Tomong Betom Yɛsu 19
19
Bulus e Ɛfɛsus
1E jeng de Apɔlɔs a rɔngɔl e Kɔrintɔs, Bulus a sé kyě kyè e yɛnɛ̂ sevwel o, ko a kyè wɔ̀ gyirik vɔk e repomô Ɛfɛsus. Sede a wul hwomo, a sɛ̀ bemat-raà Yɛsu behak. 2A rangal hɛn, a yang ɛn, “E jeng de yin á tɛ́ in bemat-raa, Gabik Jɛrɛ há hwo e ra yin arɛt?”
Yɛn a toyo a yɛ, yɛn a yang ɛ, “Wot a ga ka wok pyɛ cak e ra rehâ Gabik Jɛrɛ wɛt.”
3Bulus a to rangal hɛn, a ye, “Ba tɛ̀ a yin ɛ̀ yerê wɛ̌ batisma arɛt?”
Yɛn a ye, “Yerê womo de Yohana á kana ha e ra wɛ.”
4Bulus a ye, “Batisma de Yohana á kana tɛ̀sɛ a bemat wa sé yaga bemat de ba doyo yi e banɛn mɛn. Á kana to ha a BeIsrayɛl wɔgɔ, bē tɛ̀ gap mɛn e ra yɛ de a sé kyè vey e bama mɛ, yɛ wɛ à Yɛsu.”
5Jeng de yɛn a wok ano, yɛn a simo, ko ba tɛ̀ a yɛn batisma e ji rezâ Darwey Yɛsu. 6Bulus a tɛ̀ vɔ mɛ e ra yɛn, ko Gabik Jɛrɛ ha hwo e ra yɛn. Yɛn a hwo ha na balem de yɛn a tɔk vɛ wɛt, ko yɛn a zarap na Dagwi arɔng. 7Bemat o ba sé sede kuru na vɛ beba.
8Bulus a ra pɛl tat, a dopse yeles e duk re fongol, ko a ha a bemat na yey ting. A ra cuna na yɛn, a jāma na a tɛ̀ ɛn be tɔk, pyɛ́ de a sé ha e ra Segwɔm Dagwi ya sé tsak o. 9Ko bemat behak e ji mɛn ba vɔk bato gbarak, yɛn a kyɛ́ ɛn nà sey tsak o, ko yɛn a ha há ves e ra gwông Darwey Yɛsu e ji bemat o. Yaga ano, Bulus a hàla hɛn, ko a jut bemat-raa vɔk e dem hak. Kahɛ tuk a sangsal e lɔ̂ basa hê Tiranus, a tɔrɔng na yɛn e ra rehâ Dagwi. 10Bulus a ra ano neshey neba. Yi ano, mwa bemat de ba sé e sevwêl Asiya, BeYuda na bemât yére dyuk, mwa hɛn yɛn a wok rehâ Darwey Yɛsu.
Nèy Sekeva
11Dagwi a ra fwom na Bulus na a ra yerê pyɛ̂ bes cak de ya sé yê langat sizɔng. 12Bemat ba hashe cɛ̂k rugu de Bulus a vɔkɔs, na wap ragey de a tɛ̀sɛ jeng de a ra fwom, ko ba nɔngɔ̂s bemât serɔ na be ra vɛ. Pyɛ́ mo ya tɛ̀ nerɔ mɛn o na hàla hɛn, cēng arɔng ya nunus yi e babek mɛn.
13BeYuda behak de ba kyě kyè ba paa a bemat cēng e babek mɛn, yɛn a mara ra ano na yíla rezâ Darwey Yɛsu arɔng. Yɛn a yâng cēng o, “Ma sé nɔng in nu e ji rezâ Yɛsu, de Bulus e ha e ra yɛ, nusu hin!” 14Nèy bewen netaama ne Sekeva na ra ano. Yɛ Sekeva mo á sè gbɔng piris wo BeYuda.
15Ko ceng o ya yang ɛn, “Ma tɔk Yɛsu, ma to tɔk Bulus, ko yin ɛ̄, yin a sé beva arɛt?”
16Yɛ mwat de a vɔk ceng o a hwo e ra yɛn na yol ding-ding, ko a dal gap mɛn mwa. A dak ɛn sedesi, ko yɛn a tele yi e lɔ mɛ mo warap na baram. 17BeYuda na bemât yére dyuk de ba sé sangal e Ɛfɛsus yɛn mwa ba wok há hane mo. Bengyip ba vo ɛn tyɔng wɛt, ko yɛn a nɔ̂ng rezâ Darwey Yɛsu nerey sizɔng. 18Bemat pyak e ji vemo de bá kana tɛ́ ɛn bemat-raa yɛn a vey, ko yɛn a kulsa pyɛ́ vyes de yɛn á kana ragas a nuyêl bemat. 19Bemat pyak de bá kana ra vyoshon yɛn a hashe bebok-basa mɛn o, ko yɛn a rangas vɛ e nuyêl mwa bemat. Yɛn a tula dyâm bebok-basa mo, ko ya sé sede dyâm fwôm tuk hining yê bemat gu kuru batungun (50,000). 20E gwong gwomo, rehâ Darwey Yɛsu ra gwɛ̌ shara hɛ, ko vit a pyɛ de ya tɔk dul rɛ.
Sogo nehywɛ e Ɛfɛsus
21E bamâ pyɛ́ yane, Bulus a yong ɛ̀ e yey mɛ na a wɔ́ e Yɛrusalɛm, ko ê kwey bavwêl Makedonya na Akaya. A ye, “E bama de ma ga yɛnɛ yi e Yɛrusalɛm, a sé gbing-gbing na me kyè wɔ̀ di gbɔng repomô Roma.” 22Yaga ano, a tomo bemât sɛlɛ mɛ beba, yɛn vɛ à Timotawus na Ɛrastus, na be wɔ́ e Makedonya. Ko yɛ pyɛ mɛ a gwɛ̌ sangal e sevwêl Asiya jeng tyɔng.
23E jeng o, gbɔng sogo nehywɛ ha hwo e Ɛfɛsus yaga rehâ gwông Darwey Yɛsu. 24Mwat hwak a sé e hwomo de ba tang ɛ, à Demetiriyus. A sé zu de a yongos pyɛ́ na dyam pyɛng. A yongos nekwɔn sekwit nesɛl o ne dagwi hwā de ba tang ɛ, à Artemis. Yɛn bemât yông pyɛ́ mo ba sɛsɛm dyām sizɔng na fwom mɛn o. 25Tuhak, Demetiriyus a tula hɛn mwa na bemat de ba ragas yerê fwom mɛn o, a yang ɛn, “À besa, yin a tɔk, wot e sɛsɛm dyām naka yi e fwom gwomo. 26Yin pyɛ min, yin e bɛrɛng, ko yin e to wokos yerê pyɛ de yɛ Bulus wane mo a sé ra e jeng de e tē, pyɛ̂ sekwit de bemat ba yong na vɔ ya vɔk reto wɛt. A ga hwɔtɔ nehywɛ bemat pyak na be raa há mɛ mo. A ga ra ano e ngamo e Ɛfɛsus zɔng wɛt, ko a ga vey bagât man sevwêl Asiya mwa. 27Ko di in, pyɛ de wot e tele hot yɛ a yet: Vɔk e nuyel, bemat ba rɔda ba kyɛ́ ɛn fwom mot gwomo. Ko ba rɔda jut gbɔng kwɔ̂n sekwit hê gbɔng dagwi mot hwā, Artemis sede pyɛ cak wɛt. Ko gbɔng nerêy Artemis o nê wey arɔng, yɛ womo de mwa bemât Asiya na vê jêy mwa be re a yɛ fongol.”
28Jeng de yɛn a wok há mo, yɛn a wok shom sizɔng. Yɛn a hwo gbɔ, yɛn a tē, “Artemis wo Ɛfɛsus a dal mwa na nerey!” 29Lwɛ́lɛ mɛn o gwa shara hɛ e repomo mo mwa. Bemat o ba vo Gayus na Aristarkus, yɛn bemât Makedonya de ba sé besâ kwɛngɛl Bulus. Bemat o ba hwɔlɔ hɛn vɔk e kwɔn jɔgɔ. 30Bulus a simo na a wɔ̀ man na regyɛng bemat o, ko bemat-raa ba yang ɛ, a wɔ́ wɛt. 31Behak e ji bemât nuyêl sevwel o de ba sé besa mɛ, yɛn arɔng ba tomo a yɛ na há, na yɛn a ra won na yɛ, a wɔ́ e kwɔn jɔgɔ mo wɛt.
32E jeng o, gwolwɛlɛ gwa sogo sizɔng. Bemat o ba sé ha neha kpɛɛ, vemo be ha nehak ko vere be ha nehak detu. Bwarwêy bemat o ba ka tɔk pyɛ de ya wɔ́ na yɛn e hwomo wɛt. 33Yaga BeYuda ba tɛ̀ Aleksanda a wɔ́ e nuyel, ko bemat ba jut, a sé e yɛ de a vey na sogo nehywɛ mo. Yɛ Aleksanda mo a nára vwɔ mɛ e gwi na be sǎ yuu, a simo na a ha há de ê dul mɛ̀ tó mɛ. 34Ko jeng de bemat o ba di, a sé WoYuda, yɛn a hwo gbɔ mwa hɛn, yɛn a gbɔ ano sede dyâm gwi bya. Yɛn a tē, “Artemis wo Ɛfɛsus a dal mwa na nerey!”
35E yɛnɛ mo, mwat de a sé gbɔng mwât jɛ̂k repomo mo a kyɛm a tɛ̀ regyɛng bemat o be sǎ yuu. A yang ɛn, “À yin bemât Ɛfɛsus, mwa bemat ba tɔk, bemât Ɛfɛsus be gyenges kwɔ̂n sekwit hê Artemis de a vɔk nerey, yɛn e to gyenges gwofwa sekwit gwane de gwa kana gaba yi e lagwi. 36Vit a mwat de ê tono na pyɛ́ yemo. Yaga ano, a sé naka na yin a vɔk lɛ̀ɛ; de yin ra pyɛ cak na nefufǔl wɛt. 37Yin a vey na bemat vemo e ngamo, mwa ano de yɛn a shigi pyɛ cak ye nekwɔn sekwit kɛ yɛn a ha há ves e ra Artemis o arɔng wɛt. 38Ka sede Demetiriyus tanga besâ fwom mɛ ba vɔk há na mwat hwak, ko negasi shɔt na sɛ́, ko bemât shɔt o ba sé e hwomo arɔng. Tik na yɛn a wɔ́ e duk shɔt o, na be wɔ̀ tɛ̀ kun mɛn. 39Ka sede pyɛ cak ya sé de yin e simo, ko tik na wot a di yɛ e ji tula hemo de bemakuk mot ba ga yila hin yaga hɛ. 40Ko di in, pyɛ de wot e tele hot yɛ a yet ngan: BeRoma bê ra a wot shɔt yaga sogo nehywɛ de wot a ga ra yunung. Vit a mwat de ê kyɛm a dura wɔgɔ, pyɛ de ya tɛ̀ sogo nehywɛ hemo ya sé naka.” 41E bama de a ha ano, a yɛnɛ tula mo, ko a tɛ̀ bemat o e gwong.
Iliyochaguliwa sasa
Tomong Betom Yɛsu 19: bomBI
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
