Romag 1
1
Lapia
(Oo Tit 1:1-4)
1Mĩ Pol, ɓer lo Jeju Krist. Luwah kunɨm kad mĩ ngombangkɨla, mbedɨm kad m'la mber Hoita kɨmaj lon. 2I Hoita kɨmaj'n Luwah adj maɗi nu, kam maktubt kɨ kunjɗang kɨgo ɗob lo ngékelta kɨ tant. 3Hoita kɨmaj'n non elta dan dɔ Ngon Luwah ad i Jeju Krist'n oojɨna ko girr Dabidt kɨgo dãrot. 4Na kɨtakul Ndil kɨ kunjɗang, Luwah daan deg kɨ tɔg kɨ ngãi kad i Ngonɨn kɨtakul ɓaia ku ngékoit, i Jeju Krist, Bɨraɓe loj. 5I kɨtakula la, Luwah ndamɨn ngombangkɨla kɨgo kamkẽt lon, kad mad girrdeg kɨ dang dang tube telɨn rod go tat loa ho, adɨna kamd ho tɔ. 6Ĩn ngendɨ Romt, kaa ĩn ku girrdegt kɨdangdang'n Luwah kunsɨ kad i ndulon go Jeju Krist. 7Ĩn deg kɨ ngendɨ Romt, ngétar lo Luwah, mĩ Pol, m'ndang maktub 'nten m'adsɨ, ĩgɨn Luwah tarsɨ, na kunsɨ kad ĩn deg kɨjaɓat. Kɨ Luwah kɨ Bɔwj, kɨ Bɨraɓe loj Jeju Krist adsɨn kamkẽ, kɨ kam kɨsokɨber.
Pol ndig kaw Romt
(Rom 15:23-32; 1 Tes 1:2-3; 3:7-13)
8Dasabang, m'ɗa mersi Luwah lom kɨtakul Jeju Krist kɨtatɔsɨ tube, kɨta deg ɔrrɨn hoi kadkamsɨ Luwah kam dɔningt kɨtaagbe. 9Kɨtɔ Luwah'n m'ndɨ m'ɗa kɨlaɓer loa kɨ ngarkam tube, kam la mber hoitat kɨmaj lo Ngona, i ngemam naj kad m'ndɨ m'ga tɔsɨ kɨ ndɔbaagbe, kɨkanj nya ta kam keltagt lom'n m'el kɨ Luwah. 10M'ndɨ m'kɔ Luwah kɨgo ndigt loa kad maj urrɨm kad adɨm ɗob ad m'aw rosɨt m'oosɨ. 11Kɨtɔ ndo koosɨ ndɨ tom ngãi kad m'aw rosɨt kɨ kadkari mad kɨgo ndilt m'adsɨ kad i ngahn ne tɔg kam kadkamsɨ Luwaht. 12M'ndig kɨ m'el m'an lon m'a m'tee rosɨt ye, j'a kɨ ɗan kɨ na. A i ɗan sem kɨtakul kadkam losɨ, mĩ tɔ m'a m'ɗa sesɨ kɨtakul kadkam lom ho.
13Ngankom, m'ndig kad i ndɨn dai al, kɨ nja natnatbe m'nda kamt kɨ m'aw rosɨt kɨtakad m'ngaa deg madg kusɨt tit'n m'ngan ku girrdeg madgt. Na mbã tajigla m'ngaa ɗob al. 14Girra lo Luwah i dɔmt kad m'la mber Hoita kɨmaj ro degt tube. Kɨ m'la mber Grekg, kɨ deg kɨ gerɨn Luwah al, kɨ ngéterrg, kɨ deg kɨ daig tu. 15Kɨtɔ 'nten, m'ndig kɨ rotĩm kad m'lasɨ mber Hoita kɨmaj ĩn deg kɨ ngendɨ ɓeɓot kɨ Rom ho.
Hoita kɨmaj, i tɔg kaj deg
(Mat 16:15-16; 1 Kor 1:18-24; Rom 3:21-25)
16Kɨtɔ rom sɔlɨm al dɔ hoitat kɨmaj, Hoita kɨmaj'n non i tɔg Luwah kɨta kaj dekɨɗen ndɨ ada kamɨn jeje. Juipg dasa, kamla Grekg ho ye. 17Hoita kɨmaj'n non ɔj'j titbãi Luwah ad deg telɨn kɨdenesew takumɨnt, kɨtakul kadkam Jeju Krist kɨɗabe kɨgo tat'n ndangɨn kam maktubt lo Luwah anan: Kɨtakul kadkam Luwah la, de kɨdenesew a ndɨn kɨ dɔn dõ ye.
