Ioane 1
1
Ko Iētū te “Muna”
1I te yāyākinga nā vai wua te Muna,#1:1 te Muna: ko te muna Ēleni (Logos) e talatala wōwonutū nō te tū na wowoungia ai te ao nei e te Atua lā loto o tona mana ma tona māwutu. nā i tawa o te Atua te Muna ia, ko te Atua lāi oki te Muna ia. 2Ko lāua ma te Atua mai te yāyākinga.
3Lā loto ōna na wowoungia ai te wī mea tākatoa. Kāe mea loa i nā mea na wowoungiá e kiai na wowoungia ēna. 4Ko i loto ōna te ola, ko te ola ia oki ko aumaia te mālama ki te tangata. 5Ko yila mai te mālama ki te pōuli, yaulā, e kiai na maua i te pōuli e te popoki lā lunga o te mālama ia.#1:5 e kiai na maua i te pōuli e te popoki lā lunga o te mālama ia: mēkole, e kiai na taka lelei i te pōuli te mālama ia.
6Eia, yau loa te tangata ia, e mea ungaina mai e te Atua, ko Ioane tona ingoa. 7Na yau iāna wai kite kē wakamamata ai i te mālama ia, kē nunumi ai oki te wī tāngata ki ana talatala. 8E kiai ko ona te mālama ia, na yau wua lā iāna wai kite mō te mālama ia. 9Ko te mālama tika tēnei, ko ona ko wakayilangia te wī tangata tākatoa i tana yaunga ki te ao nei.#1:9 Mēkole: Ko te mālama tika tēnei, ko ona ko wakayilangia te wī tāngata tākatoa e wānanau mai ki te ao nei.
10Nā i te ao nei te Muna ia, wua atu oki na wowoungia te ao nei lā loto ōna, e kiai lā iāna na malaia mai e te ao nei. 11Na yau iāna ki tona wenua tangata, e kiai loa iāna na wulingia mai e ona tāngata ia. 12Ki te kau lā na āliki ia ana, ia lātou te kau na loloku ki tona ingoá, tuku loa ēna te tika kē lilo lātou wai tama mā te Atua. 13Ko te kau teia e kiai na wānaungia mai ma te toto, e kiai oki i nā manatunga a te tangata, pēkole i te winangalo o te matua tāne, ko te Atua lā na akawānaungia lātou.
14Lilo mai loa te Muna nei wai tangata, yau loa iāna nō i te puyo o mātou. Na a mātou kitea tona yilatū, ko te yilatū e kaleka ki te Wuatai na yau mai te Matua Yā, na kamuloa yulā wua i te yauyau nunui ma te talatalatika.
15Nō ona oki te tala a Ioane nā wakamamata ai, wai lā ma te kakā pēnei, “Ko te tangata tēnei nā tala atu ai aú, ‘Ia ana ka yau i muli ōku nei, na yika atu iāna ia aku, nō mua oki iāna ōku.’ ” 16Mai te kī kakale o ona yauyau nunui na maua ai ia tātou tākatoa nā wakaleleinga e yē mutu. 17Na tukuna mai oki te Tule lā loto o Mōte, ko te yauyau nunui lā ma te talatalatika na yau lā loto o Iētū Metia. 18Kāe loa tangata na kalowia ēna te Atua. Ko te Tama wua lā e tayi, ko ona lāi oki te Atua, ia ana e pipiki wakatai ma te Matuá, ko ona oki na wakaālingia mai te Atua kia tātou.
Te wakamamatanga a Ioane Pāpetītō
(Mātaiō 3:1-12; Māleko 1:1-8; Luka 3:1-18)
19Ko te tala tēnei a Ioane i te unga mainga a te kau Ngāti Iūta o Iēlūtalema i nā tatakuvai ma nā Ngāti Levi kē uwi atu ki ai, ko ai iāna. 20E kiai loa iāna nā nanā, na tala lā iāna i te tika, “E kiai ko oku te Metia.”#1:20 te Metia: Ēleni, Christos, te wulinga o te ingoa Ēpela Mashiach; ko te wakamaepanga, “te tangata na wakayinua.”
21Uwi oki lātou kia ana, “Ko ai lā koe? Ko Ēlia mō koe?”#Teutelonomi 18:15, 18; Malaki 4:5
Pau atu ai iāna, “Ēkole, e kiai au ko ona.”
“Ko koe lā te Pelovetá?”#1:21 te Pelovetá: ko te peloveta na talangia e Mōte (Teutelonomi 18:15), ko ona na manatua ka yau wai vānanga i mua o te yaunga o te Metia.
Mea atu oki iāna, “Ēkole.”
22Uwi ai lātou wakawōu, “Ko ai ai koe? Tala mai ake koe kē nī ai a mātou muna kē kave ki te kau na ungaina mai mātou nei. E wea ai tau talatala nō koe?”
23Pau atu loa ia Ioane lā loto o nā talatala a te peloveta ko Ītaia, “Nō oku te leo o te kovi e vānanga peia i te mētēpalá, ‘Wakayakongia te ngutuala mō te Atu.’ ”#Ītaia 40:3 (LXX)
24Ko nā Pālitea lā na ungaina mai kia aná, 25uwi loa lātou peia kia ana, “Nō wea ai koe e pāpetītō ai mē e kiai ko koe te Metia, e kiai koe ko Ēlia, e kiai oki ko te Pelovetá?”
26Pau atu ai ia Ioane, “Ko pāpetītō au ki te yua,#1:26 ki te yua: mēkole, ki loto o nā yua; peia i nā yīlava 31 ma 33. e tayi lā tangata ko i te puyo o kōtou nā, ko yē a kōtou iloa. 27Ko ona ka yau i muli ōku nei, ko nā yele oki o ona tāmaka ko yē kaleka loa kē tatala ēku.”
28Na tupu nā mea nei i Pētānia e lā te toe kaokao o te kauvai ko Iōlītāna, te konga nā pāpetītō ai ia Ioané.
Ko Iētū te Punua Māmoe a te Atua
29Kē oko ki te toe ayo, kite atu loa ia Ioane ia Iētū ko yau kia ana, mea ai iāna pēnei, “Kakalo ake ki te Punua Māmoe a te Atuá, ia ana ka kāvea te yala a te ao nei. 30Ko ona tēnei nā tala atu ai aú, ‘E tayi tangata ka yau i muli ōku, na yika atu iāna ia aku, nō mua atu oki iāna ōku.’ 31E kiai oki na taka lelei ia aku ko ai iāna, ko te manatunga lā na yau ai au pāpetītō ki te yua, kē wakaāli ai ia ana ki te kakai o Ītalāela.”
32Eia, tala ai ia Ioane i te wānonga nei: “Na aku kitea te Vaelua i te leilo mainga ki lalo mai te Langi pe te kūkupá, nō ai i lunga ōna. 33E kiai lāi na taka ia aku ko ona teia, ia ana lā na ungaina mai au kē pāpetītō ki te yuá, mea mai loa pēnei kia aku, ‘Ko te tangata a koe na kite na leilo mai ai te Vaelua nō mutu i lungá, ko ona teia ka pāpetītō ki te Vaelua Yā.’ 34Na kalowia oki e oku mata, ēnei au e wakamamata atu nei, ko te Tama tēnei a te Atua.”
Nā pipi mumua a Iētū
35Kē oko ki te toe ayo, nīniko wakawōu mai loa ia Ioane ma lua ana toe pipi ki te konga ia. 36Eia, makoyia loa ēna ia Iētū ko yaele lā kiai, mea ai iāna pēnei, “Onoono ake ki te Punua Māmoe a te Atuá.”
37I te wakalongonga a lua pipi ia i tana talatala ia, ālu oki lāua lā muli o Iētū. 38Wuwuli ai ia Iētū, onoono atu i te tokalua ia ko ālu mai i muli ōna, uwi loa kia lāua, “E wea tā kōlua mea ko winangalo?”
Eia, mea atu ai lāua ki ai, “E te Lapi ē, ko nō koe i wea?” (Ko te wakamaepanga o te muna Lapi, “e Pūāpī”.)
39“Lōmamai ke a kōlua kitea,” te meanga a Iētū kia lāua. E ola wā pā i te avatea awiawi te vāia ia.
Eia, wō atu loa lāua, a lāua kitea ai te konga e nō ai iāna, na pau lāi ia lāua te katoanga o te ayo ia i tawa ōna.
40Ko Ānētelea, te taina o Timona Pēteló, ko ona te toe o te tokalua na langona te talatala a Ioane ia, na ālu ia Iētū. 41Ko te yanga mua a Ānētelea na wai, wano loa iāna ulu i tona taina ko Timona, tala atu ai peia kia ana, “Na a māua kitea te Metia.” (Ko tona toe wulinga, ko te Kilito.)#1:41 te Metia: Ēleni, Christos, te wulinga o te ingoa Ēpela Mashiach; ko te wakamaepanga, “te tangata na wakayinua.” 42Taki mai ai ēna ia Timona kia Iētū.
Kakalo loa ia Iētū ki ai, mea ai pēnei, “Ko Timona koe, te tama a Ioane. I te vāia nei ka tauvaloa koe kia Kepa.” (Ko te wulinga ko Pētelo, te wakamaepanga “e watu”.)
Na tauvalo ia Iētū ia Pilipa ma Nātanāela
43I te toe ayo mai, manatu loa ia Iētū kē wano ki Kalilea. Kite atu loa iāna ia Pilipa, eia, mea ai kia ana, “Yau i tawa ōku.”
44E tangata nō Pētetaita ia Pilipa, te ōile oki e nōnō ai ia Ānētelea ma Pētelo. 45I te kiteanga e Pilipa ia Nātanāela, mea oki iāna ki ai, “Na a māua kitea te tangata na tutingia e Mōte i loto o te Tule, ko ona oki teia nā tuti ai e nā pelovetá, ia Iētū o Nātalēta, te tama a Iōtēpa.”
46“Ko Nātalēta! E yī lā mea lelei ko maua mai ki ai?” te iliili mainga a Nātanāela.
Mea mai oki ia Pilipa, “Yau oki ke au kitea.”
47I te kakalo atunga a Iētū koa pili mai ia Nātanāela, kā ai tana meanga peia, “Ēnei lā te tangata Ītalāela tika, e kovi kāe takayala ko kitea i loto ōna.”
48“Nō wea na au iloa ai au?” te uwinga a Nātanāela.
Pau atu oki ia Iētū, “Na aku kitea taumua koe nā nō i lalo o te lākau tuke, i mua ake ka tauvalo atu ai ia Pilipa ia koe.”
49Eia, talatala ai ia Nātanāela ki ai, “E te Pūāpī ē, ko koe lāi pē te Tama a te Atua! Ko koe oki te Aliki o Ītalāela!”
50Mea oki ia Iētū ki ai, “Ko lotokono koe nō taku tala atunga kia koe, na aku kitea koe nā i lalo o te lākau tuké? Ka au kitea nā toe yanga wowotu atu i te mea ia.” 51Eia, mea atu oki iāna kia lātou, “Ko tala atu au i te tika, ka a kōtou kitea te mayukenga o te Langi, ma nā āngela a te Atua i te wakaakenga ki lunga ma te lēilo mainga ki lalo, ki lunga o te Tama a te Tangata nei.”#Kēnete 28:10-17
Zvasarudzwa nguva ino
Ioane 1: PKP
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2024, Wycliffe Bible Translators New Zealand Inc. in partnership with Te Wui Aliki o Pukapuka ma Nassau