Mistari Maarufu ya Biblia kutoka Exodus 10

Shirikisha

Biyapul Garrayyu djuy'yurruna maṉḏanha Mawtjitjnha ga Yärunnha bitjarra, “Gatju biyapul marrtjiya bala buŋgawawala, liŋgu ŋarra ŋanya ŋunhiyi ŋayaŋu ḏälkuŋala, märr yurru ŋarra biyapulnha walŋu dharrpal rom djäma dhiyala wäŋaŋura, märr yurru bukmakthuna yolŋuyu walalay nhämanydja. Walala yurru yukurra ḻakarama walalaŋgalaŋuwu yumurrku'wuna ga gutharra'mirriŋuwuna walalaŋgu, ḻakaramana walala yurru yukurra ŋunhiyi ŋarrakuŋu djämanydja, ŋunhi ŋarra nhaltjarra djäma Yetjippuyŋunha yolŋunha walalanha, märr yurru nhumanydja marŋgiyirri ŋarraku, ŋunhi ŋarranydja yuwalk yana Garray.” Ga bitjarrayi ŋayi Garrayyu ḻakaraŋalanydja.

Bala Garrayyu waŋana Mawtjitjnha bitjarra, “Waṉa-garrwarthiya djiwarr'lili, bala yurru wäŋanydja dhuwala buku-ḻiw'marama munhayuna monyguma.” Ga yuwalkthi Mawtjitjtja waṉa-garrwarthina djiwarr'lili, bala marrtjina munhanydja yupthurruna, bena dhika warumukthinana, ḻiw'maraŋalana ŋunha Yetjiptja, warrpam'nha warumukthina. Yolŋu'-yulŋunydja yakana ŋula nhänharamina, ga yakana walala dhawaṯthurruna ŋula warraŋullilinydja, liŋgu warumuknha yukurrana djingaryurruna ḻurrkun' walunydja ŋupara. Yurru Yitjuralpuyŋunydja bäpurru yukurrana nhinana baḏayalaŋura warray.

Bala Mawtjitjtja waṉa-garrwarthina goŋ-wapitja'mirri, bala Garrayyunydja djuy'yurruna dhaŋaŋnha dhika ḏetj, bala walala marrtjina bunananydja, marra-muk bitjarra, ŋunhala wäŋaŋura Yetjiptja, bala ŋayi ŋuriŋiyi ḏetjthunydja warrpam'nha wäŋa ŋunhi munathany'tja gungaŋala, bala walala marrtjina ḻukanana mulmu, man'tjarr, borum dhika nhä djarwatkuŋalana.