1 Kirinti 11
11
1Noŋo Kristo wane numao gesoke mogare ari okanmaile, eso ŋine yaleka naŋane numa yewaka gesoke mogatnanikei.
Ŋei So Ŋerep Kineze
2Ŋine naso baŋem naŋane wetke more don kine kine korop maine, ra ŋidangole, yewa wane rokopko mogare malilipke ma ge okanmami, eya wane ŋine mawa ŋunmaile. 3Eso koso mane rawe desikei, yemo iwa yale, Kristo eŋe ŋei korop eŋane lewet suwaine, ŋeiŋo ŋanominane suwaine, eso Kaisaleŋo yemo Kristo wane suwaine. 4Eso ŋei mane lewine kawetkeki paki meŋenkayake, me kisi maep rayake eŋe suwaineine Yesu Kristo ewe mabaik okankayake. 5So ŋerep mane lewine kaweune midaine ge more meŋenkayake, me Kaisale wane kisi maep rayake, eŋe yaleka suwaineine Yesu Kristo ewe mabaik okankayake. Eya mo ŋerep yaup gegeene lewetene zoune unbi nobetka okaniyake, eŋerop rokop weku okaniyake. 6Eso ŋerep eŋe lewine kaweune midaine geyakane raso yemo lewine zoune ungi nobetka okaniyake. Ŋo ŋerep eŋe lewine zoune ungi nobetka mesiyakane gamu gamu okaneso, yemo lewetine maine kawetkeyake. 7Ŋei eŋe yemo lewine kaweune midaine geyake, onoka wane, eŋe Kaisale wane bango eŋine kait tanik so zonom so kibi sotaine mamaine, o ŋerep yemo ŋei wane bango so eŋane kibi so zonom sotaineŋo mamaine. 8Iwa yale wane Kaisale eŋe ŋerep wane sola bikumineŋo ŋei mi make. Midaka. Eŋe ŋei wane sola bikumineŋo ŋerep make. 9Me Kaisale eŋe yaleka ŋerep wane detki paki ŋei mi ma wakonkake. Midaka. Eŋe ŋei wane detki paki ŋerep ma wakonkake. 10Ŋerep eŋe ŋei wane bango gemaike, eya wane kibiine yemo eŋe lewine kaweune weneŋ geyake, pakimo aŋelo eŋe kau menageyake. 11Eso ŋene gegeze Waom wano pamaikane, ŋei eŋineka bonep gege me ŋerep eŋineka bonep gege eya mo, kisi maepko yale mi pamaike. 12Ŋerep eŋe ŋeiwano ŋine, set bikumineŋo make, rokop yalewaka ŋei ŋene ŋerep wane kotino ŋine wakone suwa leule okan okanmaine. Eso yeye kine kine korop yemo Kaisale wano ŋine wakone sari okanmaike, oŋo welaine.
13Ŋine ŋidom dere kau, ŋerep mane eŋe lewine kaweune midaine Kaisale meŋenkayake eya masi maine me? Mida! 14Ŋei ŋerep ŋenze tanik manikzeŋo sikan ŋunmaike, yemo iwa yale, ŋei mane eŋe lewine zoune kiroroine ma geyake, yemo mi menageyake. 15Ŋo ŋerepŋo lewine zoune kiroroine ma geyake, yemo menageyake, onoka wane Kaisaleŋo lewine zoune kiroroine mange, eyaŋo lewine setne kawetkeyakane, eyaŋo lewe kawetinane kibi okanmaike. 16Ŋo mane eŋe naŋane don iwa wane don urata mayake, me rayakane okaniyakeo, yemo iwa yale desiyake. Masi iwa ŋene masi mane mogatŋem, Kaisale wane doku tautau magu mat natne eŋe mane mi mage okanmaine.
