Hechos 22
22
1―Jahara kíchóni la ko jahara itꞌé xjan, tihínra ti nkehe tsondáxrja̱n kixin janhan chontahya ijie̱ ―ichro chꞌan.
2Ndá ti ó kuíhin sin kixin níxja chꞌin Pablo ngiva hebreo, la kꞌuejó sin kuíhin sin jína. Ndá chꞌin Pablo, ndáchro:
3 #
Hch. 5:34-39. *―Janhan mé ijnko chojni judío kokjínaxian Tarso nonte Cilicia, kjánchó kꞌuankíxia̱n ntihi Jerusalén la kjui̱ntakuáxian ti nkehe kjuako ti maestro Gamaliel la titeka̱oan ti ley tinkáchónki ti sin kꞌuaxrjeníxini ósé. La nkochríxín tjínka̱oan si̱tꞌaha̱ ixra̱ Díos kaín a̱sená, éxi tjejochꞌera jahara ijie. 4#Hch. 8:3; 26:9-11.*Senó la kꞌuéninka̱koha̱n ti sin tinkáchónki Ìnchéni la chrókꞌoñá sin, kjui̱ntantetoa chojnindoa la ko chojnichjin la sákjuiki̱a̱n sin kꞌuejóchjina sin. 5Ti sin ncha̱tꞌá tꞌe̱to̱an la ko kaín ti sin táda tꞌayakohen ni̱nko la nohe sin jína tíha kixin jehe sin kjuajon sin ijnko xroon tsꞌáyéhe̱ ti sin kíchóni judío tjejó Damasco. Ndá sákjuikjeyáni ti sin tinkáchónki Ìnchéni kixin chrótsé sin la chrókjui̱ka̱oni sin Jerusalén kixin chrókjuasóte sin.
Nkexrí kuinkáchónki Pablo Ìnchéni
(Hch. 9:1-19; 26:12-18)
6’A̱ndá ti ó kjuasán chjina Damasco éxi chonkíxin la xrína̱hña ikui ijnko xrohi, kui̱xi̱n nka̱jní la nkonda̱tjen#22:6 nkonda̱tjen alrededor ti itjén kꞌuínkaséña. 7Ndá kꞌuitsinka nonte la kui̱ha̱n itén ijnko nkexro ndáchro: “Saulo, Saulo, ¿nkekuènté xrítjéyá ti janhan?” 8Ndá kjuánchánkíha̱: “¿Xá nkexro ti jaha?” Ndá ti nkexro a la ndáchro: “Janhan mé Jesús tsíkji̱xi̱n Nazaret, ti nkexro ninkákohén xrítjéyá.” 9La ti sin sákjui̱ki̱a̱n mé kꞌuíkon sin ti xrohi la chrákon sin, kjánchó kienhña sin itén ti nkexro níxja. 10Ndá kjuánchánkíha̱ ti nkexro a: “¿Xá nkehe tjinkaoan si̱tꞌa?” Ndá Ìnchéni ndáchro: “Tꞌínkatjen sátjia Damasco ndá ntiha tsochronka sin kaín ti nkehe si̱chꞌe.” 11Ndá ti xrohi kꞌuíkua̱n mé kjuínchexenka ti ikua̱n, ndá í xitjahya kꞌuíkua̱n. Méxra̱ ti sin xríki̱a̱n la kuinkátséhe sin ti janhan sákjuíko sin Damasco.
12’Ndá ntiha kjuákꞌe ijnko nkexro itꞌin Ananías, ijnko chojni jína kjuínchexiteyá ti ley tsíkꞌe̱to̱an Moisés la kaín ti sin judío tjejó Damasco mé tjikosáyehe sin. 13Chꞌin Ananías mé kuitsjehe ti janhan la ndáchro chꞌan: “Kíchóni Saulo, tꞌayéhé kjuachaxin tsꞌikuan ínaá.” Ndá tuénxín jína kꞌuíkua̱n, la kꞌuíkua̱n ti jehe chꞌan. 14Ndá chꞌin Ananías, ndáchro: “Ti Díos kuinkáchónki ti sin kꞌuaxrjeníxini mé kjueyá ti jaha kixin tso̱noha ti nkehe tjinkaon chꞌan la ko tsꞌikuan ti nkexro jína la tsinhín ti itan tsꞌaxrjexín irꞌua chꞌan. 15Kixin jaha tso̱chro̱nka kaín ti nkehe kꞌuikuan la ko kuihín kixin tsihin kaín chojni chjasintajni. 16A̱ndá ijie la í chuénhña. Tꞌínkatjen la tikitiaxián ihni̱é Ìnchéni kixin tsꞌíjmáxin ti iji̱á”, ichro chꞌin Ananías.
Pablo chrónka kixin Díos ichrꞌán ti tjejó ti sin jehya judío
17’A̱ndá ti ó ikjan janhan Jerusalén ndá sákjuia ni̱nko kixin tsotjahá Díos kjuasáya, la ncha̱kuén Díos kꞌuíko̱xian 18Ìnchéni ndáchro: “Tjoka tꞌaxrjéxian Jerusalén kixin tsitekakonhña sin ti nkehe kuénta̱na tsjàkua.” 19Ndá ndátjan Díos: “Ìnchéni, jehe sin la ó nohe sin kixin senó la janhan kꞌuájia kaín ni̱nko la kꞌuétse̱ ti sin tinkáchónki ti jaha la sákjuiki̱a̱n sin ndo̱echjiso kjuasóte sin. 20#Hch. 7:58.*La ti ó kꞌóñá sin Esteban, ti nkexro kꞌuénixja ti itan kuèntá, la janhan kja̱xin tjéntaxián ntiha, la ndáxrja̱n kixin ncho̱xon itsꞌen chꞌan la kꞌuayakoha̱n ti iké sin.” 21Ndá Ìnchéni, ndáchro: “Tjoka sátjixian ntihi kixin janhan tsochrꞌan sátsjia chjasin ikjín tsjákohé ti chojni jehya judío.”
Ti comandante sákjuíko chꞌin Pablo kixin tsjasóte
22Ndá ti sin tsíkónkotsé mé kuíhin sin kaín tíha, ndá kjuankíxin kꞌóyako sin ndáchro sin:
―¡Itsꞌen ti nkexro i, í tsjakꞌechónhña chꞌan!
23Ndá na̱xa̱ tꞌixratánhña sin tꞌóyako sin la tótsjénka sin iké sin la ko itꞌé sin inche noi. 24Ndá ti comandante kꞌue̱tue̱hen ti sin soldado kixin sátsjiko sin ti chꞌin Pablo nkaxehen cuartel. La kꞌue̱to̱an chꞌan kixin tsꞌekoxín chꞌan chikote kixin tsochronka chꞌan nkekuènté kixin imá nínkaon sin, sítjité sin. 25Ndá ti ó kjuixin kjuínchenteto sin chꞌan kixin tsjate sin, ndá chꞌin Pablo kjuanchankíhi ijnko ti capitán itjen ntiha, ndáchro:
―¿Á chontara kjuachaxin tsjatera ijnko chojni romano, kjónté na̱xa̱ kjuéyáhyara nkehe ijie̱ chónta chꞌan ní?
26Ndá ti ó kuíhin ti capitán tíha, ndá sákjuichenka chꞌan ti comandante, ndáchro chꞌan:
―¿Nkehe si̱chꞌe?, kixin ti nkexro i la ijnko chojni romano ―ichro chꞌan.
27Ndá ti comandante mé kjuichréhe̱ chꞌin Pablo la kjuanchankí, ndáchro:
―¿Á chaxín ijnko chojni romano jaha ní?
Ndá chꞌin Pablo ndáchro:
―Jeén.
28Ndá ti comandante ndáchro:
―Janhan la itsjé chichaon kjuènka̱ ndá kꞌóna chojni romano.
A̱ndá chꞌin Pablo ndáchro:
―Janhan la chojni romano ndesi kokjína.
29Ndá ti sin soldado chrókjuate chꞌin Pablo kuíhin sin kixin jehe chꞌan la ijnko chojni romano la kuíto̱he sin chꞌan. La kja̱xin ti comandante ti ó kónohe kixin chꞌin Pablo mé ijnko chojni romano la imá chrákon chꞌan kixin kjuínchentetoxín chꞌan chꞌin Pablo ijnko cadena.
Pablo nixje̱he̱ ti sin tꞌe̱to̱an kuènté sin judío
30A̱ndá ti ña̱o chrꞌéxi̱n la ti comandante tjinkaon tso̱nohe nke ijie̱ tꞌeka sin ti chꞌin Pablo, ndá kjuasinta̱nka̱ chꞌan ti cadena tjechróntetoxín ti itja chꞌan, ndá kꞌue̱to̱an chꞌan kixin tso̱nkotsé kaín ti ncha̱tꞌá tꞌe̱to̱an la ko ti sin tꞌe̱to̱an kuènté sin judío, a̱ndá kuakitsje chꞌan ti chꞌin Pablo la kjuákꞌe chꞌan nko̱siñe ti tjejó ti sin tꞌe̱to̱an.
Iliyochaguliwa sasa
Hechos 22: poeNTplus
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2016, Wycliffe Bible Translators, Inc. All rights reserved.
