Tomong Betom Yɛsu 2
2
Vêy Gabik Jɛrɛ
1Jeng de Tuk Pɛntɛkɔs ha vey, mwa bemat-raa yɛn a man e dem hining. 2Remo-remo, yɛn a wok wûs pyɛ cak yi e lagwi sede wûs gul de gwo pɛsɛl na gap tyɔng wɛt, ko gwa sila lɔ de yɛn a sé sangal e ji hɛ. 3Yɛn a di pyɛ cak de ya sé sede balêm kya; ya shara hɛ, ko ya wɔ̀ gyirik e ra kawɛ e ji mɛn. 4Gabik Jɛrɛ ha vey, ko ha sɛ̀ reto e ra bemat o mwa, ko yɛn a hwo ha na balem baduk, tyɛng na pyɛ de Gabik Jɛrɛ mo ha simo a yɛn.
5E jeng yane, BeYuda behak de ba vey yi e bavwêl mwa e jey ba sé sangal e hwomo e Yɛrusalɛm. Yɛn a sé bemat de ba sap Dagwi. 6Jeng de yɛn a wok wus hane mo, regyɛng bemat ba tele, ba wɔ̀ man e hwomo. A sé a yɛn kpɛɛ, yaga kawɛ e ji mɛn a wok bemat-raà Yɛsu mo ba sé ha na lem mɛ. 7A sé a yɛn kpɔrɔk sizɔng, ko yɛn a yâng bemɛn, “Mwa bemat de ba sé ha mo ba sé bemât Galili wɛt arɛt? 8Yi e rɛ̌ kwong de kawɛ e ji mot e wokos ba sé ha na relem mɛ arɛt? 9Behak e ji mot ba sé vê bavwêl Partya, na Medya, na Ɛlam. Behak ba sé vê bavwêl Mɛsɔpɔtamya, na Yudiya, na Kapadokya, na Pɔntus, na Asiya, 10na vê bavwêl Firigya, na Pamfilya, na Misra, ko behak ba vey yi e bebak sevwêl Libya de ba sé bagat na repomô Kirene. Behak ba sé bekɛnɛt de ba vey yi e Roma. 11Bemat o behak ba sé BeYuda, ko behak ba sé yi e yére dyuk de ba hwo raa negwɔn BeYuda. Behak ba sé bemât rezîk Kereta tanga BeArap arɔng — ko mwa ano, wot a sé wokos pyɛ́ de ba sé ha na balem mot e ra gbɔng pyɛ́ de Dagwi a ga ra!” 12A sé a yɛn mwa hɛn kpɔrɔk, a to sé a yɛn zii, ko yɛn a hwo rangsâl bemɛn, “Pyɛ yemo ya sé sede sɛ́ arɛt?”
13Ko bemat o behak ba ragas neshɔngɔlɔng na bemat-raà Yɛsu mo, yɛn a tē, “Bemat vemo ba ga feng.”
Bitrus a ha na regyɛng bemat
14Bitrus a sogo e tumal na bwang betom Yɛsu kuru na wɛ gwining (11), a gbɔ, a hanat na bemat o, a ye, “À begwa hom BeYuda tanga yin mwa de yin a sé sangal e ngamo e Yɛrusalɛm! Wet in betong, na yin a wok há hom. Tik na me misang a yin pyɛ́ yemo. 15Bemat vemo ba ga feng wɛt, sede remo de yin e bare. A remo, jeng ya sé dyām shatyat zɔng nagasi! 16Ko a sé pyɛ ma yemo de Yɔwɛl, zarap Dagwi, à kana ha e ra yɛ:
17“ ‘Dagwi a ye: E negasi ne yɛnɛ mo,
ma rɔda tomo na Gabik hom, na me nɔ̂ng bemât mwa hɛ vit a yere mo.
Nèy min bewen na behwong na rɔda ba zarap yi na me;
bewen min ba rɔda ba di pyɛ́ de mê dura a yɛn yɛ̄ sede e ji negwi-ywey,
ko bemakuk min arɔng yɛn a rɔda ba ranas negwi.
