Matio 2
2
Dɛ̍ jlǐhɛ̍ tù-i nyɔ̍ ji̍ Jusu i̍ pɔ̀n la̍-a
1Ti̍ Jusu wlǔh-a dǒ Bɛfleɛɛn wlɔ̀ di̍i̍ dě Judia bloa̍ kɛ̍n-ɛ, nɛ̀ Ɛlo nu̍ blǔh baa. Dǒ-o bo dɛ̍ jlǐhɛ̍ tù-i nyɔ̍ sɔ-ɛ dě blǔh-a fɔ̌ kɔn we̍ tà jlǔh-a wlǔh-ia kwlǎ-a u̍h ji̍ dǒ Juluslɛn. U̍h la̍a̍, 2“Jǔpliɛ ɔ̀ wlǔh-a ɔ̀ iě-a blǔh baa nu̍ dǒ Juu nyɔ̍ we̍-ɛ, tà ɔ̍ nɛ ɛ? Dɛ̍nu̍ɛ, à jě ɔ̍ chǔhtlɛ̀n dě jlǔh-a kwlǎ wlǔh la̍-a, ɛ̍ kɔn à ji̍ à iě ɔ̍ wɛɛ sà.”
3Ti̍ Ɛlo wɔ̌n-a pɔ̀n la-ɛ, sɔ ɛ̍ nui ɔ̍ sèò kaa̍, ɛ̍ ke Juluslɛn wlɔ̀ kli̍hgbɛ̍ ke. 4Wɛ̀ ɔ̍ gbòe Nyɔsoa-a slaǎ sà nyɔ̍ klaaᵻ ke telě nǎ poe nyɔ̍ kli̍hgbɛ̍ i̍, wɛ̀ ɔ̍ tèle u̍h i̍, ɔ̍ la̍a̍, “Nyɔsoa-a Chèɛ̀ Tba̍ju la, tà ɔ̍ mu̍ wlǔh-i ɛ?”
5Wɛ̀ u̍h sèàɛ̍ ɔ̍ wlùh, u̍h la̍a̍, “Dě Bɛfleɛɛn dě Judia bloa̍ kɛ̍n. Kǎ Nyɔsoa-a tu̍owli po̍ nyɔ̍ nu̍ ka ɛ̍ chlǐh-ɛ. Ɔ̍ la̍a̍,
6‘Bɛfleɛɛn wlɔ̀, mɔ̀ nɛ-a dě Judia bloa̍ kɛ̍n-ɛ,
wlɔ̀ᵻ gbàɛ̀ klaaᵻ ìh gbǎ-a dɛ̍kɛ̍n-ɛ,
ìn se̍ i̍ wàn dě i̍h nynɛ̌.
Dɛ̍nu̍ɛ, dǒ ìn di̍i̍ bo dlǔtu-a mu̍ sɔ,
wɛ̀ ɔ̍ iě dǒ ǎn chɛ̌ Eslɔɛ nyɔ̍ we̍ i̍ gbɛ̀n.’ ”
7Ti̍ Ɛlo wɔ̌n-a u̍h-a wlu̍-ɛ, wɛ̀ ɔ̍ dǎ dɛ̍ jlǐhɛ̍ tù-i nyɔ̍ laa̍ dě slǎn iě ɔ̍ tèle u̍h i̍, ɔ̍ la̍a̍, “Ti̍ we̍ mɔ̀ jě chǔhtlɛ̀n la ɛ?” Iě u̍h sèàɛ̍ ɔ̍ wlùh. 8Wɛ̀ ɔ̍ la̍a̍, “Pò mɔ̀ mu̍ Bɛfleɛɛn-ɛ, nɛ̀ mɔ̀ pɔ̀n jǔ laa̍ i̍ chɛ̀gbɛɛ. Pò mɔ̀ jě ɔ̍-ɛ, nɛ̀ mɔ̀ ji̍ mɔ̀ iě ǐn wlùh sèàɛ̍, wɛ̀ ǎn chɛ̀ iě ɔ̍ wɛɛ sà la̍ mu̍ ke.”
9-10U̍h sɔ-a dě slǎn-a, iě u̍h mu̍. U̍h gbǎ-a dě wìè-iɛ, chǔhtlɛ̀n ɛ̀ u̍h jě-a dě jlǔh-a kwlǎ wlǔh la̍-a wɛ̀ u̍h iě-a ji̍-ɛ dǔ-ɛ, ɛ̍ gbǎ dǒ u̍h jǔ dɛ. U̍h jě-a chǔhtlɛ̀n laa̍-ɛ, sɔ u̍h gbǎ mɔna̍ dɛ kaa̍. Iě ɛ̍ mu̍ u̍h jǔ te̍e̍ wɛ̀ ɛ̍ nyna i̍ dǒ gbò kɔn di̍i̍ jǔpliɛ nɛ-a dlǔwèàì. 11Wɛ̀ u̍h pa̍ dě gbò. Iě u̍h jě jǔ-a chɛ̀ ke ɔ̍ de̍ Mɛle, wɛ̀ u̍h chlìi i̍ iě u̍h sà ɔ̍ wɛɛ. Wɛ̀ u̍h pɔ̀ni u̍h-a gbèèkǔᵻ, dě u̍h sà kòo̍ ke nɔ̌-dɛ̍ᵻ chɛ̀, ìh ke chò ke sùè-chlǎn wɔ̀ɛ-ɛa, iě u̍h nyǐ i̍h ɔ̍.
12Jɛ u̍h se̍ dě Ɛlo we̍ jii dode̍, iě u̍h gba̍ wìè dɛɛ u̍h mu̍ u̍h blǐ. Dɛ̍nu̍ɛ, Nyɔsoa sèàɛ̍ u̍h wlùh dě nyinɔ̍ i̍ u̍h-u je̍e dě ɔ̍ we̍ jii dode̍.
Josɛ gbǎ-ɛ Mɛle ke ɔ̍ jǔ kwlǎ
13Ti̍ dɛ̍ jlǐhɛ̍ tù-i nyɔ̍ mu̍-a wɛ̀-ɛ, wɛ̀ Joi-a ǐnchɔ̀ jii Josɛ dlǔ we̍, ɛ̍ la̍a̍, “Sɔ-ɔ, dǔ jǔ la ke ɔ̍ de̍-e. Mɔ̀ ple̍, mɔ̀ iě Iche bloa̍ kɛ̍n mu̍. Dě mɔ̀ iě nɛ te̍e̍ wɛ̀ iě mɔ̀ wlùh sèàɛ̍ wɛ̀ mɔ̀ iě-e sɔ-ɛ dǔ. Dɛ̍nu̍ɛ, Ɛlo-a mu̍ jǔ la i̍ pɔ̀n ɔ̍ iě ɔ̍-ɔ gbɔ̀lɔ bu̍ɛ̍i̍.”
14Wɛ̀ ɔ̍ sɔ-ɔ, iě ɔ̍ dǔ jǔ laa̍ ke ɔ̍ de̍-e maɔ̍ iě u̍h mu̍ Iche. 15Dě u̍h nɛ te̍e̍ wɛ̀ Ɛlo mɛ̌. Ɛ̀ la ɛ̍ nɛ-ɛ wɛ̀ dɛ̍ Joi bla̍-a dě ɔ̍ tu̍owli po̍ nyɔ̍ ja̍a̍-ɛ, ɛ̍ iě tìh-a taǐn nu̍. Ɔ̍ la̍a̍, “Ǐn dǎ ǎn jǔ ɔ̍ iě Iche sɔ.”
Ɛlo dbǎ jɔ̍gbauᵻ nynuu̍pli dě Bɛfleɛɛn
16Jɛ ti̍ Ɛlo juo-ao dɛ̍ i̍ ka dɛ̍ jlǐhɛ̍ tù-i nyɔ̍ poe-a ɔ̍ gblàa̍ i̍-ɛ, sɔ ɔ̍ nɛ tɛtɛ dǒ jlu̍h we̍. Wɛ̀ ɔ̍ dbo̍ fledlǔ u̍h iě dě Bɛfleɛɛn ke wlɔ̀ᵻ nɛ-a ɛ̍ de̍e̍ i̍-ɛ di̍i̍-i mu̍ u̍h iě jɔ̍gbauᵻ nynuu̍pli kli̍hgbɛ̍ dbǎ, sɔ dǒ chǔh due we̍ ìè sɔ̀nᵻ sɔɔ̌n jɛɛ. Ɔ̍ tba̍ nynuu̍ tu̍ laa̍ chèɛ̀, dɛ̍nu̍ɛ, ti̍ dɛ̍ jlǐhɛ̍ tù-i nyɔ̍ jě-a chǔhtlɛ̀n laa̍-ɛ, ɛ̍ tɛn dlǔ wɛ̀ gbɛɛ.
17Sɔ ɛ̍ nu̍ ɛ̍-ɛ dɛ̍ Nyɔsoa-a tu̍owli po̍ nyɔ̍ Jɛlemaɛa bla̍-aɛ, ɛ̍ nu̍ tìh-a taǐn. Ɔ̍ la̍a̍,
18“Fìn-i wlu̍-a sɔ dě Wlaama wlɔ̀ di̍i̍.
Wlechɔ-a we̍le dlǔgba we̍ ɔ̍ fìn ɔ̍ nynuu̍.
Ɔ̍ se̍ pɔ̀n nyɔ̍ iě ɔ̍ gbòɛ̀ i̍ blaɛ,
dɛ̍nu̍ɛ, u̍h se̍ nɛ dɛ.”
Jɛwɛ̀ Jusu bei-a sɔ Iche bloa̍ kɛ̍n
19Ti̍ Ɛlo mɛ̌-a wɛ̀-ɛ, dǒ-o bo Joi-a ǐnchɔ̀ jii Josɛ dlǔ we̍ dě Iche, ɛ̍ la̍a̍, 20“Sɔ bloɔ̍, dǔ jǔ la ke ɔ̍ de̍-e mɔ̀ iě dě Eslɔɛ bloa̍ kɛ̍n mu̍. Dɛ̍nu̍ɛ, ùh-a pɔ̀n-a jǔ la dbǎ-a i̍ de-ɛ, u̍h mɛ̌ wɛ̀.” 21Wɛ̀ ɔ̍ sɔ bloɔ̍ iě ɔ̍ dǔ jǔ laa̍ ke ɔ̍ de̍-e wɛ̀ u̍h mu̍ dě de̍ Eslɔɛ.
22Jɛ ɔ̍ wɔ̌n pɔ̀n ka Akeleɔ nu̍-a blǔh baa dǒ ɔ̍ baa wɔ̀ɔ̀ we̍-ɛ, sɔ ɛ̍ po̍ ɔ̍ faɔn ɔ̍ iě-e mu̍. Wɛ̀ Nyɔsoa sèàɛ̍ ɔ̍ wlùh dě nyinɔ̍ i̍ dɛ ke. Sɔ ɛ̍ nu̍ ɛ̍ iě ɔ̍ sàɛ̀ kɛ̍n dě Kaladii fɔɔ. 23Iě ɔ̍ mu̍ ɔ̍ tǐn dǒ Naaslɔɛ wlɔ̀ di̍i̍. Sɔ ɛ̍ nu̍ ɛ̍ dɛ̍ Nyɔsoa bla̍-a dě ɔ̍ tu̍owli po̍ nyɔ̍ ja̍a̍-ɛ, ɛ̍ nu̍ tìh-a taǐn. U̍h la̍a̍, jǔ la, “U̍h-a mu̍ ɔ̍ Naaslɔɛ jǔ dǎɛ.”
Nu markerat:
Matio 2: KDNT
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
The New Testament in Western Krahn published as KU̍O̍ DELEE © The Bible Society in Liberia, 1999.