JENESIS 47

1Chidadege Josepbe tatgut lu ze Pharaobe je, “A peu benai a sikiname penui gu melidung benai getumdung penui gu kebambe leine tei lu Kanaanram gene wang la de lei; Goshenram ge chuna â penui la de lei,” kacheu de lei. 2Zai pe sikiname ruagene hangmengeu je pa ne Pharaobe dage ngualiâ bei de lei. 3Pharaobe ne pe sikiname je, “Ningnui ’ndaikau tâ tewbe kau ramme lau?” kacheu de lei. Zai penui ne Pharaobe je, “Anui peume ting ge gum ze, ning guâ ka’ngguame â melireîme bau de lei,” kacheu de lei. 4Pharaobe je penui ne, “Kanaanram ge herakûm ran-desangdibe ziegene ning guâ ka’ngguame ramme gu kaurui deteu gai ra ga di dadege anui â aipau ram ge lunglêu gai ra wang de lei; zai chunage ning dage anui kie lei, ning guâ ka’ngguame ramme je Goshenram ge lung ra pei lau,” kacheu de lei. 5Dadege Pharaobe ne Josepbe je, “Ning peu benai ning sikiname ning dage wang gai de lei. 6Ijipram dei ze â ning suage la de lei; ning peu benai ning sikiname je heram yilangbe ge lung ra reheî gai be lau; zai peize Goshenram ge lung zu lau; zai penui ruage mige mâ-luibe kau ziemmena bambe nang chî zai â a gu kaurui ramme peireige penui ne rezietei ze bam ra kai be lau,” kacheu de lei.

7Chidadege Josepbe ne pe peu Jakobbe je Pharaobe suage nguagut kai bei de lei, zai Jakobbe ne Pharaobe je ’nnam gai de lei. 8Zai Pharaobe ne Jakobbe je, “Nang keringbe tingkum ’ndaikie di de lau?” kacheu de lei. 9Zai Jakobbe ne Pharaobe je, “I ringbe tebeîtewbe tingkum â kum haî kat ze himreu de lei; a keringbe ting â dui, zai kesiabe ne pui ze dau de lei, zai a peume penui keringbe ting ge ringchanglube riâ â changlak ti de lei,” kacheu de lei. 10Zai Jakobbe ne Pharaobe je ’nnam gai lu, Pharaobe dagene zuapat dai di de lei. 11Chidadege Josepbe ne, pe peu benai pe sikiname lung ze bamrabe bâm hang reheî gai lu, Ijipram dei ge penui heu hang, heram yilangbe dei ge, Rameseram kedei ge, Pharaobe ne ranggaibe luigum ze penui je kai bei de lei. 12Zai Josepbe ne pe peu, pe sikiname, zai pe peu kiduîme hangge ziemmena riak luî gene pie ze penui hetak hang pei gai bei de lei.

Herakûm

13Chunage heram leine ge tak ga di de lei; herakûm ran-desangdibe ziegene Ijipram benai Kanaanram ze herakûm ziegene lunghereu-desang di de lei. 14Zai Ijipram benai Kanaanram lungge rangkâng ngaube leine penui chêu luibe mî hangge Josepbe ne kaigekua gai de lei; zai Josepbe ne chipau rangkâng ze Pharaobe ki ge teiwang gai de lei. 15Zai Ijipram ge benai Kanaanram lungge rangkâng hechaituakam’ndibe ting chang dege, Ijipme leine Josepbe dage wang lu acheu sa ze, “Anui je tak pei lau; ’ndaitew ra ning mikngau ge anui chai ra lau, anui gu rangkâng â ga di daseu,” kacheu de lei. 16Zai Josepbe ne kak ze, “Ningnui gu kaurui ramme pei lau, dezai ningnui gu rangkâng ga’nzâu di dezai â kaurui mî hangge I ne ningnui je tak ne hiak kai bu lei,” kacheu de lei. 17Dadege Josepbe dage penui gu kaurui ramme penui ne teiwang gai de lei; zai Josepbe ne hekun ramme, kaurui ramme, getum ramme, zai hekunmerângne ramme mî hangge penui je tak ne hiak kai bei de lei; zai chipau kum ge kaurui ramme leine mî hangge tak ne penui je pa ne pei de lei. 18Zai chipau kum ze kam dege, chipau chaibe kum ge penui pe dage wang ze, acheu sa ze, “Anui gu rangkâng â hechaitua kam ’ndi de lei be penui pau suagene ’ngkim ra mak lei; zai kauruidung ze â a pau gu chang de lei; anui pum ramme benai anui gu kedei ramme zangno, a pau mikngau ge mâ de anui ’nsakkaibe ga de lei. 19’Ndaitew ze ning mikngau gene anui chai gai, zai anui benai anui ram ga gai ra lau? Tâk mî hangge anui benai anui gu kedei lui le lau, dezai anui benai anui gu kedei ze Pharaobe gu kebang ramme chang ra de lei, zai anui chai mak ze ring le ra hang anui je helei pei lau chidezai heram ze put-hâmmuîgai’ndibe chang mak ra hangge zeu,” kacheu de lei.

20Penui dage herakûm ran-desangdibe ziegene Ijipme leine penui gu helu ramme zua bei dadege, Ijipram gu kedei leine Josepbe ne Pharaobe hangge lui ’ndi de lei. Heram ze Pharaobe gu chang di de lei; 21zai Ijipram pedit-petâ luî pa ne ziemmena ramme je kebang ramme hang tew gai bei de lei. 22Tingkume gu kedei runne pa lui mak te lei; tingkume â penui dam hang riagaibe Pharaobe dagene ngau daseu, zai Pharaobe ne penui je peibe penui dam gene penui â teu ze bam de lei; chipauziegene penui â penui dei zua mak te lei. 23Chidadege ’nteumena je, “Pie le lau, nemai ge I ne Pharaobe hangge ningnui benai ningnui ram luî lui ’ndi de lei. Chunage aige ningnui hangge helei la lei, zai ningnui ne helu ge hetâ ta ra de lei. 24Zai helugatbe ting dezai Pharaobe hangge tûm mengeu pei ra lei, zai tum mengeu ge tûm medai ning hang chang ra lei, chize helei mî hang zai ningnui benai ningnui kiduîme zai ningnui name hetak hang de lei,” kacheu de lei. 25Zai penui ne, “Nang ne anui je tew’nring gai bei de lei; a pau ne ’nchâ zai â, anui Pharaobe gu kebang ramme chang gu lei,” kacheu de lei. 26Chidadege Josepbe ne, Ijipram gu kedei deu ge hingde tew gai de lei, zai chuna ting riâ chang ze Pharaobe ne pamengeube tûm â lu ra lei be hingde tei gerei de lei; tingkume gu heram runne Pharaobe gu chang mak te lei.

Jakobbe ne Gekiambe Nâlangbe

27Chigum ze Ijipram lung Goshenram ge Israelbe lung di de lei; zai chige penui keheube chang di de lei, zai misongga ze pung-ze-sa ze bam di de lei. 28Zai Ijipram ge Jakobbe kum kereu ze sena bam gai de lei; chidadege Jakobbe keringbe tingkum â kum haî kat ze hedai ze sena chang di de lei. 29Zai Israelbe chairabe ting nawang di dege, pe na Josepbe je pa ne kû lu, pechu acheu ze rang gai de lei, “Nang ne achu ka’nchâ zai â a bak ge ning ba kai lau, zai hekuâpheube benai lungsang tâ a peireige tew gai gu lei be deseu lau, Ijipram ge achu bai gai se lau, 30kane a peume dage achu ’njei gai be lau; Ijipram gene achu hela ’mbe puapat lu penai je baigaibe bâm ge achu bai gai lau,” ze acheu zeu. Josepbe ne kak ze, “Nang ne ranggaibe luî I tew gu lei,” kacheu de lei. 31Zai Jakobbe ne, “A dage deseu gai lau” kacheu de lei; zai pa ne pe dage deseu gai de lei. Dadege pe jeîpeî ge Israelbe kei’ngkum gai de lei.

Iliyochaguliwa sasa

JENESIS 47: ZEMEBSI

Kuonyesha

Shirikisha

Nakili