Tomong Betom Yɛsu 22
22
1“À beda na begwa hom, wet in betong, na yin a wok há de mê ha a yin a remo, na me dul mɛ̀ tó hom e nuyel min.”
2Sede yɛn a wok a hanat na relêm BeYuda, yɛn a gwɛ̌ sǎ yuu, ko Bulus a re nuyel, a yang ɛn:
3“Ma sé WoYuda, bá tɔ me e Tarsus e bak sevwêl Kilikya, ko á sè e ngamo e Yɛrusalɛm de ma ras ɛ̀. Gamalyel á sè mwât basa hom, ko yi na yɛ ma masa Badu bedabeda mot naka-naka. Ma raa Dagwi na yey rining arɔng, sede remo de yin mwa yin a sé raa hɛ yunung. 4E jeng de bemat bá kana hwo raa gwông Darwey Yɛsu, ma tak a yɛn reyɔm na me wey na yɛn. Ma vos ɛn, beras na beha, ko ma tɛ̀ be bangas hɛn e lɔ̂ ngyang. 5Darwey bepiris tanga mwa bemakûk badu yɛn ê tɔk ha a yin, pyɛ de ma sé ha ya sé tsak o. Á kana sè e yɛn vɛ de bá nɔng me bebok-berang na me nɔ̂ng BeYuda e repomô Damaskus. Ano kwong, ma wɔ́ e Damaskus, yaga na me vos bemat-raà Yɛsu mo, na me tɛ̀ a yɛn ngyang, na me vey na yɛn e Yɛrusalɛm, yaga na be tabak hɛn.”
Bulus a ha e ra gwong de a tɛ́ ɛ mwat-raa
6“E jeng de ma sè kyè wɔ e repomô Damaskus e tê-gwi, jeng de ma wɔ́ bagat na repomo mo, remo-remo negbey nehak de ná nɛp sedesi, nemo de ná yi e lagwi ná pe lolo, ná gwɔrɔ me. 7Ma gaba e vwel, ko ma wok fwɔ hwak de gwa yang me, ‘À Saul! À Saul! Yaga sɛ́ de hwó tak a me reyɔm arɛt?’ 8Ma yang ɛ, ‘E hwo à wà, à Darwey arɛt?’ Fwɔ mo gwa toyo a me, gwa ye, ‘A sé e me Yɛsu wo Nazarɛt, de hwó tak a yɛ reyɔm!’ 9Bemat de bá sè kyè tanga me yɛn á di negbey o, ko yɛn á wok fwɔ̂ mwat de á sè ha na me wɛt. 10Ma ye, ‘À Darwey, e sɛ́ de mê ra arɛt?’ Á yang me, ‘Sogo, na hwo wɔ̀ yel e Damaskus. E hwomo, bê ha a hwo mwa pyɛ́ de Dagwi à yong ɛ̀ gyam na hwo ra.’ 11Nedyɛt negbey nane mo ná tɛ̀, ma tɔk to di jey wɛt. Yaga ano, bemat de bá sè tanga me yɛn á hwɔlɔ me na vwɔ vɔk e ji Damaskus o.
