Mistari Maarufu ya Biblia kutoka Lucas 6

Shirikisha

Marĩ hã dama 're sõmri za'ra wa'aba mono. Tawamhã 'Re ihâimana u'âsi mono hã te za marĩ te te aima 're anhomri 'wa. Sõprub uptabi na te za aima 're hâimana za'ra wa'wa. Duré marĩ iwẽ te te aima 're i'apisutu aba mono hã ahâ uptabi di za. Tawamhã asib'ratamhã 're 'wasari waihu'u aba mono õ di za. Aihâimana wẽ na duré asõprum na dama 're i'aihâimana za'ra wa'aba mono zéb zarina, te za taha zarina aima 're hâimana za'ra wa'wa, 'Re ihâimana u'âsi mono hã.

Ni'wa hâimana wẽ wamhã, marĩ iwẽ te za te te 're azani tipẽ'ẽ hawi, marĩ iwẽ si te te 're i'a'ubumroi mono zém hawi. Tane duré ni'wa wasété na hâimana wamhã, marĩ iwasédé te za te te 're azani tipẽ'ẽ hawi, marĩ iwasété si te te 're i'a'ubumroi mono zém hawi. E marĩ wa. Dapẽ'ẽ 're, 'masisi na dama 're ihâimana za'ra mono zéb zarina si, 're damreme zusi mono wa.

Tane nherẽ, a norĩ wa'wa hã, ma'ãpé dawa'rãmi 're 'manharĩ za'ra wa'aba mono. Asitob'ru norĩ hã 're sawi pese za'ra wa'aba mono. Marĩ iwẽ hã tãma 're 'manharĩ za'ra wa'aba mono. Duré rob'uiprazé tãma 're sõmri za'ra wa'aba mono, iwa'rãmib zô 're asimipari za'ra wa'aba mono ãna. Tawamhã aipawa'â za iwaibui wa'wa hã, sa'ẽtẽ uptabi di za. Uburé Danhipai u 're Ihâimana mono 'ra na te za duré 're aihâimana za'ra wa'aba mo. E marĩ wa. Ta hã simizawi pese uptabi wa, da'ãma 're isina waihu'u mono õ norĩ ma hã, duré wasété na 're ihâimana za'ra mono norĩ ma zama.

Da'ãma 're aiwamri za'ra wa'aba mono, Aimama 'wa hã ai'ãma 're isiwamri za'ra wa'aba mono ne.

— Dawasédé hã da'ãma 're sa'ra wa'aba mono tõ. Tawamhã 'Re ihâimana u'âsi mono hã aiwasédé te te ai'ãma 're sa'ra wa'aba mono õ di za. Duré 're dapisutu za'ra wa'aba mono tõ, da te 're i'upa za'ra mono na. Tawamhã 'Re ihâimana u'âsi mono, ãne hã te te duré 're aipisutu za'ra wa'aba mono õ di za. Duré dawasédé hã da'ãma 're 'madâ'â za'ra wa'aba mono tõ. Tawamhã 'Re ihâimana u'âsi mono hã aiwasédé te te ai'ãma 're 'madâ'â za'ra wa'aba mono õ di za.

— Tane nherẽ, wa za ãne aima roti za'ra wa'wa, asiwi ĩwapari aba norĩ hã: Ma'ãpé asitob'ru norĩ hã 're sawi pese za'ra wa'aba mono. Duré ai'ruiwapari'wa norĩ ma, marĩ iwẽ si 're 'manharĩ za'ra wa'aba mono. Marĩ iwẽ hã tãma 're pisutu za'ra wa'aba mono, marĩ iwasédé te te aima 're ipisutu za'ra wa'aba mono norĩ ma hã. Duré ãma 're rowaptẽrẽ za'ra wa'aba mono, te te aima 're irob'manharĩ wasété za'ra wa'aba mono norĩ ãma hã.

Marĩ hã da te aima 're 'manharĩ wẽ za'ra wa'aba mono da, asima 're iwẽ za'ra wa'aba mono zéb zarina, te za tô taha zarina dama 're i'manharĩ wẽ za'ra wa'aba mo.

Ni'wa hã ai'ubu wi te te ai'azâri wamhã, tãma aipi'ra na, ihâiba amoi niwĩ te te duré ai'azâri da. Duré ni'wa ai'uza ihâpa asi'ubuzé hã te te aiwi âri wamhã, tiwi sawi tõ. Te te duré âri, ai'uza ihâpa i'rowibzéb zama. Siwa'ru marĩ hã da te aiwi 're waptẽrẽ za'ra wa'aba mono wamhã, tô dama 're sõmri za'ra wa'aba mono. Duré marĩ ate nherẽ, da te aiwi âri wamhã, apâ hã dawi waptẽrẽ tõ.

— Rowede hã wede wẽ wamhã, 'rãi wasété na 'rãi waihu'u õ di. Tane duré rowede wede wasété wamhã, 'rãi wẽ na hã 'rãi waihu'u õ di.

Uburé rowede norĩ hã te za i'rã na da te 're waihu'u za'ra. Ni'wa hã wab'ru na, rob'rã figu te te tari waihu'u õ di. Tane duré uva hã ni'wa te te tari waihu'u õ di, 'wabzéré na hã.