'Anga'anga 5
5
Ko Ānania rāua ko Saphīra
1Ko tēta'i tangata ra ko Ānania te ingoa, ma tāna va'ine ko Saphīra, 'oko katoa atura i tēta'i kāinga, 2ē kua 'akapae i'ora aia i tēta'i pae o te moni 'oko, ma te kite katoa o tāna va'ine, ē 'apai maira 'oki i tēta'i pae, ē tuku atura ki te pae vaevae o te au 'āpōsetolo ra. 3Kua karanga atura a Pētero, “E Ānania, 'e a'a a Sātani i 'akakī ei i tō'ou ngākau kia pikika'a koe i te Vaerua Tapu, ē i 'akapae ei koe i tēta'i tu'anga o te moni 'oko o te kāinga na? 4Kāre āinei nō'ou rāi te kāinga i mua ake i te 'oko atu'anga? Ē i muri ake i te 'oko atu'anga ra, kāre āinei tei a koe rāi te moni 'oko? 'E a'a 'oki koe i 'akatupu ei i tēnā na 'anga'anga ki roto i tō'ou ngākau? Ko te Atua 'oki tā'au i pikika'a, kāre ē ko te tangata 'ua.” 5Ē i te 'akarongo'anga mai a Ānania i taua tuatua ra, topa i'ora ki raro, unu'i rava akera. E roko'ia atura te kātoatoa tei 'akarongo ra e te mataku ma'ata. 6Kua tū akera te au tangata 'ōu ra, 'opa i'ora i aia, 'apai atura ki va'o, e tanu atura.
7Mei te toru pa'a ora i muri i'o ake, kua tomo maira tāna va'ine ki roto. Kāre 'oki aia i kite ake i tei tupu ra. 8Kua tuatua atura a Pētero ki aia, “E 'akakite mai ki āku, ko tēia āinei te tūtaki i te kāinga tā kōrua i 'oko atu?”
Kua pa'u maira aia, “Āe, ko tēia te tūtaki.”
9Kua tuatua atura a Pētero ki aia, “'E a'a kōrua i 'akatika ai i rotopū i a kōrua i te tīmata atu i te Vaerua o te Atua? Inā, tei te ngūtupa mai nei te vaevae o te au tangata i tanu i tō tāne na, ē nā rātou katoa koe e 'apai ki va'o.” 10Kua topa i'ora aia i reira rāi ki raro i tō Pētero vaevae, e unu'i rava akera. Ē kia tomo maira te au tangata 'ōu ra ki roto, kua kite atura i taua va'ine i mate ra, ē kua 'apai katoa rātou i aia ki va'o, ē tanu atura ki te pae o tāna tāne ra. 11Roko'ia atura taua 'ēkālēsia katoa ra e te mataku ma'ata, ē pērā katoa te aronga i 'akarongo i taua au mea ra.
Kua rave'ia te au 'akairo ē te au mea ūmeremere 'e mānganui
12'E mānganui te au 'akairo ē te au mea ūmeremere i rave'ia e te rima o te au 'āpōsetolo i rotopū i te 'iti tangata ra. Ē kua mātau te aronga 'akarongo kātoatoa i te putuputu mai ma te manako 'okota'i ki roto i te porotito o Sōlomona. 13Kāre tēta'i 'ua atu o te aronga kē ra i tae i te tōpiri atu ki a rātou; inārā, kua manako meitaki te tangata kātoatoa i a rātou. 14Kua kāpiti'ia atura te aronga tei 'irinaki i te 'Atu 'e mānganui, te au tāne ma te au va'ine katoa ra. 15Ē ko te 'openga i'ora, kua 'apai maira rātou i te aronga maki ki va'o ki te pae arāta'a ra, ē tuku atura ki runga i te au ro'i rikiriki ē te au ro'i 'apaipai ra, pēnei 'ua ake, ko te tāpoki'ia mai tēta'i o rātou e te ata o Pētero i tōna 'aere'anga mai nā reira a'o. 16Kua 'aere katoa maira te au tangata 'e mānganui nō te au 'ōire i vaitata ki Iērūsalēma ra ma te 'apai mai i te aronga maki ē te aronga i tāmanamanatā'ia e te au vaerua vi'ivi'i ra; ē kua 'akaora'ia rātou kātoatoa.
Te tākinga kino'anga'ia te au 'āpōsetolo
17Kua tae maira te Ta'unga Ma'ata ra ē te aronga katoa i kāpiti ki aia ra, koia 'oki te pupu o te au Sādukea ra; kua kī rava rātou i te vare'ae pukupuku, 18ē kua mou maira i te au 'āpōsetolo, titiri atura i a rātou ki roto i te 'are 'āuri. 19Nā tēta'i 'āngela rā a te 'Atu i 'e'eu i te au ngūtupa o te 'are 'āuri i te pō, ē kua arataki maira i a rātou ki va'o, nā kō atura, 20“E 'aere, e tū ki roto i te 'iero, ē e 'akakite atu ki te tangata i te au tuatua rava rāi o tēianei ora 'ōu.” 21Kua 'akarongo i'ora rātou, ē i te pōpongi 'ākirāta kua tomo atura ki roto i te 'iero ē kua 'akamata atura i te 'āpi'i.
Kia tae mai te Ta'unga Ma'ata ra ē te aronga i kāpiti ki aia ra, kua 'akaputuputu maira rātou i te Sūnēderi, koia 'oki te kōnitara pūpū o te au tamariki o Īserā'ela ra, ē kua tono atura i te au karere ki te 'are 'āuri e tiki mai i te au 'āpōsetolo. 22I tō rātou tae'anga atu ki te 'are 'āuri, kāre taua au tāvini ra i kite i te au 'āpōsetolo i roto, kua 'oki atura rātou e 'akakite, 23nā kō atura, “Kua kite mātou ē, kua tōpiri mou meitaki'ia te 'are 'āuri, tē tū 'ua rāi te au tiaki i te pae o te au ngūtupa; inārā, i te 'e'eu'anga'ia ra, kāre rava 'e tangata e kitea'ia i roto.” 24Kia 'akarongo te rangatira o te 'iero ē te kau ta'unga nunui ra i te reira tuatua, kua vā ma'ata atura ē 'ēumiumi i'ora ē, 'e a'a tei tupu. 25Kua tae maira tēta'i tangata e 'akakite ki a rātou, “Inā, ko te au tangata tā kōtou i titiri atu ana ki roto i te 'are 'āuri, tē tū mai nei rātou i roto i te 'iero ē tē 'āpi'i maira i te tangata.” 26Kua 'aere atura te rangatira ma tōna au tāvini ē kua arataki maira i te au 'āpōsetolo, kāre rā ma te rima ririnui, nō te mea, kua mataku rātou i te 'iti tangata ko te pē'i'ia ā'ea rātou 'ua'orāi ki te toka.
27Kia arataki maira rātou i te au 'āpōsetolo, kua tuku atura i a rātou ki mua i te Sūnēderi, ē kua ui atura te Ta'unga Ma'ata ki a rātou, 28#Māt 27.25nā kō atura, “Kāre āinei mātou i 'akaue pakari atu ana ki a kōtou ē, auraka rava kōtou e 'āpi'i atu ma tēia ingoa nei? Ē inā, kua 'akakī kōtou i a Iērūsalēma ki tā kōtou 'āpi'i'anga, ē tē 'inangaro nei kōtou kia 'aere mai te toto o tēianei tangata ki runga i a mātou nei!”
29Kua pa'u maira a Pētero ē te au 'āpōsetolo, nā kō maira, “Kia kauraro'ia te Atua nā mua e tikāi, auraka te tangata ra. 30Nā te Atua o tō tātou 'ui tupuna i 'akatū mai i a Iēsū ki runga, tā kōtou i tāmate nā roto i te pātiti'anga ki runga i te rākau. 31Ko ia tā te Atua i 'akateitei ake nei ki tōna rima katau, 'ei arataki ē 'ei 'akaora mou, kia 'ōronga mai aia i te tatarā'ara ē te 'akakore'angā 'ara ki a Īserā'ela. 32Ko mātou nei 'oki te kite o tēia au tuatua nei, ē pērā katoa te Vaerua Tapu tā te Atua i 'ōronga mai ki te au tangata e kauraro atu nei i aia.”
33I te 'akarongo'anga rātou i te reira, kua riri tikāi rātou ē kua 'inangaro i te tāmate i te au 'āpōsetolo. 34Kua tū akera tēta'i Phārīsea ki runga i taua Sūnēderi ra, ko Gāmaliela te ingoa, 'e pū'āpi'i rongonui aia ē te 'akangāteitei'ia e te au tangata rava rāi. Kua 'akaue atura aia kia arataki'ia te au 'āpōsetolo ki va'o kia roa poto ake. 35Ē kua karanga atura aia ki te 'uipā'anga: “E te au tangata nō Īserā'ela nei, e matakite i a kōtou 'ua'orāi i tā kōtou ka rave ki tēnā na au tangata. 36I tēta'i tuātau i topa ki muri, i tū mai ana a Teuda ki runga ma te tuatua ē, 'e tangata ma'ata aia; ē mei te 'ā 'ānere pa'a tangata tei kāpiti katoa atu ki aia. Kua tāmate'ia rā aia, ē te kātoatoa tei 'āriki i aia ra, kua pue'urikiriki kē atura ia, pou tākiri atura. 37I muri ake i aia, kua tū maira a Iūda nō Galilea ki runga i te au rā o te tārē'anga, ē kua tāruru i te au tangata 'e mānganui ki muri i aia ra; kia mate rā aia ra, kua 'akanga'oro katoa'ia te kātoatoa tei āru atu i aia ra. 38Ē tēianei, tē karanga atu nei au ki a kōtou, auraka e tāmanamanatā i tēnā na au tangata, ē e tuku atu i a rātou; nō te mea, mē nā te tangata 'ua tēia 'akakoro'anga ē tēia 'anga'anga nei, ka ngaro 'ua ia; 39mē nā te Atua rā, kāre rava e rauka i a kōtou i te ārai i a rātou. Ko te riro ā'ea 'oki kōtou 'ei aronga tamaki atu i te Atua.”
Kua 'āriki atura rātou i tāna. 40Kua kāpiki 'aka'ou i'ora rātou i te au 'āpōsetolo, pāpā atura; e oti akera, kua 'akaue atura i a rātou, auraka rava e tuatua 'aka'ou atu i te ingoa o Iēsū, ē kua tuku atura i a rātou.
41'Aere atura te au 'āpōsetolo ma te rekareka mei kō mai i te Sūnēderi, i te mea kua manako'ia rātou e te Atua ē, e tau rātou i te tākinga kino'ia nō tōna ra ingoa. 42Ē kāre 'e rā i tukua e rātou i te 'āpi'i'anga atu ē te tūtū 'aere'anga atu i te tuatua meitaki ē, ko Iēsū, ko te Mesia aia. I 'akapērā 'oki rātou i roto i te 'iero, ē pērā katoa i tērā 'are ē i tērā 'are.
Iliyochaguliwa sasa
'Anga'anga 5: CIMRNT
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Cook Island Maori Revised New Testament © Bible Society of the South Pacific, 2021.
'Anga'anga 5
5
Ko Ānania rāua ko Saphīra
1Ko tēta'i tangata ra ko Ānania te ingoa, ma tāna va'ine ko Saphīra, 'oko katoa atura i tēta'i kāinga, 2ē kua 'akapae i'ora aia i tēta'i pae o te moni 'oko, ma te kite katoa o tāna va'ine, ē 'apai maira 'oki i tēta'i pae, ē tuku atura ki te pae vaevae o te au 'āpōsetolo ra. 3Kua karanga atura a Pētero, “E Ānania, 'e a'a a Sātani i 'akakī ei i tō'ou ngākau kia pikika'a koe i te Vaerua Tapu, ē i 'akapae ei koe i tēta'i tu'anga o te moni 'oko o te kāinga na? 4Kāre āinei nō'ou rāi te kāinga i mua ake i te 'oko atu'anga? Ē i muri ake i te 'oko atu'anga ra, kāre āinei tei a koe rāi te moni 'oko? 'E a'a 'oki koe i 'akatupu ei i tēnā na 'anga'anga ki roto i tō'ou ngākau? Ko te Atua 'oki tā'au i pikika'a, kāre ē ko te tangata 'ua.” 5Ē i te 'akarongo'anga mai a Ānania i taua tuatua ra, topa i'ora ki raro, unu'i rava akera. E roko'ia atura te kātoatoa tei 'akarongo ra e te mataku ma'ata. 6Kua tū akera te au tangata 'ōu ra, 'opa i'ora i aia, 'apai atura ki va'o, e tanu atura.
7Mei te toru pa'a ora i muri i'o ake, kua tomo maira tāna va'ine ki roto. Kāre 'oki aia i kite ake i tei tupu ra. 8Kua tuatua atura a Pētero ki aia, “E 'akakite mai ki āku, ko tēia āinei te tūtaki i te kāinga tā kōrua i 'oko atu?”
Kua pa'u maira aia, “Āe, ko tēia te tūtaki.”
