GENESIS 3
3
Okunyona kwomunhu nokutokolwa kwaye
1Ndele eyoka la li la lungama li dule oifitukuti aishe yomoixwa ei Omwene Kalunga a ninga. Ndele lo ola pula omwalikadi: “Kalunga okwa ti shili: ‘Inamu lya komiti adishe domoshikunino?’ ” 2Ndele omwalikadi okwa nyamukula eyoka: “Ohatu li oiimati yomiti domoshikunino, 3ndelenee oiimati yomuti wopokati koshikunino Kalunga okwa ti: ‘Inamu i lya, nye inamu i kuma, muha fye.’ ” 4Opo nee eyoka ola tya komwalikadi: “Nye itamu fi shili. 5Kalunga oku shi shii nokutya, ngeenge mwe i li, omesho eni otaa pashuka, ndele tamu shiiva ouwa nowii, ngaashi Kalunga.” 6Opo nee omwalikadi okwa tala, omuti ou omuwa nokulya notau hafifa omesho, heeno, omuti kau yehama shili okupa omunhu eendunge. Ndele ye okwa kufa oiimati yao ndele ta li ndele ta pe yo omulumenhu waye, ndele ye okwa lya. 7Opo nee omesho avo aveshe vavali a pashuka, ndele vo ove liwete ve li hamunghele. Ndele vo ova hondjela kumwe omafo omukwiyu, ndele tave liningile omateta.
8Ndele vo ova uda ondaka yOmwene Kalunga, fimbo Ye ta endaenda moshikunino onguloshi, eshi kwa talala. Ndele omulumenhu nomwalikadi waye ova ka hondama Omwene Kalunga momiti domoshikunino. 9Opo nee Omwene Kalunga okwa ifana omulumenhu ndele ta ti kuye: “Ou li peni?” 10Ndele ye okwa nyamukula: “Ame onda uda ondaka yoye moshikunino, ndele onda tila, osheshi ondi li hamunghele. Onghee ame onda hondama.” 11Ndele Ye okwa tya: “Olyelye e ku lombwela kutya ou li hamunghele? Ove owa lya komuti ou, nde ku kelela okulya?” 12Ndele omulumenhu okwa nyamukula ta ti: “Omwalikadi ou wa pa nge a kale pwaame, oye a pa nge komuti, ndele ame onda lya.” 13Opo nee Omwene Kalunga ta ti komwalikadi: “Ove owa ninga ngahelipi?” Ndele omwalikadi ta nyamukula: “Eyoka la kengelela nge, ndele ame nda lya.”
Efingo neudaneko lotete
14Ndele Omwene Kalunga okwa lombwela eyoka ta ti:
“Ove eshi we shi ninga,
oto fingwa mokati koinamwenyo aishe.
Ove ou na okweendifa edimo loye,
ndele ou na okulya edu omafiku oye aeshe.
15Ndele Ame ohandi ka tula outondwe
pokati koye nomwalikadi
nokoludalo loye nokoludalo laye.
Ye ota ka nyanyaula omutwe woye
ndele ove to ke mu twa moshififinwa.”
16Ye okwa lombwela omwalikadi ta ti:
“Ame ohandi ke ku hapupalifila
oudjuu moufimba woye.
Ove to ka dala ounona voye nokuyehama.
Ndele oto kala nokuhala omulumenhu woye,
ndele ye ote ke ku pangela.”
17Ndele Ye okwa lombwela omulumenhu ta ti:
“Ove eshi wa pwilikina ondaka yomwalikadi woye,
ndele wa lya komuti nde ku lombwela uha lye ko,
edu otali fingwa molwoye,
ndele oto ke lipalula noudjuu omafiku oye aeshe.
18Lo oli na oku ku menifila yo omakiya neeshosholo.
Ndele ove oto ka lya oimeno yomoixwa.
19Omungome woye
oto u li noshinhwi moshipala shoye,
fiyo oto shuna medu,
osheshi omo wa kufwa.
Osheshi oove edu,
ndele oto ka ninga edu.”
Okutewatewa muEden
20Ndele omulumenhu okwa luka omwalikadi waye Eva, osheshi ye okwa ninga ina yaaveshe ava ve na omwenyo. 21Ndele Omwene Kalunga okwa ningila omulumenhu nomwalikadi waye oikutu yoipa ndele te i va dike.
22Opo nee Omwene Kalunga okwa ti: “Paamha omunhu okwa ninga ngaashi umwe womufye, eshi a shiiva ouwa nowii. Opo aha nane eke laye a kufe ko vali komuti womwenyo nokulya ndele ta kala e na omwenyo fiyo alushe, ohandi mu taataa mo.” 23Opo nee Omwene Kalunga okwe mu taataa mo moshikunino shomuEden a ka longe edu omu a kufilwe. 24Osho hano Ye a taataa omunhu ndele ta tula ovakerubi koushilo woshikunino shaEden, ve na omaongamukonda a xwama omundilo taa taima vo va kelele omhito yokuya komuti womwenyo.
Nu markerat:
GENESIS 3: OKYB
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Oshikwanyama Bible Revised © Bible Society of Namibia, 2008, 2012.