Efesios 5
5
Chrokꞌuejora éxi ijnko xrohi tꞌinkaséñaxín
1Jahara mé ó kꞌónara xje̱en Díos la tjua̱hára Díos. Méxra̱ chrókjuáko̱xinra éxi kjua̱ko̱xi̱n chꞌan. 2#Ex. 29:18; Sal. 40:6.*Chrotjue̱héra kichuara éxi Cristo tjue̱he ti jeheni la ko kjuenka̱yákohe̱n chꞌan ti iji̱éni, éxi ijnko kolélo kꞌóñá sin la kjuínchechján sin, la kꞌuáyéhe̱ Díos ti xraxé náxrjón.
3A̱ndá jahara ó tinkachónkira Díos la í chji̱ñéhña tsonixjara nkojín nkehe nduáhya kuènté chojnichjin kixin kaín tíha la ijie̱, la ko ninkehó nkehe náxrjónhña chrókjuénka̱yáxinra la chrókjuénka̱yáxinhñara kixin tsochontara itsjé nkehe tjete. 4La ko chji̱ñéhña chrónixjara ijnko nkehe kjuatosuéhe̱, la ko chrókjóhyara kjuachjanta la ko chrókóno̱nto̱nhñara kixin kaín tíha mé nduáhya. Ícha jína chrókꞌuitjára chróchje̱héra Díos kjuasáya. 5A̱ndá jahara la ó nohara kixin ti nkexro chrókjuasinko ijie̱ ijnko chojnichjin jehya ichjién, ti nkexro ichꞌe nkehe jínahña, ti nkexro tjakꞌe a̱sén tsochónta itsjé nkehe (tíha mé yóhe̱ éxi chrókuinkáchónki sin ti nkehe tsíkjano̱ña), la ti nkexro a la xrokjuahya tsꞌixehen ti tꞌe̱to̱axín Cristo la ko Díos. 6Méxra̱ jahara chrókui̱to̱éhyara chrókjuitꞌayahara nkojín nkexro nixja nkehe ninkehó sínkíhya, kixin ti nkehe jínahña mé tsi̱xi̱n ti kjuanínkaon kuènté Díos la sinchekjasóte chꞌan kaín ti sin titekakonhña ti jehe chꞌan. 7Méxra̱ í tꞌitonhñara ti chojni xi̱kaha tjenka̱yáxin.
8Jahara la ósé la kuékꞌájira ti sítie. A̱ndá ijie la tjejora ti tꞌinkaséña kixin tinkachónkira Ìnchéni. Méxra̱ chrókjuáko̱xinra kixin ó tjejora ti itjen ti xrohi tꞌinkaséña kuènté Díos. 9Kixin ti xrohi tꞌinkaséñaxín la mé tjinki̱tsa kixin tsja̱ko̱xi̱ni jína la ko tsonixjani ti nkehe chaxín la ko ndoá tsꞌejóni. 10Méxra̱ chrókóxakohanra chrókjuéyára ti nkehe tóxríhi̱n Ìnchéni. 11Chrokuankíehyara ti sin tjenka̱yáxin nkehe nduáhya, kixin jehe sin mé tjejó sin ti sítie. Ticháxi̱n chróndáchera sin kixin ti nkehe tjenka̱yáxin sin la nduáhya. 12Kixin kjónté chrókjoni kuènté ti nkehe ómó ichꞌe sin la ijnko kjuatosuéhe̱ tíha. 13Méxra̱ kaín nkehe la tso̱noxín kixin ti xrohi la sinchenoxín kaín ti nkehe siín, á nkehe jína o̱ náhí. 14Mé xi̱kaha ndáchro sin:
Xráxèxian jaha tjéchrian;
tꞌaxrjékjanxian ti siín ti sin tsíkꞌen,
kixin Cristo mé tjetjoka ti xrohi tsꞌinkaséñaxián.
