Kɨlag 13
13
Ndil Kɨkunjɗang kɔt Barnabas kɨ Sool kɨta kɨla lo Bɨraɓe
1Kam ngékawnat kɨ Antiosɨ, ngékelta kɨ ta Luwaht, kɨ ngéndoo deg madg ndɨnt nõ. I Barnabas, kɨ Simõ'n a kunɨna Nijer, kɨ Lukius'n i de kɨ dɔning Sirent, kɨ Manahen'n tɔgɨn nat kɨɗabe kɨ ngar Herod Antipas'n õɓe dɔ Galilet, nat kɨ Sool ho. 2Ndɔ mad lon ndɨ ɔsɨngon Bɨraɓe ho, ndɨ ɔgɨn rod nyasa ho tɔ ye, Ndil Kɨkunjɗang eld an: Ɔrrɨn Barnabas kɨ Sool i ndand kɔt ko kɨɗa kɨtakad ɗan kɨla'n m'kund kɨtatɔ.
3Goot'n ɔgɨn rod nyasa ho, elɨn ta kɨ Luwah woi ye, ndan jid dɔdt, nyand ad awɨn.
Barnabas kɨ Sool lan mber Hoita kɨmaj kam dɔning Siprɨt
4Ndil Kɨkunjɗang la Barnabas kɨ Sool ad'd awɨn. Awɨn ɓebo Selesit, nõbe unɨn too kɨbo awɨn dɔning Siprɨt. 5Lon aw teen takumkaat kɨ Salamint ye, lan mber ta lo Luwah kam kuj kawnat lo Juipg. Jã Mark i nat sed kad ɗa sed kam kɨlat. 6Lon lan go koorlo kɨ Siprɨt tube aw teen Papos ye, ndɔdɨn ngeyo mad i Juip kɨ tɔa i Barteen Jeju. 7De'n non ndɨ nat kɨ Serjius Polus kɨ i de kɨ ngégoosɨ. Serjius Polus ad kunɨn Barnabas kɨ Sool kad elɨnɨn ta lo Luwah. 8Na ngeyo'n non tɔa i Elymas, kɨ ta grek i tɔ de kɨ ngeɗayo, ndoor Barnabas kɨ Sool, ndig kad'n tur dɔ Serjius kad tel ngetaata lo Krist al. 9Na Soolɨn a kunɨna Pol ye, Ndil Kɨkunjɗang ɓaakot, ad nda kumɨn kɨ dɔ Elymast ndã. 10An: Ĩ de kɨ ɗoosɨ kɨ gool deg, ndokum deg ɗoosɨ kami tap, ĩ madngéta nyaɗa kɨdenesew tube, ĩ ngon Sɨtan, i ndɨ i sah ɗob kad i tuj ɗobg kɨdenesew lo Bɨraɓe, maj kad i nya taa. 11Tajigla oo maj. Ji Bɨraɓe i dɔit, a i tel mundo, a oo kum kàd al asɨ tat be. Tentenbe Elymas mba girr mom lo, a sah de kad ɔrrɨn ta kag. 12Lon ngekõɓe oo nya'n ɗa nya nõ ye, taa ta lo Krist, kɨta nyandoo lo Bɨraɓe dum dɔa kɨ dumbit.
Pol kɨ Barnabas lan mber hoita kam ɓebot kɨ Antiosɨ kam dɔningt kɨ Pisidi
13Pol kɨ deg'n ĩn nat sia ye, alɨn kam toot kɨbo ɓebot kɨ Papos awɨn ɓebot kɨ Perge kam dɔning Pampilit. Jã-Mark nyad nõbe, na tel aw gog Jerusalemt. 14Kamla, Pol kɨ Barnabas kɨ deg'n ĩn nat sia ɓain ɓebot kɨ Perge aw teen ɓebot kɨ Antiosɨ kɨ Pisidit. Lon ndɔ taakò lo Juipg asɨ ye, andɨn kam kuj kawnat lo Juipg, na ndɨn ber ku degt. 15Lon dan maktub mberkɨnda kɨ maktub lo ngékelta kɨ ta Luwaht woi ye, kɨbog kɨ dɔ kuj kawnat lo Juipg elɨn Pol kɨ Barnabas anan: Ngankõg ĩla awɨn kɨ ta mad kad i lan ne dɨngam kam degt ho, i sɔlɨn ne kam deg ho a ne, jadsɨ ta kad i elɨn.
16Taa ne, Pol ɓai ɗa dõ, mbɔj deg kɨ jin an: Ĩn deg kɨ Israel kɨ ngéɓool Luwah, i nelɨn mbisɨ. 17Luwah lo girrdeg'n ɗan, Luwah lo Israel'n mbed bɔwjg ye, ad girrdeg lon bɨlan kɨ dɔt dɔt lon ndin ne dɔningt kɨ Ejipt't. Kamla Luwah tee sed kɨ tɨga kɨ tɔg jin. 18Luwah ndɨ sed dɔt mbã ɓal dɔsɔɔ kam dɨlalot. 19Lon Luwah tɔ koh girrdeg kɨ dang dang tanãimɨta kam dɔning Kanat ye, ad'd dɔning lo deg'n non nyakagɓet. 20Go nyagt 'nten asɨ ɓal ɓu sɔɔ kɨ dɔ mi, Luwah ad'd ngégangtag mbã teen kaglot lo Samuel. 21Kamla Bɔwjg ndɨjen ngar, Luwah kaa ne, ad'd Sool ngon Kis ko girrkoojt lo Benjami. Sool õɓe ɓal dɔsɔɔ.
22Go kõɓet loa, Luwah ɔrra kɔ, na ndah Dabid ngart ad bɔwjg, na manaj dɔat an: M'ngaa Dabid ngon Jese, i de kɨgo kam ndigt lom, ĩla a ɗa nyag tube kɨgo ndigt lom ye. 23Ko kam ngaka Dabidt la Luwah ɓai kɨ ngekaj ad Israelag kɨgo kunkɔt lon ad i Jeju. 24Lon Jeju ɗe al ɓaitɔ ye, Jã kɨ ngeɗa deg baptem deg la mber deg kɨ Israelt tube kad tɔrrɨn ndid dɔ majalgt, na kɨ ɗan baptem. 25Na lon Jã ndɨ tɔlkon kɨla lon ye an: Oon a anan mĩ nõ a? Mĩ Krist al. Na oon de mad ndɨ ɗe gomt nõ, na mĩ m'asɨ kad m'tut sa kɨ njat al. Pol eld tɔ an: 26Ngankõ, ĩn deg kɨ girrkooj Abrahamt, kɨ deg kɨ ngéɓool Luwah, i kɨtatɔj la Luwah laan kɨ ta 'nten kad n'aj'jɨn ye. 27Kɨtɔ ngendɨ ɓebot kɨ Jerusalem kɨ kɨbog lo Juipg gerɨn Jeju i Ngekaj deg al, gerɨn tag lo ngékelta kɨ ta Luwaht'n ɗa dan kɨ ndɔ taakò lo Juipg al tɔ. Na tɔlɨn Jeju. 28Ke neni ngahn nya mad kɨ asɨ gangta koi dɔat al kaa ne, ndɨjen Pilat kad tɔla kɔ. 29Lon tɔlɨn kon nyag tube'n ndangɨn kam maktubgt lo Luwah dan ne dɔ Jeju ye, got ɗisɨn sia dɔ kag dosɨt lana kam ɓe nint. 30Na Luwah ada ɓai ku ngékoit. 31Ndɔg ngãibe Jeju ɔj ron kɨ ro degt'n ɓain sia Galilet mbã kɨ ɓebot kɨ Jerusalem. Tajigla, deg'n non, ĩn ngémanaj lo Jeju nõ koosɨdegt. 32Na jĩ taa, ndɨ kɨ lasɨ mber hoita kɨmaj: Nya'n Luwah unɨn kɔn ad bɔwjg. 33Luwah tɔl kõna kɨtatɔj jĩ ngandg, ad Jeju ɓai lo koit; tit'n ndangɨn ne kam maktub pa pat kɨjoo: Ĩ ngonɨm. M'ooji ɓone. 34Ta dɔ ɓait kɨ Luwah ad Jeju ɓai lo koit, kɨ dãroa kɨ a tel kɨ lo ndumt gog al ye, Luwah el titbe: M'a m'adsɨ njang dɔ kɨjaɓat ho, kɨ jeje ho, tit'n m'unɨn kɔm mad Dabid. 35Kɨtɔ 'nten elɨn kam maktub Pat mad an: A i nya Ngekunjɗang loi ad ndum kam ɓe nint al.
36Lon Dabid i kɨ dɔn dõ ye, ɗa kɨla ɓer lo Luwah, ɗa ndig lo Luwah kamla oi, ad awɨn sia duwɨna kad bɔwagt, ad dãroa ndum kam ɓe nint. 37Na Jeju taa ne, Luwah ada ɓai, ndum kam ɓe nint al, na ɓai lo koit. 38Kɨtɔ 'nten ngankõ maj kad i gerɨn, i kɨtakul Jeju la lasɨn ne mber nyàgo majalg kɔ ye. 39Kɨtakula tɔ dekɨɗen ndɨ taa ta lo Jeju a ne, takɨgang goto dɔat. 40Kɨtɔ 'nten oon go rosɨ maj, na ɓeta nya'n ngékelta kɨ ta Luwaht ndangɨn ye, tee dɔsɨt, anan:
41Ĩn ngékid deg, oon maj.
Adɨn ta yasɨ, mbã kad i goton kɔ,
kɨta m'a m'ɗa kɨla mad kam ndɨsɨt kɨ dɔdõ,
ke neni de mad ɔrrsɨ hoia kaa ne,
a adɨn kamsɨ al bat.
42Lon Pol kɨ Barnabas ndɨ teen kam kuj kawnat lo Juipg ye, ndɨjend kad tel ɗen ndɔ taakòt lo Juipg'n a ɗe nõ, kad elɨnd ta 'nten gog.
43Lon kawna tɨga ye, Juipg ngãibe, kɨ deg ngétel rod go mberkɨndat lo Moij ndulon go Pol kɨ Barnabas, elɨn sed ta, adɨnd kɔj kad hɔn tɔgd bá kam tart lo Luwah. 44Ndɔ taakòt lo Juipg kɨ ɔsɨ go ĩn tɔi ye, deg tube kɨ kam ɓet kɨ Antiosɨ kawɨn na kɨta koo dɔ ta lo Luwah.
Pol kɨ Barnabas awɨn kɨ ro girrdegt kɨ dang dang
45Lon Juipg oon koosɨdeg ye, ni tɔld sɔkɨr, ad majɨn tag'n Pol el nõ ho, na tajɨna tɔ ho. 46Taa ne, Pol kɨ Barnabas elɨn deg kɨ kam kɨmisɨmisɨ anan: Kari na ĩn Juipg la maj kad kɨ la mber hoita lo Luwah kusɨt dasa ye. Na tit'n i mbetɨn ye, i telɨn rosɨ deg kɨ asɨn taa kumkajir kɨ mbãkɨnõt lo Luwah al. Kɨtɔ 'nten oon tajigla kɨ ndɨ kɨ tel roj kɨ ro girrdegt kɨ dang dang. 47Kɨtɔ Bɨraɓe ndaj mber an: M'ndai kad ĩ kunj kad unj girrdeg kɨ dang dang, a i la mbera mbã dɔngoi dunia kad Luwah i ngekaj deg.
48Lon deg'n ĩn Juipg al oon dɔ ta 'nten ye, ɗan ronel, ɔsɨngon ta lo Bɨraɓe. Deg tube'n Luwah mbed'd kete woi kɨta kumkajir kɨ mbãkɨnõt ye, taan ta lo Krist.
49Ta lo Bɨraɓe ɔrr lo wom kam dɔningt kɨtaagbe. 50Na Juipg sɨlan dekɨdẽg kɨ ngétel rod go mberkɨndat lo Moij, na ĩn Juipg al. Dekɨdẽg'n non ĩn ngan ngéɓeg kɨ Antiosɨ kam dɔning Pisidit. Juipg sɨlan kɨbog kɨ kamɓet tɔ, ndun deg, ad dan kum Pol kɨ Barnabas ndo, kamla tuɓand kam dɔningt lod kɔ. 51Pol kɨ Barnabas ndan bu njad kɨ dɔdt, na tɔi awɨn kam ɓebot kɨ Ikonium. 52Kam ɓet kɨ Antiosɨ taa ne, ngéndoog lo Jeju ĩn kɨ ronel kɨ ɗoosɨ kamd ho, ɓankot kɨ Ndil Kɨkunjɗang ho tɔ.
Nu markerat:
Kɨlag 13: MlL
Märk
Kopiera
Jämför
Dela
Vill du ha dina höjdpunkter sparade på alla dina enheter? Registrera dig eller logga in
Mbai Bible Revision © Bible Society of Chad, 2015.
