1 Corintios 10
10
Ti nkehe tꞌe̱to̱an Pablo kuènté ti nkehe tsíkjano̱ña
1 #
Ex. 13:21, 22;
Ex. 14:22-29. *Kíchóni, tjínka̱konhña kixin chrókꞌuitjáñahanra kixin ti sin kꞌuaxrjeníxini, la kaín sin kꞌuejó sin chrínkí ti itji̱, la kaín sin kꞌuatsínka sin ti Nda̱ñao Kjátse. 2Mé xi̱kaha kaín ti sin chréhe̱ chꞌin Moisés la éxi kuikite sin xi̱kaha kixin nkoko̱a kꞌuejó sin chrínkí ti itji̱ la ko nkoko̱a kꞌuatsínka sin ti nda̱ñao. 3#Ex. 16:35.*La ko kaín sin nkoko̱a kjónie sin ti nkehe kjuajon Díos, 4#Ex. 17:6; Nm. 20:11.*la ko kaín sin ikꞌui sin ti ìnta̱ kjuajon Díos kꞌuaxrjexín ti itjo̱ ti kꞌuáji sin nte̱je̱, a̱ndá ti itjo̱ a, la mé Cristo tíha. 5#Nm. 14:29, 30.*Kjánchó itsjé sin la kuítekakonhña sin Díos; méxra̱ kónínkakohen chꞌan sin la nte̱je̱ ó kꞌuénxin sin.
6 #
Nm. 11:4. *Kaín tíha kóhen kixin chrókónoheni kixin xi̱kahña chróndáchro a̱séni chrókuitekakoheni ti nkehe jínahña éxi kjuénka̱yáxin sin. 7#Ex. 32:6.*Méxra̱ chrókuinkachónkihyara ti nkehe tsíkjano̱ña éxi kjuíchꞌe iso ti sin a, éxi ndáchro ti xroon itén Díos: “Kaín sin kꞌuejótja̱xi̱n sin kjónie sin la ko ikꞌui sin, ndá kjuixin la kꞌuínkatjen sin, la kjuasin sin kié ti nkehe tsíkjano̱ña la ité sin.” 8#Nm. 25:1-18.*Méxra̱ chrókjuásinkoáhyara ijie̱ íjnko chojnichjin jehya ichjiánra éxi kjuíchꞌe iso sin la nkoko̱a ña̱o ikꞌuén veintitrés mil sin. 9#Nm. 21:5, 6.*Kja̱xin chrókjuasinhñani ijie̱ éxi kjuíchꞌe sin ndá kónínkaon Ìnchéni la ikꞌuén sin kixin kjóniehe konche ti jehe sin, 10#Nm. 16:41-49.*la ko chrókjontahyani Díos éxi kjuíchꞌe ti sin Israelita kuítekakonhña ndá ti ángel kuènté kjuachꞌén la ikui ndá ikꞌuén itsjé sin.
11Kaín tíha kóhen kixin chrókónoheni la kꞌóna xroon chronka xi̱kaha kixin nchexraxinkaon ti jeheni tjejóni ijie kixin í séhya tsjeje̱ chjasintajni. 12Méxra̱ ti nkexro ndáchro kixin chaxín jína nchexiteyá la chrókóxakohen kixin chrókꞌuitsinkahya. 13Jahara kꞌuatsínkaxínhñara ninkehó nkehe chrókjuachahya chojni chrókꞌuatsínka. Méxra̱ chróxraxinkáonra Díos kixin jehe chꞌan chrókuíto̱ehya chꞌan ti jahara kixin chrókꞌuatsínkara ijnko nkehe imá ixra̱. Náhí. Ti itsi ichrén nkehe tso̱hanra la Díos tsjinki̱tsa tsjachara tsꞌatsínkara.
14Méxra̱ kíchóni, chrókui̱to̱héra chrókjuíkosáyéhyara ti nkehe tsíkjano̱ña. 15Nixjahára éxi chojni ó tienxín jína. Méxra̱ jahara tjénka̱yáxinra á jína ti nkehe ndáxrja̱n o̱ náhí. 16#Mt. 26:26-28; Mr. 14:22-24; Lc. 22:19, 20.*Ti ó chjéheni Díos kjuasáya ti ó itꞌini ti nkehe xraxinkakonxíni Cristo, la kaíni xraxinkakonxíni ti ijni̱é Cristo. La ko ti ó ìñéni ti nio̱tja̱ la xraxinkakonxíni ti cuerpo kuènté chꞌan kjuajon chꞌan. 17Kjónté itsjéni la kaíni nkoko̱a nio̱tja̱ inieni mé xi̱kaha kꞌónani nkoko̱a cuerpo kuènté Cristo.