15Méxra̱ ijnko nkehe jína chrókjuénka̱yáxinra; jehya éxi ti sin lo̱nti̱ chóntahya kjuaxrexinkaon jína, náhí. Chrokꞌuejora éxi ijnko chojni nohe, chónta kjuaxrexinkaon jína. 16#Col. 4:5.*Chrokóxakohanra chrókjui̱chꞌera ixra̱ éxi tjinkaon Ìnchéni kixin ijie la imá siín nkehe jínahña. 17Méxra̱ chrókꞌónahñara ijnko chojni lo̱nti̱. Chrokóxakohanra chrókiénxinra ti nkehe tóxríhi̱n Ìnchéni. 18Chrokókoanhñara kixin tíha la tsꞌitjáñaxínra nkochríxín. Ícha jína chrókjuájonra kjuachaxin kixin Ncha̱kuén Díos chrókꞌue̱tue̱hen ti jahara. 19#Col. 3:16, 17.*Chrotsjera salmo la ko himno, la ko kaín a̱sánra chrókjuíkosáyehéra Ìnchéni. 20Nkochríxín chróchje̱héra kjuasáya Itꞌéni Díos kixin kaín ti nkehe kjuajon chꞌan, chróchje̱éxinra kjuasáya ti ihni̱é Ìnchéni Jesucristo.
Jína chrókꞌuejóni kixin tinkáchónkini Ìnchéni
21Chrokjuinchexiteyéhe kichuara kixin ó tinkachónkira Ìnchéni. 22#Col. 3:18; 1Pe. 3:1.*Méxra̱ ti chojnichjin ó tsíkóte̱he la chrókjuinchexiteyéhe ti xìi éxi nchexiteyéhe sin Ìnchéni. 23Kixin ti chojnindoa mé chónta kjuachaxin tsꞌe̱tue̱hen ti ichjién éxi Cristo mé ikja ti ni̱nko. Mé xi̱kaha Cristo mé kjuínchekaá ti ni̱nko, kixin ti ni̱nko la cuerpo kuènté chꞌan. 24Méxra̱ éxi ti ni̱nko nchexiteyéhe Cristo, la xi̱kaha ti chojnichjin tsíkóte̱he la chrókjuinchexiteyéhe ti xìi.
25 #
Col. 3:19; 1Pe. 3:7. *La ko kja̱xin ti chojnindoa chrótjue̱hé ti ichjién éxi Cristo tjue̱he ti ni̱nko la ko kꞌuenyákohe̱n. 26Ikꞌuén Cristo kixin sinchetjóá chꞌan ti sin ni̱nko, kjuínchetjuáxin chꞌan ti ìnta̱ kuikitexín sin kixin kuitekaon sin ti itén chꞌan. 27Mé xi̱kaha jína tsꞌáyéhe̱ Cristo ti jeheni kixin jeheni mé ijnko ni̱nko náxrjón chóntahya ninkehó kji̱ta̱, ijnko ni̱nko tjóá la ko ndoá. 28Mé xi̱kaha ti chojnindoa tso̱tjue̱he ti ichjién éxi tju̱éxin a̱sén. Ti nkexro chaxín tjue̱he ti ichjién mé kja̱xin tjue̱he a̱sén. 29Méxra̱ kjá nijnko chojni chrókónínkakohen ti cuerpo kuènté. Náhí. Kjá chrókjonie sin jína la chrókꞌuayakohen sin ti cuerpo kuènté sin la xi̱kaha Cristo tꞌayakohen ti ni̱nko. 30Kixin ti cuerpo kuènté Cristo mé jeheni, kixin jeheni mé kꞌóna ti cuerpo kuènté chꞌan la ko ti huéso̱e chꞌan. 31#Gn. 2:24.*Mé xi̱kaha ndáchro: “Ti chojnindoa la tsíto̱he ti itꞌé la ko ìñé la tso̱nkojié ti ichjién la yóí sin mé tsꞌóna sin éxi nkoko̱a chojni.” 32Tíhi la ijnko nkehe imá ijié la ko imá ixra̱ la tsjachahya chojni tsienxín. Méxra̱ janhan xrja̱nká kuènté Cristo la ko ti ni̱nkué chꞌan. 33Méxra̱ nkojnko ti chojnindoa la ticháxi̱n tso̱tjue̱he ti ichjién éxi tju̱éxin a̱sén, la ko kja̱xin ti chojnichjin chróchóntehe kjuasàya ti xìi.
Iliyochaguliwa sasa
Efesios 5: poeNTplus
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2016, Wycliffe Bible Translators, Inc. All rights reserved.