18E negasi nane mo, ma rɔda nɔ̂ng bemât fwom hom, beras na beha, Gabik hom vit a yere mo,
ko yɛn a rɔda ba zarap yi na me.
19Ma rɔda ba ra pyɛ̂ langat e lagwi
tanga pyɛ̂ bes e ngamo e jey.
Yin a rɔda ba di nemi, na kya, tanga sekyeng ding-ding.
20Gwi gwa rɔda ba tɛ́ ɛ mwangalang,
ko pwɛl gwa rɔda ba senge sede nemi.
Pyɛ́ yane ya rɔda ba té gyam na gbɔng jeng gbɔng nerat ye vey, jeng de Darwey a rɔda to ba vɛ̄ hɛ.
21E jeng o, kawɛ mwat de ê yila Darwey na a sɛlɛ hɛ,
Darwey o a rɔda sey neken mɛ.’
22“À yin BeIsrayɛl, wet in betong na pyɛ de ma sé ha a yin! Yɛsu wo Nazarɛt á sè mwat de Dagwi á dura a yin hɛ wɛshɛrɛk wɔgɔ, yɛ a tomo hɛ. Á dura ano yi na pyɛ̂ langat na pyɛ̂ bes detidetu de á ra yi na Yɛsu mo. Yin pyɛ min yin a tɔk, a sé ano, yaga pyɛ́ mo yá kana té e tē min. 23Dagwi, yɛ de a tɔk kayɛ pyɛ gyam na ye té, à kana yong ɛ̀ e yey mɛ wɔgɔ, ba rɔda nára Yɛsu e vɔ min. Ko yin a simo na bemat de be raa Dagwi wɛt be kak ɛ e ra cɔ́gɔt. A sé ano de yin a mɔrɔ hɛ. 24Ko Dagwi a sene hɛ yi e reku, a viri hɛ yi e retô reku, yaga reku mo ra tɔk re nuyel na kaba hɛ wɛt. 25A raane, Davit à kana ha e ra yɛ, à ye,
“ ‘Kayɛ jeng me bɛrɛng Darwey hom e nuyel hom.
Yaga yɛ a sé e tumal e vwɔ yege hom, pyɛ cak ya rɔda digta me wɛt.
26Yaga ano, yey hom ya pɛngɛ,
ko neha hom ne dura yey pyɛng hom.
Mwa ano de ma sé mwasi zɔng,
ko ma rɔda tɛ̀ gap hom e ra Dagwi, yaga ma sɛt yey hom e ra pyɛ de a rɔda ra a me.
27Ma tɔk, hwo Dagwi hwà rɔda kyini me e kwɔ̂n bevuvwel wɛt.
Hwô simo na mwât fwom mō de a sé jɛrɛ a ku na a bɔsɔ wɛt.
28Hwà ga dura a me begwong de mê raa na me sɛ̀ tsak neken.
Yey hom ya pɛngɛ sizɔng, yaga hwà sé tanga me.’
29“À begwa, me tɔk ha a yin sana tô yey e ra Gbɔng Gwɔ̀m Davit, yɛ dâ beda mot. À ku, ko bà lɛrɛ hɛ, ko sak mɛ ba rɔngɔl e ngamo na wot pere vey e yunung. 30À kana sè zarap Dagwi, ko à tɔk, Dagwi à sira hɛ, a rɔda tɛ̀ hwak e ji yére mɛ a re negwɔm sede yɛ Davit. 31Davit à kana tɔk pyɛ de ya sé kyè wɔ̀ té. Jeng de à ye, ‘Dagwi a kyini hɛ e kwɔ̂n bevuvwel wɛt, ko revin mɛ ra bɔsɔ wɛt’, à ha há e ra sene yi e reku hê Mwat de Dagwi a kasa na a sey bemat. 32Yɛ Yɛsu mo, a sé e yɛ wɛ de Dagwi a sene hɛ yi e reku. Ko wot mwa hot wot e tɔk nɔng nuha e ra pyɛ yemo mo. 33Dagwi Da mɛ a ga jut Yɛsu, a ga tɛ̀ ɛ a sangal e ra gwofwa negwɔm e vwɔ yege mɛ. A to nɔng ɛ Gabik Jɛrɛ, sede remo de à kana sira na a nɔng ɛ hɛ. Ko Yɛsu a jut Gabik o, a nɔng ot hɛ. A sé e nɔrɔ mo de yin a sé bɛrɛng a remo, yin a to sé wokos hɛ arɔng. 34Yaga Davit pyɛ mɛ à tut vɔk e lagwi wɛt, ko à ye,
“ ‘Dagwi Darwey a yâng Darwey hom:
Sangal e ngamo e vwɔ yege hom,
35sɛ̌ ma tɛ̀ bemât repugu mō be tɛ́ ɛn kwɔ̂n tik bol mō.’
