2 Korinti 11
11
Paulo Wane Kait Masiŋo Aposolo Isisine Eŋane Rokop Mida
1Ŋine detnanbi, na qelaŋ don nigatne ŋidanbe, siluŋ maine det-nanikei me? 2Na ŋinanera more sorin borin okan okanmaile, so sorin borin donne eya yemo Kaisale wano ŋine ŋine yemo ŋerep natewen mane koboboine ŋei wekurop aukeik yale, noŋo Kristo wane biŋekkoune okane eŋeropka weku koboboine gekei wane maturaŋ-ŋungole. 3Ŋo siluŋ dere mezet okanmaile, yemo komaŋo Ewa borikinane isikaki pelekke, masi yalewaka ŋinano wakongi wet dereret ŋine wiriyake, pakimo tanik manik libekaka okane more Kristo wane ka dere gege eya mo baŋ qeliŋgei, na eya wane kaet nanmaike. 4Onoka wane, ŋinano ŋei maneŋo lotkeyakeo, Yesu wane kine ŋene ŋidan-okanmaine, yewa eŋe mi ŋidaniyake, midaka, oŋo tanikine mane ŋidaniyake, so Asu ŋenano ŋine makoi, yewa midaka, eŋekune ŋine mane ŋiboniyake, so Kisi Maep Don ŋedo ŋidanŋem detkoi, yewa midaka, eŋe wetne mane ŋidaniyakeo, yewa ŋinemi rawetkau paki detpi zok menageyake!
5Na detmaile, yemo noŋo nigatne ŋinane “Aposolo” natne eŋane ketkele mi okanmaile. 6Welekatne, na Kisi Maep gereunerop mi mane ra okanmaile, ŋo siluŋ Kisi Maep wane kine dereret yemo det okanmaile. Ŋene numa kine kine ma okangone yewa korop ŋine sikanŋun warekone.
7Na Kaisale wane Kisi Maep don Maine ŋidangole, naso yewao na eya wane lewine qole nanikei wane mi rakole. Na yale okanbe paki nae ma ket bira nagu more ŋine ŋibu wiyekole, na yale okanbe borike me? 8Na ŋinano Kisi Maep me peyam urata makalane, yemo welekatne doku tau tau magu mat natne edo wesi aboŋ ninbi ebu makole, yale okangole, eyaŋo yemo yaup oma ongole yale okanmaike, ŋo yemo ŋine qesiŋ-ŋunikalane okangole. 9So na ŋinerop gekole, naso yewao na wesi aboŋ wane zuwagewe paki, ŋido qesiŋ nanikei wane ra meŋen mi okan ŋungole. Na mazuwaŋ okane gewe kimakopne Makedoniya kepeo ŋine sarikoi, edo yeye kine kine zuwaŋgole, yewa korop ma sari qesiŋ nangoi. Na ŋinano yaup gewe, ŋine naŋane wikile mi detkoi, yalewaka ŋado naŋane wikile mi desikei. 10Kristo wane don wele eyaŋo naŋano pamaike, yalewa wane mo welekatne Akaiya loli lolik korop ŋinano ŋine aboŋ wane, ŋei maneŋo naŋane mawa mawa donne eya mane mi maket birananiyake. 11Eso na onoka wane don iwa ramaile? Na ŋinane mi nanmaike eya wane me? Midaka! Kaisaleŋo detmaike, na ŋinane nanmaike!
12So na masi iwa okanmaile, eya baŋ takotke yale okane arikale. Yale okane more ŋei natne leŋonbe, eŋe numa natne maratkau paki, eŋe ŋene urata mamaine, eya wane rokopka mamaine rau paki, ŋei natne eŋane kaitko mawa nagukei wane qesi qesiŋenane numa qekakei. 13Eyamo iwa yale, ŋei yaline eŋe aposolo wele Midakaka! Eŋe aposolo isisine, eŋe urata kaki yenane isiu paki tanik manikene eya maingeu, solaeneŋo onbi Kristo wane aposolo wele okan okanmaike. 14So ŋine eya wane oŋa ŋine misuk qaeyake! Ŋei Borikine eŋe yaleka oŋomka, solaine qeingeki kau, aŋelo qelaŋan gorop eŋane rokop okaniyake! 15Eso yalinane eŋane qelit ŋeikoune eŋeŋei eŋane kaiteno edomka solaene qein gekeiwo, eŋe onbi, peyam ŋei koboboine eŋane rokop okaniyake. Eya wane detpi, masikune ŋine mi okaniyake. Ŋado eŋe baŋ masi kine kineene okane ma okane gekoi, eya wane rokopko turuŋine marat-kaikei.
Pauloŋo Aposolo Uratao Umat Loutne Maratkake
16Na rele eyaka koso rawe, ŋei maneŋo naŋane detki qelaŋ misuk okaniyake, ŋo ŋine naŋane ŋei qela ŋine norawe raso norakei, pakiso, na yaleka solane nigatne mawakaikale. 17Na don iwa raikale yemo, Waom wane don wane rokopko mi raikale, yaup sola mawa mawa don kiyeke relane siluŋ qelaŋ yale okane raikale. 18Ŋei loutneŋo, sola okengo kine kine yauwine kepeo ŋine, eya wane sola mawa mawa, don ra okanmami, wane na yaleka sola mawa mawa don rakale. 19Yai, kine dereret ŋine, qelaŋ ŋei natneŋo masirak don ŋidanbi, detpi menaŋ okanmaike! 20So ŋine ŋei maneŋo, qelit mamakoune ŋibuyake, me kine kine ŋine ŋibu, ma ne, okaniyake, me isiŋune more ŋibuyake, me ŋei waom okan-ŋuniyake, me kaitŋino ŋinguyake, yewa ŋine detpi menaŋ lukeyake. 21Na dere worikewe paki ramaile, ŋene ketkele, ŋo yalewa daleo okan ŋunŋem rap?
Ŋo ŋei mane eŋe eŋinane detki wawaine, okangi, mawanagu, wayakeo, na yaleka nae wane detpe waki mawa nagukale. Don ramaile eyamo qelaŋ don, dere more ramaile. 22Eŋe Hibru me? Na yaleka. Eŋe Israel me? Na yaleka. Eŋe Abraham wane ŋosa ŋabokoune me? Na yaleka. 23Eŋe Kristo wane urata ŋei me? Na yaleka ŋo na siluŋ qelaŋ don rawe, na Kristo wane urata ŋei rokop mane, eŋane rokop yuwan-waremaile. Na urata togogole mamaile, eya rokop mane, so mulap urumgo waket okanmaile, eya rokop mane, kumunam nirot okanmaike, eya rokop mane, seukkalane okan okanmaile, eya rokop mane. 24Atak 5 Yuda ŋei edo i zutŋo nekuwi zaleine 39 okange. 25Atakkarewe (3) kumunamŋo nekukoi, atak mane wesiŋo nekukoi. Atak (3) karewe seki wiriki kiwetko ket more kaiwe weku so ruwo weku kiwet kutno poge pakole. 26Atak loutne na numa kiroine arimaŋkole, yewao ŋaba zok marat-kamaŋkole. Doku qakumgo midakalane okangole, ŋei ŋaba eŋane keuwo wikile kutno gekole, Yuda ŋei kimakopne eŋane keuwo wikile marat kakole, qelaŋ ŋei eŋane keuwo wikile marat kakole, ŋei matko wikile kutno wagekole. Kepe yaup papaine, ŋei mi gegeeno wikile kutno wagekole. Kiwetko wikile marat kakole, Peyam ŋei isisine eŋane keuwo wikile kutno wagekole. 27Na urata kine kine suwaine zok manerop makole, naso baŋem kulu mi papa gemaŋkole, goiŋ wisika urata mamaŋkole, ŋara doku wane seuseu, koya momoo ruru qise wise, ge more takot bilaŋ ket mida wane zuwa zuwaŋ, yale okane gekole. 28So yewaka mida, kaiwe baŋem umat loutne wakongi naŋane qelit sari zeine gereune okan-nanbi, mat baŋem doku tau tau magu eŋane dere mezet okane ge okanmaile. 29Daleo ŋei maneŋo tik pelelek kito geki, na dere wa kitip midaine maine gekale? Daleo ŋei maneŋo qeyauki, na maine kito luke mesikale?
30Eso na mawa-nagukaleo yemo, na ketkele gemaile, yewa weku ma wakawe menageyake. 31Kaisale, Waom Yesu wane Magaine, eŋano bakom mawa mawa naso baŋem pa ariyakeŋo don welekatne ramaile iwa detmaike, na isi mi ramaile. 32Damasiko yewao ŋei waom Aretas wane bano ware ware oŋo diyam gege ŋei, na neu luknanikei wane biraongi mat suwainane madetko toe rapoke pakoi. 33Ŋo siluŋ kimakopne edo kelao nakore nane more mat buroro ŋine kitolotkeu okorake yewaoka mulapko luke birananbi ket sen ŋadino kito more ware ware wane metino ŋine ra kake arikole.
Iliyochaguliwa sasa
2 Korinti 11: onsNT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2012, Wycliffe Bible Translators, Inc. All rights reserved.