Tomong Betom Yɛsu 4
4
Bitrus na Yohana e nuyêl bemakûk badu
1Jeng de Bitrus na Yohana yɛn a rɔ̌ ha na bemat, behak e ji bepiris, na gbɔng o wo bemât gyeng Gbɔng Duk Re Fongol, tanga BeSaduki behak ba wɔ̀ sɛ̀ ɛn e hwomo. 2Yɛn a wok shom, yaga betom Yɛsu mo ba sé basa a bemat wɔgɔ, Yɛsu a ga sene yi e reku, ko yaga ano, mwa bemat ba rɔda ba sene yi e reku arɔng. 3Yɛn a vo ɛn, ko yɛn a ka tɛ̀ ɛn e lɔ̂ ngyang sɛ̌ tuk de he kyè vey, yaga a sé nahywegelek. 4Ko pyak e ji vemo de ba wok pyɛ de yɛn a ha mo yɛn a sey tsak o na Yɛsu. Ko nepyak bemat-raa na gwɛ̌ hɛn vɔk e gu batungun (5,000).
5Tuk het, bemât nuyêl BeYuda, na bemakuk, tanga bemât basâ Badu ba tula hɛn e Yɛrusalɛm. 6Yɛn a man na Hanas, yɛ darwêy bepiris, na Kayafas, na Yohana, na Aleksanda, tanga bwang bemât lɔ darwêy bepiris o. 7Yɛn a tɛ̀ be vey a yɛn na Bitrus na Yohana, na be tumal e nuyel mɛn, ko ba hwo rangal hɛn, ba ye, “E wà de a nɔng in reto na yin a tɛ̀ mwat o tyang arɛt? E rezâ wà de yin a ra mɛ̀ fwom arɛt?”
8Ko Bitrus, de Gabik Jɛrɛ ha sɛ̀ reto e ra yɛ, a yang ɛn, “À yin bemât nuyel na bemakuk! 9Ka sede yin a sé ra a wot nerangsal e ra fwom rwat de wot a ra a mwat nà bol o, na yin a to rangal hot begwong de ba tɛ̀ ɛ tyang, 10ko tik na yin mwa, tanga mwa BeIsrayɛl, yin a tɔk: A sé e retô rezâ Yɛsu Kristi wo Nazarɛt de ra tɛ̀ mwat womo a sé tumal e nuyel min tyang gyat. E yin de yin á kak Yɛsu mo e ra cɔ́gɔt, ko Dagwi á to sene hɛ yi e reku. 11A sé e ra Yɛsu de bà jɛk e ji Bwok-basa Dagwi wɔgɔ,
“ ‘Gwofwa de yin bemât lɔ̂k duk yin á kana kyɛ́ in gwɛ wɔgɔ, gwa vɔk fwom wɛt,
e gwɛ de gwa tɛ́ ɛ gbɔng gwofwa râ fwom.’
12E yɛ nju mɛ zɔng de e tɔk sey bemat. Dagwi a nɔ̂ng bemat reza mɛ, ko vit a reza rehak e ji jêy mwa de re tɔk sey neken mot.”
13Jeng de bemakûk badu mo ba di BeBitrus o ba ha na yey ting ano, yɛn a langat hɛn, yaga yɛn a to di, betom o ba vɔk tɔ́k wɛt, ko ba sé tyɛng na bwang bemat zɔng. Yɛn a tɔk, BeBitrus o bá kana sè bemat raà Yɛsu arɔng. 14Ko sede remo de yɛn a di mwat de ba ga tɛ̀ ɛ tyang o a sé tumal bagat na BeBitrus, yɛn a bidɛ pyɛ de yɛn ê ha. 15Yaga ano, yɛn a yang ɛn, be nusu yi e duk tula mo, ko yɛn pyɛ mɛn ba vo redu e ra pyɛ de yɛn ê ra. 16Yɛn a rangâl bemɛn, ba ye, “E sɛ́ de wot ê ra na bemat vemo arɛt? Kawɛ mwat de a sé e ngamo e Yɛrusalɛm a tɔk, bemat o ba ga ra gbɔng pyɛ bes, ko wot ê tɔk tono há hane wɛt. 17Ko yaga na wot a dul há mo nà gwɛ̌ shara hɛ e ji bemat, tik na wot a tusa hɛn, yaga na yɛn a kwon gwɛ̌ ha na mwat hwak e ji reza remo mo ko tyɔng wɛt.”
