創世記 2

1恁樣，天地萬物攏總造齊了。 2第七日上帝完成一切个工作，就停工歇睏。 3上帝賜福給第七日，將這日分別為聖，因為佢在這日完成一切創造个工作，就停工歇睏。 4這就係天地創造个來歷。

伊甸園

主上帝創造天地个時節， 5地還吂有草木，菜還吂生出來，因為主上帝還吂落雨在地上，也吂有人耕種； 6總係有水對地下湧出，滋潤全地。

7後來主上帝用地上个泥造人 #2:7 在希伯來文，「人」㧯「地」有共樣个字根；「人」㧯人名「亞當」也係共一隻字。，將生命个氣歕入佢个鼻孔，佢就成做有生命个人。

8主上帝在東方設立伊甸園，將佢創造个人放在該位。 9主上帝使地生出各種靚个樹木，結出好食个果子。在園中央有一頭生命樹，也有一頭能使人分別善惡个樹仔。

10有一條大河對伊甸流出，滋潤該園，對伊甸分做四條河壩。 11第一條安到比遜河，流過哈腓拉全地，在該位有金仔。 12該位个金仔盡純，該位又有高貴个香料㧯寶石。 13第二條安到基訓河，流過古實全地。 14第三條安到底格里斯河，流過亞述東部。第四條安到幼發拉底河。

15主上帝將該人放在伊甸園，喊佢去耕種、看守該園。 16主上帝吩咐該人講：「園肚各種樹頂个果子，你全部做得食， 17總係，該頭能使人分別善惡个樹仔所結个果子，你一定做毋得食；因為你食个時一定會死！」

18後來，主上帝講：「該人孤單生活毋好，𠊎愛為佢造一個登對个伴來幫助佢。」 19主上帝用泥造地上各種个走獸、㧯空中各種个飛鳥，全部帶到該人面前，看佢樣般安名。該人樣般安各種動物，該就係它个名。 20該人就㧯所有个頭牲、空中个飛鳥、野地个走獸安名；總係該人尋毋到登對个伴好幫助佢。

21主上帝俾該人當好睡。佢睡掉个時，主上帝拿出佢个一支膁𥯟骨，然後將肉合轉去。 22主上帝就用該人身上所拿出該支膁𥯟骨造一個女人，將姖帶到該人面前。 23該人講：

「這正係𠊎骨中个骨，

肉中个肉；

姖愛喊做『女人』，

因為姖係對『男人』身上拿出來个。」#2:23 在希伯來文，「女人」㧯「男人」有共樣个字根。

24因為恁樣，男人愛離開佢个爺𡟓，㧯𡜵娘結合，兩儕成做一體。

25該人㧯厥𡜵娘兩儕赤身露體，總係佢等並無看做見笑。

Iliyochaguliwa sasa

創世記 2: THV12Hdb

Kuonyesha

Shirikisha

Nakili

Je, ungependa vivutio vyako vihifadhiwe kwenye vifaa vyako vyote? Jisajili au ingia

Mistari Maarufu ya Biblia kutoka
創世記 2