Gálatas 4
4
1Mé xi̱kaha ndáxrja̱n: Ijnko chájan ti ó tsíkito̱eko ti nkehe kꞌuéchónta itꞌé la tóyóhe̱ xjan éxi ijnko chojni chꞌexón ixra̱, kixin na̱xa̱ xja̱ntsí xjan la na̱xa̱ xitjahya tsꞌe̱to̱an xjan, kjónté kuènté xjan kaín nkehe. 2Siín nkexro tꞌayakohen ti ixjan la ko ti ixra̱ kuènté xjan hasta tsjixrakájña ti ña̱o tsíkꞌe̱to̱an ti itꞌé xjan ndá tsꞌayéhé xjan kaín tíha. 3Mé xi̱kaha jeheni ti na̱xa̱ kꞌuénoehñani ti jína, la ti ncha̱kuén jínahña tꞌe̱to̱an chjasintajni kuékꞌe̱tue̱hen ti jeheni. 4Kjánchó ti ó kjuixraká ti ña̱o kjuákꞌe Díos, la ichrꞌán chꞌan ti Xje̱en chꞌan ikui kꞌuaxrjeníxin ijnko chojnichjin. La kjuínchexiteyá chꞌan kaín ti nkehe tꞌe̱to̱an ti ley kuènté Moisés. 5#Ro. 8:15-17.*Ikui chꞌan kjuenka̱yákohe̱n chꞌan ti jeheni kixin chrókjuasótexínhñani ti ley. Ndá ijie kꞌónani xje̱en Díos.
6Díos kjua̱ko̱xi̱n kixin chaxín xje̱en chꞌan ti jeheni kixin ichrꞌán chꞌan ti Ncha̱kuén Xje̱en chꞌan chóntani, la ti Ncha̱kuén chꞌan chóntani mé tꞌéya ndáchro: “Paapa.” 7Mé xi̱kaha jaha la í jehya ijnko chojni tꞌítuehen. Náhí. Jaha la ó kꞌóna xje̱en Díos. Landá kaín ti nkehe kuènté Díos mé tsꞌóna kuèntá kja̱xin kixin tinkachónkia Cristo.
Pablo kjuenduéhe sin kixin í tsjasinhña sin ijie̱
8Ósé ti na̱xa̱ kꞌuéchonhñara Díos la kꞌuékji̱nchexiteyéhéra ti díos chaxínhña. 9A̱ndá ijie la ó choxínra Díos, o̱ ícha jína chróndáchroni Díos ó chóxin ti jahara. La ¿nkexrín kixin na̱xa̱ tjinkáonra chrókjanra chrókuinkachónkira ti nkehe chóntahya kjuachaxin la ko chónkó? 10Jahara na̱xa̱ tjásinra kia tsjíkosáyehéra nkojín ña̱o, nitjó o̱ nkojín nánó. 11Imá tóxakona kixin kjá ó chónkó ti ixra̱ kjui̱tꞌa.
12Kíchóni, xrja̱noáhára kixin chrókjanra chrókóyóha̱ra ti janhan chrókuitekákonhñara ti ley éxi janhan kóyóna éxi ti jahara ti kꞌuéchoxínhña ti ley. La ninkehó nkehe jínahña kjui̱chꞌehera ti janhan. 13Ó nohara kixin ti sa̱oxín kjuákohára ti itan jína tsaáxini la kꞌuénína. 14Kꞌuétja̱hára ixra̱ kixin kꞌuénína la kjónté kꞌuéchontara kjuasàya ti janhan la kjuanoáhñarani la jína kjuájonra kjuachaxin kjuakꞌé ntiha éxi ijnko ángel kuènté Díos o̱ éxi Ìnchéni Jesucristo chrókjuíji xi̱kaha. 15¿Nkehe kóhen ti kjuachéhe̱ kꞌuéchontara? Chaxín ndáxrja̱n kixin imá jínara kixin ti chrókójína la hasta ti ikonra chrókuakitsjenkíra chrókjuájonra. 16A̱ndá ijie la, ¿á kóninkáko̱hénra ti janhan kixin kjuákohára ti nkehe chaxín ní?