12“E hwomo, mwat hwak á sɛ̀ de bá tang ɛ, à Hananiyas. Á sè mwat-raà Dagwi naka, á to gyenges Badu mot, ko mwa BeYuda de bá sè sangal e repomo mo bá ha há rat e ra yɛ. 13Hananiyas o á vey di me, á tumal bagat na me, ko á yang me, ‘À gwa hom Saulus, tik na hwo to bɛɛ jey!’ E ji jeng o, ma pe hwo bɛɛ jey, ko ma di ɛ. 14Á to yang me, ‘Dagwi de bedabeda mot bà re a yɛ fongol, a sé e yɛ de a kasa hwo na hwo tɔk pyɛ́ de yɛ e simo a ra. A to kasa hwo na hwo di yɛ womo de a sé mwat rwat, na hwo wok fwɔ mɛ arɔng jeng de a sé ha na hwo. 15Yaga hwà rɔda sè mwât nuha mɛ, na hwo ha a mwa bemat pyɛ́ de hwà ga di na yēmo de hwà ga wok. 16E sɛ́ de hwà sé gyeng arɛt? Sogo, na be tɛ̀ a hwo batisma, na be to kus a hwo banɛn mō e jeng de hwà sé yila e ra reza mɛ.’ ”
Ba yila Bulus na a shara a yére dyuk Yɛgɛt Yat
17Bulus a re nuyel, a ye, “Ma toyo vey e Yɛrusalɛm, ko ma wɔ̀ yel e Gbɔng Duk Re Fongol na me ra won. Sede ma sè ra won o, ma di pyɛ cak na negwi-ywey. 18Ma di Darwey de á yang me, ‘Rá ziri, na hwo hàla Yɛrusalɛm dey-dey, yaga bemât repomo mo yɛn ê kyɛ́ ɛn nà sey tsak o na pyɛ́ de hwà sé ha e ra me.’ 19Ko ma yang ɛ, ‘À Darwey, bemat o yɛn a tɔk, a sé e me wɛ de ma kana yeles e beduk re fongol, na me vos bemat-raa mō, na me dakas hɛn arɔng. 20Ko jeng de bá kana mɔrɔ Istifanus, yɛ de á ha a bemat reha mō, me pyɛ hom ma kana sè e hwomo. Ma simo rehâ mɔrɔ mɛ mo, ko ma gyeng berugû bemat de ba mɔrɔ hɛ mo.’ 21Ko Darwey o á yang me, ‘Sogo, mê tomo hwo vɔk na bemât yére dyuk e nekwɔn de na sé yikyik.’ ”
22Regyɛng bemat o ba wet betong na hâ Bulus, sɛ̌ a ha neha nemo mo. Jeng de yɛn a wok nɛ, yɛn a hwo gbɔ na gap, ba tē, “Bē mɔrɔ hɛ! Bē wey na yɛ! A jam na be tik yerê mwat womo na neken wɛt!” 23Yɛn a gbɔ ding-ding, yɛn a nása berugu mɛn e gwi, ko yɛn a tabas fongol e gwi arɔng. 24Gwɔ̀m bemât como mo a tɛ̀ bemat mɛ be yel na Bulus e kwɔ̂n fwom mɛn. A yang ɛn, be dak ɛ na zining, yaga na yɛn a tɔk pyɛ de ya tɛ̀ BeYuda ba ta lwɛ́lɛ e ra yɛ ano. 25Jeng de yɛn a rɔgɔs hɛ na rik na be dak ɛ, Bulus a yâng gbɔng o de a sé e tumal e hwomo, “Badu ba simo a yin na yin a dak hwêy vwêl BeRoma sana ra a hɛ shɔt arɛt?”
26Sede a wok há mo, a wɔ̀ ha a gwɔ̀m mɛn, a yang ɛ, “E sɛ́ de hwô ra arɛt? Mwat o a sé WoRoma!”
27Gwɔ̀m bemât como mo a wɔ́ na Bulus, a yang ɛ, “Hā a me, hwà sé WoRoma arɛt?”
Bulus a yang ɛ, “Ey.”
28Gwɔ̀m o a yang ɛ, “Ma nɔ̂ng gwɔmnati dyām pyak na me tɛ́ me mɛ̀ hwêy vwêl BeRoma.”
Bulus a ye, “Ko me ma sé WoRoma, yaga da na neng hom ba sé BeRoma.”
29Remo-remo, yɛn de bá kana sè simo be ra a Bulus nerangsal yɛn a hàla hɛ. Ko gwɔ̀m bemât como mo a wok bengyip jeng de a di, a sé e WoRoma de á kana tɛ̀ a yɛ ngyang.
Bulus e nuyêl bemakûk badu
30Gwɔ̀m bemât como mo a simo na a tɔk tyɛng pyɛ de ya tɛ̀ BeYuda ba tɛ̀ kûn Bulus. Yaga ano, tuk het, a tɛ̀ be viri Bulus, ko a yila begbɔng bepiris tanga mwa bemakûk badu BeYuda na be tula hɛn. E bama mo, a tɛ̀ ba jut Bulus, ba tɛ̀ ɛ a tumal e nuyel mɛn.
Iliyochaguliwa sasa
Tomong Betom Yɛsu 22: bomBI
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
Tomong Betom Yɛsu 22
22
1“À beda na begwa hom, wet in betong, na yin a wok há de mê ha a yin a remo, na me dul mɛ̀ tó hom e nuyel min.”
2Sede yɛn a wok a hanat na relêm BeYuda, yɛn a gwɛ̌ sǎ yuu, ko Bulus a re nuyel, a yang ɛn:
3“Ma sé WoYuda, bá tɔ me e Tarsus e bak sevwêl Kilikya, ko á sè e ngamo e Yɛrusalɛm de ma ras ɛ̀. Gamalyel á sè mwât basa hom, ko yi na yɛ ma masa Badu bedabeda mot naka-naka. Ma raa Dagwi na yey rining arɔng, sede remo de yin mwa yin a sé raa hɛ yunung. 4E jeng de bemat bá kana hwo raa gwông Darwey Yɛsu, ma tak a yɛn reyɔm na me wey na yɛn. Ma vos ɛn, beras na beha, ko ma tɛ̀ be bangas hɛn e lɔ̂ ngyang. 5Darwey bepiris tanga mwa bemakûk badu yɛn ê tɔk ha a yin, pyɛ de ma sé ha ya sé tsak o. Á kana sè e yɛn vɛ de bá nɔng me bebok-berang na me nɔ̂ng BeYuda e repomô Damaskus. Ano kwong, ma wɔ́ e Damaskus, yaga na me vos bemat-raà Yɛsu mo, na me tɛ̀ a yɛn ngyang, na me vey na yɛn e Yɛrusalɛm, yaga na be tabak hɛn.”
Bulus a ha e ra gwong de a tɛ́ ɛ mwat-raa
6“E jeng de ma sè kyè wɔ e repomô Damaskus e tê-gwi, jeng de ma wɔ́ bagat na repomo mo, remo-remo negbey nehak de ná nɛp sedesi, nemo de ná yi e lagwi ná pe lolo, ná gwɔrɔ me. 7Ma gaba e vwel, ko ma wok fwɔ hwak de gwa yang me, ‘À Saul! À Saul! Yaga sɛ́ de hwó tak a me reyɔm arɛt?’ 8Ma yang ɛ, ‘E hwo à wà, à Darwey arɛt?’ Fwɔ mo gwa toyo a me, gwa ye, ‘A sé e me Yɛsu wo Nazarɛt, de hwó tak a yɛ reyɔm!’ 9Bemat de bá sè kyè tanga me yɛn á di negbey o, ko yɛn á wok fwɔ̂ mwat de á sè ha na me wɛt. 10Ma ye, ‘À Darwey, e sɛ́ de mê ra arɛt?’ Á yang me, ‘Sogo, na hwo wɔ̀ yel e Damaskus. E hwomo, bê ha a hwo mwa pyɛ́ de Dagwi à yong ɛ̀ gyam na hwo ra.’ 11Nedyɛt negbey nane mo ná tɛ̀, ma tɔk to di jey wɛt. Yaga ano, bemat de bá sè tanga me yɛn á hwɔlɔ me na vwɔ vɔk e ji Damaskus o.
