संत.मत्ती 15
15
पुरखाकु आला दसतुर
(संत.मरकुस 7:1–13)
1मुसिङ फरीसीकु आउर धरम पुथी सि-सिखावकु जिरोसलेम तरअः ईसु दुबाःड़े हीःग नेनाकु, 2आउर नोकान बेता लियाकु, “आम आलकु चेला ताम पुरखाकु आला नेग-दसतुर के एता लःअय टोटागेआकु? हुंकू दो बेगार तीः आबुन ते लाःड कु जोमेआ!”
3ईसु हुंकू के कंहड़ी रूवाड़ोः लिकुआय, “आउर आपे अपन पुरखाकु आला नेग-दसतुर लःअय परमेसर आला हुकूम के एता लःअय टोटागेआपे? 4#उइठ 20:12; कन 5:16; उइठ 21:17; लेवी 20:9एता लःअय ची परमेसर कंहड़ी तदाय, ‘अपन आया-बाबा के आदर कुपे,’ आउर ‘जे अपन आया-बाबा के काबेस कंहड़ीआय, हुनी के गो-गोएःग चाही।’ 5बकिर आपे कंहड़ीआपे ची जदि जाहें अपन आया-बाबा के कंहड़ीआय, आम के ईङ तरअः जे फयदायोआ थिना, ‘होना के परमेसर लःअय भेंट रकाःब किदिंग,’ 6नोःआँ लकान हुनी के अपन आया-बाबा आला आ-आदर रअः दरकार एतान होः कनोआँ। निआँ लकान आपे पहिल रअः नेग-दसतुर तरअः जेके आपे ठहराव तदापे, परमेसर आला बचन के टोटागेआपे। 7ए ढोंगीकु, आपे रअः बारे रे इसायस नोःआँ के बेस केन आगमजानी तदाय।
8 #
जसा 29:13
“‘नुंकू होड़ ईङ के आहा तरअः आदारिङा कु,
बकिर नुंकू आला मन दिल ईङ तरअः लंकाआ।
9आउर नुकू बेगारी रअः ईङ आला आराधनायाकु,
एता लःअय ची हुंकू आला सिकछा होड़ आला बनाव लआ कनहुन हेके।’”
छुंतोः रेनअः कंहड़ी
10नोःआँ तयोम ईसु होड़कु के आएंग दुबाःड़े राअः केते बेता लिकुआय, “आपे ईङ आला कंहड़ी के आयुमेपे, आउर समझअ पे। 11जे आहा तरअः भीतीर बोला होना होड़ के काय छुँत कुआ, बकिर जे आहा तरअः उडुंगोआ हिना होड़ के छुँत कुआय।”
12ईसु आलकु चेलाकु तयोम हीःग केते हुनी के बेता लियाकु, “ची फरीसीकु आम आला कंहड़ी के आयुम केते ठोकोर जोम लअकु, एतान आम पाड़ी तनाम?”
13ईसु कंहड़ी रूवाड़ लःअय, “जे गाछी के ईङ आली सिरमा रिनी बाबा काय बिःड तदा,” होना के रचाअ केआकु। 14#सं.लुका 6:39“हुंकू के सेन चाकुपे, हुंकू अन्धराकु के होरा देखावकु हेके, बकिर हुंकू खुदे अंधरा एदान कुआ। जदि मियांड अंधरा, अंधरा के होरा उदूः गियाय, दो हुंकिन बनाहोंड़ गड़हा रिकीन उयुअ कोआ।”
15नोःआँ आयुम केते पतरस हुनी के बेता लियाय, “नोःआँ गाम के आले के समझाव लेमे।”
16ईसु उतारा एम लःअय, “आपे होः नहाअः जगुत बेलुराआपे एतान? 17नोःआँ कापे समझआ एतान? ची जे आहा रे जोमेआ होना लाहीःग रे सेना आउर लाहीःग तरअः हुई केते, बाहरी उडुंग जुनोआ? 18#सं.मत्ती 12:34बकिर मन रे हिजोआ होना आहा तरअः उडुंगोआ, आउर हिना होड़ के छुँत कुआय। 19बकिर होड़ आला मन तरअः गादुस सोंच, होड़ गोएःग, बेलाज काम, एटाअ आउराईत लोः बेलाज काम, चोचोर, झुठो रअः गोवाही एमोअ आउर नि-निन्दा, नोःआँ जामा मन तरअः उडुंगोआ। 20निआँ कंहड़ी होड़ के छुँत कुआय, होड़ बेगार तीः अबुनते घोटो जोमेआय, होना काय छुँतेआ।”
कनानी जाईत रिनी मियांड आउराईत आला बिसवास
(संत.मरकुस 7:24–30)
21ईसु होनाःड़े तरअः उडुंग केते सूर आउर सैदा रअः राईज पखी सेन नेनाय। 22होना राईज तरअः मियांड कनानी आउराईत हीःग नेनाय। आउर गूल-गूल कंहड़ी तनाय, “ए परभु, दाऊद आली होपोन ईङ के दयाईंग मे। ईङ आली माई तिंग के मुवाँ आतमा मुरुक सताव दियाय।”
