Kɨlag 26
26
Pol elta ɔrrɨn ta dɔnt nõ Agripat
1Agripa el Pol an: Ta ɗob tee kɨtatɔi kad elta ɔrrɨn ta dɔit.
Taa ne, Pol sɨra jin kamla elta kad n'ɔrrɨn ta dɔnt an: 2Ngar Agripa, ɓone rom nelɨm ngãi kad m'elta nõit kad m'ɔrrɨn ta dɔmt dɔ nyagt tube'n Juipg tetɨn kɨ dɔmt. 3Kɨtɔ ĩ kɨɓe kɨ dɔi i ger nyabelɓe lo Juipg, kɨ tamajg tube'n to kudt. 4Juipg tube gerɨn kɨla ɗam lon mĩn kɨ basam nu, titbãi m'tɔgɨn ku girrdegt lom ho, Jerusalemt ho. 5Juipg germɨn maɗi nu ĩla ndigɨn manaj dɔt a ne, a man kari, kɨta mĩ Parisɨ kɨ kɔr njereng kɨgo nyandoot kɨ ngang tɔi lo nyabelɓe loj. 6Na tajigla taa nya'n m'ɗan nõsɨt nẽbe kad i gangɨn ne ta dɔmt ye, i kɨta m'nda kam dɔ kunkɔt'n Luwah un ad bɔwjg. 7Girrdeg loj kɨkɨlah gidaijoo ndan kamd dɔt kad Luwah a tɔlkon kunkɔ 'nten, ad ndɨ ɗan kɨlaɓer ndubɨna ne ndɔ ho kàda ho. Ngar Agripa, mĩ kaa ne, m'nda kam dɔ nyat 'nten. I dɔ kam kɨndahdɔt'n non la Juipg ɗa lan ne ta dɔmt ye. 8Ĩn Juipg kɨtɔɗi adɨn kamsɨ kad Luwah a ad ngékoig a ɓain lo koit al a? 9Rota, mĩ kɨɓe kɨ dɔm maɗi m'oo m'an sumba kad m'la rom kɨ nat kɨ goɗobg kɨ dang dang kad m'ndoor tɔ Jeju kɨ Najaret't. 10I nya'n m'ɗa Jerusalemt la. M'hɔ deg kɨjaɓat lo Luwah ngãibe m'ũd dangait. Kɨtɔ m'ngaa tɔg kokɨro bɨra ngejanyamosɨkadkarit kad m'ɗa titbe. Lon a gangɨn ta koi dɔdt a ne, mĩ kaa ne, m'a m'nda tam nat sed kɨɗabe ho. 11M'aw kɨ kam kuj kelta kɨ Luwah lo Juipg. M'ɗa sed nya kɨ to to kɨ nja nat nat be kad tɔrrɨn jid girr tat lo Jeju. Kum il kirir dɔdt ad m'da rod ndo mbã m'tuɓa god kɨ lo lo m'teen ɓegt kɨɗang.
Pol ɔrr girr taa'n taa ta lo Jeju Krist
(Oo Knk 9:1-9; 22:6-16)
12I titbe, ndɔ mad m'ndɨ m'aw Damasɨt. Kɨbog lo ngéjanyamosɨkadkari lamɨn nu, admɨn tɔg kad m'hɔn ngétaata lo Krist. 13Mĩ dɔ ɗobt ɓaitɔ, Ngar Agripa lo kɨ kàd kɨ ɗa ngawdanɓet, m'oo kunj mad ko dɔrãt, nyẽra tɔi nyẽr kàd, ɔsɨ gug dɔm nat kɨ deg'n awɨn sem. 14Jĩ tube kɨ tuso ber, kamla m'oo dɔ ndi ta mad elɨm kɨ ta hebre, an: Sool, Sool, kɨtɔɗi i ɗa i dan kum ndo titbe a? Ĩla i ndig taaɗɔ Luwah a ne, a ngang sei ngãi.
15M'ndɨjea m'an: Ĩ nõ a Bɨraɓe?
Bɨraɓe elɨm an: Mĩ Jeju kan i ɗa i da kumm ndo nõ.
16Tajigla, i ɓai, i ɗa dõ. Elɨm an: M'kɔti m'ndai ngekɨlaɓert lom ho ngemanajt lom tɔ kad i la mber nyag'n oo kɨ kumi woi, kɨ ĩgɨn ɓet m'a m'tee dɔ m'adi oo kam ndilt. 17M'a m'aji ji juipgt, kɨ girrdeg kɨdangdang'n m'ndɨ m'la sei kɨ rodt. 18M'ndɨ m'la sei kɨ rodt kad i tee kumd, kad kɨ ɓain kam tilt kɨ telɨn kɨ kunjt, kad kɨ teen girr tɔg Sɨtant kɨ telɨn kɨ ro Luwaht, kad Luwah nyàgo majal lod kɔ, kɨ ngahn nyanduba nat kɨ deg kɨjaɓat lo Luwah kɨtakul taa'n taan ta lo Krist.
Pol elta ɔrrɨn girr kɨla lon
19I titbe, Ngar Agripa, lot'n non m'tel rom go nyakoo kam ndilt'n Luwah ad ɗisɨ ko dɔrãt ad m'oo. 20Na dasabang m'la mber ta mad ngendɨ Damasɨt, got gog m'la mber ta mad ngendɨ Jerusalemt, kamla m'la mber ta mad ngendɨ dɔning Judet, mbã m'teen kɨ ro girrdegt kɨ dang dang; m'eld kad tɔrrɨn ndid dɔ majalgt lod ho kɨ telɨn kɨ ro Luwaht ho, na kɨ ɗan kɨlag kɨ ɗa kɨtɨga, ɔjɨn ne kad ĩn deg kɨ teen kɨ tɔrrndit. 21Kɨtɔ nyag 'nten la Juipg hɔmɨn ne kam kuj ndub Luwaht, sahn ɗob tɔlɨm kɔ ye. 22Na Luwah ngomɨm mbã ɓone ad mĩ kɨ dɔm dõ kad mĩ nẽbe m'ɗa m'manaj nõ degt kɨbo kɨ kɨdug tu. M'elta dɔ nya madt kɨɗang al, na m'elta dɔ nyat'n ngékelta kɨ ta Luwaht kɨ Moij anan: A ɗa nya nõ tã. 23Ad Krist a dai yon kɨ kõ, a i kɨ dasabang ku degt'n a ɓain ku ngékoit, na a la mber kunj kɨ ro degt kɨ Israel kɨ girrdeg kɨ dang dang tu.
Pol ɔj Ngar Agripa kad taa ta lo Krist
24Lon Pol ɗa elta ɔrrɨn ta dɔnt titbe ye, Pestus ndánga kɨ tɔgɨn an: Pol, dɔi tel wãri, nya'n i ndoo ngãi ɗa ad dɔi tel wãri.
25Na Pol tura an: Dɔm tel wãri al. Pestus ngemaj kɨ tɔitɔi ta'n m'ɗa m'el, i ta kɨ rota ho, i ta kɨ kumtɔg ho tɔ. 26Ngar Agripa ger nyag'n non ɓet, kɨta 'nten la m'ɗa m'elɨn ta kɨ kammt kɨ kam kɨmisɨmisɨ. Kɨtɔ m'ger kammt, i ger nyag'n non tube kɨta nya mad kɨ lo yarot goto. 27Ye, ĩ ngar Agripa, i taa ta'n ngékelta kɨ ta Luwaht elɨn yo? M'ger kad adkami. 28Agripa tur Pol an: Hai. I gaa kamit kad ngon ta kɨ ten el nõ, a i dumɨn dɔm kad m'tel ngetaata lo Krist e?
29Pol el an: M'kɔ Luwah ke i tajigla ke i kaglot mad, ĩ koon al, na deg tube'n ndɨ oon dɔ ta lom ɓola kɨ i telɨn titɨm be, na kanj kad ĩn kɨ dɔ kɨ jinjir.
30Ngar Agripa kɨ ngekõɓe Pestus, kɨ Bernis kɨ deg'n ĩn nat sed ɓain dõ. 31Lon ɔrrɨn rod kɨ gog ye, elɨn na ta anan: De'n ɗan ye, ɗa nya mad kɨ asɨ koi al ho, ke asɨ ɗa dangai al ho.
32Ngar Agripa el ngekõɓe Pestus, an: De'n ɗan ni ndɨje kad Sejar la gangta lon al a ne, maj kad i kɨ nyàa dõ.
Nu markerat:
Kɨlag 26: MlL
Märk
Kopiera
Jämför
Dela
Vill du ha dina höjdpunkter sparade på alla dina enheter? Registrera dig eller logga in
Mbai Bible Revision © Bible Society of Chad, 2015.
