ROMUDENƆ 2
2
Luda ni yãkpatɛ kɛ a zɛ́a
1Abire yãi mɔkɔ̃n kũ ndì gbɛ̃ pãnde taari e, ń kutɛkɛna vĩro. Tó n gbɛ̃ pãnde taari è, n n zĩda dà yãmmɛ,#Mat 7:1-2 zaakũ mɔkɔ̃n gbɛ̃taari'eri ndì kɛ lɛ se dɔ. 2Ó dɔ̃ kũ Luda yãkpatɛkɛna kũ yã bire taka kɛ̀rinɔ kun a zɛ́amɛ. 3Mɔkɔ̃n kũ ndì yã bire taka kɛ̀rinɔ taari e, akũ ndì kɛ se, ntɛn da ĩni bo Luda yãkpatɛkɛnan yá? 4Ke ntɛn dɔkɛ kũ Luda nnakɛnnɛna zɔ̃kɔ̃ɔo kũ a mɛnao kũ a sùruuomɛ? Ń dɔ̃ kũ Luda tɛni a nna kɛnnɛ de ǹ n nɛ̀sɛ litɛ yãinloo? 5N sãgbãna kɛ̀, ńdi nɛ̀sɛ litɛro, ntɛn pɔfɛ̃ kakaranyĩ ari Luda pɔfɛ̃kipammana gɔrɔ zĩ, tó Luda yãkpatɛkɛnaa kũ gbɛ̃nɔ a zɛ́a bò gupuraa. 6Ani fĩna bo baadinɛ a yãkɛnaaa.#Zab 62:12 7Gbɛ̃ kũ òtɛn gakuri kũ bɛ̀ɛrɛɛo kũ mɛ̀vãnasario wɛtɛ, akũsɔ̃ òtɛn yã mana kɛ kũ mɛnaonɔ ni wɛ̃̀ndi kũ àdi lákaro le. 8Gbɛ̃ kũ ń zĩda pɔyeina tɛn dońnɛ arɛ ò gì yãpurai ò tɛ́ yã vãninɔ sɔ̃, Luda ni pɔfɛ̃ kũ pɛ̃tɛ̃o kipaḿma. 9Wɛ́tãmma kũ wãwão ni yãvãnikɛri sĩnda pínki le, atɛ̃nsa Yudanɔ, ń gbɛra buri pãndenɔ. 10Luda ni yãmanakɛri sĩnda pínki gba gakuri kũ bɛ̀ɛrɛɛo kũ aafiaao, atɛ̃nsa Yudanɔ, ń gbɛra buri pãndenɔ. 11Zaakũ Luda dì gbɛ̃ke wɛ́ gwaro.
12Gbɛ̃ kũ à durunna kɛ̀ Musa doka dɔ̃naa sari ni kakatɛ lɛ doka pìi sari. Gbɛ̃ kũ à durunna kɛ̀ nana doka pì ɔĩ sɔ̃, Luda ni yãkpatɛ kɛ kãao doka pìi musumɛ. 13Adi kɛ gbɛ̃ kũ àtɛn doka ma kũ são mɛ́ à mana Ludanɛro. Gbɛ̃ kũ àtɛn zĩ kɛa mɛ́ ani bo mana. 14Tó buri kũ ò Musa doka dɔ̃ronɔ yã kũ à kɔ̃ sìoo kɛ̀ kũ ń zĩdao, ò doka vĩ ń zĩdaaamɛ. 15Òtɛn mɔwɛrɛ kũ yã kũ à kú doka pìi gũn kú ń nɛ̀sɛmmɛ. Ń laasun tɛni a yãpura o dɔ, zaakũ ń laasun mɛ̀n doro, a kenɔ dì ń da yãn, a kenɔ dì ń bon. 16Lɛmɛ yãkpatɛkɛgɔrɔ zĩ Luda ni yãkpatɛ kɛ kũ bisãsirinɔ yã kũ à utɛna ń nɛ̀sɛn musu Kirisi Yesu gãi, lákũ baaru nna kũ matɛn kpá ò nà.
Yudanɔ bi dokadarisarinɔmɛ
17Mɔkɔ̃n Yuda inaa, n zɛ kũ n Yudakɛo, ń Musa doka náani vĩ, ntɛni ĩa dã kũ Ludao. 18Ń Luda pɔyenyĩna dɔ̃ kũ yã kɛ̃ à zɛ́ vĩo, kũ ò doka pìi dàdannɛ yãi. 19Ntɛni da ń de vĩ̀nanɔ wɛ́de ũ, gbɛ̃ kũ ò kú gusira gũnnɔ fitila ũ, 20wɛ́siradenɔ yãdannɛri ũ, gbɛ̃ dufunɔ kyódari ũ. Ntɛni da Luda dokamɛ dɔ̃na kũ yãpurao mì ũ. 21Mɔkɔ̃n kũ ndì yã da gbɛ̃ pãndenɔnɛ, bɔ́yãi ndì da n zĩdanɛroo? N pì òsun kpãni oro, mɔkɔ̃n ndì o se yá? 22Ndì pi òsun zina kɛro, akũ ndì kɛ se yá? Ndì tãnanɔ gya bo, akũ ndì ń kpɛ́ pɔ́nɔ kpãni o se yá? 23Ndì ĩa dã Luda doka musu, akũ n doka pì danasari dì Luda tɔ́ yaka. 24Zaakũ á yãin buri pãndenɔ dìgɔ̃ Luda tɔ́ vãni sí lákũ ò kɛ̃̀ Luda yãn nà.
25Tó ń Luda doka kũna, akũ tɔ̃̀zɔ̃ àre vĩnnɛ. Tó ńdi a yã da sɔ̃ro, ń lɛɛlɛ kũ gyɔfɔrɔdenɔmɛ. 26Tó gyɔfɔrɔde Luda dokanɔ kũna, Luda ni gyɔfɔrɔde pì gwa lɛɛlɛ kũ gbɛ̃ kũ à tɔ̃̀ɔ zɔ̃̀ɔoroo? 27Bee tó ń doka takada pì kũna, akũsɔ̃ ń tɔ̃̀zɔ̃na, tó ńdi doka pì daro, gyɔfɔrɔde kũ à yã pì kũna ni tó yã danla. 28Kunna Yuda ũ yãpura bi mɛ̀barayãnlo, lɛmɛ tɔ̃̀zɔ̃na yãpura bi mɛ̀barayãn sero. 29Kunna Yuda ũ yãpura bi nɛ̀sɛgũnyãmɛ, lɛmɛ dɔ tɔ̃̀zɔ̃na yãpura bi nɛ̀sɛgũnyãmɛ se. Luda Nini zĩmɛ, adi kɛ doka takada yãnlo. Luda mɛ́ àdi gbɛ̃ bire taka sáabu kpá, adi kɛ bisãsirinlo.
Bisã Bible © SIM International, 2005.