23बकिर हुनी काय कंहड़ी रूवाड़ोः लियाय, चेलाकु हुनी दुबाःड़े हीःग केते कंहड़ी तनाकु, “नुई के कुलगोःडिमे, एता लःअय ची नुई आले तयोम-तयोम रे गोहराव यअते दराईया।”
24हुनी कंहड़ी रूवाड़ लःअय, “ईङ के इसराइल घराना रिनकु आःड उनकु भेंड़ाकु लःअय गी कुलगोःड तदिङा कु।”
25हिमने रे हुनी आउराईत हीःग केते ईसु के जोहार लियाय, आउर कंहड़ी लःअय, “परभु, ईङ के मदाई-तिङ मे।”
26ईसु हुनी के बेता लियाय, “चेंगाकु जोमेआकु लाःड के इदी केते सेताकु मड़ांग रे गिगिड़ी बेस नलागे।”
27हुनी कंहड़ी लःअय, “हाँ परभु, सेरे होः मलिक आला टिबुल तरअः उयुअ ओना सखड़ी के सेता गी जोमेआकु।”
28नोःआँ चलते ईसु कंहड़ी रूवाड़ोः लियाय, “ए आउराईत आम आला बिसवास बड़ेआ, आम आला मरजी पुरा कोआ।” आउर हेने घड़ीक हुनी आली माई ते बेस नाय।
ढेर बेमराहाकु के च-चंगा
29ईसु होनाःड़े तरअः सेनोः नाय आउर गलील रेनअः समुदर दौंड़ी रे सोदोर केते। मियांड टुंगरी तेंग रे रकाःब केते होनाःड़े दुड़ूः नाय। 30तुन्दरा के तुन्दरा होड़ हुनी दुबाःड़े हिजोअ तानाकु, हुंकू लंगड़ा, लुलहा, अंधरा, कोन्दा, बहिरा आउर ढेर एटाअ बेमराहाकु के, ईसु आला जांगा दुबाःड़े आगु कु केनाकु, आउर हुनी हुंकू के बेस लिकुआय। 31जब होड़कु नेल लअकु ची कोन्दा, बहिराकु कंहड़ीः दाकु, लुलहा कु बेस केन चंगायोः तानाकु, आउर लंगड़ाकु दंड़ान तानाकु, आउर अन्धराकु नेल दाकु, दो होड़ छकित केते इसराइल रिनी परमेसर आला बड़ाई लअकु।
चाईर हजार होड़कु के खियाव लिकुआय
32ईसु आनेःग आलकु चेलाकु के आएंग दुबाःड़े राअः केते बेता लिकुआय, “ईङ नुकू होड़ के नेल केते सोगाव तानिङ, एता लःअय ची नुकू पे रोज तरअः ईङ लोः एदान कुआ, आउर नुकू दुबाःड़े जोजोम लःअय एतान होः कनोआँ। ईङ नुकू के रांगेःग ते ओड़ाअ कुलगोःड कुईंग दो होरा रेगी थकाव केते, ताही कोआकु।”
33चेलाकु हुनी के बेता लियाकु, “नोःआँ सुमसान ठाँव रे आले के नुमिन बगरा लाःड ओकाःड़े तरअः भेटाव कोआ, ची नुमिन बगरा तुन्दरा के खियाव दाड़ी कुआ?”
34ईसु हुंकू के कुली लिकुआय, “आपे दुबाःड़े उकिन केन लाःड एदनाअ?” हुंकू कंहड़ी लअकु।
“सात गोड़ एदनाअ आउर थोड़ेःकेन छोटे हाकु एदान कुआ।”
35ईसु तुन्दरा होड़कु के ओत रे दुड़ूः आचु लिकुआय। 36आउर होना सात गोड़ लाःड आउर हाकु के इदी केते, हुनी परमेसर के धन्यवाद एमा केते, हुनी लाःड के केचाअ केते आउर हाकु के खांड़ा-खांड़ा चेलाकु के एमा लिकुआय, आउर चेलाकु होड़कु के हाटिंग ऊ लिकुआकु। 37आउर हुंकू जामा भाईर लाहीःग जोम बी नेनाकु। आउर चेला ताय सारेःग ओना लाःड के सात खाईचलअ पेरेःग केते हलांग लअकु। 38जोजोमकु मेसे आउराईतकु आउर चेंगाकु के बाई केते, चाईर हजार हेरेलकु ताहिनाकु।
39ईसु होड़कु के बिदा लिकुआय, आउर हुंकू डोंगा रे रकाःब केते, मगादान राईज सोदोर नेनाकु।
Nu markerat:
संत.मत्ती 15: ASR
Märk
Kopiera
Jämför
Dela
Vill du ha dina höjdpunkter sparade på alla dina enheter? Registrera dig eller logga in
© 2023 NLCI CC BY-NC-ND 4.0