17Ti chojni nduáhya tjako la imá tjinkaon sin chrókjuitꞌayahara sin. Kjánchó nduáhya ti nkehe tjenka̱yáxin sin kixin tjinkaon sin kixin chrókui̱to̱héra ti jeheni, ndá chróchréhéra ti jehe sin. 18Kjá jína chrókjuinki̱tsa sin ti jahara ti chaxín ndoá tjenka̱yáxin sin, kjánchó nkochríxín jína chrókjuíchꞌe sin jehya jehó ti ó chrókjuakꞌé ti tjejora. 19Xje̱eni, imá tjoté a̱sená kixin tóxakona nkexrín tjejora. Éxi ijnko ìñé xjan tjoté ti ó nchekokjíhi xjan, mé xi̱kaha na̱xa̱ tjétjasóte kixin tjínka̱oan kixin chaxín chrókjuénka̱yáxinra éxi tjinkaon Cristo. 20Ti chrókójína chrókjuakꞌé ntiha la a̱ntsí jína chrónixjahára, ndá ijie ikjín itjén la nonahña nkexrín tjejora.
Kjuíncheyóe̱xin Pablo ti tjan Agar la ko Sara
21Jahara ti na̱xa̱ tjinkáonra chrókjui̱nchexiteyéhéra ti ley tsíkꞌe̱to̱an Moisés, la chro̱nkara, ¿á kíenhñara nkehe ichro ti ley ní? 22#Gn. 16:15; Gn. 21:2.*Ndáchro xroon itén Díos kixin Abraham kóchónta yaá xje̱en, ijnko la xje̱en ti tjan chꞌexón ixra̱ ndá ti íjnko mé xje̱en ichjién chꞌan. 23Ti xje̱en ti tjan chꞌexón ixra̱ la kokjíhi éxi tjenka̱yáxin chojni ó. A̱ndá xje̱en ti tjan chaxín ichjién Abraham mé kokjíhi xjan kixin xiteyá ti nkehe tsíndáchro Díos. 24Tíhi mé tꞌaxrjexín kixin ti yaá chojnichjin mé tóyóhe̱ ti yaá nkehe tsíndáchro Díos. Ti tjan Agar mé yóhe̱ ti ley xránjonxín ti ijna̱ Sinaí la ti chojni titekaon tíha mé tokjíexíen sin sichꞌexón sin ixra̱. 25Mé xi̱kaha ti tjan Agar mé yóhe̱ ti ijna̱ Sinaí tjen Arabia la tíha tóyóhe̱ ti chjasin Jerusalén ntihi kixin ti chjasin la ko ti sin tjejó ntiha la ko kaín xje̱en sin mé ti ley tꞌe̱tue̱hen ti jehe sin. 26A̱ndá tjan Sara la yóhe̱ ti chjasin Jerusalén itjen nkaya nka̱jní mé tꞌe̱tue̱nhña ti ley. A̱ndá tíha mé ti chjasin kuènténi jeheni. 27#Is. 54:1.*Ndáchro xroon itén Díos:
Chrokocháha jaha chojnichjin xrokjuahya tsochonta ixjan,
chrókꞌoyakuan kixin chonta kjuachéhe̱ jaha kꞌuíkonhña ninkehó kjuatjoté kixin kjui̱nchekokjíehya xjan.
A̱ndá ti tjan tsíkítsinkehe la a̱ntsí tsochónta nchónhña xjan ke ti tjan chónta xìi.
28Kíchóni, jeheni mé éxi Isaac, ti ixjan tsíndáchro Díos tsochónta Abraham, kixin kaíni la xje̱en Díos kixin xi̱kaha tsíndáchro chꞌan. 29#Gn. 21:9.*Mé xi̱kaha ósé ti xjan sa̱o tsíkokjíhi, xje̱en Agar, la kónínkakohen Isaac, ti xjan kokjíhi kjuachaxíen Ncha̱kuén Díos. Mé xi̱kaha sítóhen ijie. 30#Gn. 21:10.*Kjánchó ndáchro ti xroon itén Díos éxi Díos tsíndáche chꞌin Abraham: “Takítsjexián ntihi ti tjan chꞌexón ixra̱ sátsji tjan la ko ti xje̱en tjan, kixin ti xje̱en tjan la tsꞌáyèhya ti nkehe tsi̱to̱nhe̱n ti xje̱en ti tjan chónta kjuachaxin.” 31Mé xi̱kaha kíchóni, jeheni la jehya xje̱en ti tjan chꞌexón ixra̱. Náhí. Jeheni mé xje̱en ti tjan chónta kjuachaxin.
Iliyochaguliwa sasa
Gálatas 4: poeNTplus
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2016, Wycliffe Bible Translators, Inc. All rights reserved.