Enzũko 3
3
Enzoka ikateba Adamu na Eva
1Nĩkwa enzoka yabya nʼamenge kwilaba esyonyama syosĩ syʼomolĩ esyo Mwami Mukulu Nyamuhanga abya iniabirihangika. Neryo moyabũga nʼomũkalĩ, iti, Ega, ko Nyamuhanga abĩrĩbũga ati, Simusyerya oko miti yosĩ yʼeririma kwehĩ? 2Omũkalĩ mwasũbĩrya enzoka ati, Twanganalya oko bĩgũma byʼemiti yʼomwʼirima, 3nĩkwa oko bĩgũma byʼomuti owali omo katĩkatĩ kʼeririma, Nyamuhanga abĩrĩbũga ati, Simusyerya kubyo, kutse sĩmũsyetũla kugo, mukasyasyahola. 4Enzoka moyabũga nʼomũkalĩ iti, Simwendisyahola nʼahake. 5Kusangwa Nyamuhanga anasĩ ekiro mwasyalya kubyo, ameso wenyũ asyalĩbũlwa, kandi ko mwasyabya nga Nyamuhanga, imwabya nʼeriminya ekibuya nʼekibi. 6Neryo omugulu omũkalĩ alangira omuti kʼowene busana nʼakalyo, nʼakandi kwʼakatsemesaya meso, kandi omuti kwʼanganzwa busana nʼeriyira omundu mo wʼamenge, mwĩmya oko bĩgũma byago, mwalyakyo. Mwahakyo ĩba wuwe, naye mwalyakyo. 7Neryo ameso wʼababiri bosĩ mwalĩbũlwa, mobaminya ko babya ndũmbũ. Neryo mobalandira haguma ebikoma byʼomũtĩnĩ, mobayirabyo mo ngimba. 8Neryo mobowa omulenge wʼOmwami Mukulu Nyamuhanga akalendera omwʼirima omo malengera. Omundu oyo nʼomũkalĩ wuwe mobayĩbĩsa oko bũsũ bwʼOmwami Mukulu Nyamuhanga omo katĩkatĩ kʼemiti yʼeririma.
Eritswerwa lya Adamu na Eva
9Neryo Omwami Mukulu Nyamuhanga mwabirikira omundu oyo, mwabũga naye ati, Kʼuli hahi? 10Naye mwabũga ati, Mongowa omulenge wawe omwʼirima, mongubaha, kusangwa nyiri ndũmbũ, mongayĩbĩsa. 11Neryo mwamubwira ati, Nindi wakubwira ati uli ndũmbũ? Wabirirya oko muti ogo nakuhana nyiti Susyeryako kwehĩ? 12Omundu oyo mwabũga ati, Yo mũkalĩ wamba eribya haguma nage, yo wamba oko bĩgũma byʼomuti oyo, nage monalya. 13Neryo Omwami Mukulu Nyamuhanga mwabũga nʼomũkalĩ ati, Ekyo wakolĩre nĩkĩ kwehĩ? Omũkalĩ mwabũga ati, Enzoka yo yanyiteba, nage monalyakyo. 14Neryo Omwami Mukulu Nyamuhanga mwabũga nʼenzoka ati, Kusangwa wabirikola ekĩ, uli mutakirwa kwilaba esyonyama syosĩ syʼeka, na kwilaba esyonyama syosĩ syʼomolĩ; wasyayikura oko nda yawe, wasyalya olũtũtũ ebiro byosĩ byʼeribyaho lyawe. 15Kandi nasyahĩra obũyĩgũ omo katĩkatĩ kawe nʼomũkalĩ, nʼomo katĩkatĩ kʼekihanda kyawe nʼekihanda kiwe. Iye asyabanda omutwe wawe, nawe wasyabanda akasĩnzĩro kuwe. 16Neryo Nyamuhanga mwabũga nʼomũkalĩ ati, Nasyakanyĩa obwagalĩ bwʼeributa lyawe bo kutsibu. Omo bwagalĩ wasyabuta abana, neryo erisonda lyawe lyasyabya ũkwʼĩbawe, naye asyakutabalako. 17Nĩkwa Nyamuhanga mwabũga na Adamu ati, Kusangwa wabirihulikirira omulenge wʼomũkalĩ wawe, kandi wabirirya oko bĩgũma byʼomuti, ogo nakuhana nyiti susyeryako. Ekitaka kyamatakirwa busana nawe, Omo bũlĩge wasyalya ebyalya byakyo ebiro byosĩ byʼeribyaho lyawe. 18Kyasyakũlasĩrya emisakisaki nʼamahwa, nawe wasyalya emyaka yʼomolĩ. 19Omo lũnza lʼobũsũ bwawe wasyalya akalyo, erĩhĩka oko kiro wasyasuba oko kitaka, kusangwa walũsĩbawa omo lũtũtũ nʼakandi uli lũtũtũ, nʼakandi wasyasuba omo lũtũtũ. 20Neryo omundu oyo mwahula erĩna lyʼomũkalĩ wuwe mo Eva, kusangwa abya nyĩnya wʼabosĩ abaliho. 21Omwami Mukulu Nyamuhanga mwakokoterya Adamu nʼomũkalĩ wuwe esyongimba syʼesyongobĩ, mwambalya syobo.
Nyamuhanga akahiga Adamu na Eva bʼomwʼirima
22Neryo Omwami Mukulu Nyamuhanga mwabũga, ati, Lebaya, omundu oyũ abiribya nga muguma gʼũkwʼĩtwe, eriminya ebibuya nʼebibi. Lino syaswehĩra ebyala biwe erioha ebĩgũma byʼomuti wʼengebe, nʼerirya kubyo, akabyaho akakota. 23Kyatuma Omwami Mukulu Nyamuhanga ĩnĩalolyabo eyĩhya wʼeririma lyʼeEdenĩ, alime ekitaka ekyo alũsĩbawamo. 24Litya mwahigira omundu oyo yʼeyĩhya, neryo mwahĩra Amakerũbĩ oko luhande lwʼendata lwʼeririma lyʼeEdenĩ; nʼomũyalĩ wʼekirimi kyʼomuliro owakatĩmba ehosĩ, busana nʼerĩteya enzira eyʼomuti wʼengebe.
Nu markerat:
Enzũko 3: KB80
Märk
Dela
Kopiera
Vill du ha dina höjdpunkter sparade på alla dina enheter? Registrera dig eller logga in
Bible in Kinandi © Bible Society of the Democratic Republic of Congo, and Bible Society of Uganda, 1980.