18E bama mo, yɛn a to yila hɛn vey e ji mo, ko ba nɔng ɛn nu, yɛn a to ha há hak, kɛ be to basa a bemat pyɛ cak e ji rezâ Yɛsu ko tyɔng wɛt. 19Ko Bitrus na Yohana ba toyo a yɛn, ba yang ɛn, “Mara hin pyɛ min na yin a di pyɛ de ya dal e bayîs Dagwi. Ê sè tyɛng na wot a gyeng há min, kɛ na wot a gyeng hâ Dagwi arɛt? 20Yaga wot ê tɔk tik há e ra pyɛ́ de wot a ga di na yēmo de wot a ga wok wɛt.” 21E bama de bemakûk badu mo ba gwɛ̌ shìsa hɛn, ba hàla hɛn na be kyè. Yɛn a di gwong de bê tabak hɛn wɛt, yaga bemât mwa ba sé somo Dagwi yaga pyɛ de ya ga té. 22Yaga neshey tɔ̂ mwat de bá tɛ̀ ɛ tyang e gwong de gwa sé pyɛ langat sizɔng ná kana dal kuru banaas (40).
Bemat-raa ba ra won
23Jeng de bemakûk badu ba hàla hɛn, Bitrus na Yohana yɛn a to ɛn vɔk na bemat mɛn. Yɛn a wɔ̀ ha a yɛn pyɛ de begbɔng bepiris tanga bemakuk bá kana ha a yɛn. 24Sede yɛn a wok ano, yɛn a wuna bato mɛn mwa, yɛn a hwo ra won vɔk na Dagwi, yɛn a ye, “À Darwey, hwo de hwà yong lagwi, na jey, na gworep, tanga mwa pyɛ́ de ya sé e ji yɛ̄! 25Yi na Gabik Jɛrɛ hwà nɔ̂ng dâ beda mot Davit, yɛ mwât fwom mō, neha, ko à ye,
“ ‘Yaga sɛ́ de bemât yére dyuk be lolong arɛt?
Yaga sɛ́ de bemat be yong begwông pyɛ́ vyes kpɛɛ arɛt?
26Begwɔ̀m jey be yong bato mɛn yaga como,
vemo de ba vɔk reto be tula hɛn,
na be ra yol na Darwey tanga Mwat mɛ de Dagwi a kasa na a sey bemat.’
27“Mwin, Gbɔng Gwɔ̀m Herodes tanga Pɔntyus Pilatus yɛn a man na BeYuda tanga bemât yére dyuk e ngamo e gbɔng repomo remo. Yɛn a wuna-nu na be yong begwong beves e ra Yɛsu, mwât fwom mō de a sé jɛrɛ, womo de hwà ga kasa. 28Yɛn a wuna bato mɛn na be ra pyɛ́ yane de hwà kana yong ɛ̀ gyam, ya rɔda té. Hwà kana tɔk yong ano, yaga hwà vɔk reto, ko yaga hwà simo na pyɛ́ yane ye té arɔng. 29Ko di a remo, à Darwey, di yerê shísa de be shìsa hot mɛ̀! Nɔng ot, wot de wot a sé besam mō, reto na wot a tɔk ha há mō na yey ting sizɔng. 30Nára vwɔ mō, na hwo tɛ̀ mɛ̀ bemât serɔ tyang, na hwo to tɛ̀ bemat be ra pyɛ̂ langat na pyɛ̂ bes yi na rezâ Yɛsu, mwât fwom mō de a sé jɛrɛ.”
31Jeng de yɛn a yɛnɛ râ won, kwɔn de yɛn a man ɛ̀ mo ha digta. Ko Gabik Jɛrɛ ha sɛ̀ reto e ra yɛn mwa, yɛn a hwo ha rehâ Dagwi na yey ting.
Bemat-raa ba gas pyɛ́ de yɛn a vɔk
32Mwa bemat-raa mo ba vɔk yey rining na báre hining. Vit a hwak e ji mɛn de a jut pyɛ́ de a vɔk, ya sé myɛ pyɛ mɛ, ko yɛn a gas kayɛ pyɛ de yɛn a vɔk na bemɛn. 33Betom Yɛsu mo ba re nuyel na nɔng nuha, Darwey Yɛsu a ga sene yi e reku, ko yɛn a ha ano na gbɔng reto. Ko Dagwi a tɛ̀ nerat mɛ ding-ding e ra yɛn mwa. 34E ji mɛn o, vit a mwat de a bidɛ pyɛ. Yaga e jeng e jeng, yɛn de ba vɔk pyɛ́ sede cāp kɛ nelɔ yɛn a rɛsɛl yɛ̄, ko yɛn a vɛ̀sɛ na dyām de ba sɛsɛm yi e de rɛsɛl pyɛ́ mo, 35ba nɔ̂ng betom o yɛ̄. Betom o ba gas a kawɛ mwat yɛ̄ tyɛng na pyɛ de e simo.
36Á sè ano arɔng de Yɔsɛf á ra. Yɛ á sè WoLevi de bá kana tɔ ɛ e rezîk Kipirus. Betom o bá tang ɛ, à Barnabas wɔgɔ, “Womo de e gwɛsɛ a bemat gap.” 37Yɛ á row cap de a vɔk, ko á vey na dyām o, á nɔ̂ng betom o.
Iliyochaguliwa sasa
Tomong Betom Yɛsu 4: bomBI
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
Tomong Betom Yɛsu 4
4
Bitrus na Yohana e nuyêl bemakûk badu
1Jeng de Bitrus na Yohana yɛn a rɔ̌ ha na bemat, behak e ji bepiris, na gbɔng o wo bemât gyeng Gbɔng Duk Re Fongol, tanga BeSaduki behak ba wɔ̀ sɛ̀ ɛn e hwomo. 2Yɛn a wok shom, yaga betom Yɛsu mo ba sé basa a bemat wɔgɔ, Yɛsu a ga sene yi e reku, ko yaga ano, mwa bemat ba rɔda ba sene yi e reku arɔng. 3Yɛn a vo ɛn, ko yɛn a ka tɛ̀ ɛn e lɔ̂ ngyang sɛ̌ tuk de he kyè vey, yaga a sé nahywegelek. 4Ko pyak e ji vemo de ba wok pyɛ de yɛn a ha mo yɛn a sey tsak o na Yɛsu. Ko nepyak bemat-raa na gwɛ̌ hɛn vɔk e gu batungun (5,000).
5Tuk het, bemât nuyêl BeYuda, na bemakuk, tanga bemât basâ Badu ba tula hɛn e Yɛrusalɛm. 6Yɛn a man na Hanas, yɛ darwêy bepiris, na Kayafas, na Yohana, na Aleksanda, tanga bwang bemât lɔ darwêy bepiris o. 7Yɛn a tɛ̀ be vey a yɛn na Bitrus na Yohana, na be tumal e nuyel mɛn, ko ba hwo rangal hɛn, ba ye, “E wà de a nɔng in reto na yin a tɛ̀ mwat o tyang arɛt? E rezâ wà de yin a ra mɛ̀ fwom arɛt?”
