मरकुस 16
16
यीशु मरनेरे पत्ती फिरी ज़ींतो भोते।
(मत. 28:1-8;लूक. 24:1-12;यूह. 20:1-10)
1होरसां ड्लवझ़ी, ज़ैखन आरामेरी दिहाड़ी खतम भोवरी थी, त तैखन मगदलीन ड्लंव्वेरी मरियम, त कने याकूबेरी अम्मा मरियम, त कने सलोमी, एन सेब्भेईं रोड़ी मुश्की बालो तेल आनो, ताके यहूदी लोकां केरि रसमरे मुताबिक यीशुएरी लाशी पुड़ तेल लान। 2हफतेरे पेइले दिहाड़े झ़ेज़्झ़ां-झ़ेज़्झ़ां, ज़ैखन मसां दिहाड़ो निस्सी राओरो थियो, त तैना कब्री कां जेई ज़ैस मां यीशुएरी लाश रख्खोरी थी। 3तैखन तैना एप्पू मांमेइं ज़ोती थी, “इश्शे लेई कब्रेरे दारे पुड़ेरां घोड़ कौन गिसालो?” 4किजोकि तै घोड़ बड़ो बड्डो थियो। पन तैड़ी पुज़नेरे बाद, तैनेईं कब्रेरे पासे उब्री तक्कू त हेरू कि घोड़ पेइलो कब्रेरे दारे पुड़ेरां गिस्सोरो थियो। 5तैनेईं कब्रेरे अन्तर गेइतां अक जुवान#16:5 तै जुवान मैन्हु स्वर्गदूत थियो लाव ते तैना बेड़ि हैरान भोइ जेई। तैस छ़ित्तां लिगड़ां लगोरां थियां, ते तैड़ी तैन केरे सिद्धे पासे बिशोरो थियो। 6तैनी जुवाने तैन सेइं ज़ोवं, “डरा न, अवं ज़ानताईं कि तुस नासरत नगरेरे यीशु तोप्पी राओरिथ, ज़ै क्रूसे पुड़ च़ाढ़रो थियो। तै मुड़दन मरां ज़ींतो भोवरोए। तै इड़ी नईं। हेरा, ई तैए ठार आहे, ज़ैड़ी तैसेरी लाश रख्खोरी थी। 7पन तुस गेइतां तैसेरे चेलन सेइं त कने पतरसे सेइं भी ज़ोइयथ कि यीशु तुसन करां पेइलो गलील इलाके जो गालो। ज़ेन्च़रां तैनी पेइलू तुसन सेइं ज़ोवरू थियूं, तेन्च़रां तुस तैस तैड़ी लाले।” 8तैना कुआन्शां कब्री मरां बेइर निस्तां तैट्ठां नेश्शी जेई, किजोकि तैन्न थर्क लग्गोरी त घेबरोरी थी। बत्तां तैनेईं केन्ची सेइं किछ न ज़ोवं, किजोकि तैना डेर्री थी।
यीशु मरियम मगदलीनी लेइहोते।
(मत. 28:9-10;यूह. 20:11-18)
9हफतेरे पेइले दिहाड़े झ़ेझ़ भोते, यीशु मुड़दन मरां ज़ींतो भोइतां पेइले मगदलीन नगरेरी मरियमी लेइहोव, ज़ैस मरां तैनी पेइलां सत भूतां केरो सायो कड्डोरो थियो। 10मरियमां यीशु लानेरे पत्ती, गेइतां तैसेरे चेलन खबर दित्ती, ज़ैना यीशुएरे लेई शोग केरने लग्गोरे ते कने लेरां देने लग्गोरे थिये। 11पन ज़ैखन तैनेईं तैसारी गल शुनी कि यीशु फिरी ज़ींतो भोवरोए ते तैसां लेवरोए, त तैनेईं तैसारी गल्ली पुड़ याकीन न कियूं।
यीशु अपने दूई चेलन लेइहोते।
(लूक. 24:13-35)
12तैल्ला पत्ती, यीशु अपने चेलन मरां दूई चेलन होरि रूपे मां लेइहोव, ज़ैखन तैना (यरूशलेम) नगरेरां अपने ड्लोंव्वे जो च़लोरे थिये। 13तैखन तैनेईं भी नगरे वापस एजतां यीशुएरे होरे चेलन खबर दित्ती, पन तैनेईं तैन केरि गल्लारो भी विश्वास न कियो।
महान आदेश
14तैल्ला पत्ती, यीशु अपने 11 चेलन भी लेइहोव, ज़ैखन तैना रोट्टी खेइ राओरे थिये। त तैन केरे अविश्वास त कने सखत दिलेरे वजाई सेइं यीशुए तैना डांटे, किजोकि तैनेईं तैन केरो विश्वास न कियो, ज़ैनेईं यीशु ज़ींतो भोनेरे पत्ती तै लेवरो थियो।#मत. 28:16-20;लूक. 24:36-49;यूह. 20:19-23;प्रेरित. 1:6-8. 15यीशुए अपने चेलन ज़ोवं, “तुस सैरी दुनियाई मां गेइतां सारे लोकन मेरे बारे मां खुशखबरी शुनाथ। 16ज़ै कोई मीं पुड़ विश्वास केरे ते बपतिस्मो ने, तैस पापां केरि सज़ाही करां मुक्ति मैल्हेली। पन ज़ै कोई विश्वास न केरे, तैस अपने पापां केरि सज़ाह मैल्हेली। 17ज़ैना मीं पुड़ विश्वास केरतन, तैना एरां चमत्कारेरां कम्मां (निशाना) केरले कि तैना मेरे नंव्वे सेइं लोकन मरां भूतां केरो सायो कढेले, ते नंव्वी-नंव्वी बोली केरले। 18ते अगर तैना ज़ेहरीले सप्पन ट्लाले त कने ज़ेहरीली चीज़ भी पीले, तांभी तैन्न किछ नुकसान न भोल्हो। ते ज़ैखन तैना बिमारन पुड़ हथ रख्खेले, ते तैना बेज़्झ़ोइ गाले।”
यीशु सुर्गे जो गाते।
(लूक. 24:50-53;प्रेरित. 1:9-11)
19यीशु अपने चेलन सेइं गल्लां केरनेरां पत्ती, परमेशरे तै सुर्गे जो नियो। ते यीशु परमेशरेरे देइने पासे राज़गेद्दी पुड़ बिश्शी जेव। 20ते यीशुएरे चेलेईं बेइर हर जगाई गेइतां लोकन खुशखबरी शुनाने लग्गे। ते प्रभु तैन सेइं साथी कम केरतो राव। तैना चमत्कारेरां कम्मां (निशानन) केरे ज़िरिये, ज़ैना साथी-साथी भोतां थियां, प्रभु साबत केरतो राव कि तैन केरि गल्लां सच़ आन। आमीन।
Nu markerat:
मरकुस 16: BHDNT
Märk
Kopiera
Jämför
Dela
Vill du ha dina höjdpunkter sparade på alla dina enheter? Registrera dig eller logga in
Bhadrawahi Bible (भड्लाई बाइबिल), 2020 by Beyond Translation is licensed under a Creative Commons Attribution-ShareAlike 4.0 International License.
