La ko kja̱xin tjáncháha̱ Díos kixin jehe chꞌan chrótjáhara ti kjuaxrexinkaon jína kixin chrókónohara kaín ti nkehe chrókꞌuejochohénra kixin xi̱kaha tsíkꞌeya̱ha̱ra chꞌan, la ko tso̱nohara kixin imá tjete ti nkehe sincheki̱to̱nhe̱n chꞌan ti sin kuènté chꞌan. La ko kja̱xin tso̱nohara kixin ti kjuachaxin kuènté Díos mé ijnko nkehe imá ijié, mé chóntahya nketí tsjeje̱xin. Ti kjuachaxin kuènté Díos mé ichꞌe ixra̱ nkaya a̱séni kixin jeheni tinkáchónkini Cristo. Mé tíhi nkokón kjuachaxin kjua̱ko̱xi̱n Díos *ti ó kjuínchexechón chꞌan Cristo la ko kjuajon chꞌan kjuachaxin kjuákꞌetja̱xi̱n Cristo ti itja chꞌan chjina ti nkaya nka̱jní. A̱ndá xi̱kaha kꞌuáyéhe̱ Cristo kjuachaxin tsꞌe̱tue̱hen kaín nkehe siín nka̱jní la ko chjasintajni, ijie la ko nkochríxín.