8Ko Bitrus, de Gabik Jɛrɛ ha sɛ̀ reto e ra yɛ, a yang ɛn, “À yin bemât nuyel na bemakuk! 9Ka sede yin a sé ra a wot nerangsal e ra fwom rwat de wot a ra a mwat nà bol o, na yin a to rangal hot begwong de ba tɛ̀ ɛ tyang, 10ko tik na yin mwa, tanga mwa BeIsrayɛl, yin a tɔk: A sé e retô rezâ Yɛsu Kristi wo Nazarɛt de ra tɛ̀ mwat womo a sé tumal e nuyel min tyang gyat. E yin de yin á kak Yɛsu mo e ra cɔ́gɔt, ko Dagwi á to sene hɛ yi e reku. 11A sé e ra Yɛsu de bà jɛk e ji Bwok-basa Dagwi wɔgɔ,
“ ‘Gwofwa de yin bemât lɔ̂k duk yin á kana kyɛ́ in gwɛ wɔgɔ, gwa vɔk fwom wɛt,
e gwɛ de gwa tɛ́ ɛ gbɔng gwofwa râ fwom.’
12E yɛ nju mɛ zɔng de e tɔk sey bemat. Dagwi a nɔ̂ng bemat reza mɛ, ko vit a reza rehak e ji jêy mwa de re tɔk sey neken mot.”
13Jeng de bemakûk badu mo ba di BeBitrus o ba ha na yey ting ano, yɛn a langat hɛn, yaga yɛn a to di, betom o ba vɔk tɔ́k wɛt, ko ba sé tyɛng na bwang bemat zɔng. Yɛn a tɔk, BeBitrus o bá kana sè bemat raà Yɛsu arɔng. 14Ko sede remo de yɛn a di mwat de ba ga tɛ̀ ɛ tyang o a sé tumal bagat na BeBitrus, yɛn a bidɛ pyɛ de yɛn ê ha. 15Yaga ano, yɛn a yang ɛn, be nusu yi e duk tula mo, ko yɛn pyɛ mɛn ba vo redu e ra pyɛ de yɛn ê ra. 16Yɛn a rangâl bemɛn, ba ye, “E sɛ́ de wot ê ra na bemat vemo arɛt? Kawɛ mwat de a sé e ngamo e Yɛrusalɛm a tɔk, bemat o ba ga ra gbɔng pyɛ bes, ko wot ê tɔk tono há hane wɛt. 17Ko yaga na wot a dul há mo nà gwɛ̌ shara hɛ e ji bemat, tik na wot a tusa hɛn, yaga na yɛn a kwon gwɛ̌ ha na mwat hwak e ji reza remo mo ko tyɔng wɛt.”
18E bama mo, yɛn a to yila hɛn vey e ji mo, ko ba nɔng ɛn nu, yɛn a to ha há hak, kɛ be to basa a bemat pyɛ cak e ji rezâ Yɛsu ko tyɔng wɛt. 19Ko Bitrus na Yohana ba toyo a yɛn, ba yang ɛn, “Mara hin pyɛ min na yin a di pyɛ de ya dal e bayîs Dagwi. Ê sè tyɛng na wot a gyeng há min, kɛ na wot a gyeng hâ Dagwi arɛt? 20Yaga wot ê tɔk tik há e ra pyɛ́ de wot a ga di na yēmo de wot a ga wok wɛt.” 21E bama de bemakûk badu mo ba gwɛ̌ shìsa hɛn, ba hàla hɛn na be kyè. Yɛn a di gwong de bê tabak hɛn wɛt, yaga bemât mwa ba sé somo Dagwi yaga pyɛ de ya ga té. 22Yaga neshey tɔ̂ mwat de bá tɛ̀ ɛ tyang e gwong de gwa sé pyɛ langat sizɔng ná kana dal kuru banaas (40).