36“Yaga ano, tik na BeIsrayɛl mwa be tɔk pyɛ yemo tsɛng-tsɛng: Yɛ Yɛsu de yin a kak ɛ e ra cɔ́gɔt a sé e yɛ de Dagwi a ga tɛ̀ ɛ na a sè Darwey, ko a to kasa hɛ na a sey bemat.”
37Jeng de bemat ba wok há hemo mwa, há mo ha luga hɛn e neyey mɛn, ko yɛn a yâng Bitrus na bwang betom o, “À begwa, e sɛ́ de wot ê ra arɛt?”
38Bitrus a toyo a yɛn, a yang ɛn, “Tik na kawɛ e ji min a doyo yi e banɛn mɛ, ko be tɛ̀ a yɛ batisma e ji rezâ Yɛsu Kristi, yaga na Dagwi a hàla a yɛ banɛn mɛ; ko Dagwi ê nɔng ɛ Gabik Jɛrɛ arɔng. 39Pyɛ yane de Dagwi à kana sira e ra yɛ ya sé yaga yin tanga nèy min, na mwa vemo de ba sé yikyik — ya sé yaga mwa vemo de Dagwi Darwey mot a rɔda ba yila hɛn vey na yɛ.”
40Bitrus a shonong e ra yɛn na gap na neha nehak pyak, a yang ɛn, “Séy in bato min yi e reyɔm de ra sé kyè wɔ̀ hwo e ra bemat beves vê jeng yemo!” 41Bemat pyak ba sey há mɛ, ko ba tɛ̀ a yɛn batisma. E tuk hane mo, Darwey a tɛ̀ bemat sede gu batat (3,000) ba wuna hɛn na bemat-raa mɛ mo. 42Yɛn a nɔng bato mɛn e de masâ pyɛ́ yi na betom Yɛsu, na e de wunâ nesa na bemɛn, na e de kwɔrɔs kpam-tuk, tanga e de ragâs won.
Wunâ nesâ bemat-raà Yɛsu
43Dagwi a ra pyɛ̂ langat na pyɛ̂ bes pyak yi na betom Yɛsu, ko bemât mwa ba wok bengyip, sede yɛn a di ano. 44Mwa bemat-raa ba re nuyel na wunâ nesa na bemɛn, ko yɛn a ra fwom na pyɛ́ de yɛn a vɔk mwa e dem o. 45Yɛn a rɛsɛl pyɛ̂ mwa de yɛn a vɔk na nedok nekyɔrɔk mɛn, yɛn a jut dyām o, ko ba gas a kawɛ mwat tyɛng na pyɛ de e simo. 46Kahɛ tuk yɛn a dopse manas e nelalâ Gbɔng Duk Re Fongol, ko yɛn a kwɔrɔs kpam-tuk e dem hining e nelɔ mɛn. Yɛn a re pyɛ́ na yey pyɛng na yey rining arɔng. 47Yɛn a somo Dagwi, ko bemât mwa ba simo hɛn tyɔng wɛt. Ko kahɛ tuk Darwey Yɛsu a gwɛsɛ nepyak vemo de a sey neken mɛn, ko ba wuna hɛn na bwang o.
