If you would like a copy of this version please contact info@davaraudiobibles.org

Lhomi New Testament

हुनी येशु लदोक् दीनी मल्‍ल भप्‍न युङ्‌नी, हुनी खोङ्‌गी तीङ्‌ल मी छेत्‍मीत् युङ बेत्। हुनी जीस्‍सो़ च्‍यीक् येशु च्‍याल युङ्‌न खोङ्‌ल छ्‌यक् छेन हीन्‍दुक् झ्‍यीब बेत्। चोव ज्‍यीन्‍दक् नीज्‍यरङ्‌गी थुल यो़त्‍न, ङे नज हीगो ढक्‍तु ची़त्‍न चङ्‌मल सो छुगेन् बेत् सीन्‍न स्‍यी़ब बेत्। हीनी येशुगी खोङ् रोरङ्‌गी लक्‍प दी च्‍यङ्‌न हुगी जीस्‍सो़ दील रेक्‍न रङ् ढक्‍तु ची़च्‍च्‍ये ॱनो़ब यो़त्। रङ् हीगी नज हीनी ढक्‍न चङ्‌मल ज्‍युक्‍च्‍यीत् सीन्‍न ॱसुङ बेत्। हुनी ॱस्‍यर्च्‍यक् हुगी जी नज दी ढक्‍न चङ्‌मल ॱसोङ बेत्। हुनी येशुगी हुगी मी दील रङ् ढक्‍पे केच्‍च्‍य हीगो ॱसुल आक् ॱमत् ॱस्‍यो़प्‍प, स्‍युङ्‌ज्‍योङ् छ्‌यो़प्‍पो़न् च्‍याल ज्‍युक्‍ल रङ् दीम्‍बरङ् ढक्‍प दी मी कुरीक्‍की ॱह घोज्‍ये यो़प्‍पल रङ्‌गी सी़बु दी छ्‌यो़प्‍पो़ल्‍ल तो़ल्‍लेत्। हुनी मोशागी कल यो़प्‍पल रङ्‌गी नज ढक्‍पे ढीक्‍ल को़न्‍ज्‍योक्‍ल छ्‌यो़प्‍प पुलेत् सीन्‍न ॱङान तङ बेत्।

हुनी येशु कफर्नहुम्‍गी सार्की नङ्‌ल स्‍युनी, हुदु खोङ् च्‍याल ॱमक्‍पो़न् च्‍यीक् युङ्‌न हुगी खोङ्‌ल हीन्‍दुक् सीन्‍न स्‍युदेन् ज्‍यब बेत्। चोव ज्‍यीन्‍दक् ङे खीम्‍न ङे ॱयोक्‍पु च्‍यीक् घोङ्‌न नस्‍सी नन सुक् गन्‍दीक्‍म ज्‍यक्‍कीन् यो़त्। हीगी लेल्‍ल येशुगी ङ युङ्‌न ङे ढक्‍तु ची़त् योङ् झ्‍यीब बेत्। ॱनी हुगी ॱमक्‍पो़न् दीगी खोङ्‌ल चोव ज्‍यीन्‍दक् नीज्‍यरङ् ङे खीम्‍गी नङ्‌ल झ्‍यो़म्‍बल ओ़ब च्‍येम्‍मे मी ङ मेन्। नीज्‍यरङ्‌गी ढक्‍ल ज्‍युक् सीन्‍न छीक् च्‍यीक् ॱसुङ्‌नरङ्, ङे ॱयोक्‍पु हुगो ढक् डोगेन् बेत्। ङरङ् अङ् ॱयोङ्‌गी ॱवङ्‌गी होक्‍ल दो़क्‍को़त्। ॱनी ङरङ्‌गी ॱवङ्‌गी होक्‍ल अक् ॱमक्‍मी गज्‍येन् यो़त्। च्‍यीक्‍ल ज्‍युक् सीन्‍न डोगेन् बेत्। ॱनी यङ् च्‍यीक्‍ल ॱस्‍योक् सीन्‍न युङ्‌गेन् बेत्। ॱयोक्‍पु च्‍यीक्‍ल हीगो झ्‍यी सीन्‍न झ्‍यीक्‍केन् बेत् सीन्‍न झ्‍यीब बेत्। ॱनी हीगी केच्‍च्‍य हीगो घोनी येशु हील ॱह लेब बेत्। हुनी उन खोङ्‌गी तीङ्‌ल युङ्‌गेङ्‌गी मी घयेत् दील खोङ्‌गी हीन्‍दुक् ॱसुङ बेत्। ङे खीत्‍रङ्‌ल गन्‍दीय ॱस्‍येत् योङ्। नुक्‍मे छ्‌य ज्‍यीक्‍प स्‍योक्‍केङ्‌गी मी ङे इस्राएली घयेक्‍की घुङ्‌दु उक् थोङ्‌मोङ्। ङे खीत्‍रङ्‌ल ॱस्‍येत् योङ्। ॱस्‍यर् धङ् नुप्‍नी मी गज्‍येन् युङ्‌न को़न्‍ज्‍योक्‍की स्‍यालक्‍ल इगी तेङ् यी़गी ज्‍यागक्‍तु अब्राहाम्, इसहाक्, ॱनी याकुब्‍दङ् दल दो़च्‍च्‍ये ॱनोङ्‌गेन् बेत्। ॱनी ॱलीत् गो़गेन् ज्‍यागक्‍की मीस्‍सीर् घयेत् दी हुनी छ्‌यील मेन्‍नक् ॱनक् थीङीयल पुर्केन् बेत्। हुदु ङुजी ज्‍यक्‍केन् धङ् ॱसोन्‍जीन् डीक्‍केन् युङ्‌गेन् बेत्। हुनी येशुगी हुगी ॱमक्‍पो़न् दील रङ् लोक्‍ल ज्‍युक्। रङ्‌गी ङल छ्‌य स्‍यक्‍प दी डस्‍सीरङ् डुप्‍च्‍ये यो़प्‍प ज्‍युक्‍च्‍यीत् झ्‍यीब बेत्। ॱनी हीगी छो़त् दीलरङ् हुगी ॱयोक्‍पु दी ढक्‍नर हीङ्‌गो़प्‍प बेत्।

हीनी येशु पत्रुस्‍की खीम्‍ल फीन्‍न नङ् दील स्‍युनी, उन पत्रुस्‍की ज्‍युक्‍मु दी ढो़त् बर्न ना दो़प्‍प ठेप्‍प बेत्। ॱनी येशुगी हुगी लक्‍प दील रेक्‍नी, हुगी ढो़त् दी छ्‌यक्‍नर बेत्। हुनी हुगो लोङ्‌न येशुसोल स्‍यप्‍च्‍यी़ ज्‍युब बेत्।
ॱनी हुगी गोङ्‌ज्‍यो दी हुदु येशु च्‍याल ॱनो़प्‍प अयेक्‍प स्‍यीन्‍नरे मी गज्‍येन् ठीक्‍न युङ बेत्। ॱनी येशुगी हुगी ॱनो़प्‍प घयेत् दी खोङ्‌गी ॱसुङ्‌स्‍येक्‍की तो़न्‍न दीत् तङ बेत्। ॱनी हुदु नेप्‍प युङ घयेत् दी इक् खोङ्‌गी ढक्‍तु ची़प्‍प बेत्। हीगो कलुङ् ॱस्‍यो़क्‍केन् यशैयागी ॱसुङ्‌रप्‍ल थो़ङ्‌गेन्
ङीक्‍की नज घयेत् कुरीक् ङीक्‍की ज्‍यप्‍नी या टेन खोङ्‌गी खुर बेत् सीरे केच्‍च्‍य दी डुबल येशुगी हुन्‍दुक् जेप्‍प बेत्।

हुनी तीङ्‌ला येशुगी उन छो़ छीगन मी छेत्‍मीत् यो़प्‍प थोङ्‌नी हुनी रोरङ्‌गी ॱलोप्‍टुक् दीबल ह हज्‍यरङ् हीगी छो हीगी पारील डो सीन्‍न खक्‍को़ ज्‍यब बेत्। ॱनी हुदु येशु च्‍येल्‍ल छ्‌यो़डीम्‍गी चयेलम च्‍यीक् युङ्‌न हुगी खोङ्‌ल चयेलम नीज्‍यरङ् घल झ्‍यो़न्‍न अक्, ङ अक् नीज्‍यरङ्‌गी तीङ्‌ल युङ्‌गेन् सीन्‍न झ्‍यीब बेत्। ॱनी हुल येशुगी चीप्‍च्‍यङ्‌ल आक् दो़स्‍से धोङ् यो़क्‍केन् बेत्। ॱनम्‍गी झ्‍यल अक् छङ् यो़क्‍केन् बेत्। कोलीमीगी ॱरेबुलरङ् ॱङे ज्‍यक्‍से ॱसने च्‍यीक् इक् मीप्‍प बेत् सीन्‍न ॱसुङ बेत्।
ॱनी येशुल रोरङ्‌गी ॱलोप्‍टुक् ॱयोङ्‌म च्‍यीक्‍की चोव ज्‍यीन्‍दक् ॱअल ङे पबे कुबुर् रो बेक्‍सल ॱलुक्‍न स्‍यक्‍नी, हुनी ङ युङ्‌गेन् झ्‍यीब बेत्। ॱनी हुल येशुगी रङ् ङे ॱलोप्‍टुक्‍ल ङदङ् दल डो। ॱस्‍यीनरे रो ॱस्‍यीगोरोक् रोरङ्‌सोलरङ् ॱलुक्‍तु ची़त्‍लोङ् सीन्‍न ॱसुङ बेत्।

हीनी क हस्‍सो़त् येशु धङ् ॱलोप्‍टुक् दीब ढुल स्‍युन पारील फीम्‍ब बेत्। ॱनी ॱस्‍यर्च्‍यक् छो़ थोक्‍तु भुयुक् छ्‌यीम्‍मु ज्‍यप्‍न युङ्‌नी, छो दी भङ्‌ज्‍यीत् ॱलोङ्‌ज्‍यीत् झ्‍यीन युङ बेत्। ॱनी ढु दी इक् यल्‍लेङ् यी़ल्‍लेङ् झ्‍यीन ढी़ नङ् दील छ्‌यु स्‍युक्‍च्‍येम ॱयेङ बेत्। ॱनी हुगी यङ्‌ल येशु ॱङीत्‍ल ॱसोङ्‌न यो़प्‍प बेत्। ॱनी ॱलोप्‍टुक् दीबे येशु ॱङीत् ॱसेत्‍न खोङ्‌ल चोव ज्‍यीन्‍दक् हज्‍यरङ् कुरीक् ॱस्‍यीयेत्। ॱरोक्‍च्‍यप् जेत्‍लेत् झ्‍यीब बेत्। ॱनी हील येशुगी खीत् घन्‍डल टक्‍प सेच्‍च्‍युङ? छ्‌य गन्‍दीक्‍म मीत् स्‍योक्‍केन्‍सो सीन्‍न हुनी खोङ् लोङ्‌न भुयुक् दी धङ् छो दील लप्‍स्‍य तङ बेत्। हुनी छो दी स्‍यीवल ॱसोङ्‌न गीलील देप्‍प बेत्। ढुल यो़प्‍पे मी घयेत् दी ॱह लेन रोरङ्‌सो नङ्‌दु येशु घन्‍दुक् झ्‍यीबे मी ब अक्? छो धङ् भुयुक्‍की इक् खोङ्‌गी कल चीगुक् सीन्‍न झ्‍यीब बेत्।

हुनी येशुसो छो़ पारीगी लुङ्‌ब गदरीनी सीस्‍स च्‍यीक्‍ल ॱलीब बेत्। ॱनी हुदु ॱनो़प्‍प अयेक्‍प स्‍यीम्‍बे मी ॱङी ठेप्‍प बेत्। हुब ॱङीबु रो बेक्‍स घयेत्‍ल दो़क्‍को़प्‍प बेत्। हुब गन्‍दीक्‍म ज्‍यीसी झ्‍यीनी, हुब झ्‍यीस्‍सनी फल्‍ल मी ॱसु उक् डो ॱमीत् छुगो़प्‍प बेत्। हुब ॱङीबी़ ओ़लोक् ज्‍यप्‍न येशुल ॱवे को़न्‍ज्‍योक्‍की ॱरेबु ङीत्‍ल घन्‍ड झ्‍यीच्‍च्‍ये ॱनो़गुक्‍क? हुन्‍दो धी़रङ् ॱमत् ॱलीबनी, ङीत्‍ल दुक्‍प अयेक्‍पे ॱनर्मी तोङ्‌दु युङ हीम्‍ब न? झ्‍यीब बेत्। हुगी फच्‍चो़त् दीनल फक्‍प छेत्‍मीत् ॱसोगीन् यो़प्‍प बेत्। ॱनी हुगी ॱनो़प्‍प अयेक्‍प घयेत् दीगी येशुल नीज्‍यरङ्‌गी ङीत् हीनी तो़न्‍न दीक्‍केन् हीन्‍न, फागी फक्‍प घयेत् फागी नङ्‌ल स्‍युक्‍तु ची़त्‍रो झ्‍यी सीन्‍न स्‍युदेन् ज्‍यब बेत्। हील खोङ्‌गी ज्‍युक् सीन्‍न तङ बेत्। हुनी मीरङ् ॱङीबु दीगी नङ्‌नी हुगी ॱनो़प्‍प घयेत् दी थो़न्‍नी फक्‍प घयेत् दील स्‍युनर बेत्। स्‍युनी, फक्‍प घयेत् दी कुरीक् ज्‍युन फीन्‍न ढागोनी मल्‍ल छर्न हुगी छो दील खीन कुरीक् ॱङङ्‌न ॱस्‍यीनर बेत्।
ॱनी हुगी फक्‍चीब घयेत् दी हुनी ढो़न फीन्‍न हुदु घङ् झ्‍युङ घयेत् दी धङ् ॱनो़प्‍प अयेक्‍प स्‍यीम्‍बे मी ॱङीबु दील घङ् झ्‍युङ दी हुगी सार्की मी घयेत् दील कुरीक् ॱस्‍येत्‍न टेप्‍प बेत्। ॱनी हुगी सार्की मी घयेत् दी जेङ् येशु च्‍येल्‍ल युङ्‌न हुबे खोङ्‌ल ङीक्‍की लुङ्‌ब हीनी नीज्‍यरङ् ह फल्‍ल लोक्‍न डोरो झ्‍यी सीन्‍न स्‍युव पुब बेत्।

Sikiliza मत्‍ती 8