Tomong Betom Yɛsu 12
12
Gbɔng Gwɔ̀m Herodes a tak a bemat-raa
1E rwa jeng yane, Gbɔng Gwɔ̀m Herodes a hwo tak a bemât ekilisiya behak reyɔm. 2A tɛ̀ be mɔrɔ Yakɔp, gwa Yohana, na wal. 3Sede a di, pyɛ de a ra ya pɛngɛ a BeYuda yey, a re nuyel, ko a tɛ̀ be vo Bitrus arɔng. Pyɛ mo ya té e jeng Nzem Kpam-tuk Sana Géy-sing. 4Bama de ba vo Bitrus o, ba tɛ̀ ɛ e lɔ̂ ngyang, ba tɛ̀ bemât como benaas be gyeng ɛ. Kahɛ tuk be segsa bemât como mo zang naas. Ko Herodes a yong e yey mɛ wɔgɔ, e bamâ Nzem Gyilsit Nelɔ BeIsrayɛl ê vey na Bitrus o e jey, na be ra a yɛ shɔt e nuyêl bemât mwa. 5Yaga ano, ba gyeng Bitrus e hwomo e lɔ̂ ngyang. Ko bemât ekilisiya ba sé ra won na yey mɛn mwa, yaga na Dagwi a sɛlɛ hɛ.
Ba hàla Bitrus yi e lɔ̂ ngyang
6Tuhak, Herodes a yong ɛ̀ na a ba vey na Bitrus o, na be ra a yɛ shɔt e nusu hwol o. Nabwalak o, Bitrus a sé e de nevwa e tê bemât como beba. Yɛn a rɔgɔs hɛ na ngyang bya, ko bemât como behak ba sé e ruhup e de gyêng lɔ̂ ngyang o. 7Gòbok, tom-lagwi hwak a pere tumal e hwomo, ko negbey na lolo e keduk ngyang o. Tom o a fala Bitrus e hagat mɛ, a sene hɛ, ko a yang ɛ, “Sogo dey!” Ngyang de bá kana tɛ̀ a yɛ ya pere gaba yi e vɔ mɛ. 8Tom-lagwi o a to yang ɛ, “Rɔgɔs gworugu mō; tɛ̀ bekpatak mō!” Bitrus a ra ano, ko tom o a yang ɛ, “Tɛ̀ pyɛ banga mō, na hwo raa me!” 9Bitrus a raa hɛ pere wɔ̀ nusu yi e lɔ̂ ngyang o. A sé a yɛ sede a di pyɛ yemo e ji negwi-ywey, a tɔk kɛ pyɛ de tom-lagwi o a sé ra ya sé mwin wɛt. 10Yɛn a kwey bemât gyêng lɔ̂ ngyang o vê mɛsɛng, ko ba to kwey behak. E yɛnɛ mo, yɛn a pom e ruhup de ba yong gwɛ na dyam, gwomo de gwa kwey cik vɔk e ji repomo. Ruhup o gwa wunta hɛ pyɛ gwɛ yaga yɛn, ko yɛn a nusu hɛn e gwɛ. Sede yɛn a ga kyè lyoshô hyôk repomo mo hining, ko remo-remo, tom-lagwi o a hàla hɛ.
11Bitrus a tumal e hwomo, ko nehywɛ mɛ na toyo a yɛ, a ye, “Ma tɔk a remo, pyɛ de ya té ya sé negwi wɛt! Darwey a ga tomo tom-lagwi mɛ na a vey sey ɛ̀ me yi e vɔ Herodes, na a to pat me yi e mwa reyɔm de BeYuda ba tɛ̀ e yey mɛn na be tak a me.”