Korinti Eŋe Waom Wane Ŋara Matalikoi
17Na iwa girem don natne ŋidanmaile, na mi mawa ŋunmaile, yemo iwa yale wane, ŋine lewa lewaŋ ŋino lewage masi maine mi okan okanmami, midaka! Masi qotkoine okan okanmami. 18Na lewine eya wane rawe, ŋine doku tau tau maguŋo lewaŋmami, naso yewao keu ŋino mapo mapokine wakon okanmaike, yale nolatpi na don eya wane detpe, welekatne qou okanmaike. 19Welekatne, doku tautau magu keu ŋino mapok, yemo yaup mida kisi maep mage mage ŋinane kine didiwo wakoniyakane, so ŋei ŋerep maŋo Waom wane uratao modat lukmaike, eya maine wakongi kaulukkei. 20Ŋine ruwo ŋara wane qeturage okanmami, naso yewao Waom wane ŋara wele nekeiwane maine mi lewaŋ okanmami. 21Mida ŋine bonep bonep ŋinŋine ŋara ikopka ne okanmami, eso mane eŋe ŋara wane seukeyake, so mane eŋe doku zok neki wetine siukeyake. 22Me daleo? Ŋine ŋinŋine mat bonepŋine mi pamaike me? Yewao ŋara so doku newe ra neurap me? Me ŋine Kaisale wane doku tau tau magu eŋane detpi kine kine yauwine okanmaike, pakimo ŋine ŋei ŋerep natne ŋara midaine gamu kuteno motkei wane sari okanmami me ŋinane na daleo raikale? Na maine ŋinane masi eya wane bakom kito mawa ŋunikalane me? Eya, midakaka! Na kine kine eya wane maine mi mawa ŋunikale.
Pauloŋo Gege Ŋara Wane Kine Ra Qelaŋange
23Na Waom wano ŋine don makole, eya yaleka ŋine kito ŋidangole, eya wane done iwa yale pamaike, Yudaŋo Waom Yesu siron qeki makoi, ruwo yewao Waom Yesuŋo kasap make. 24Paki Kaisale bakomine kito eya mapoke more rake, “Iwa naŋane bikumne, ŋine qesiŋ ŋuniyakane ŋibonikale. Naŋane dereret ge more yale nekei.” 25Kasap neu, eŋe wain lase okange, yaleka ma more rake, “Lase iwao weŋemne metmaike, eyaŋo Kaisale wane siwa siwap me tako rakot muselane qesiŋ, na noŋom weŋemneŋo ma wakone motmaile, eya nekei rokop naŋane dereret ge more ne arikei.”
Mane Eŋe Waom Wane Ŋara Mataliyake Eŋe Sotkorop Okaniyake
26Yesu wane don eyaŋo iwa yale sikanŋonmaike, ŋine naso baŋem kasap iwa nekei, so lase iwa ŋine wain nekei, rokop Waom Yesuŋo wikile make so detke, so seuseuinane don kisi weneŋ ra qelaŋane ge mageu Waom eŋine sari lotkeyake. 27Eya wane mane eŋe Waom wane ŋara me laseo ŋine wain mi detluke mabaike more qazaŋ neyake, eŋe Waom wane bikum so Waom wane weŋemine eya ne siuke sotkorop okaniyake. 28Eso yalinane mo, mane eŋe eŋine wetinane kine detkaki paki, ŋado kasap ne more laseo ŋine wain neyake, 29onoka wane, ŋei eŋe Waom wane bikuminane kine mi detluke malipka more bikumine ne more laseo ŋine wain yaup neki paki eŋine sotine ne wakonmaike. Pakimo Waomŋo mo manerop okankayake. 30Ŋine yalewa okan okanmami, eya wane ŋinano ŋine ŋei ŋerep loutneŋo zomarop so zonomene midadaine zok ge okanmami, paki loutneŋo mo esat seukwarekoi. 31Ŋo ŋene ŋedomka kotozane kine mo ma wesake ma qelaŋanikeneo, yemo Kaisaleŋo ŋongi sotze midaine okaniyake. 32Ŋo ŋene qewoloŋ okanŋem, yemo Waomŋo kineze ma wakone more ma koboe ŋoniyake, pakimo ŋene eŋine dokoine okangene. Eŋe yale okan-ŋoniyake, yemo ŋene kepeo kisi maep midaine borikine mama ŋei ŋerep natne gemami eŋerop qeliŋŋongi, mi midakene.
33Eso kimakopne, eya wane ŋine Waom wane ruwo ŋara qeturage weku nekeiwane lewage toma metpi, natne sari wareu kiyeke nekei. 34Eso mane eŋe ŋara wane seukmaikeo, eŋe matino ŋara neyake, pakimo wekuwoka lewa lewaŋŋine, yewao Kaisaleŋo kineŋine mi ma wakoniyake. So don kine kine natne pamaike, eya mo baŋ noŋom umore ra ŋidanikale.
Iliyochaguliwa sasa
1 Kirinti 11: onsNT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2012, Wycliffe Bible Translators, Inc. All rights reserved.