Aposolo 28
28
Paulo Malta Geke
1Ŋene maineka qalakko ket warekone, yewao ŋene detŋem siya yewa eŋetine Malta orakoi. 2Siya welakoune eŋe kima okan ŋongoi paki, kiyeke koya qeke so momoine okange, eso eŋe gerep dubukeu zeki so ŋene korop ŋebu yai ososok okan ŋongoi. 3Paulo eŋe gerep kowage sari qakki paki, peikki gerepko wake, yewao koma mane gerep aŋetneŋo qeki saketke, pakiso Paulo wane metino ki oŋomka walipke okorake. 4Siya welakoune eŋe kau, komaŋo Paulo metino kisage ket okoraki, eŋe alat nagu au rakoi, “Ŋei iwa eŋe ŋei mane mo qeke, wane eŋe kiwetko mi mideke, ŋo siluŋ koboboine welaineŋo sesekaki mi geyake, baŋ seukeyake.” 5Paulo eŋe qatariŋgi qoe gerepko ketki, eŋe detki mane mi matalikake 6Paulo wane solaine suwa kayakane me eŋe ikopka ket rasu more, seukeyakane tomakakoi, ŋo eŋe naso kiroine tomakau so Paulo eŋe wikile mane mi detke, eya wane eŋe dereretene mainge rakoi, “Eŋe Waom mane!”
7Eya ŋine duma bamgo kepe mane pake, kepe eya Publius wane kepe biŋek, ŋei eya eŋe siya ware ware ŋetne, eŋe ŋene marat-ŋongi, so ŋene matino kaiwe karewe kulit gekone. 8Publius wane magaine eŋe kulu papa urumino zoma kaki pake, so eŋe ka bira wira weneŋ okankake, so solaineŋo gereune okangi, papaino pake. Paulo eŋe kulu papa urumino waket meŋenkake, so metine etkeka eŋane kutno more more, ma menaŋkake, 9eŋe yale okankaki, naso eyaka siya eya wane zoma ŋei ŋerep loutne eŋano lotkeu, eŋe yale waka ma menaŋ onge. 10Eya wane siya eya wane welaine eŋe ŋene bakom loutne ŋebongoi, so ŋene sekiwo waikenane okanŋem, eŋe ŋenane ŋara maun kaki loutne qesiŋ ŋone more, sekiwo motkoi.
Paulo Eŋe Malta Qelige More Roma Matko Arike
11Meso karewe qoeki so seki mane, eŋetine ‘Waom Atiksipo’, Alekzandriya matko ŋine sari pake, seki eya eŋe momo suwaine qeke naso eyao eŋe eya pake, ŋene seki eya waket more arikone. 12Ŋene Sirakus matko lotke more, kaiwe karewe metkone. 13Ŋene mat eya qelige more, ari mage Regium matko lotkekone, kepe qaeki rai momo kiyeke puwangi, so ŋene kaiwe etke Puteoli matko lotkekone. 14Ŋene mali malip ŋei natne yewao marat onŋem, so eŋe ŋene newan ŋonbi, so ŋene eŋerop soda weku gekone, eya wane ŋadino yemo ŋene baŋ Roma matko lotkekone. 15Roma mat wane malip malip ŋei ŋerep eŋe ŋenane don kisi, eŋe sarimami, eya detkoi, dere more Apius Wane Naluwo so mat mane Lobo Mat Karewe, ramami, eya numao sari marat ŋongoi. Pakimo, Paulo eŋe one more, Waom bakom ra more bakom kitoka more wet mali malipine so wet dereretine matogoleke.
Paulo Eŋe Roma Matko Kisi Maep Ra Qelaŋange
16Pakimo, ŋene Roma matko lotkekone. Lot-keŋem so Roma gavaman ŋetne eŋe Paulo mat maneo eŋineka so kawali ŋei mane warekaki mesiyakane bonep birakake.
17Kaiwe karewe qoeki, so Paulo eŋe Yuda ŋetne Roma matko gekoi, don ebone more rake, “Ŋine maine naŋano sarikei.” Yuda ŋetne eŋe don eya dere more, Paulo wano lewageu, so Paulo eŋe iwa yale edange, “Kimakop Israel ŋei, ŋei natne Yerusalem gemami, eŋe na dongo bira nangoi, na ŋenze Yuda ŋei ŋerep magu so aso ŋabokopze eŋane numa eya mane mi ma qasikkole, ŋo eŋe siluŋ mulapko Yerusalem biranangoi, so eŋe Roma gavaman wane meto birananbi, so eŋe na mulap urumgo birananbi waketkole. 18Eŋe naŋane don kot eya detkoi, detmageu, naŋane umat eyaŋo seukkalane rokop mi okange, eya wane eŋe na qeliŋ nangei wane onge. 19Ŋo, Yuda ŋei edo don eya wane soringekoi, eya wane naŋane dumane mane mi wakonge, pakimo na Sisaŋo don kot, eya desiyakane bokakole, na Yuda magu eya dongo mane mi biraongole. 20Kine kine eya wane na ŋine iwa don ŋidanikalane newan ŋunmaile, onoka wane Israel ŋei ŋerep ebuki menaŋgei wane tomaka gemami, na ŋei eya wane rawe paki, sein iwa meteno kisage metmaike.”
21Yuda ŋei eŋe don kisi eya dere more olale rakoi, “Ŋene kibi mane geŋane don kisi Yuda kepeo ŋine motpi sariki, mi ma dapotkone, me kimakopze natne yewa ŋine mi sari more, geŋane don kisi ŋedangoi, me geŋane don qotkoine mane mi rakoi, 22Ŋo ŋene geŋane wetŋonane kine desikenane ŋonmaike, yemo onoka wane ŋene detŋem yewao me yewao ŋei ŋerep eŋe geŋane magu eya wane dere worik okanmami.”
23Eso eŋe yale rau paki, Paulorop naso mane motkoi, pakiso kaiwe naso yewao Yuda ŋei ŋerep magu suwaine eŋe Paulo mat metke, yewa sari lewaŋgoi, Paulo eŋe Kaisale Ware Wareinane don kisi ra qelaŋane, ŋei ŋerep edane metki ari ruwo kereke. Eŋe Mose wane ra rokop don eya so propet edo don qekoi, eya wane kine ra wakone Yesu eŋe Mesiya, eya detluk kaikei wane wetene ma eweke edange. 24Ŋei ŋerep natne eŋe Paulo wane don detkoi, ŋo ŋei ŋerep natne eŋe don eya mi malip kakoi. 25Eso eŋe edomka don auye kitat okan nagu more arikoi, pakiso Paulo eŋe ŋado don weku iwa edange, “Asu Koboboine eŋe propet Isaiya wane piino don motki, eŋe aso ŋabokop ŋine don rauluke edange! 26Eŋe rake,
‘Arinom paki, ŋei ŋerep iwa edannom, ŋine baŋ dereret eŋe maine desikei, ŋo kine mi detlukkei, ŋine baŋ kaka i maine kaikei, ŋo wele mi kaikei, 27onoka wane, ŋei ŋerep iwa eŋane dereretene mo siukke, eŋe ketene mo qe wongekoi, so deene mo kulakoi, ŋo midao eŋe deeneŋo maine kaurap, eŋe keteneŋo maine detlukeu rap, eŋe derereteneŋo maine detlukeu rap, so eŋe naŋano maine zingeu rap, Kaisaleŋo ramaike, so na maine ebuwe menageu rap.’ ”
28Don eya qoekiso, Pauloŋo koso takotke rake, “Na don iwa ŋidanbe ŋine desikei, yemo Kaisaleŋo ŋei ŋerep ebuki, mena menaŋ eya wane don kisi, eya yemo mo qelaŋ ŋei ŋerep eŋane more ebonge, edo baŋ desikei!” 29Paulo eŋe iwa raki qoeki, ŋado Yuda eŋe don zok manerop auye kitat okan nagu more so arikoi.
30Koma etke Paulo eŋe mat mane oŋom qoleke, yewao geke, pakiso ŋei ŋerep korop eŋano sarimaŋkoi, eŋe yai ososok okanon maŋke. 31Eŋe Kaisaleŋo Ware Wareinane so qeli ewe zonominane don ra qelaŋane ŋei ŋerep edange, so Waom Yesu Kristo wane kine kaet so qeka maka midaine kito edange, so ŋei maneŋo madet leŋ leŋ me ra togoleka ra togoleka, eya mo mane mi okankake.
Iliyochaguliwa sasa
Aposolo 28: onsNT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2012, Wycliffe Bible Translators, Inc. All rights reserved.