Bemat-raa ba ra won
23Jeng de bemakûk badu ba hàla hɛn, Bitrus na Yohana yɛn a to ɛn vɔk na bemat mɛn. Yɛn a wɔ̀ ha a yɛn pyɛ de begbɔng bepiris tanga bemakuk bá kana ha a yɛn. 24Sede yɛn a wok ano, yɛn a wuna bato mɛn mwa, yɛn a hwo ra won vɔk na Dagwi, yɛn a ye, “À Darwey, hwo de hwà yong lagwi, na jey, na gworep, tanga mwa pyɛ́ de ya sé e ji yɛ̄! 25Yi na Gabik Jɛrɛ hwà nɔ̂ng dâ beda mot Davit, yɛ mwât fwom mō, neha, ko à ye,
“ ‘Yaga sɛ́ de bemât yére dyuk be lolong arɛt?
Yaga sɛ́ de bemat be yong begwông pyɛ́ vyes kpɛɛ arɛt?
26Begwɔ̀m jey be yong bato mɛn yaga como,
vemo de ba vɔk reto be tula hɛn,
na be ra yol na Darwey tanga Mwat mɛ de Dagwi a kasa na a sey bemat.’
27“Mwin, Gbɔng Gwɔ̀m Herodes tanga Pɔntyus Pilatus yɛn a man na BeYuda tanga bemât yére dyuk e ngamo e gbɔng repomo remo. Yɛn a wuna-nu na be yong begwong beves e ra Yɛsu, mwât fwom mō de a sé jɛrɛ, womo de hwà ga kasa. 28Yɛn a wuna bato mɛn na be ra pyɛ́ yane de hwà kana yong ɛ̀ gyam, ya rɔda té. Hwà kana tɔk yong ano, yaga hwà vɔk reto, ko yaga hwà simo na pyɛ́ yane ye té arɔng. 29Ko di a remo, à Darwey, di yerê shísa de be shìsa hot mɛ̀! Nɔng ot, wot de wot a sé besam mō, reto na wot a tɔk ha há mō na yey ting sizɔng. 30Nára vwɔ mō, na hwo tɛ̀ mɛ̀ bemât serɔ tyang, na hwo to tɛ̀ bemat be ra pyɛ̂ langat na pyɛ̂ bes yi na rezâ Yɛsu, mwât fwom mō de a sé jɛrɛ.”
31Jeng de yɛn a yɛnɛ râ won, kwɔn de yɛn a man ɛ̀ mo ha digta. Ko Gabik Jɛrɛ ha sɛ̀ reto e ra yɛn mwa, yɛn a hwo ha rehâ Dagwi na yey ting.
Bemat-raa ba gas pyɛ́ de yɛn a vɔk
32Mwa bemat-raa mo ba vɔk yey rining na báre hining. Vit a hwak e ji mɛn de a jut pyɛ́ de a vɔk, ya sé myɛ pyɛ mɛ, ko yɛn a gas kayɛ pyɛ de yɛn a vɔk na bemɛn. 33Betom Yɛsu mo ba re nuyel na nɔng nuha, Darwey Yɛsu a ga sene yi e reku, ko yɛn a ha ano na gbɔng reto. Ko Dagwi a tɛ̀ nerat mɛ ding-ding e ra yɛn mwa. 34E ji mɛn o, vit a mwat de a bidɛ pyɛ. Yaga e jeng e jeng, yɛn de ba vɔk pyɛ́ sede cāp kɛ nelɔ yɛn a rɛsɛl yɛ̄, ko yɛn a vɛ̀sɛ na dyām de ba sɛsɛm yi e de rɛsɛl pyɛ́ mo, 35ba nɔ̂ng betom o yɛ̄. Betom o ba gas a kawɛ mwat yɛ̄ tyɛng na pyɛ de e simo.
36Á sè ano arɔng de Yɔsɛf á ra. Yɛ á sè WoLevi de bá kana tɔ ɛ e rezîk Kipirus. Betom o bá tang ɛ, à Barnabas wɔgɔ, “Womo de e gwɛsɛ a bemat gap.” 37Yɛ á row cap de a vɔk, ko á vey na dyām o, á nɔ̂ng betom o.
Iliyochaguliwa sasa
:
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust