ܓܠܝܢܐ 1:5-14

ܘܥܲܠ ܝܲܡܝܼܢܵܐ ܕܗ̇ܘ ܕܝܼܗ݇ܘܵܐ ܝ݇ܬܝܼܒ݂ܵܐ ܥܲܠ ܬܪܘܿܢܘܿܣ ܚܙܹܐ ܠܝܼ ܟܬܵܒ݂ܵܐ ܟܬܝܼܒ݂ܵܐ ܡ̣ܢ ܠܓܵܘܹܗ ܘܡ̣ܢ ܠܒܵܬ݇ܪܹܗ ܘܚܬܝܼܡܵܐ ܒܫܲܒ݂ܥܵܐ ܚܵܬܡܹ̈ܐ. ܘܚܙܹܐ ܠܝܼ ܡܲܠܲܐܟ݂ܵܐ ܚܲܝܠܵܢܵܐ ܡܲܟܪܘܼܙܹܐ ܒܩܵܠܵܐ ܪܵܡܵܐ، ”ܡܵܢܝܼ ܝܠܹܗ ܚܫܝܼܚܵܐ ܕܦܵܬܹܚ ܠܟܬܵܒ݂ܵܐ ܘܫܵܪܹܐ ܠܚܵܬܡܹ̈ܐ ܕܝܼܹܗ؟“ ܐܝܼܢܵܐ ܐܘܼܦ ܚܲܕ، ܠܵܐ ܓܵܘ ܫܡܲܝܵܐ ܘܠܵܐ ܥܲܠ ܐܲܪܥܵܐ ܘܠܵܐ ܠܠܬܸܚܬ ܡ̣ܢ ܐܲܪܥܵܐ، ܠܵܐ ܡܨܹܐ ܠܹܗ ܠܸܦܬܵܚܵܐ ܠܟܬܵܒ݂ܵܐ ܝܲܢ ܠܸܚܝܵܪܵܐ ܒܝܼܹܗ. ܘܒܟܹܐ ܠܝܼ ܪܵܒܵܐ ܣܵܒܵܒ ܠܵܐ ܡܫ݇ܟ̰ܝܼܚ ܠܹܗ ܐܘܼܦ ܚܲܕ ܕܚܵܫܹܚ ܗ݇ܘܵܐ ܠܸܦܬܵܚܵܐ ܠܟܬܵܒ݂ܵܐ ܝܲܢ ܠܸܚܝܵܪܵܐ ܒܝܼܹܗ. ܗ̇ܝܓܵܗ ܚܲܕ ܡ̣ܢ ܚܘܵܪ̈ܕܸܩܢܹܐ ܐ݇ܡܝܼܪܹܗ ܐܸܠܝܼ، ”ܠܵܐ ܒܵܟܹܝܬ، ܗܵܐ، ܓ݂ܠܝܼܒ ܠܹܗ ܐܲܪܝܵܐ ܡ̣ܢ ܫܲܒ݂ܛܵܐ ܕܝܼܗܘܼܕܵܐ، ܥܸܩܪܵܐ ܕܕܵܘܝܼܕ. ܗ̇ܘ ܡܵܨܹܐ ܠܸܦܬܵܚܵܐ ܠܟܬܵܒ݂ܵܐ ܘܠܫܲܒ݂ܥܵܐ ܚܵܬܡܹ̈ܐ ܕܝܼܹܗ.“ ܘܚܙܹܐ ܠܝܼ، ܒܹܝܬ݇ ܦܲܠܓܵܐ ܕܬܪܘܿܢܘܿܣ ܘܕܐܲܪܒܲܥ ܚܲܝܘܵܬܹ̈ܐ ܘܒܒܹܝܬ݇ ܦܲܠܓܵܐ ܕܚܘܵܪ̈ܕܸܩܢܹܐ، ܦܹܐܪܵܐ ܟܸܠܝܵܐ، ܐܲܝܟ݂ ܦܪܝܼܡܵܐ. ܐܝܼܬ ܗ݇ܘܵܐ ܠܹܗ ܫܒܲܥ ܩܵܪ̈݇ܢܵܢܹܐ ܘܫܒܲܥ ܥܲܝܢܹ̈ܐ ܕܝܼܢܵܐ ܫܒܲܥ ܪ̈ܘܼܚܹܐ ܕܐܲܠܵܗܵܐ، ܫܘܼܕܪܹܐ ܓܵܘ ܟܠܵܗ̇ ܐܲܪܥܵܐ. ܐ݇ܬܹܐ ܠܹܗ ܘܫܩܝܼܠ ܠܹܗ ܠܟܬܵܒ݂ܵܐ ܡ̣ܢ ܐܝܼܕܵܐ ܕܝܲܡܝܼܢܵܐ ܕܗ̇ܘ ܕܝܼܗ݇ܘܵܐ ܝ݇ܬܝܼܒ݂ܵܐ ܥܲܠ ܬܪܘܿܢܘܿܣ. ܘܟܲܕ ܕܫܩܝܼܠ ܠܹܗ ܠܟܬܵܒ݂ܵܐ، ܐܲܪܒܲܥ ܚܲܝܘܵܬܹ̈ܐ ܘܥܸܣܪܝܼ ܘܐܲܪܒܥܵܐ ܚܘܵܪ̈ܕܸܩܢܹܐ ܢܦܝܼܠ ܠܗܘܿܢ ܩܵܕ݇ܡ ܦܹܐܪܵܐ. ܟܠ ܚܲܕ ܡܸܢܲܝܗܝ ܐܝܼܬ ܗ݇ܘܵܐ ܠܹܗ ܩܝܼܬܵܪܵܐ، ܘܦܝܼܠܵܣܵܐ ܕܕܲܗܒ݂ܵܐ ܡܸܠܝܹܐ ܒܸܣܡܵܐ، ܕܝܼܢܵܐ ܨܠܵܘܵܬܹ̈ܐ ܕܩܲܕܝܼܫܹ̈ܐ. ܘܫܲܒܘܼܚܹܐ ܝܗ݇ܘܵܘ ܬܸܫܒܘܿܚܬܵܐ ܚܲܕܬܵܐ، ܒܹܐܡܵܪܵܐ: ܐܲܢ݇ܬ ܝܼܘܸܬ ܚܫܝܼܚܵܐ ܠܸܫܩܵܠܵܐ ܠܟܬܵܒ݂ܵܐ ܘܠܸܦܬܵܚܵܐ ܠܚܵܬܡܘܼ̈ܗܝ، ܣܵܒܵܒ ܦܝܼܫ ܠܘܼܟ݂ ܦܪܝܼܡܵܐ، ܘܩܲܡ ܙܵܒ݂ܢܹܬ ܒܕܸܡܘܼܟ݂ ܐ݇ܢܵܫܹ̈ܐ ܩܵܐ ܐܲܠܵܗܵܐ ܡ̣ܢ ܟܠ ܫܲܒ݂ܛܵܐ، ܘܠܸܫܵܢܵܐ، ܘܛܵܝܸܦܵܐ، ܘܐܘܼܡܬܵܐ. ܘܥܒ݂ܝܼܕܲܝ ܠܘܼܟ݂ ܡܲܠܟܘܼܬܵܐ ܘܟܵܗܢܹ̈ܐ ܠܐܲܠܵܗܲܢ، ܘܒܸܬ ܥܵܒ݂ܕܝܼ ܡܲܠܟܘܼܬܵܐ ܥܲܠ ܐܲܪܥܵܐ. ܗ̇ܝܓܵܗ ܚܙܹܐ ܠܝܼ ܘܫܡܝܼܥ ܠܝܼ ܩܵܠܵܐ ܕܡܲܠܲܐܟܹ̈ܐ ܪܵܒܵܐ ܠܚܵܕܸܪ̈ܘܵܢܹܐ ܕܬܪܘܿܢܘܿܣ ܘܕܚܲܝܘܵܬܹ̈ܐ ܘܕܚܘܵܪ̈ܕܸܩܢܹܐ. ܡܸܢܝܵܢܲܝܗܝ ܪܸܒܘܿ ܪܸ̈ܒܘܵܢ ܝܼܗ݇ܘܵܐ، ܘܐܲܠܦܹ̈ܐ ܕܐܲܠܦܹ̈ܐ، ܒܹܐܡܵܪܵܐ ܒܩܵܠܵܐ ܪܵܡܵܐ: ܚܫܝܼܚܵܐ ܝܠܹܗ ܦܹܐܪܵܐ ܕܝܼܗ݇ܘܵܐ ܦܪܝܼܡܵܐ، ܕܩܲܒܸܠ ܚܲܝܠܵܐ ܘܥܘܼܬܪܵܐ ܘܚܸܟ݂ܡܬܵܐ ܘܥܘܼܫܢܵܐ ܘܐܝܼܩܵܪܵܐ ܘܚܸܩܪܵܐ ܘܒܘܼܪܟܬܵܐ. ܘܟܠ ܒܪܝܼܬܵܐ ܕܓܵܘ ܫܡܲܝܵܐ ܘܥܲܠ ܐܲܪܥܵܐ ܘܠܠܬܸܚܬ ܡ̣ܢ ܐܲܪܥܵܐ ܘܓܵܘ ܝܵܡܵܐ، ܘܟܠ ܕܐܝܼܬ ܓܵܘܲܝܗܝ، ܫܡܝܼܥ ܠܝܼ ܒܹܐܡܵܪܵܐ: ܒܘܼܪܟܬܵܐ ܘܐܝܼܩܵܪܵܐ ܘܫܘܼܒ݂ܚܵܐ ܘܚܲܝܠܵܐ ܠܗ̇ܘ ܕܝܼܠܹܗ ܝ݇ܬܝܼܒ݂ܵܐ ܥܲܠ ܬܪܘܿܢܘܿܣ، ܘܠܦܹܐܪܵܐ، ܠܥܵܠܲܡ ܥܵܠܡܝܼܢ. ܘܐܲܪܒܲܥ ܚܲܝܘܵܬܹ̈ܐ ܓ̰ܘܼܘܸܒ ܠܗܘܿܢ، ”ܐܵܡܹܝܢ.“ ܘܢܦܝܼܠ ܠܗܘܿܢ ܚܘܵܪ̈ܕܸܩܢܹܐ ܘܣܓ݂ܝܼܕ ܠܗܘܿܢ.