Populära bibelverser från Roma 3

Dela

Asuntu na nyakasalaꞌ ya kadég, diliꞌ na manga utaw ka͡apetan ya kadyawan na Tyumanem. Manang asuntu sa kallat nan kanaten na walaꞌ ya bayad, pigdawat nan kitadun kasiling na walaꞌ da ya salaꞌ magi sa pagkamatay ni Kristu Jisus. Aw dun da nan lekata ya kadég tadun lekat adti pag-allang na salaꞌ.

Dun ni bagu na pa-agi, mabatug da dawaten na Tyumanem ya pangkay singalan na utaw kasiling na walaꞌ da ya salaꞌ magi sa pagpangintu-u nan kan Jisu-Kristu, pangkay Judiyu silan aw pangkay Héntil. Kay adti Tyumanem, ya kadég alag da mig-unawa.

Kay pigpadala sakanan na Tyumanem na un ma-imoꞌ kalyu kanaten. Aw magi sa duguꞌ ni Jisus malanas ya kanaten manga salaꞌ kun mangintu-u kitadun kanan, aw dun pakita͡an na Tyumanem na matinaw ya kanan pagbayaꞌ sa manga utaw na nyakasalaꞌ. Asini muna, asuntu na magpakatagen ya Tyumanem sa kadaman nan, pigpalabay pa nan ya salaꞌ na manga utaw. Manang adun pigpakitaꞌ da nan kanaten na matinaw ya kanan pagbayaꞌ, kay walaꞌ nan pabaya-i ya manga salaꞌ tadun. Magi dun ni pagkamatay ni Jisus, piglekat nan kitadun. Aw pangkay singalan ya mangintu-u kan Jisus, dawaten sakanan na Tyumanem kasiling na walaꞌ da ya salaꞌ.

Kay bekeꞌ na pagtuman sa Uldin ya du-an na dawaten kitadun na Tyumanem kasiling na walaꞌ da ya salaꞌ. Kay magi saba sa Uldin, dun ka-ede-i na ya kadég tadun alag nyakasalaꞌ.

Pigpasulat na Tyumanem, law nan: “Walaꞌ ya pangkay sambuk na utaw na adti anenanganeng na Tyumanem walaꞌ ya salaꞌ. Aw walaꞌ ya sambuk na nyakalabet sa Tyumanem, aw walaꞌ ya malim maka-edeꞌ kanan. Ya kadég na manga utaw, alag tyumalikud kanan, yanagaw walaꞌ alag ya ma-untung kanilan. Walaꞌ ya pangkay sambuk na mig-imoꞌ sa madyaw.”

Kay kya-ede-an da naten na pigdawat nan kitadun kasiling na walaꞌ da ya salaꞌ magi sa pagpangintu-u tadun kan Kristu Jisus, aw bekeꞌ na asuntu na pagtuman tadun sa kadég na suguꞌ na awun ni Uldin.

Ya tubag ku, “Diliꞌ saba na maynan! Ya Tyumanem pagtumanen nan ya manga pigpakang nan, pangkay ya kadég na utaw alag maggaluꞌ. Kasiling na pigsulat ni Dabid asini muna: ‘Dun ni kanmu paglong, kay Tyumanem, ka-ede-an na matinaw ya pagbayaꞌ mu sa manga utaw. Aw degen mu ya manga miglong na bekeꞌ na matinaw ya pag-ukum mu.’ ”