Mavhesi emuBhaibheri Ane Mukurumbira kubva kuna Romanos 8

As ootzimale' sqa'n uva' kam uva' nu kupaleb'e, as kajayil nitxakonsa Aak ti' qeq'ol tu u b'a'nile', jank'al o' uva' xo'n Aak sqe, as o' uva' kat imolo o' Aak eche' uva' itz'amal ta'n Aak sqi'

Esti'e' ootzimal sva'n uva' k'uxh la kam in as k'uxh isle'ltel in, as ye'xheb'il la oleb' ti' veesal kan k'atz u Tiixhe'. As mita'n unq'a ángel; as mita'n unq'a ib'ooq'ol unq'a b'anol va'lexhe' uva' nich'o'n taama ti' Aak; as mita'n unq'a vee' uva' at cheel; as mita'n unq'a vee' a'n tule'; as mita'n uve' at tu almika'; as mita'n uve' at jaq' u tx'ava'e'; as mita'n umaj unq'a vee' cheesamal kan ta'n Aak la oleb' ti' qeesal kan ti' vib'a'nil Aake' uva' qetz ta'n u Kub'aal Jesucristo, jank'al o' uva' at ve't ok o' k'atz Aak.

As tul nu kunache' uva' ye'l iyak'il u qaanxelale', as a' u Tiixhla Espíritu ni lochon o'. As tul ye' qootzaj kam uva' nisa' u Tiixhe' uva' la kujaj te Aak, aq'al uva' la kub'ane' kam uva' ni tal taama Aak, as niloch o' u Tiixhla Espíritu ti' toksat kuyol vatz Aak. As tul ye' nichee kuyol ti' uva' kam la qale', as nijelun u Tiixhla Espíritu tu u qaanxelale' ti' toksal u kuyole' vatz Aak.

¿As kam q'i la qal ve't ti' unq'a yole' uva' kat vala? Tan a' u Tiixhe' at sqi'. Esti'e' ye'xheb'il la oleb' sqi'

Esti'e' ni val sete uva' ye'l ve't umaj choob'al paav at sqi' jank'al o' uva' at ve't ok o' k'atz u Jesucristo

Pet asoj a' kuxh la qoksakat qaama ti' inimal u tacha'v u kuchi'ole', as a' la teq'okat o' tu u kamchile'. Pet asoj a' la qoksakat qaama ti' inimal vitxumb'al u Tiixhla Espíritu, as at ve't kutiichajil k'atz Aak as b'a'n ve't qatine' tuk' u Tiixhe'.

As k'uxh kam kuxh la kupaleb'e, as techal chit la oleb' o' sti' ta'n u Cristo uva' xo'n chit o' ste.

As ni vitz'a unq'a k'axk'oe' uva' nu kupaleb'e cheel, as eche' la koj lejon ti' uva' la ilpu ve't sqi' jank'al uva' tuk ib'an u Tiixhe' sqe uva' nim talche'.

As ye'xhkam la eesan kan o' k'atz u Cristo uva' xo'n o' ste. As k'uxh la kupaleb'e k'axk'o, as k'uxh la txumun qaama, as k'uxh la laq'b'al o', as k'uxh la kupaleb'e va'y, as k'uxh ye'l ve't qoksa'm, as k'uxh kam kuxh la kupaleb'e, as k'uxh la yatz'pu ve't o' tuk' ch'ich'; as ye'xheb'il la oleb' ti' qeesal kan k'atz u Cristo uva' xo'n chit o' ste

As a' u Tiixhe' ootzin tetz u qaanxelale'. As ootzimale' ta'n Aak uva' kam ni tal taama u Tiixhla Espíritu, tan nijaj b'a'nil te Aak sqi' uva' o' itenam Aak, ti' uva' la ib'an Aak kam uva' ni tal taama Aak sqi'.

As jank'al o' uva' a' u Tiixhla Espíritu ni eq'on o' ti' kunimata' kam uva' nisa' Aak sqi', as o' me'al ik'aol u Tiixhe'.

As ab'il uva' antel kuxh u tacha'v vichi'ole' nib'ane', as a' kuxhe' ni titz'a tuk' vichi'ole'. Pet ech koj o' uva' ni niman vitxumb'al u Tiixhla Espíritu, tan a' ni qitz'a kam uva' nisa' u Tiixhla Espíritu.

tan aya'l chit ik'u'l Aak kat taq' Aak viK'aole' kamoj sqi'. ¿As a' kol chit ye'l uma'toj b'a'nil q'a ye' la ib'an Aak sqe ta'n viK'aole'?

As an chit u Tiixhla Espíritu ni nachonsan sqe uva' o' ve't sme'al ik'aol Tiixh. As ti' uva' o' ve't me'al ik'aol u Tiixhe', as at ve't kutx'aja'm ta'n Aak. Asoj la kupaleb'e k'axk'o ti' kunimat viyol u Jesucristo eche' ipaleb'et Aak u k'axk'oe' ti' inimat viyol u Tiixhe', as eela tok kuq'ii tuk' Aak.

Tan ab'il uva' a' kuxh u tacha'v vichi'ole' ni toksa taama sti', as at ve't ixo'l tuk' u Tiixhe' tan ye' ninima vitzaq'it Aake'. As mita'n la koj isa' inimata'.

Tan jank'al unq'a icheesa'm u Tiixhe' as nisa' tilat u q'iie' tul uva' la ilax ve't u nimla b'a'nile' uva' la ib'an Aak sqe, jank'al o' uva' o' me'al ik'aol Aak.

As ootzimal sqa'n uva' jelu'm chit nib'an unq'a icheesa'm Aake' skajayil ti' itx'eb'at u q'iie' uva' tule' eche' nib'an umaj ixoj tul ni tok vatz vich'o'me' ti' talane'.