Kɨlag 22
22
1Ngankomg kɨ bɔwɨmg, i nelɨn mbisɨ oon ne dɔ ta'n m'a m'eltajigne kad kɨ m'ɔrrɨn ta dɔmt. 2Lon oon dɔ kad Pol elta kɨ ta hebre ye, adɨn lo to king kɨ tɔi dɔ. Pol el an: 3Mĩ Juip, oojmɨn kam ɓet kɨ Tarsɨ kam dɔning Silisit, na m'tɔg kam ɓet kɨ Jerusalem. Gamaliel la ndoom mberkɨnda lo bɔwjg ad'm m'ger kɨ goa goa. M'ɗa nya kɨgo lo Luwaht kɨ rotĩm tit'n i ɗa i ɗa ne, ɓone. 4M'da ro deg ndo mbã m'tɔld kɨta ndulon go ɗob lo Jeju. M'hɔ dekɨdɨngãg kɨ dekɨdẽg m'ũd dangait. 5Bɨradɔ ngéjanyamosɨkadkari, deg tube kɨ ngégangta ku Juipgt asɨn manaj dɔ tat 'nten, kad i ta kɨ je. Kɨtɔ m'taa maktub rodt kɨ ɔj dɔ ngankõ Juipg, m'awɨn godt kam ɓebot kɨ Damasɨt, kad m'hɔ deg kɨ ngétaata lo Jeju n'ndɨn nu, kɨ m'ɗe sed Jerusalemt kɨ ji kɨdɔ kɨ kɨla kɨtakad ɗan sed nyakɨto.
Pol ɔrrd hoi ndɔdɨn ndɔdɨn na kɨ Krist
6Pol el an: Mĩ dɔ ɗobt ɓaitɔ, m'leg dɔ ɓe kɨ Damasɨ. Taa ne, tajigt kɨ kàd kɨ ɗa ngawdenɓet kunj mad kɨbobe ɓa busɨ gug dɔm gej. 7M'so ber, m'oo dɔ ndɨ ta mad elɨm an: Sool, Sool, kɨta ɗi bai i ndɨ dan rom ndo a? 8M'ndɨje m'an: Bɨraɓe, i nõ a? Ndɨ ta'n non turɨm an: Mĩ Jeju kɨ Najaret't ka'n i ɗa i da kuma ndo nõ. 9Deg'n ĩn nat sem ye, oon kunjɨn non kɔikɔi, na oon dɔ ndi de'n elɨm ta nõ al. 10Kamla m'ndɨjea tɔ m'an: Bɨraɓe kam ɗa ɗi a? Bɨraɓe turɨm an: I ɓai dõ, aw kam ɓet kɨ Damasɨ, nõbe la a elɨn nyag tube'n Bɨraɓe ndig kɨ i ɗa. 11M'tel mundo kɨta tɔg kunj kɨ ɗa ngereng'n non i kɨbobe. Ad deg'n ĩn nat sem ye, hɔn jim ɔrrmɨn ne ta ɗob ad m'tee Damasɨt.
12Kam ɓet kɨ Damasɨ, de mad ndɨt nõ, tɔa i Ananias, i de kɨ ngeɗa nya kɨgo lo Luwaht ho, kɨgo lo mberkɨndat lo Moij ho. Juipg tube'n ndɨn kam ɓet kɨ Damasɨ ye, manaj kɨmaj dɔat. 13Ananias ɗe romt ɗa kadɨmt nderbe elɨm an: ngonkom Sool, kɨ oo lo. Dɔkàdt'n non m'oo lo ho, m'oo Ananias ar nyang ho. 14Ananias elɨm an: Luwah lo Bɔwjg kɔti kete nu kad i ger ndig lon, kad i oo De kɨdenesew'n non kɨ kumi ho, kɨ oo dɔ ta kɨ taat ho tɔ. 15Kɨtɔ 'nten kɔti kad ĩ ngemanaj loa ro degt tube dɔ nyagt'n oo kɨ kumi ho, oo dɔ kɨ mbii ho. 16Tajigla kɨtɔɗi i ndɨn kɔkɨ tɔ a? I ɓai dõ ad ɗain baptem ad majal loi i kɨ nyàgo kɔ kɨtakul tɔ Jeju kɨ i kun. 17Kamla lon m'tel m'aw Jerusalemt ye, ndɔ mad m'ndɨ m'elta kɨ Luwah kam kuj ndub Luwaht m'oo nya kam ndilt. 18M'oo Bɨraɓe, elɨm an: I ɓai i ɗa kɨ dõt, i tee kam ɓet kɨ Jerusalemt kɔ. Kɨtɔ deg kɨ tit a taan najkɨma kɨ ɓet a i ma dɔmt nõ al.
19M'tur m'an: Bɨraɓe ĩn kɨɓeg kɨ dɔd gerɨn maj kad maɗi m'a m'and kɨ kam kuj kawnag lo Juipg, m'la ngétaata lo Krist dangait ho, mad ndand kɨ ndeh riw-riw tɔ. 20Mbã lon ɗa tɔlɨn Etien kɨ ngemanaj loi kaa ne, m'ɗa nõ, na mĩ tɔ m'ɗa kam kɨɗa sed deg'n tɔlɨna, ad m'ngom kubg lod. 21Bɨraɓe elɨm an: Aw m'lai sãi nu ro girrdegt kɨ dang dang.
Pol el bɨradɔ ngéɗɔɔg kad nĩ Roma
22Juipg nelɨn mbid kɨ roat oon ne dɔ ta loa mbã lon elɨn ta'n non; kamla gan tad kot kon ne kɨ tɔgd anan: Kɨ de'n ɗan goto dɔningt kɔ. Kɨ oi kɔ. Sumba kad ndɨ kɨ dɔn dõ al. 23Gan kɔl kang kang, tɔrrɨn kubg kɨ rodt yeen yekɨyekɨ, ɔin ɓu un kɨ dõ. 24Bɨradɔ ngéɗɔɔg ad ɗen kɨ Pol kam kuj ngomdɔɓet ad ndana kɨ ndeh kad elta. Ɔrrɨn girr nya'n koosɨdeg ɗa kon ne titbe dɔat. 25Dɔɔn Pol kɨ kɨla ndar dã kad n'ndana kɨ ndeh, kaglot'n non Pol el bɨradɔ ngéɗɔɔg an: i goɗobatal kad i ndan de kɨ Romt kɨ ndeh kɨkanj gangta dɔat ɓaitɔ. 26Lon kɨbo lo ngéɗɔɔg oo dɔ ta 'nten ye, aw ro bɨradɔ ngéɗɔɔgt ug ela an: Nãi sĩ be kad i ɗa nya kɨ tɔi dɔ. Kɨtɔ de'n non i de kɨ Romt.
27Taa ne, bɨradɔ ngéɗɔɔg aw ro Polt ela an: Elɨm i de kɨ Romt je e?
Pol tura an: Ãã. 28Bɨradɔ ngéɗɔɔg ela an: Mĩ taa ne, m'ndugo kĩm de kɨ Romt kɨ nar ngãibe.
Pol tura an: Mĩ nyam taa ne oojmɨne ta kooj.
29Tajigt deg'n ɗa kɨ n'ndan Pol kɨ ndeh kad elta ye, tĩ nyana. Lon bɨradɔ ngéɗɔɔg oo kad n'ad deg dɔn Pol kɨ kɨla jinjir ye, ɓool ɗaa.
Pol ɗa nõ ngégangtat
30Bɨradɔ ngéɗɔɔg ndig kad n'ger girr nya kɨ jeje'n Juipg ndɨ la ne ta dɔ Polt. Kɨtɔ 'nten, loti got ad tutɨn jinjir roat, na ndamber kɨbo lo ngéjanyamosɨkadkari kɨ ngégangta ku Juipgt: Kad ɗen kɨ nat. Kamla un Pol ɗe sia nda dandt.
Nu markerat:
Kɨlag 22: MlL
Märk
Kopiera
Jämför
Dela
Vill du ha dina höjdpunkter sparade på alla dina enheter? Registrera dig eller logga in
Mbai Bible Revision © Bible Society of Chad, 2015.