18 #
Lv. 7:6. *Tsjehéra ti sin Israel, ti sin inie ti iko kjuajon sin tsíkꞌayéhe̱ Díos la xi̱kaha nkoko̱a tjejó sin inie sin. 19Ndáxrja̱nhña kixin ti nkehe tsíkjano̱ña la chónta kjuachaxin, la ko ndáxrja̱nhña kixin ti into tsíchroxi̱hi̱ sin ti nkehe tsíkjano̱ña la chónta a̱ntsí kjuachaxin ke ti iso into. Náhí. 20#Dt. 32:17.*Ndáxrja̱n kixin ti nkehe tjajon ti sin chónhña Díos la tꞌáyéhe̱ ti jínahña, jehya Díos tꞌáyéhe̱. A̱ndá janhan la tjínka̱konhña kixin xi̱kaha chrókjui̱chꞌera, chróxraxinkáonra ti jínahña. 21Xrokjuahya itsꞌira ti nkehe xraxinkakonxíni ijni̱é Cristo la ko kja̱xin itsꞌira ti nkehe xraxinkakonxín sin ti jínahña. Xrokjuahya sintera ti nio̱tja̱ xraxinkakonxíni ti cuerpo kuènté Cristo la ko kja̱xin sintera ti nkehe xraxinkakonxín sin ti jínahña. 22#Dt. 32:21.*O̱, ¿á tjinkáonra chrókjui̱nchekónínkáonra Ìnchéni ní? ¿Á a̱ntsí chontara kjuachaxin ke jehe chꞌan ní?
Ti kjuachaxin chónta ti sin tinkáchónki Cristo
23 #
1Co. 6:12. *Isora ndáchrora kixin jína chrókjui̱chꞌera kaín ti nkehe ndáchro a̱sánra, kjánchó kaínhña nkehe jína. Siín kjuachaxin kaín nkehe chrókjuíchꞌeni, kjánchó kaínhña tjinki̱tsa kixin chrókónoheni ti nkehe kuènté Díos. 24Chrokjuéyáhyara ijnko nkehe chrókꞌuejoxi̱nra jína. Náhí. Ícha jína chrókjuéyára ti nkehe chrókꞌuejóxin jína iso sin.
25Intera kaín ti into sítóxin ndasin la tjóhya a̱sánra nketí tsíki̱xi̱n 26#Sal. 24:1.*kixin kuenté chjasintajni la ko kaín ti nkehe siín la kuènté Ìnchéni.
27Ti nkojín nkexro tinkáchónkihya Díos chrókꞌueya kixin chrókjontekoára, a̱ndá ti tjinkáonra itsjira, la itjira la intera kaín ti nkehe tsjajon sin la tjóhya a̱sánra á jína chrókjontera o̱ náhí. 28A̱ndá ti nkojín sin tsondáchro kixin ti into la tsíchróxihi sin ti nkehe tsíkjano̱ña, ndá ti xi̱kaha la ntehyara, kixin nohara kixin ó chrónka sin la chrókjuénka̱yáxinhña sin kixin chaxínhña tinkachónkira Díos. 29Ndáxrja̱n tíhi kixin tjínka̱konhña kixin nduáhya chrókjuénka̱yáxin íjnko chojni, jehya kixin ndáxrja̱n kixin nduáhya chrókjuénka̱yáxinra.
Janhan la tjinka̱konhña kixin chróchontahya kjuachaxin chrókjui̱tꞌa nkojín nkehe, kixin iso chojni la nduáhya tjenka̱yáxin sin. 30Ti tja̱ha̱ Díos kjuasáya kixin ti nkehe inié, ¿la nkekuènté chrókꞌuándaxín chojni kixin kjonié tíha? 31Méxra̱ ti chrókjontera kaín nkehe la o̱ chrókꞌuira la o̱ chrókjui̱chꞌera ixra̱ la chrókjuáko̱xinra kixin tjikosayehéra Díos. 32Chꞌehyara ninkehó nkehe chrókjuichròexín íso chojni, kjónté sin judío o̱ jehya sin judío o̱ ti sin ni̱nko. 33Janhan la tjínka̱oan kixin kaín ixra̱ itꞌa̱ la chrókóxríhi̱n kaín chojni, la jehya tjínka̱oan kixin janhuán chrókjuakꞌexián jína. Náhí. Tjínka̱oan kixin chrókꞌuejóxin jína íso chojni kixin kaín sin chrókuaá sin.
Iliyochaguliwa sasa
1 Corintios 10: poeNTplus
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2016, Wycliffe Bible Translators, Inc. All rights reserved.