Iliyochaguliwa sasa
Tomong Betom Yɛsu 2: bomBI
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
Tomong Betom Yɛsu 2
2
Vêy Gabik Jɛrɛ
1Jeng de Tuk Pɛntɛkɔs ha vey, mwa bemat-raa yɛn a man e dem hining. 2Remo-remo, yɛn a wok wûs pyɛ cak yi e lagwi sede wûs gul de gwo pɛsɛl na gap tyɔng wɛt, ko gwa sila lɔ de yɛn a sé sangal e ji hɛ. 3Yɛn a di pyɛ cak de ya sé sede balêm kya; ya shara hɛ, ko ya wɔ̀ gyirik e ra kawɛ e ji mɛn. 4Gabik Jɛrɛ ha vey, ko ha sɛ̀ reto e ra bemat o mwa, ko yɛn a hwo ha na balem baduk, tyɛng na pyɛ de Gabik Jɛrɛ mo ha simo a yɛn.
5E jeng yane, BeYuda behak de ba vey yi e bavwêl mwa e jey ba sé sangal e hwomo e Yɛrusalɛm. Yɛn a sé bemat de ba sap Dagwi. 6Jeng de yɛn a wok wus hane mo, regyɛng bemat ba tele, ba wɔ̀ man e hwomo. A sé a yɛn kpɛɛ, yaga kawɛ e ji mɛn a wok bemat-raà Yɛsu mo ba sé ha na lem mɛ. 7A sé a yɛn kpɔrɔk sizɔng, ko yɛn a yâng bemɛn, “Mwa bemat de ba sé ha mo ba sé bemât Galili wɛt arɛt? 8Yi e rɛ̌ kwong de kawɛ e ji mot e wokos ba sé ha na relem mɛ arɛt? 9Behak e ji mot ba sé vê bavwêl Partya, na Medya, na Ɛlam. Behak ba sé vê bavwêl Mɛsɔpɔtamya, na Yudiya, na Kapadokya, na Pɔntus, na Asiya, 10na vê bavwêl Firigya, na Pamfilya, na Misra, ko behak ba vey yi e bebak sevwêl Libya de ba sé bagat na repomô Kirene. Behak ba sé bekɛnɛt de ba vey yi e Roma. 11Bemat o behak ba sé BeYuda, ko behak ba sé yi e yére dyuk de ba hwo raa negwɔn BeYuda. Behak ba sé bemât rezîk Kereta tanga BeArap arɔng — ko mwa ano, wot a sé wokos pyɛ́ de ba sé ha na balem mot e ra gbɔng pyɛ́ de Dagwi a ga ra!” 12A sé a yɛn mwa hɛn kpɔrɔk, a to sé a yɛn zii, ko yɛn a hwo rangsâl bemɛn, “Pyɛ yemo ya sé sede sɛ́ arɛt?”
13Ko bemat o behak ba ragas neshɔngɔlɔng na bemat-raà Yɛsu mo, yɛn a tē, “Bemat vemo ba ga feng.”
Bitrus a ha na regyɛng bemat
14Bitrus a sogo e tumal na bwang betom Yɛsu kuru na wɛ gwining (11), a gbɔ, a hanat na bemat o, a ye, “À begwa hom BeYuda tanga yin mwa de yin a sé sangal e ngamo e Yɛrusalɛm! Wet in betong, na yin a wok há hom. Tik na me misang a yin pyɛ́ yemo. 15Bemat vemo ba ga feng wɛt, sede remo de yin e bare. A remo, jeng ya sé dyām shatyat zɔng nagasi! 16Ko a sé pyɛ ma yemo de Yɔwɛl, zarap Dagwi, à kana ha e ra yɛ:
17“ ‘Dagwi a ye: E negasi ne yɛnɛ mo,
ma rɔda tomo na Gabik hom, na me nɔ̂ng bemât mwa hɛ vit a yere mo.
Nèy min bewen na behwong na rɔda ba zarap yi na me;
bewen min ba rɔda ba di pyɛ́ de mê dura a yɛn yɛ̄ sede e ji negwi-ywey,
ko bemakuk min arɔng yɛn a rɔda ba ranas negwi.