12Jeng de a ga yang ɛ wɛng-wɛng, a hwo kyè vɔk e lɔ Marya nêng Yohana, de ba tang ɛ, à Markus arɔng. E hwomo, bemat pyak ba ga kana tula hɛn, ba sé ra won. 13Bitrus a kwɔgɔt rwi ruhup, ko hwông fwôm lɔ mo hwak de ba tang ɛ, à Roda a vey na a ba simo yíla mo. 14Jeng de a wok fwɔ̂ Bitrus, a pere tɔk gwɛ. Yey mɛ ya pɛngɛ sizɔng, ko a to tele vɔk e ji lɔ mo sana wunta rwi ruhup o, a yang ɛn, “Bitrus a sé e rwi ruhup!”
15Yɛn a toyo a yɛ, yɛn a yang ɛ, “E tang o how ayi!” Sede hwong o a shonong wɔgɔ, há de a ha ha sé ano, ko yɛn a ye, “A sé e tom-lagwi de e gyenges hɛ.”
16Ko Bitrus a re nuyel na kwɔgɔ̂t rwi ruhup o. E yɛnɛ mo, yɛn a wɔ̀ wunta gwɛ, ko jeng de yɛn a di ɛ, a yang ɛn kpɔrɔk. 17A nára vwɔ mɛ e gwi na yɛn a sǎ yuu, ko a misang a yɛn gwong de Darwey a pat ɛ yi e lɔ̂ ngyang. A to yang ɛn, “Há in a Yakɔp tanga bwang begwa mot há mo.” Ano, a sogo, a nára hɛ vɔk e kwɔn hak.
18Sede gasi ha ye gbey, lwɛ́lɛ gwa sogo e hwomo e lɔ̂ ngyang o tyɔng wɛt. Mwa bemât como mo yɛn a hwo rangsâl bemɛn pyɛ de ya té na Bitrus o. 19Herodes a tɛ̀ be jāma hɛ, ko ba tɔk sɛ̀ ɛ wɛt. Ko a rangsâl bemât gyeng o pyɛ de ya té mo ngyɛ̄k-ngyɛk. Ko yɛn a tɔk ha pyɛ cak wɛt. Yaga ano, a tɛ̀ be mɔbɔs hɛn.
E jeng o, Herodes a sogo yi e sevwêl Yudiya, a wɔ́ e repomô Kaisariya, ko a sangal e hwomo jeng cak.
Rekû Herodes
20Herodes á kana kyě ra nu na bemât bapomô Tur na Sidɔn. Yɛn a wuna hɛn na yɛn a wɔ̀ di ɛ. Ko yɛn a tānga wɔ̀ man nu na Bilastus de a sé gbɔng o wo lɔ gwɔ̀m, na a sɛlɛ hɛn. Ko yɛn pyak ba sogo wɔ na Herodes, na yɛn a jāma sangâl netyang na yɛ. Yɛn a ra ano, yaga pyɛ̂ re de yɛn e sangal mɛ̀ ye yís yi e sevwêl gbɔng gwɔ̀m o.
21Herodes a kwɔrɔ a yɛn tuk véy o. Sede tuk o ha vey, a tɛ̀ gworugû negwɔm mɛ gworwat, a wɔ̀ sangal mɛ̀ e ra gwofwa negwɔm mɛ, ko a ha na bemat de ba tula hɛn o mwa. 22Bemat o ba gbɔ, ba tē, “Fwɔ mo gwa sé fwɔ̂ dagwi hwak, gwa sé gwô mwasi wɛt!” 23Remo-remo, tom-lagwi Darwey a tɛ̀ a ro ɛ, yaga a nɔ̂ng Dagwi nerey wɛt. Bekǔt ba hwo re rebek mɛ, ko a ku.
24Ko ba re nuyel na sharâ rehâ Dagwi, ko bemat pyak ba sey tsak o na rɛ.
25Barnabas na Saulus yɛn a yɛnɛ fwom mɛn e Yɛrusalɛm, ko yɛn a toyo wɔ e Antyokya. Yɛn a jut Yohana tanga yɛn, yɛ womo de ba to tang ɛ, à Markus.
Iliyochaguliwa sasa
Tomong Betom Yɛsu 12: bomBI
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
