Luka 24
24
Te tūwakawōunga o Iētū
(Mātaiō 28:1-10; Māleko 16:1-8; Ioane 20:1-10)
1Oko loa ki te ayo mua o te tāpati, i te vaveāo, kave loa te kau wāwine i a lātou lākau kakala nā penapená, wō atu ai ki te lua tanumate. 2Eia, a lātou kitea loa na wakatekatekā ki tātea te watu nā ūwi ai te ngutu o te lua ia, 3yaulā, kē ūlu atu lātou ki loto, e kiai na a lātou kitea te tino o te Atu ko Iētū.
4Ia lātou e wetū ma te nenu nā manako i te mea ia, na peia wua ake, wetū mai loa lua tangata ia i tawa o lātou, ma o lāua kākawu kānapanapa pe te uwilá. 5Pūnonou loa nā tupu o te kau wāwine ia ki lalo, na kamuloa mātataku. Eia, talatala mai ai te tokalua tāne ia kia lātou, “E wea kōtou e ulu ai i te tangata ola i te konga o te kau na mamaté? 6Ko yē i kinei iāna, na wenake ki lunga mai te mate! Wakamayala i ana mea nā tala atu kia kōtou, i te vāia nā nō ai ia kōtou i Kalileá, mea loa:#Mātaiō 16:21; 17:22-23; 20:18-19; Māleko 8:31; 9:31; 10:33-34; Luka 9:22; 18:31-33 7‘Ka tukua te Tama a te Tangata ki loto o nā lima o te kau yayalá kē wakatātaulongia, kē oko ki te tolu o te ayo, ka tū wakawōu mai iāna ki lunga.’ ” 8Eia, mayala loa te kau wāwine nei i ana muna ia.
9I tā lātou nīniko mainga mai te lua, tala loa lātou i te wī mea tākatoa ki te tino angaulu mā tai pipi, ma te toe kau nā i kiai. 10Ko nā wāwine nei, ko Mālia o Mākatala, ko Ioana, ko Mālia te matua wawine o Iākōpo, ko lātou ma nā toe wāwine na talaina mai nā mea nei ki nā āpōtetolo. 11Yaulā, e kiai lātou nā lotokono i te kau wāwine ia, na manatu nā pipi i nā talatala ia, ni tala wua. 12Yaulā, tū loa ia Pētelo ki lunga, mākalokalo ki te lua. Pūnou loa iāna ma te kakao ki loto, kitea atu ai ēna nā wuti kākawu paluvai nā kowikowi aí ko wetike wua i ai. Niko mai loa iāna ki wale ma te mīngutu wua e wea te mea na tupu nei.
Te tokalua nā yāele ki Ēmauta
(Māleko 16:12-13)
13I te ayo lāi ia, wō loa lua toe yoa o Iētū́ ki te lulu e lapangia ko Ēmauta, ko taliweolo ki te witu maile#24:13 witu maile: Ēleni, 60 stadia (ka lāua te 11 kilomita). te mamao mai Iēlūtalema. 14Ko yāele lāua ma te wakatau talatala wua i te wī mea na tupu ia. 15Ia lāua e talatala ma te yaluyalu i nā mea ia, yau loa ia Iētū yaele lā tawa o lāua; 16yaulā, na ālaingia o lāua mata kē yē a lāua iloa iāna.
17Eia, uwi loa ia Iētū kia lāua, “E wea te mea e wakatau yaluyalu yāele ai kōlua nā?”
Wetū wua ai lāua ma te laumatemate o nā tupu. 18Ko te toe o lāua e lapangia kia Keleopá, iliili loa ki ai, “Ko koe wua mō te tangata wilo i Iēlūtalema ko yē iloa te wī mea nā tupu i kiai i nā ayo nei?”
19“Ni wea nā mea ia?” tana uwi mainga.
Pau mai loa lāua ki ai, “Nā mea na tupu kia Iētū o Nātalētá. E peloveta te tangata ia, awukele i ana muna nā yalu ma ana wī yanga nā wai i mua o te Atua ma te kakai. 20Na kāvea iāna e o mātou tatakuvai wowolo ma nā wakayaele kē tūāngia kē mate, wakatātaulo oki lātou ia ana. 21Nā manaki oki mātou ko ona te tangata ka wakaolaina ia Ītalāela. Tēnei te toe, ko te tolu tēnei o te ayo na tupu ai nā mea nei. 22Wāpiki atu i tawa, na wetō o mātou palo i nā toe wāwine o mātou nei. Na wō lātou i te vaveāo nei ki tona lua, 23yaulā, e kiai lātou na kite i tona tino. Nīniko mai ai lātou, tala mai na wakaata mai nā āngela kia lātou, nā mea oki, na ola wakawōu iāna. 24Wō loa nā toe yoa o mātou ki te lua, kite atu ai ko tautonu pē nā muna a te kau wāwine nā tala mai ia, yaulā, e kiai iāna na kitea e lātou.”
25Eia, talatala mai ai ia Iētū kia lāua, “Tiāi kōlua ka pāioio ai ma te mālie o nā nunuminga i te wī mea nā talā mai e nā pelovetá! 26Kāle lā te Metia#24:26 te Metia: Ēleni, te Kilito, peia i te yīlava 46 ka lā loto loa iāna o nā mate nei pau, e ulu atu ai ki tona yilatū?” 27Eia, wakamālama ai ia Iētū kia lāua i nā mea tākatoa nā talaina i loto o te Puka Yā nō ona, taumua mai nā tutinga a Mōte, oko wua atu ki nā tutinga a te wī peloveta.
28Koa tō pili mai lātou ki te lulu e wō ai te tokalua ia, mea loa ia Iētū pe te mea ka wano kē tō mamao ki mua. 29Yaulā, nanau loa lāua ia ana, mea loa, “Yau kē nōnō tātou, koa vave te awiawi, koa pō oki te ayo nei.” Eia, ulu ai iāna ki loto, nō i te konga ia lāua ia. 30Ia lātou e nōnō i te kaingākai ia, liko loa iāna i nā walaoa, tataku loa ma te wakaatawai, vayivayi ai ma te tuku atu kia lāua. 31Eia, yūkena loa o lāua mata, taka ngaleka ai ia lāua ko Iētū teia, yaulā, wakangalo loa iāna mai mua o lāua. 32Eia, wakatau iliili wua ai lāua, “Kāle lā o tāua ngākau nei kaina loa te awi nā mumula i loto o tāua i ana talatala mainga i lunga o te ngutualá, peia tana wakamaepanga mai i te Puka Yā kia tāua?”
33Eia, wetū oki lāua ki lunga i te vāia ia, nīniko i te eva ki Iēlūtalema. A lāua kitea ai te tino angaulu mā tayi pipí ko wakalulu wakatai ma te toe kau, 34ko tala mai kia lāua, “Ko tika pē! Na tū wakawōu lāi te Atu, na wakaāli mai oki kia Timona!” 35Eia, tala atu ai lāua kia lātou i nā mea nā tupu i lunga o te ngutuala, peia te iloanga e lāua, ko Iētū pē teia i te vāia na vayivayi ai iāna i nā walaoá.
Te wakaālinga a Iētū ki ana pipi
(Mātaiō 28:16-20; Māleko 16:14-18; Ioane 20:19-23; Yanga 1:6-8)
36Ia lāua e tala nei kia lātou i nā mea ia, alaala wua ake ko tū ia Iētū i te puyo o lātou, mea mai loa kia lātou, “Kē ia kōtou nā te yauleka.”
37Na kamuloa lātou wetō nā palo ma te mātataku, na manatu e yītolo tā lātou mea na kite ia. 38Talatala ai iāna kia lātou, “E wea te mea na vioina ai kōtou? E wea oki na mangalua ai o kōtou manako? 39Kakalo mai ake ki oku lima ma oku vae nei. Ko oku tika tēnei! Wāwā mai o kōtou lima kē taka ia kōtou; ko te yītolo oki ko yē wai kiko ma te ivi pē eku e onoono mai ai kōtou nā.”
40Kē oti ana muna ia, wakaāli loa iāna kia lātou i ona lima ma ona vae. 41E kiai loa lātou kē nunumi tika nō te ongo o te vēvēia ma te mīmīngutu. Eia, iliili ai iāna kia lātou, “E nī a kōtou popoa i kinā?” 42Tuku atu loa lātou e konga ika tunutunu kia ana, 43liko mai ai iāna, kai lā mua o lātou.
44Talatala loa iāna kia lātou, “Ēnei nā mea nā talā atu ai au kia kōtou i te vāia nā tataka ai tātou: Ka tupu tākatoa te wī mea na tutingia mō oku i loto o te Tule a Mōte, nā puka a nā Peloveta ma nā Talamó.”
45Eia, yuyuke loa ēna o lātou manako kē taka ngaleka ia lātou nā muna i loto o te Puka Yā. 46Mea oki iāna kia lātou, “Na tutingia pēnei, ka takikinongia te Metia, ka tū oki ki lunga mai te mate i te tolu o te ayo, 47ka vānangaina ki te wī wenua te talatala o te yalayala o te ngākau ma te wakakolenga i nā yala i tona ingoa, ka taumua mai Iēlūtalema nei. 48Ko kōtou oki nā kite o nā mea nei. 49Ka tuku mai au kia kōtou i te mea a toku Matua na wakapono mai. Yaulā, kali wua kōtou i te ōile nei kē oko ki te vāia e wakakawua ai kōtou ki te mana mai lunga mai.”#Yanga 1:4
Te nikonga a Iētū ki lunga o te Langi
(Māleko 16:19-20; Yanga 1:9-11)
50Eia, taki loa iāna ia lātou ki vao o te ōile ia, ki te konga e pili wua ki Pētānia, tāki loa ona lima ki lunga, wakalelei mai ai ia lātou.#Yanga 1:9-11 51Ia ana e wakalelei ia lātou nei, maka loa iāna ia lātou, kāvea atu ai iāna ki lunga o te Langi. 52Eia, tautapa loa lātou ia ana i kiai, nīniko atu ai lātou ki Iēlūtalema ma te yulā i te vēvēia. 53Taunu wua ai lātou e te wakalulu i loto o te Waleyā ma te talayikayika i te Atua.
Zvasarudzwa nguva ino
Luka 24: PKP
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2024, Wycliffe Bible Translators New Zealand Inc. in partnership with Te Wui Aliki o Pukapuka ma Nassau