Deg awɨn kɨ ta dɔdt nõ Luwaht
18Kɨtɔ 'nten, Luwah tee dɔ wong lon ko dõ dɔrãt dɔ nyaɗat kɨgo lo Luwaht al tube, kɨ nyaɗa kɨdenesew al tube lo deg'n nyaɗad kɨdenesew al ɔg dɔ rota kad tee kɨ tɨga. 19Na nya kɨ asɨ kad deg gerɨn ne Luwah to kɨ tɨga wakɨsɨ, kɨta Luwah ĩ kɨɓe kɨ dɔn tee dɔ ad'd oon. 20Kɨtɔ lo yaɓoodat nu mbã tajigla nyandahg lo Luwah kɨ dum koo kɨ kum ad: I tɔga kɨ tokɨnõt, kɨ ji kiã Luwaht, ĩn nyag kɨ asɨ kad deg gerɨn maj. Deg oond kam nyagt'n Luwah ɗa, kɨta 'nten deg asɨn kɔrrtadɔdt nõ Luwaht al. 21Ke deg gerɨn Luwah maj kaa ne, ɔsɨn gona kɨ sumba loa al, ke ɗana mersi al tɔ. Tagahd teld ngékurdɔkoit, ngarkamd kɨɓod tel til ad gerɨn nya kɨmaj al. 22Ndɨ oon rod ngéterrt, na ĩn kur deg. 23Ad mbelɨn tɔg Luwah kɨ kunja kɨɗangeɗeng, kɨ dum koi, kɨ yog kɨ ɗan ɓakumta de kɨ a oi, kɨ yelg, kɨ dãg kɨ njad i sɔɔ, kɨ nyag kɨ ngékɔrr kɔd'd ber.
24Kɨtɔ 'nten, Luwah tɔrr jin girrdt, nyad kɨ kam yerrt kɨ ɗa, kɨgo nyurkõt kɨ ngarkamdt kad ɗan ne nyag kɨ rosɔl kɨ dãrod ĩn kɨɓeg. 25Deg'n non mbelɨn Luwah kɨ yog, ɓoolɨn ndil nya kɨ ndahg, ɗan kɨlaɓer lo yog gan ne goot Luwah kɨ ngendah nyag'n non, ĩn asɨ kad deg ndubɨna mbãkɨnõt. Amin.
26Kɨtɔ 'nten Luwah tĩnyadɨn kɨ kam nyaɗagt kɨ rosɔl. Dekɨdẽg lod kɨɓeg kɨdɔd mbelɨn nyaɗad kɨgo ndahdt kɨ nyaɗa kɨgoɗobat al. 27Titbe ho la, dekɨdɨngãg nyan go nyaɗad kɨ dekɨdẽg kɨgo ndahdt, na adɨn nyurkõ kɨ tɨngabil lod ɗad kɨ dɔ nat, dekɨdɨngã kɨ dekɨdɨngã ndɨ ɗan nya kɨ rosɔl kɨ na, ad ĩn kɨɓeg ndɨ taan nyabaj kɨ asɨ ta ndomɨn ndomɨn.
28Na tit kan hã turɨn go ger Luwah al ye, Luwah lad kɔ kɨ kam nyageralt lod kad ɗan ne nyag kɨ sumba ɗa al. 29Deg'n non, ĩn deg kɨ kamd ɓakot kɨ nyaɗa kɨdenesew al kɨɗen, kɨmajal kɨ ɗa, kɨ kumndà, kɨ ndang, kamd ɗoosɨ kɨ mina, kɨ tɔl deg, kɨ kɔlna, kɨ gool deg, ĩn ngékam majal, kɨ ngékeltagot degt, 30ĩn ngélatakɔ degt, ngékɔsɨta Luwah, ngékɔsɨkum, ngédɔngang, ngégaburo, ngékun man nyag kɨmajal, ngételrod go tat lo ngékoojdg al. 31Ĩn deg kɨ dɔd goto, ngékelta kɔɔ joo, deg kɨ tanooj õ kamd al, ĩn deg kɨkanj kookumtondo. 32Deg'n non, gerɨn ta kɨ gang kɨdenesew lo Luwah maj, ta kɨ gangɨn an: Deg'n hɔn ɗa nyag kɨ tit'n non asɨn koi, na be kaa ne, ndigɨn ɗa ta ɗa hã kɨɗabe al, na ndɨ ndan tad nat kɨ deg'n ndɨ hɔn ɗa nyag 'nten.
Nu markerat:
Romag 1: MlL
Märk
Kopiera
Jämför
Dela
Vill du ha dina höjdpunkter sparade på alla dina enheter? Registrera dig eller logga in
Mbai Bible Revision © Bible Society of Chad, 2015.