12“E hwomo, mwat hwak á sɛ̀ de bá tang ɛ, à Hananiyas. Á sè mwat-raà Dagwi naka, á to gyenges Badu mot, ko mwa BeYuda de bá sè sangal e repomo mo bá ha há rat e ra yɛ. 13Hananiyas o á vey di me, á tumal bagat na me, ko á yang me, ‘À gwa hom Saulus, tik na hwo to bɛɛ jey!’ E ji jeng o, ma pe hwo bɛɛ jey, ko ma di ɛ. 14Á to yang me, ‘Dagwi de bedabeda mot bà re a yɛ fongol, a sé e yɛ de a kasa hwo na hwo tɔk pyɛ́ de yɛ e simo a ra. A to kasa hwo na hwo di yɛ womo de a sé mwat rwat, na hwo wok fwɔ mɛ arɔng jeng de a sé ha na hwo. 15Yaga hwà rɔda sè mwât nuha mɛ, na hwo ha a mwa bemat pyɛ́ de hwà ga di na yēmo de hwà ga wok. 16E sɛ́ de hwà sé gyeng arɛt? Sogo, na be tɛ̀ a hwo batisma, na be to kus a hwo banɛn mō e jeng de hwà sé yila e ra reza mɛ.’ ”
Ba yila Bulus na a shara a yére dyuk Yɛgɛt Yat
17Bulus a re nuyel, a ye, “Ma toyo vey e Yɛrusalɛm, ko ma wɔ̀ yel e Gbɔng Duk Re Fongol na me ra won. Sede ma sè ra won o, ma di pyɛ cak na negwi-ywey. 18Ma di Darwey de á yang me, ‘Rá ziri, na hwo hàla Yɛrusalɛm dey-dey, yaga bemât repomo mo yɛn ê kyɛ́ ɛn nà sey tsak o na pyɛ́ de hwà sé ha e ra me.’ 19Ko ma yang ɛ, ‘À Darwey, bemat o yɛn a tɔk, a sé e me wɛ de ma kana yeles e beduk re fongol, na me vos bemat-raa mō, na me dakas hɛn arɔng. 20Ko jeng de bá kana mɔrɔ Istifanus, yɛ de á ha a bemat reha mō, me pyɛ hom ma kana sè e hwomo. Ma simo rehâ mɔrɔ mɛ mo, ko ma gyeng berugû bemat de ba mɔrɔ hɛ mo.’ 21Ko Darwey o á yang me, ‘Sogo, mê tomo hwo vɔk na bemât yére dyuk e nekwɔn de na sé yikyik.’ ”
22Regyɛng bemat o ba wet betong na hâ Bulus, sɛ̌ a ha neha nemo mo. Jeng de yɛn a wok nɛ, yɛn a hwo gbɔ na gap, ba tē, “Bē mɔrɔ hɛ! Bē wey na yɛ! A jam na be tik yerê mwat womo na neken wɛt!” 23Yɛn a gbɔ ding-ding, yɛn a nása berugu mɛn e gwi, ko yɛn a tabas fongol e gwi arɔng. 24Gwɔ̀m bemât como mo a tɛ̀ bemat mɛ be yel na Bulus e kwɔ̂n fwom mɛn. A yang ɛn, be dak ɛ na zining, yaga na yɛn a tɔk pyɛ de ya tɛ̀ BeYuda ba ta lwɛ́lɛ e ra yɛ ano. 25Jeng de yɛn a rɔgɔs hɛ na rik na be dak ɛ, Bulus a yâng gbɔng o de a sé e tumal e hwomo, “Badu ba simo a yin na yin a dak hwêy vwêl BeRoma sana ra a hɛ shɔt arɛt?”
26Sede a wok há mo, a wɔ̀ ha a gwɔ̀m mɛn, a yang ɛ, “E sɛ́ de hwô ra arɛt? Mwat o a sé WoRoma!”
27Gwɔ̀m bemât como mo a wɔ́ na Bulus, a yang ɛ, “Hā a me, hwà sé WoRoma arɛt?”
Bulus a yang ɛ, “Ey.”
28Gwɔ̀m o a yang ɛ, “Ma nɔ̂ng gwɔmnati dyām pyak na me tɛ́ me mɛ̀ hwêy vwêl BeRoma.”
Bulus a ye, “Ko me ma sé WoRoma, yaga da na neng hom ba sé BeRoma.”
29Remo-remo, yɛn de bá kana sè simo be ra a Bulus nerangsal yɛn a hàla hɛ. Ko gwɔ̀m bemât como mo a wok bengyip jeng de a di, a sé e WoRoma de á kana tɛ̀ a yɛ ngyang.
Bulus e nuyêl bemakûk badu
30Gwɔ̀m bemât como mo a simo na a tɔk tyɛng pyɛ de ya tɛ̀ BeYuda ba tɛ̀ kûn Bulus. Yaga ano, tuk het, a tɛ̀ be viri Bulus, ko a yila begbɔng bepiris tanga mwa bemakûk badu BeYuda na be tula hɛn. E bama mo, a tɛ̀ ba jut Bulus, ba tɛ̀ ɛ a tumal e nuyel mɛn.
Iliyochaguliwa sasa
:
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust