1 Kirinti 7
7
Ŋao Ŋanom Eŋane Don
1Ŋine kibi more nine don wane qeson nangoi, eya wane mo iwa rawakone ŋidanbe detpi.
Ŋei mane eŋe ŋerep midaine gewe ra, maine geyake, 2Ŋo siluŋ borikinane liwe liwekine zok manerop pamaike, eya wane ŋei bonep bonep eŋe ŋanomine mayake, eso ŋerep bonep bonep eŋe yalewaka ŋaune mayake. 3So ŋei eŋe solaine ŋanomine mi ma wuluke maniyake, eso ŋerep eŋe yaleka, solaine ŋaune mi mawaluke maniyake. 4Ŋerep oŋomka solainane ware ware mi gemaike, midaka, ŋeiŋo weneŋ gemaike, rokop yalewaka ŋei oŋomka solainane ware ware mi gemaike, ŋerepŋo weneŋ gemaike. 5Eya wane ŋao ŋanom ŋine sola ma waluk ma waluk qazaŋ misuk okane more mane solaine mawaluke maniyake. Welekatne meŋemeŋen wane ewekeu paki yemo lewine done auye dere more naso bamgo motpi paki tau qe more meŋenkaikei. Qoeki koso solaŋine qeturaŋgei yemo maine. Naso midaine qaza zaŋka okane solaŋine mi mawaluke warekau Ŋei Borikineŋo yewao takotke more liwekŋuniyake.
6Na don iwa ramaile, yemo ŋidom remi eya wane mo wet pesekko ŋidanmaile. Na ratogole ŋibone more mi ramaile. 7Naŋane simile yemo ŋei ŋerep korop ŋine na gemaile yale geurap. Ŋo siluŋ ŋei bonep bonep eŋe Kaisaleŋo wet maep okane ebonge, ŋei mane eŋe ŋerep midaine qaluwit geyakane raki eya menageyake, ŋo mane eŋe ŋao ŋanom geyakane Kaisaleŋo ra mangi, eŋe eyarop geki menageyake.
Ŋei Qaluwit, Mala So Ŋao Ŋanom Eŋane Don
8Ŋei qaluwit so ŋerep natawen so ŋerep mala eŋane yemo na iwa yale ramaile, eŋe na gemaile yale okane ŋao ŋanom midaine geu menageyake. 9Ŋo eŋe kotoene so solaene mi mauluke ware kaikeiwo yemo eŋe siluŋ ŋao ŋanom gorop okane gekei. Ŋaorop ŋanom gorop okane more gege yewaŋo mayakatne, yewa midaine yemo bailalaŋ wane qom ŋine zok riweyake.
10Ŋo ŋao ŋanom ŋinane don rawe detpi. Eya naŋane don mida, iwamo Waom wane don. Iwa yale, ŋerep mane eŋe ŋaune misuk qeliŋka ariyake. 11Me ŋaune mo qeliŋka arikeo, yaup ŋei midaine geyake. Me midao yemo eŋe koso ŋaunano ariki kima okane gekeik. Eso ŋei eŋe yaleka ŋanomine misuk qeliŋkayake.
Ŋao Ŋanom Amego Gege Wane Don
12Ŋao ŋanom natne ŋinane don iwa rawe detpi, Waom wane don misuk okaniyake, yemo nae don okaniyake. Ŋao ŋanom sogine qelaŋ geu paki so ŋei eya peyam doku tau tau, ŋo ŋerep eya peyam doku mi tau taune makeo oŋo ŋaune eŋeropka geyakane kaki ŋei eŋe misuk ŋerep eya qeliŋ-kayake. 13Me peyam doku tau taune ŋerep maneŋo eŋe yalewaka ŋaune qelaŋ geyake, peyam doku mi tau taune wane ŋaune ŋo ŋerep eŋeropka geyakane rakiso, eŋe misuk qeliŋkayake, eŋe maine ere ŋao so ŋanom wele okane gekeik. 14Onoka wane ŋaune ŋei qelaŋ eŋe ŋanomine doku tautaunane mosop ŋo eŋano mo wake, so ŋanomine ŋerep qelaŋ eŋano ŋaune doku tautau wane mosopŋo mo eŋano wake. Pakimo eya wane ra more gipon borasokopene eŋe mosop korop okangoi gemami. Yewa midaine ra eŋane dokoene eŋe qelaŋ geurap. 15Ŋo ŋei qelaŋ maneŋo ŋanomine doku tautau ŋerep yewa qelaŋŋo qeliŋkawe ra maine qeliŋ kayake. Masi yaline wakoniyakeo, yemo doku tau tau kimaŋine yewa ŋaune me ŋanomine ere mulaune midaine okanikeik, eya wane Kaisaleŋo peyamgo kima kima okane gekenane ŋedora newan ŋonge. 16Ŋerep; ge ŋaoŋone kisi maep numao waraŋ kanom ariyake me mida, me ge daleo detmaine? Ŋei, ge ŋanomŋone kisi maep numao waraŋkanom ariyake me mida, me ge daleo detmaine?
Mane Eŋe Alakan Okorake, Okora Okora Yewaoka Kisi Maepko Okorayake
17Ŋo midao yemo mane eŋe Waomŋo urata ra mange so mane eŋe gege ma wakone mangi geki Kaisaleŋo ora newankake, rokop weku yewaka kisi maepko geyake. Na don yale rawe paki mat baŋem doku tautau magu ra edan okanmaile. 18Ŋei mane solaine peitne kita kitatne geki, Kaisaleŋo ora newankake, eŋe yale okangeo, yemo solaine peitne kita kitatne eya wane lopot yewa misuk qe susuwakki siukeyake. Ŋo ŋei mane eŋe yaup geki Kaisaleŋo ora newankake, eŋe yaup gekeo, yemo eŋe solaine peitne misuk kitasiyake. 19Onokawane, sola peitne kita kitat me mi kita kitatne yewaŋo wele mi okanmaike, Kaisale wane don dere teweke ma gege yewaŋo wele. 20Mane eŋe urata mane ma geki Kaisaleŋo ora newankakeo, eŋe urata yewaoka ma geyake. 21Ge qelit qeqe genom, Kaisaleŋo gora newangange, ge eya wane dere mezet misuk okanikene. Ŋo ge qelit qeqe urata yewa yeine qeliŋgenane numaine wakon maikeo, siluŋ qeligenom. 22Mane eŋe qelit qeqe ŋei mane eŋane urata ma geki Kaisaleŋo ora newankake, eŋe Waom wane ŋei yaup geyake. Rokop yalewaka mane eŋe yaup geki Waomŋo ora newan kakeo eŋe Kristo wane qelit ŋei okanmaike. 23Ŋine Kaisale eŋe lewine kakapa suwaineŋo sotŋine qekok ŋungane ŋei eŋane borikinane mulapko qelit qeqe misuk okane gekei. 24Eso kimakop, mane eŋe alakan kisi maep dere ma geki Kaisaleŋo ora newankake, tego yewaoka naso iwao okora more Kaisale wano makatakeyake.
Medep Qaluwit So Ŋerep Natewen Eŋane Don
25Natewen qaluwit eŋane yemo na Waom wano ŋine eŋane don mane mi ma gemaile. Ŋo siluŋ nae wetnoŋine don ŋidanbe. Waomŋo wet pesekk okan nangi aŋa tewe tewek korop okangolane donne rawe ŋine maine dere malipkaikei.
26Naso iwao umat zok wakom okanmaike, eya wane na wetkemaile, yemo ŋei eŋe ŋerep midaine mayakatne gemaike, yalewaka geyake. 27Ge ŋerep biŋekŋone mo qekoi me? Eso ge qeliŋkaikenane misuk desikene. Ge mete kobek gemaine me? Eso ge ŋerep maikenane misuk desikene. 28Ŋo ge ŋerep mo mamaineo, yemo manom borikine mi okaniyake. Eso ŋerep natewen mane eŋe ŋei maki eyaŋo borikine mi okaniyake. Ŋo ŋei ŋerep eŋe ŋao ŋanom okanikeiwo yemo siluŋ kepe iwa wane umat suwaine baŋ kuteno wayake. Na tanik yewaŋo ŋinano wakoniyakane mi nanmaike.
