Ioane 2
2
Na tieni ia Iētū i nā yua wai uwaina
1I te tolu o te ayo, wai loa te wakaaonga ia i Kana i Kalilea. Nā i kiai te matua wawine o Iētū, 2na valongia oki ia Iētū ma ana pipi ki te wakaaonga ia. 3I te pakanga o nā uwaina i ai, mea loa te matua wawine o Iētū peia kia ana, “Kāni uwaina a lātou ko takoto.”
4“E te vale wawine ia ē, e wea koe na oko wua mai ai kia aku?” te mea atunga a Iētū. “E kiai ake na oko ki toku vāia.”
5Eia, mea ai tona matua wawine ki nā tāvini, “Wai wua kōtou i ana mea ka wakaunga atu kia kōtou.”
6Nā wetū wua lā tawa o lātou te ono ngaua tiā watu ava yua, ko wai ai nā yanga palupalu kē mā, e mātau ai te Ngāti Iūtá. Ka pau te laulua ki te lautolu kālani#2:6 te laulua ki te lautolu kālani: ko weolo ki te 80 ki te 120 lita (litres). e kī ai te ava e tayi.
7Talatala loa ia Iētū ki nā tāvini, “Wakakī nā ava nā ki te yua.” Eia, wakakī ai lātou i nā ava kikī yeyele.
8Wakaunga oki ia Iētū ia lātou, “Yalu kōtou ni yua, kave atu ki te wakayaele o te imukai.”
Wai oki lātou peia, 9eia, tongi ai te wakayaele ia i nā yua na tieni wai uwaina ia. E kiai na ana iloa nō wea nā uwaina ia, yaulā na iloa wua e nā tāvini na yalua nā yua ia. Eia, tauvalo loa te wakayaele ia i te tāne na wakaao ia kē yau, 10mea loa ki ai, “Ko te wī tāngata ko aumai taumua i nā uwaina malie, ka wakamuli ai ki nā uwaina kaleka wua, koa wālolona oki ma te kau na valongiá. Yaulā koe na wakatītī i nā mea lelei atu ki te vāia nei.”
11Ēnei te wakauyunga o nā wakailo mana a Iētū, na waingia i Kana i Kalilea. Na wakaāli mai oki i tona yilatū, eia, tuku ai loa te lotokono o ana pipi kia ana.
12Kē oti nā mea ia, wano atu loa ia Iētū ki lalo ki te lulu ko Kāpelenāuma, ko lātou ma tona matua wawine, ona tāīna ma ana pipi. Nōnō ai lātou i ai kē nī lua ayo.#Mātaiō 4:13
Na vevele ia Iētū i te Waleyā
(Mātaiō 21:12-13; Māleko 11:15-17; Luka 19:45-46)
13Koa talivave mai te vāia e wai ai te Ōloa Paata a te Ngāti Iūta, wakaake loa ia Iētū wano atu ai ki Iēlūtalema.#Ēkoto 12:1-27 14I tana ulunga ki loto o te kolo o te Waleyā, kite atu loa iāna i nā tāngata ia ko okooko i a lātou puakatolo, nā māmoe ma nā kūkupa, peia te toe kau ko i nā kaingākai ko tieni moni. 15Eia, wili loa tana uwēpu ki te enu taula, tulituli ai ēna te kau ia tākatoa ki vao mai te kolo o te Waleyā, peia nā māmoe ma nā puakatolo. Lingilingi ai ēna ki te taua i nā moni a te kau tieni moní, wuliwuli pūlou oki i a lātou kaingākai. 16Maka ai loa tana muna ki te kau e okooko nā kūkupá, “Tali a kōtou mea nā ki te tulanga! Wakamutu loa kōtou e te wakalilo i te wale o toku Matua wai mākete okooko!”
17Mayala loa i ana pipi te talatala na tutingia i te Puka Yā e mea pēnei, “Ko aku wakayayanonga nō tō wale, e te Atua, ko mumula loa pe te awí i loto ōku nei.”#Talamo 69:9
18Eia, naumate ai loa te kau Ngāti Iūta e te iliili kia ana, “E wea tau wakailo wakawotu ka wakaāli mai kē wakapono ai kia mātou i tō mana kē wai i nā mea nei?”
19Talatala atu ai ia Iētū, mea loa kia lātou, “Lepeti ki lalo te waleyā nei, e tolu ayo e oti ai ia aku e te wakatū wakawōu.”#Mātaiō 26:61; 27:40; Māleko 14:58; 15:29
20Kākole lā te mea mainga a te kau Ngāti Iūtá, “E lauwā mā ono te matawiti na wowoungia ai te Waleyā nei. Eia, ka wowou e koe wakawōu e tolu ayo?” 21Yaulā, ko te waleyā āna nā talatala ia ko tona tino. 22I tona tū mainga mai te mate, mayala loa i ana pipi ana mea nā talatala i mua atú. Eia, nunumi ai lātou i te Puka Yā ma nā muna a Iētū nā yalu ia.
23Ia ana e i Iēlūtalema i te Ōloa Paata ia, wainga te tangata nā kite i ana wakailo wakawotu nā wai ia, loloku ai loa lātou i tona ingoa. 24Yaulā ia Iētū, ko yē manaki iāna ia lātou, ko mailonga oki iāna te tū o te wī tāngata tākatoa. 25Ko yē winangalo iāna kē talā kia ana te tū tangata, na taka wua oki ia ana nā mea i loto o te ngākau tangata.
Zvasarudzwa nguva ino
Ioane 2: PKP
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2024, Wycliffe Bible Translators New Zealand Inc. in partnership with Te Wui Aliki o Pukapuka ma Nassau