18E negasi nane mo, ma rɔda nɔ̂ng bemât fwom hom, beras na beha, Gabik hom vit a yere mo,
ko yɛn a rɔda ba zarap yi na me.
19Ma rɔda ba ra pyɛ̂ langat e lagwi
tanga pyɛ̂ bes e ngamo e jey.
Yin a rɔda ba di nemi, na kya, tanga sekyeng ding-ding.
20Gwi gwa rɔda ba tɛ́ ɛ mwangalang,
ko pwɛl gwa rɔda ba senge sede nemi.
Pyɛ́ yane ya rɔda ba té gyam na gbɔng jeng gbɔng nerat ye vey, jeng de Darwey a rɔda to ba vɛ̄ hɛ.
21E jeng o, kawɛ mwat de ê yila Darwey na a sɛlɛ hɛ,
Darwey o a rɔda sey neken mɛ.’
22“À yin BeIsrayɛl, wet in betong na pyɛ de ma sé ha a yin! Yɛsu wo Nazarɛt á sè mwat de Dagwi á dura a yin hɛ wɛshɛrɛk wɔgɔ, yɛ a tomo hɛ. Á dura ano yi na pyɛ̂ langat na pyɛ̂ bes detidetu de á ra yi na Yɛsu mo. Yin pyɛ min yin a tɔk, a sé ano, yaga pyɛ́ mo yá kana té e tē min. 23Dagwi, yɛ de a tɔk kayɛ pyɛ gyam na ye té, à kana yong ɛ̀ e yey mɛ wɔgɔ, ba rɔda nára Yɛsu e vɔ min. Ko yin a simo na bemat de be raa Dagwi wɛt be kak ɛ e ra cɔ́gɔt. A sé ano de yin a mɔrɔ hɛ. 24Ko Dagwi a sene hɛ yi e reku, a viri hɛ yi e retô reku, yaga reku mo ra tɔk re nuyel na kaba hɛ wɛt. 25A raane, Davit à kana ha e ra yɛ, à ye,
“ ‘Kayɛ jeng me bɛrɛng Darwey hom e nuyel hom.
Yaga yɛ a sé e tumal e vwɔ yege hom, pyɛ cak ya rɔda digta me wɛt.
26Yaga ano, yey hom ya pɛngɛ,
ko neha hom ne dura yey pyɛng hom.
Mwa ano de ma sé mwasi zɔng,
ko ma rɔda tɛ̀ gap hom e ra Dagwi, yaga ma sɛt yey hom e ra pyɛ de a rɔda ra a me.
27Ma tɔk, hwo Dagwi hwà rɔda kyini me e kwɔ̂n bevuvwel wɛt.
Hwô simo na mwât fwom mō de a sé jɛrɛ a ku na a bɔsɔ wɛt.
28Hwà ga dura a me begwong de mê raa na me sɛ̀ tsak neken.
Yey hom ya pɛngɛ sizɔng, yaga hwà sé tanga me.’
29“À begwa, me tɔk ha a yin sana tô yey e ra Gbɔng Gwɔ̀m Davit, yɛ dâ beda mot. À ku, ko bà lɛrɛ hɛ, ko sak mɛ ba rɔngɔl e ngamo na wot pere vey e yunung. 30À kana sè zarap Dagwi, ko à tɔk, Dagwi à sira hɛ, a rɔda tɛ̀ hwak e ji yére mɛ a re negwɔm sede yɛ Davit. 31Davit à kana tɔk pyɛ de ya sé kyè wɔ̀ té. Jeng de à ye, ‘Dagwi a kyini hɛ e kwɔ̂n bevuvwel wɛt, ko revin mɛ ra bɔsɔ wɛt’, à ha há e ra sene yi e reku hê Mwat de Dagwi a kasa na a sey bemat. 32Yɛ Yɛsu mo, a sé e yɛ wɛ de Dagwi a sene hɛ yi e reku. Ko wot mwa hot wot e tɔk nɔng nuha e ra pyɛ yemo mo. 33Dagwi Da mɛ a ga jut Yɛsu, a ga tɛ̀ ɛ a sangal e ra gwofwa negwɔm e vwɔ yege mɛ. A to nɔng ɛ Gabik Jɛrɛ, sede remo de à kana sira na a nɔng ɛ hɛ. Ko Yɛsu a jut Gabik o, a nɔng ot hɛ. A sé e nɔrɔ mo de yin a sé bɛrɛng a remo, yin a to sé wokos hɛ arɔng. 34Yaga Davit pyɛ mɛ à tut vɔk e lagwi wɛt, ko à ye,
“ ‘Dagwi Darwey a yâng Darwey hom:
Sangal e ngamo e vwɔ yege hom,
35sɛ̌ ma tɛ̀ bemât repugu mō be tɛ́ ɛn kwɔ̂n tik bol mō.’