Naso Bomile Maikane Yewao Me Yewao Misuk Makatakkene
29Na iwa yale wane ramaile, kimakopne, Naso mo bomilemaike. Eso naso bamgo pamaike, eya wane ŋei ŋanom gorop ge okanmami, ŋine geu gegeŋineŋo ŋanom midaine gemami, yale okaniyake. 30Eso arok okanmami, ŋei yewa ŋine geu aro midaine gemami yale okaniyake. So batneka ge okanmami, ŋei yewa ŋine geu batneka mi gemami, yale okaniyake. Eso aboŋ kine kine qole ma ge okanmami, ŋei yewa ŋine geu aboŋ moriyan midaine gemami, yale okaniyake. 31So kepe wane aboŋ kine kine eya wane urataine ma ge okanmami, ŋei yewa ŋine geu kepe wane aboŋ kine kine mi malipka gemami, yale okaniyake. Onokawane, kepe iwa pamaike, eŋe yalineka mi pa ariyake eŋe siuke mida leleyake.
32Na ŋine yeye kine kine yauwine eya wane dere mezet mi okanikei wane nanmaike. Ŋerep midaine ŋei yewaŋo Waom wane urata kisi maep woken eya wane dere mezet okaniyake. Paki Waom ŋo detki menageyakane rayake. 33Ŋo ŋei ŋanom gorop eŋe yemo sola okengo kepe iwa wane tanik manik eya wane dereret geyake, eya mo ŋanomineŋo detki eŋane menageyake eya wane yale okaniyake. 34Yale okangi wetine wiriyake. Eso ŋerep ŋaune midaine me natewen mane eŋe yemo kisi maepko-ken kine kine eya wane wetkeyake paki, koto so sola koboboine Waom wano motki payakane desiyake. Ŋo ŋerep mane ŋaune-ropŋo yemo sola okengo kine kine, kepeo ŋine eya wane dereret okani-yake. Ŋauneŋo detki eŋane menage-yake eya wane yale okaniyake.
35Na don iwa yemo ŋinŋine qesiŋ-ŋunbe maine geu lukkei wane ramaile, qik-ŋunbe paki midaka. Wet dereret ŋine qeturageu Waom wano koropka okoraki gekei, paki mo yeye maneŋo wet dereret ŋine tebaki yau yaup mi ariyake.
36So ŋei mane so ŋerep biŋekine raumo, ŋerep so ŋei ere maine zokit mi makeik, waom wane qelit qe ge more urataine mogasi-keik, eya menaŋ-maike. Baŋ ŋei yewa ŋerep wane siminkaki so eŋe maine ŋanomine mayake, eya sot midaine. 37Ŋo ŋei mane eŋe wetineŋo iwayale ra togoleyake, ŋerep mi mayake yaup geyake, yale wetkeki paki detki mi qekayakeo, eŋe eweke more qaluwitka geyakane ra togoleki menageyake. 38Eya wane ŋei mane eŋe ŋanominerop zokit maki menageyake. Eso ŋei mane eŋe ŋanomine midaine zokit mi maki paki ŋerep biŋekine yaup wareka-yake eya yemo menaŋ lukeyake.
Ŋerep Mala Eŋane Don
39Ŋerep mane eŋe ŋaune qeliŋka more koso ŋei mane misuk mayake, eso eŋe ŋaune seukmaikeo, yemo eŋe koso ŋei mane mayakane similekaki eŋe maine mayake. So eŋe yau yaup okane more midakaka, kisi maepko Waom wano doku tautau numa yewa mogare zokit mayake. 40Ŋo naŋane wet yemo ŋerep eŋe yaup gemaike yale wet pesekk dere maine geyake. So na detmaile yemo na yaleka Kaisale wano ŋine Asu ma gemaile.
Iliyochaguliwa sasa
1 Kirinti 7: onsNT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2012, Wycliffe Bible Translators, Inc. All rights reserved.