1 Timoteo 3
3
Jína chrókꞌuejó ti sin tꞌe̱tue̱hen ti ni̱nko
1Tíhi mé ijnko nkehe chaxín tsondáxrja̱n. Ti nkexro tjinkaon sichꞌe ixra̱ kuènté ni̱nko mé ijnko ixra̱ jína tjinkaon sin. 2#Tit. 1:6-9.*Méxra̱ ti nkexro tꞌe̱to̱an la ndoá chrókꞌuejó sin kixin kohya nkexro chrókꞌueka ijie̱ ti jehe sin, chróchónta sin nkoko̱a ichjién sin, jína chrókꞌuejó sin, la jína chrókjuénka̱yáxin sin, chróchónta sin kjuasáye sin, la kja̱xin jína chrónixje̱he̱ sin ti nkexro tjiji ndo̱e sin la ko chrókónohe sin tsjáko sin. 3Chrokókoanhña sin, chrókjueyáhya sin kjuanínkaon la ko tsjenka̱yáxinhña sin sichꞌia sin kixin tsjacha sin itsjé chichaon. Ícha jína chrókjua̱ko̱xi̱n sin jína, la kjuaxróxin chrókꞌuejó sin la ko chrókóxakuenhña sin chróchónta sin itsjé chichaon. 4Kja̱xin chrókónohe sin chrókꞌue̱to̱an sin ndo̱e sin, la chrókjuenduéhe sin ti xje̱en sin kixin chrókuitekaon xjan la ko chróchóntehe xjan kjuasáye xjan kaín chojni. 5A̱ndá ti nkexro tjachahya tꞌe̱to̱an ti ndo̱e la, ¿nkexrín chrókjuacha chrókꞌue̱to̱an ti ni̱nko kuènté Díos? 6La ko kja̱xin ti nkexro tsjako la jehya ijnko nkexro ni̱xin kuenté ni̱nko. La náhí, kixin ti xi̱kaha la imá sinchenke sin ndá tsjasin sin ijie̱ éxi ti jínahña kjuasin ijie̱ ósé. 7La ko ticháxi̱n chróchónta sin kjuasáye sin kixin ti sin na̱xa̱ tinkáchónkihya Ìnchéni la tsochóntehe kjuasàya ti jehe sin. A̱ndá ti náhí, la tsjonta chojni ti jehe sin, la tsjacha ti Jínahña tsjachròe ti jehe sin, ndá tsjasin sin ijie̱.
Nkexrín chrókꞌuejó ti sin diácono
8Kja̱xin ti sin diácono, tjinki̱tsa ti ixra̱ kuènté ni̱nko, la ticháxi̱n chróchónta sin kjuasáye sin, la ti nkehe tsondáchro sin la ticháxi̱n tsoxiteyá, kja̱xin chrókókoanhña sin la ko chrókjuichꞌiahya sin kixin chrókjuacha sin itsjé chichaon. 9Mé xi̱kaha ticháxi̱n chrókꞌuitjáñehña sin ti nkehe jína kuíhin sin, ti nkehe titekaoni kaíni, la ko chrókjuichꞌehya sin nkehe sincheníhi a̱sén sin. 10A̱ndá ti chrókꞌuáyéhe̱ sin ti ixra̱ diácono la sa̱o chrókjua̱ko̱xi̱n sin kixin jína ichꞌe sin ti ixra̱, ndá jína tsꞌóna sin diácono kuènté ni̱nko. 11La ko kja̱xin ti ichjién ti sin diácono la ticháxi̱n chróchónta sin kjuasáye sin, la chrókuinkáchónkihya sin kjuachꞌia, la jína chrókꞌuejó sin la ko chrókjuinchexiteyá sin kaín ti nkehe jína. 12La ti sin diácono la ójnko ichjién sin chróchónta sin, la chrókjuacha sin chrókꞌue̱tue̱hen sin ti xje̱en sin la ko ti ndo̱e sin. 13Kixin ti sin sichꞌe ijnko ixra̱ jína la a̱ntsí tsꞌáyéhe̱ sin kjuasàya la ko kjuaxróxin tsꞌejó sin kixin tinkáchónki sin Ìnchéni Jesucristo.
Díos mé kjuínchenoheni ti nkehe kꞌuénoehñani
14Tjínka̱oan chrókjuasántsjahára tjoka, kjánchó sa̱o tjínka̱oan tsokjian ti xroon i 15kixin ti na̱xa̱ si̱ntaxrjen ntihi, la kjónté tso̱nohara nkexrín chrókꞌuejó ti sin kuenté Díos, kixin jehe sin mé ti ni̱nko tjechón kuenté Díos. La tꞌayakonheni ti itan chaxín kuènté Díos. 16Ninkexró chróndáchrohya kixin chaxínhña ti nkehe tinkáchónkini, kixin tíhi mé ijnko nkehe tjetoan la ninkexró kꞌuénoehña:
Kixin Jesucristo mé ikui kꞌóna chojni;
la Ncha̱kuén Díos kjua̱ko̱xi̱n kixin jína chꞌan.
La ti sin ángel mé kꞌuíkon sin chꞌan
la kuenté chjasintajni kuíhin sin ti nkehe chrónka chꞌan,
la itsjé chojni kuitekaon sin.
Ndá sákjui̱ chꞌan nkaya nka̱jní la kꞌuáyéhe̱ chꞌan kjuachaxin.
Iliyochaguliwa sasa
1 Timoteo 3: poeNTplus
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2016, Wycliffe Bible Translators, Inc. All rights reserved.