Mateo 21
21
Jerusalén llaqtaman Jesús yaykusqanmanta
(Mr 11.1-11. Lc 19.28-40. Jn 12.12-19)
1Jerusalén llaqtaman hichparuspankum Betfagé llaqtaman chayarurqaku, hinaspam Olivos moqopa hichpanpi samarurqaku. Chaymantam Jesusqa iskay discipulonkunata kachaspan 2nirqa:
Wak chimpa llaqtaman riychik, chaypim uñayuq china asnota watarayachkaqta tarinkichik. Paskaykuspa pusaramuychik. 3Sichum pipas imatapas nisuptikichikqa: “Señormi necesitachkan, chayllam kutichipamusunki” nispam ninkichik.
4Chayqa pasakurqa profetapa qellqasqan cumplikunanpaqmi. 5#Zac 9.9.Paymi kaynata qellqarqa:
Sión llaqtata niychik:
“Reynikim qanman hamuchkan,
asnopi silladam humildella hamuchkan,
carga asnopa wawanpi silladam hamuchkan”, nispaykichik.
6Chaymi discipulonkuna rispanku Jesuspa kamachisqanman hina ruwarqaku. 7Asnota uñantinta aysaramuspanku capankuwan caronaykuptinkum Jesusñataq sillakuykurqa. 8Hinaptinmi achkallaña runakuna capankuta ñanman mastarqaku. Wakinñataqmi sachapa kallmankunata kuchuspa Jesuspa pasanan ñanman mastarqaku. 9#Sal 118.25.#Sal 118.26.Ñawpaqninta qepanta riq runakunañataqmi qaparirqaku:
¡Yupaychasunchik! ¡Salvaykullawayku! ¡Señorpa sutinpi hamuqqa qapaqchasqayá kachun! ¡Hanaq pachapi munaychakuq Dios salvaykullawayku! nispanku.
10Jerusalenman Jesús yaykuruptinmi, llapa runakuna chaqwakuspa nirqaku:
¿Pitaq kayqa? nispanku.
11Hinaptinmi runakunañataq nirqaku:
Payqa Galilea law Nazaret llaqtayuq profeta Jesusmi, nispanku.
Templopi rantikuqkunata Jesús qarqosqanmanta
(Mr 11.15-19. Lc 19.45-48. Jn 2.13-22)
12Jesusmi temploman yaykurqa, hinaspam chaypi rantikuqkunatawan rantiqkunata qarqorqa. Qollqe cambiananku mesakunatawan paloma rantikuqkunapa sillankunatapas wikaparurqam. 13#Is 56.7.#Jer 7.11.Hinaspam nirqa:
Chuya Qellqapim nichkan: “Temployqa mañakuna wasiwan sutichasqam kanqa”, nispa; qamkunam ichaqa suwakunapa machayninta hinaña ruwarunkichik, nispa.
14Templopi kachkaptinmi ñawsakunawan wistukuna Jesusman asuykurqaku, hinaptinmi sanoyachirqa. 15Sacerdotekunapa kamachiqninkunawan Diospa leynin yachachiqkunañataqmi Jesuspa ruwasqan milagrokunata rikuspanku chaynataq warmakunapas “Davidpa Churin salvaykullawayku” nispa nisqankuta uyarispanku llumpayta piñakururqaku. 16#Sal 8.2.Hinaspam Jesusta nirqaku:
¿Uyarichkankichu kaykunapa nisqanta? nispanku.
Jesusñataqmi nirqa:
Arí, uyarichkanim. ¿Manachu Qellqapi leerqankichik:
“Llapa warmakunawan ñuñuq wawakunam yupaychasunki” nisqanta? nispa.
17Chaynata niruspanmi paykunata saqeruspan Betaniaman pasakurqa, chaypi samakunanpaq.
Mana ruruq higos sachata Jesús ñakasqanmanta
(Mr 11.12-14, 20-26)
18Tutapayta Jerusalenman kutimuchkaspanmi yarqarachikurqa. 19Chaymi ñanpa patanpi higosta rikuruspan asuykurqa. Ichaqa manam ima rurutapas tarirqachu aswanqa llaqellantam. Chayraykum chay higosta nirqa:
¡Kunanmantaqa manañam haykapipas rurunkiñachu! nispan.
Hinaptinmi chaypunilla chay higos chakirurqa. 20Discipulonkunañataqmi chayta qawaykuspanku admirasqallaña Jesusta tapurqaku:
¿Imanasqataq kay higos chaypunilla chakirun? nispanku.
21 #
Mt 17.20; 1 Co 13.2. Chaymi Jesusñataq nirqa:
Cheqaptapunim nikichik, sichum iñispaykichik mana iskayrayaspaqa manam kay higos sachawan ruwasqayta hinallachu ruwawaqchik, aswanqa kay orqotapas niwaqchikmi: “Kaymanta suchuspa lamar qochaman wischukuykuy” nispaykichik, hinaptinqa chaynam kanman. 22Sichum imatapas iñiywan mañakuspaykichikqa chaskinkichikpunim, nispan.
Jesusqa kamachikunanpaq atiyniyuq kasqanmanta
(Mr 11.27-33. Lc 20.1-8)
23Chaykunapa qepantam, temploman Jesús yaykuruspan yachachichkarqa, hinaptinmi llaqtapa kamachiqninkunawan sacerdotekunapa kamachiqninkuna kaynata tapurqaku:
¿Pitaq kamachisurqanki kaykunata ruwanaykipaq? ¿Pitaq kaykunata ruwanaykipaq atiyta qosurqanki? nispanku.
24Chaymi Jesusñataq nirqa:
Ñoqapas tapusqaykichikyá, sichum kay tapusqayta contestawaptikichikqa ñoqapas nisqaykichikmi ima atiywanmi kaykuna ruwasqayta. 25¿Pitaq bautizananpaq Juanta kachamurqa, Dioschu icha runakunachu? nispa.
Chaynata niruptinmi kikinkupura kaynata nispa kutipanakurqaku:
Sichum “Diosmi kachamurqa” niptinchikqa “¿Imanasqataq manaqa creerqankichikchu?” niwasunchiki. 26Sichum “runakunallam kachamurqa” niptinchikqa llapa runakunachiki imatapas ruwaruwasun; Bautizaq Juantaqa profetapaqmi hapinku, nispanku.
27Chaymi Jesusta nirqaku:
Manam yachanikuchu, nispanku.
Jesusñataqmi nirqa:
Chaynaqa, ñoqapas manam nisqaykichikchu ima atiywanmi kaykuna ruwasqaytapas, nispa.
Iskay churikunawan rikchanachisqanmanta
28¿Imaninkichiktaq qamkuna? Huk runapam iskay churinkuna karqa, hinaspam piwi churinta nirqa: “Churilláy, rispayá uvas chakranchikpi llamkamuy”, nispan. 29Churinñataqmi nirqa: “Manam riymanchu”, nispa. Ichaqa allinta yuyaymanarispanmi pasarqa. 30Chaymantam huknin churinmanpas asuykuspan hina chaynallata nirqa, hinaptinmi chay churinqa nirqa: “Arí taytáy, risaqmi” nispa. Ichaqa manam rirqachu. 31¿Kay iskayninkumanta mayqantaq taytanpa munasqanta ruwarqa? nispa.
Chay runakunañataqmi nirqaku:
Punta kaqmi, nispanku.
Jesusñataqmi nirqa:
Cheqaptaqa impuesto cobraqkunawan chuchumikakunaraqmi qamkunapa ñawpaqnikichikta Diospa munaychakuyninman richkanku. 32#Lc 3.12; 7.29-30.Bautizaq Juanmi allin kawsakuymanta yachachisunaykichikpaq hamurqa, qamkunam ichaqa mana creerqankichikchu; impuesto cobraqkunawan chuchumikakunam ichaqa creerqaku. Qamkunaqa kaykunata qawachkaspapas manam paypi creenaykichikpaqqa wanakurqankichikchu.
Mana allin llamkaqkunawan rikchanachisqanmanta
(Mr 12.1-12. Lc 20.9-19)
33 #
Is 5.1-2. Kay rikchanachiytawanyá uyariychik:
Huk runam chakranpi uvasta plantaruspan muyuriqninta perqarachirqa, vinota ruwananpaqpas huk pozotam ruwachirqa, hinaspam cuidananpaq huk torreta ruwarurqa. Chaymantam chakra llamkaqkunaman arriendakuruspan illarurqa. 34Cosecha tiempo chayaramuptinmi chay arriendaqninkunamanta tupaqninta mañamunankupaq serviqninkunata kacharqa. 35Ichaqa arriendaqnin runakunam chay kachamusqan serviqninkunata hapiruspanku hukninta maqaparurqaku, hukninta wañurachirqaku, huknintañataq rumiwan chamqaparurqaku. 36Hinaptinmi chay chakrayuqqa punta kaqmantapas aswan achkataña serviqninkunata kacharqa; ichaqa chay llamkaqkunam ñawpaq hamuqkunata hina ruwarurqaku.
37Chaykunapa qepantam churintaña kacharqa: “Churiytaqa respetanqakuchá”, nispa. 38Ichaqa chay llamkaqkunam chakrayuqpa churinta rikuruspanku ninakurqaku: “Paymi herencia chaskiqqa, chaynaqa wañurachisun ñoqanchikña chakranwan qepakunanchikpaq”, nispanku. 39Chaymi hapiruspanku chakramanta hawaman hurqoruspanku wañurachirqaku.
40Chaynaqa, chakrayuq kutiramuspanqa ¿imatataq chay llamkaqkunata ruwanqa? nispa.
41Uyariqninkunañataqmi nirqaku:
Chay mana allin runakunataqa mana llakipayaspam wañurachinqa, hinaspam chakrantapas huk llamkaqkunamanña arriendakunqa chaynapi tiempollanpi payman tupaqnin cosechata qonankupaq, nispanku.
42 #
Sal 118.22-23. Jesusñataqmi nirqa:
¿Manachu Qellqapi leerqankichik:
“Wasi perqaqkunapa wischupakusqanku rumim
cimientopa esquinan hapiq rumiña rikurirun.
Kaytaqa Diosmi ruwarun,
chayraykum anchata admirakunchik, nisqanta?” nispa.
43Chaynaqa, nikichikmi, Diospa munaychakuyninmi qamkunamanta qechusqa kanqa, hinaspam Diospa munaychakuyninta ruruchiq llaqtamanña qosqa kanqa. 44Chay rumiman wichiqñataqmi pakipasqa kanqa, rumipa hapisqanñataqmi ñutusqa kanqa, nispa.
45Sacerdotekunapa kamachiqninkunawan fariseokunañataqmi Jesuspa rikchanachisqanta uyariruspanku, paykunamanta rimasqanta musyakururqaku. 46Hinaspankum hapiruyta munarqaku, ichaqa runakunata manchakuspankum mana atirqakuchu, Jesusta profetapaq runakuna hapisqankurayku.
Nu markerat:
Mateo 21: RCHQ2
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Chuya Qellqa Revisión @ Sociedad Bíblica Peruana, 2012