9Kua tuatua atura a Pētero ki aia, “'E a'a kōrua i 'akatika ai i rotopū i a kōrua i te tīmata atu i te Vaerua o te Atua? Inā, tei te ngūtupa mai nei te vaevae o te au tangata i tanu i tō tāne na, ē nā rātou katoa koe e 'apai ki va'o.” 10Kua topa i'ora aia i reira rāi ki raro i tō Pētero vaevae, e unu'i rava akera. Ē kia tomo maira te au tangata 'ōu ra ki roto, kua kite atura i taua va'ine i mate ra, ē kua 'apai katoa rātou i aia ki va'o, ē tanu atura ki te pae o tāna tāne ra. 11Roko'ia atura taua 'ēkālēsia katoa ra e te mataku ma'ata, ē pērā katoa te aronga i 'akarongo i taua au mea ra.
Kua rave'ia te au 'akairo ē te au mea ūmeremere 'e mānganui
12'E mānganui te au 'akairo ē te au mea ūmeremere i rave'ia e te rima o te au 'āpōsetolo i rotopū i te 'iti tangata ra. Ē kua mātau te aronga 'akarongo kātoatoa i te putuputu mai ma te manako 'okota'i ki roto i te porotito o Sōlomona. 13Kāre tēta'i 'ua atu o te aronga kē ra i tae i te tōpiri atu ki a rātou; inārā, kua manako meitaki te tangata kātoatoa i a rātou. 14Kua kāpiti'ia atura te aronga tei 'irinaki i te 'Atu 'e mānganui, te au tāne ma te au va'ine katoa ra. 15Ē ko te 'openga i'ora, kua 'apai maira rātou i te aronga maki ki va'o ki te pae arāta'a ra, ē tuku atura ki runga i te au ro'i rikiriki ē te au ro'i 'apaipai ra, pēnei 'ua ake, ko te tāpoki'ia mai tēta'i o rātou e te ata o Pētero i tōna 'aere'anga mai nā reira a'o. 16Kua 'aere katoa maira te au tangata 'e mānganui nō te au 'ōire i vaitata ki Iērūsalēma ra ma te 'apai mai i te aronga maki ē te aronga i tāmanamanatā'ia e te au vaerua vi'ivi'i ra; ē kua 'akaora'ia rātou kātoatoa.
Te tākinga kino'anga'ia te au 'āpōsetolo
17Kua tae maira te Ta'unga Ma'ata ra ē te aronga katoa i kāpiti ki aia ra, koia 'oki te pupu o te au Sādukea ra; kua kī rava rātou i te vare'ae pukupuku, 18ē kua mou maira i te au 'āpōsetolo, titiri atura i a rātou ki roto i te 'are 'āuri. 19Nā tēta'i 'āngela rā a te 'Atu i 'e'eu i te au ngūtupa o te 'are 'āuri i te pō, ē kua arataki maira i a rātou ki va'o, nā kō atura, 20“E 'aere, e tū ki roto i te 'iero, ē e 'akakite atu ki te tangata i te au tuatua rava rāi o tēianei ora 'ōu.” 21Kua 'akarongo i'ora rātou, ē i te pōpongi 'ākirāta kua tomo atura ki roto i te 'iero ē kua 'akamata atura i te 'āpi'i.
Kia tae mai te Ta'unga Ma'ata ra ē te aronga i kāpiti ki aia ra, kua 'akaputuputu maira rātou i te Sūnēderi, koia 'oki te kōnitara pūpū o te au tamariki o Īserā'ela ra, ē kua tono atura i te au karere ki te 'are 'āuri e tiki mai i te au 'āpōsetolo. 22I tō rātou tae'anga atu ki te 'are 'āuri, kāre taua au tāvini ra i kite i te au 'āpōsetolo i roto, kua 'oki atura rātou e 'akakite, 23nā kō atura, “Kua kite mātou ē, kua tōpiri mou meitaki'ia te 'are 'āuri, tē tū 'ua rāi te au tiaki i te pae o te au ngūtupa; inārā, i te 'e'eu'anga'ia ra, kāre rava 'e tangata e kitea'ia i roto.” 24Kia 'akarongo te rangatira o te 'iero ē te kau ta'unga nunui ra i te reira tuatua, kua vā ma'ata atura ē 'ēumiumi i'ora ē, 'e a'a tei tupu. 25Kua tae maira tēta'i tangata e 'akakite ki a rātou, “Inā, ko te au tangata tā kōtou i titiri atu ana ki roto i te 'are 'āuri, tē tū mai nei rātou i roto i te 'iero ē tē 'āpi'i maira i te tangata.” 26Kua 'aere atura te rangatira ma tōna au tāvini ē kua arataki maira i te au 'āpōsetolo, kāre rā ma te rima ririnui, nō te mea, kua mataku rātou i te 'iti tangata ko te pē'i'ia ā'ea rātou 'ua'orāi ki te toka.
27Kia arataki maira rātou i te au 'āpōsetolo, kua tuku atura i a rātou ki mua i te Sūnēderi, ē kua ui atura te Ta'unga Ma'ata ki a rātou, 28#Māt 27.25nā kō atura, “Kāre āinei mātou i 'akaue pakari atu ana ki a kōtou ē, auraka rava kōtou e 'āpi'i atu ma tēia ingoa nei? Ē inā, kua 'akakī kōtou i a Iērūsalēma ki tā kōtou 'āpi'i'anga, ē tē 'inangaro nei kōtou kia 'aere mai te toto o tēianei tangata ki runga i a mātou nei!”
29Kua pa'u maira a Pētero ē te au 'āpōsetolo, nā kō maira, “Kia kauraro'ia te Atua nā mua e tikāi, auraka te tangata ra. 30Nā te Atua o tō tātou 'ui tupuna i 'akatū mai i a Iēsū ki runga, tā kōtou i tāmate nā roto i te pātiti'anga ki runga i te rākau. 31Ko ia tā te Atua i 'akateitei ake nei ki tōna rima katau, 'ei arataki ē 'ei 'akaora mou, kia 'ōronga mai aia i te tatarā'ara ē te 'akakore'angā 'ara ki a Īserā'ela. 32Ko mātou nei 'oki te kite o tēia au tuatua nei, ē pērā katoa te Vaerua Tapu tā te Atua i 'ōronga mai ki te au tangata e kauraro atu nei i aia.”
33I te 'akarongo'anga rātou i te reira, kua riri tikāi rātou ē kua 'inangaro i te tāmate i te au 'āpōsetolo. 34Kua tū akera tēta'i Phārīsea ki runga i taua Sūnēderi ra, ko Gāmaliela te ingoa, 'e pū'āpi'i rongonui aia ē te 'akangāteitei'ia e te au tangata rava rāi. Kua 'akaue atura aia kia arataki'ia te au 'āpōsetolo ki va'o kia roa poto ake. 35Ē kua karanga atura aia ki te 'uipā'anga: “E te au tangata nō Īserā'ela nei, e matakite i a kōtou 'ua'orāi i tā kōtou ka rave ki tēnā na au tangata. 36I tēta'i tuātau i topa ki muri, i tū mai ana a Teuda ki runga ma te tuatua ē, 'e tangata ma'ata aia; ē mei te 'ā 'ānere pa'a tangata tei kāpiti katoa atu ki aia. Kua tāmate'ia rā aia, ē te kātoatoa tei 'āriki i aia ra, kua pue'urikiriki kē atura ia, pou tākiri atura. 37I muri ake i aia, kua tū maira a Iūda nō Galilea ki runga i te au rā o te tārē'anga, ē kua tāruru i te au tangata 'e mānganui ki muri i aia ra; kia mate rā aia ra, kua 'akanga'oro katoa'ia te kātoatoa tei āru atu i aia ra. 38Ē tēianei, tē karanga atu nei au ki a kōtou, auraka e tāmanamanatā i tēnā na au tangata, ē e tuku atu i a rātou; nō te mea, mē nā te tangata 'ua tēia 'akakoro'anga ē tēia 'anga'anga nei, ka ngaro 'ua ia; 39mē nā te Atua rā, kāre rava e rauka i a kōtou i te ārai i a rātou. Ko te riro ā'ea 'oki kōtou 'ei aronga tamaki atu i te Atua.”
Kua 'āriki atura rātou i tāna. 40Kua kāpiki 'aka'ou i'ora rātou i te au 'āpōsetolo, pāpā atura; e oti akera, kua 'akaue atura i a rātou, auraka rava e tuatua 'aka'ou atu i te ingoa o Iēsū, ē kua tuku atura i a rātou.
41'Aere atura te au 'āpōsetolo ma te rekareka mei kō mai i te Sūnēderi, i te mea kua manako'ia rātou e te Atua ē, e tau rātou i te tākinga kino'ia nō tōna ra ingoa. 42Ē kāre 'e rā i tukua e rātou i te 'āpi'i'anga atu ē te tūtū 'aere'anga atu i te tuatua meitaki ē, ko Iēsū, ko te Mesia aia. I 'akapērā 'oki rātou i roto i te 'iero, ē pērā katoa i tērā 'are ē i tērā 'are.
Iliyochaguliwa sasa
:
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Cook Island Maori Revised New Testament © Bible Society of the South Pacific, 2021.