36“Yaga ano, tik na BeIsrayɛl mwa be tɔk pyɛ yemo tsɛng-tsɛng: Yɛ Yɛsu de yin a kak ɛ e ra cɔ́gɔt a sé e yɛ de Dagwi a ga tɛ̀ ɛ na a sè Darwey, ko a to kasa hɛ na a sey bemat.”
37Jeng de bemat ba wok há hemo mwa, há mo ha luga hɛn e neyey mɛn, ko yɛn a yâng Bitrus na bwang betom o, “À begwa, e sɛ́ de wot ê ra arɛt?”
38Bitrus a toyo a yɛn, a yang ɛn, “Tik na kawɛ e ji min a doyo yi e banɛn mɛ, ko be tɛ̀ a yɛ batisma e ji rezâ Yɛsu Kristi, yaga na Dagwi a hàla a yɛ banɛn mɛ; ko Dagwi ê nɔng ɛ Gabik Jɛrɛ arɔng. 39Pyɛ yane de Dagwi à kana sira e ra yɛ ya sé yaga yin tanga nèy min, na mwa vemo de ba sé yikyik — ya sé yaga mwa vemo de Dagwi Darwey mot a rɔda ba yila hɛn vey na yɛ.”
40Bitrus a shonong e ra yɛn na gap na neha nehak pyak, a yang ɛn, “Séy in bato min yi e reyɔm de ra sé kyè wɔ̀ hwo e ra bemat beves vê jeng yemo!” 41Bemat pyak ba sey há mɛ, ko ba tɛ̀ a yɛn batisma. E tuk hane mo, Darwey a tɛ̀ bemat sede gu batat (3,000) ba wuna hɛn na bemat-raa mɛ mo. 42Yɛn a nɔng bato mɛn e de masâ pyɛ́ yi na betom Yɛsu, na e de wunâ nesa na bemɛn, na e de kwɔrɔs kpam-tuk, tanga e de ragâs won.
Wunâ nesâ bemat-raà Yɛsu
43Dagwi a ra pyɛ̂ langat na pyɛ̂ bes pyak yi na betom Yɛsu, ko bemât mwa ba wok bengyip, sede yɛn a di ano. 44Mwa bemat-raa ba re nuyel na wunâ nesa na bemɛn, ko yɛn a ra fwom na pyɛ́ de yɛn a vɔk mwa e dem o. 45Yɛn a rɛsɛl pyɛ̂ mwa de yɛn a vɔk na nedok nekyɔrɔk mɛn, yɛn a jut dyām o, ko ba gas a kawɛ mwat tyɛng na pyɛ de e simo. 46Kahɛ tuk yɛn a dopse manas e nelalâ Gbɔng Duk Re Fongol, ko yɛn a kwɔrɔs kpam-tuk e dem hining e nelɔ mɛn. Yɛn a re pyɛ́ na yey pyɛng na yey rining arɔng. 47Yɛn a somo Dagwi, ko bemât mwa ba simo hɛn tyɔng wɛt. Ko kahɛ tuk Darwey Yɛsu a gwɛsɛ nepyak vemo de a sey neken mɛn, ko ba wuna hɛn na bwang o.
Iliyochaguliwa sasa
:
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust