Lala NT

Ngawa Tadkoma u nkaadǝng yisti semra wa, ɓaa Yahudawa ǝn yarme hiira Tadko ǝn wowo, Kuɓsa nek mbusa sa ma malǝmaa fǝɗkǝra Musa sa ɓǝn kǝr ɗǝɗa ɓǝkaa tom ɓa ma Yeso ra, pa ɓǝn kura kokto ɓeta wa. Pa Kuɓ Nsaa wa yǝ kanaa Yahuda Iskariyoti ni, ya ɓan yarsǝsǝ me, ya fin a ɗaaso emfǝɗkaa puu nhaa raɓ ɓa. Pa Yahuda yǝ ko a kuɓsa nek mbusa sa ma ɓan sengge Hit Kaa wa ɓa yǝ kan ma ɓosa mbu yǝka tom ya fang Yeso ɓa. Ɓǝ kura maa nepto ya ɓǝ yauwan me ɓekaa na koɓa. Yahuda yǝ yawan yǝ ti senda yǝn kǝrsǝ ɗǝɗa yǝkaa tom yǝɓǝ na Yeso a nema ya a fer ɓeta kaura wa.

Pa ka nkaadǝng yisti semra ɓa wosǝ wa u ɓan todsǝ tǝmnka ɓǝ se ɓa tom tadko wa. Yeso ya timi Bitrus ma Yohanna yǝɓǝ nkee me, “So kosǝdǝ sǝk ham kǝɗa se mbuseya tadkoɓa.” “Ngǝn ta me kotǝ sǝk hamsa nau?” Ɓa taa.
Ya kakka, “Me sǝ kan a urun pararakǝra kiya wo ma sǝɗaa a ɗuura me yǝ won sa bǝɗɗǝ a hit kiya kan wa, sǝ nkee An taanda ya me, ‘Malǝm nkee me, ham ham waa ɓa nau, ham kǝna se mbu tadki ya ma emfǝɗkaa ɓǝna ɓa?’ Ki yǝsǝ weɗa wiine hito ɓoti wa ya sǝksǝ kwalari. Sǝ kǝn kǝnso.”
Ɓǝ ko sǝwa, koɓǝ ta mbusa nga Yeso nkee ɓǝsǝ wa, pa ɓǝ wǝrkǝ Mbukamsa Tadko ma kaɓa.
Fer usu kansǝwa Yeso ma ɓahona sisa ɓǝ kaɗ me ɓǝkǝ se mbuseya. Pa yǝɓǝ nkee me, “Nǝn ta me nǝ se mbuseya tadko ɓa ma sase pa nǝ wee kongsa. Nǝn nkeesǝn nkee, na se ɗǝm ra me fer maar tadko sǝra kunggun a kuɓsutu Kaa wara.”
Yǝ tosǝ kofi wa yǝ na himara Kaa yǝɓǝ nkee me, “Sǝ kono sǝ ɓaa a ɗaaso waso. Nǝn nkeesǝ me nǝ ɓaarǝ nǝ we em ngwate ɓa ra me ka kuɓsutu Kaa ɓa wosǝra wa.”
Yǝ too nkaadǝng yǝ na himara yǝ ɓaa yǝɓǝ na yǝn nkee me, “U nwa ndǝ maabiri yaane, u ɓaa nasǝ a ɗuura saa wa. Sǝ tom maaso me sa ɗim ma niina.”
Maaso ɗǝm, ndiira se mbuseya sǝsa wa, yǝ too kofi, yǝ nkee me, “Kofi ya, ndǝ nfiinfiira waa ra, ma monma naa u ɓaa tuksǝ a ɗuura saa wa. Pa ya kǝyǝ nǝsǝ nfang ya yǝn se mbuseya kee ma niina. Au Ete ya kiya ko nga kaa yausǝ wa, pa mbu manyamanyato ɓa, a yaa yǝ pangsǝsǝ ya.” Ɓǝ tii ta ɓaatǝwa me yakǝ tom mbusa niu?
Pa renǝta a nii a ɗaaso emfǝɗkaa me ndǝ yamni kiya kaɗ ya kwang yau. Yeso yeɓǝ nkee me, “Kuɓsa ɓaa ɓǝn Yahudawa ra ɓa, ɓǝn weɗa kwangto kuɓsutu wa a ɗuura ɓaa ɓǝn tom ɓǝsǝ kuɓsutu ɓa, ɗǝm ɓaa kwang kwang ɓosa ɓǝn yar nkweera ɓora me, ‘ɓǝn ɓen kwasira ɓeta ɓa.’ Pa waaso sǝ kaɗ maaso ra, me maaso a lee yaa yǝsǝ kwang a ɗaaso waaso ya, yǝ kang nga yaa ngeek ya. Pa yaa yǝn tomsǝ kuɓsutu ya, yǝ kang nga hoora. Pa ndǝ yamni yǝsǝ kwang ngǝu yayǝ kaɗsǝ a ham se mbuseya ɓau hana yayǝn nasǝ mbuseya yau? Ən ya yǝ kaɗsǝ a ham se mbuseya ɓa rau? Pa na ɗaaso waso nga yayǝn nasǝ mbuseya ya. Ən saase sǝ nǝɗsǝ a ndiira na a fer mǝkǝta naa wa. Nga paane yǝ nanǝsǝ kuɓsutu nǝn nasǝ maaso kǝn. Me sǝ se sǝ wee a ham kaɗɗa kuɓsutu waano ɓa sǝ kǝ kaɗ a ham kaɗ kuɓsa ɓa, sǝn kankiita tuwa pu a nhaa raɓ u Isra'ila wa.
“Siman, Siman Kuɓ Nsaa wa yǝ ta me yǝsǝ ree nga alkama. Pa nǝ tom kǝnara a ɗuura ngaan Siman me ɓongtǝra nga ngǝ tom ngeek ra. Pa me ngǝ kangan ngǝ kwasi ɓaata ɓǝnga.”
Pa yǝ kakka, “Ankundi, nǝ yauwan me nǝ ko a kurung hana woɗa.”
Yeso yaa kak me, “Nǝn nkee ngǝ Bitrus, naso, me ǝn nkee me kokra ǝn pa pomra ya, kǝngǝ nǝ renǝ a kan taatǝn, me ngǝ maa nǝ ra.”
Pa Yeso yǝɓǝ taa, “Nǝ timi sǝsǝ koɓa, taa, hana ɓukra semra wa, ǝn mbi sǝ ta rau? Ɓǝ kak me.
“Ən mbuka ra.”
Yǝɓǝ nkee me, “Pa nawa me sǝma ɓukra sǝ too hana koɓa ɗǝm me sǝ sem ma empaame ra sǝ fang lukta sǝsa saa tiri fin. Nyorsǝ me, ‘Ɓaa kwaasǝ ke ma ɓan tǝblǝ mara ɓa,’ pa nǝn nkeesǝ me mbu ɓa me kugun a nanin. Ee nwa mbu ɓaa nyorsǝ a ɗuura nara ǝn kan kana a fer kungkung usu.”
Emfǝɗkaa ɓǝsa ɓǝ nkee me, “Ankundi empaame raɓ wa.”
Yǝ kak me, “Usu maan.”

Yeso fiɗ taadi nga u nfee wa a Yol Zaitun wa, pa emfǝɗkaa ɓǝsa ɓaa bǝɗɗǝ. Yǝ kansǝ a ham ka ɓa wa yǝɓǝ nkee me, “Sǝ toma kǝnara me tom sǝ kan a han pǝtara ɓa ra.” Yǝɓǝ lee ngeek nga ɓa mudkǝ kudara a wii ɓoso yǝ kwǝrsǝ yǝ toma kǝnara, “Paapa me ngǝ yauwan a too kongsa a nani ɗǝm a tom mbu ngǝn yausǝ ɓa, pa sem mbu nǝn yausǝ ɓa ra.” An timira Kaa ya yǝ wo a sani yǝn kwasisǝ. Me ya kongsa ya ɓaarǝ yǝ tom kǝnara ɓong ɓong, pa yalma ima ǝn roo nga roo modma wa a putu.
Yǝ nisǝ a kǝnara wa ya kan a emfǝɗkaa ɓǝsa ni yǝɓǝ woɓa munda me kuɗa tǝblǝ ɓǝn. Yǝɓǝ ta me, “Sǝn tǝr munda me ǝn mbiu? Sǝ ni sǝ tom kǝnara me tom sǝ kan a han pǝtara ɓa ra.”

Yeso yǝsǝ ding a kanmǝra wa, ɓeta dem ɓǝ wo, pa eɗ ke yarsǝ me Yahuda fin a ɗaaso emfǝɗkaa puu nhaa raɓ sǝɓa, ya wiiyo ya wo kwang ma Yeso ya ma kwektek. Pa Yeso yaa ta, “Yahuda kǝn fang Au Edteya ma maa kwektek wau?”
Emfǝɗkaa Yeso ɓa ɓǝ wǝrsǝ mbu ɓa kasa tom ɓa wa ɓǝ nkee me, “Ankundi tǝ haa empaame tǝɓǝ tikkiu?” Pa fin a ɗaaso ɓoso ya tiki hoora kuɓ kwang nek mbusa ya, yaa ɗaɗ ngwee a seya ya.
Pa Yeso ya kakka, “Sem maaso ra!” Pa ya ntee ngwee eɗ kaya ya yaa roɓo.
Pa Yeso ya nkee kuɓsa nek mbusa sa ɓa, ma ɓan sengge Hit Kaa Urshalima wa ɓa ma ɓaa kwang kwang u ɓǝ wosǝ me sasewa, “Nǝn an tang mbusa yau sǝ wosǝ ma empaame ma kwalanga wa? A handa weeya nǝ ke ma sase a tanda Hit Ɓet Kaa Urshalima wa, pa sǝ manǝra. Pa ngawa ǝn fer waso fer ham teptep ɓa yǝsa kuɓsutu wa.”

Pa ɓǝsa kosǝ a hit kuɓ kwang nek mbusa ya ni. Bitrus yaa bǝɗ ndiira. Pa ɓǝ neksǝ ara a ɗaaso taanda wa ɓǝ kaɗ a ham fiina pa Bitrus yǝ kaɗ ke ma ɓosa. Nhora autoone ke yaa wǝrǝ kǝnso a ham ɓa neksǝ ara sǝɓa ya ko kwang ma sase. Yaa sengge ya nkee me, “Eɗ ɗa kayǝ ke ma sase.”
Pa ya renǝ, yaa nkee me, “Toone niina nǝ masǝra.”
Kaɗsǝ ngeek wa atike ɓol yaa wǝrǝ ya nkee me, “Ngase kǝn ngǝ ke ma ɓosa.”
Bitrus ya kak ya nkee me, “Ete nǝ nasera.”
Kaɗsǝ singǝ wa atike woya sengge ya nkee me, “Ɓong eɗ ɗa yǝ ke ma sase me yǝn yaa Galili ya.”
Bitrus ya kakka, “Ete, nǝ ma mbu ngǝn nkesǝnke ɓa ra!” Nga yǝn kansǝnkan wa, kokra ya pa pomra. Ankundi ya kǝrtǝ ya sengge Bitrus a nuuwa. Pa Bitrus yǝ ɗim ma mbu Yeso nkee sǝsǝ ɓa me, “Meen nkee me kokra kiya paa pomra naso, kǝ ngǝ nkee me ngǝ maa nǝra a kan taatǝn” Pa yǝ fiɗ taandi yǝ tee dem. Pa Bitrus yǝ ko taandi yǝ tee kwalakwala.

Ɓaa ɓǝn warsǝ wanda Yeso ɓa ɓaa ntii nhuura ɓǝ hoɓsǝ. Ɓǝ kaasǝ mbuka a ota ɓaa nkee me, “A nawanto ya hoɓ ngǝ niu?” Ɓaa nkee mbu tenatenato ɓa ma sǝrma.

Handa weesǝwa ɓa kau wiina ɓeta ɓa nsaad ma kuɓsa nek mbusa sa ma malǝmaa masaka sa ɓǝ fama, pa ɓa ko ma Yeso a wiiyo ɓoni. Ɓaa nkee me, “Me ngǝn Almaseho tǝn nkee.”
Yeso ya kakka, “Menǝ nkeesǝ sǝ na ɓongtǝra ma mbu nǝ nkesǝsǝ ɓa ra. Pa menǝ tasǝ sǝnǝ kak ra. Pa waso ma ko a wiiyo, Au Ete ya kiya kaɗ a nem seya Yaa kwang ya Kaa.”
Ɓǝ ta nsaad, “Ya ngǝn Au Kaa yau?”
Ya kakka, “Sǝ nkeen keke me nǝn nase.”
Pa ɓǝ nkee me, “Ya Ən mbi ndǝn kǝrsǝ a ɗuura ira ɗǝmǝu? Ndǝ kuran a ee isi.”

Sikiliza Luka 22