Mavhesi emuBhaibheri Ane Mukurumbira kubva kuna Romã 8

Pakurirana nevamwe

Ivo katu Janejare'e poroinõ ipi, wauparà kõ rõmõ. A'e tè janepyteporo okoty rewarà kõ rõmõ tijaiko ipi. Wemikuwa rupi tè a'evo ekoi. Ajawyi sikuwa pirujẽ manyvo jaiko ipe remẽ, Janejare'e oposiko jẽ janerereko katua rè iko ipi.

Kee jaa aje ywete mã'ẽ. Manyvo jaiko remẽ, Janejare'e janerauvay jẽ janerereko ipi. Nopi'ãi janerauvaya wyi. Jamãnõ ipe remẽ, nopi'ãi janerauvaya wyi. Janerauvay jẽtà. Jaiko puku jẽ remẽ, janerau jẽtà janerereko ipi. Janejare'e remĩgwai yvapewarà kõ teve nomomi'ãi teve janerauvaya. Ãmõ, ãjãg kõ opota ipe Janejare'e topi janeraua wyi. Ajamã'ẽ manyvo noereko'ãi imomi, Janejare'e okãte'ã janere ipi rewarà mõ. Ãmõ, naikoi teve age'e remẽwarà janeraua omomi kuwa mã'ẽ mõ. Ãmõ, naiko'ãi teve kãramõwarà janeraua omomi kuwa mã'ẽ mõ. Janerau jẽtà Janejare'e kãramõ. Ãmõ, yvapewarà kõ teve nomomi kuwa'ãi janeraua janewyi. Ãmõ, yvy pewarà kõ teve nomomi kuwa'ãi janeraua janewyi. Yvy popykwerà wyi tesõ naiko ekojẽi janerauvaya omomi mã'ẽ, Janejare'e janerauvay wete rewarà mõ. Janerõvijã Kiristu Jesu mãnõa rupi Janejare'e janerauvay karuaru janerereko ipi, eevejẽ jaiko mãe kõ rõmõ.

Kee jaa rè tapeja'a. Janejare'e 'Ãg tẽ tesõ uupa janemokasiarà rõmõ, Jesu rè jajirovija remẽ. Nijakuwa ywe'eive Janejare'e pè japoregeta. Ajawyi, “Manyvo a'età põ aporegeta ijupe?” ja'e ipi. A'evo remẽ i'Ãg tè janepy'a mojimogetaoka ijupe ãmẽ. Janeporijauesaoka teve Janejare'e pè ipi. Janemokasioka teve ipi. Oporegeta remẽ, ãwitõ ijamu 'ejẽ mã'ẽ vo 'ejẽ, ãwĩvo ve Janejare'e 'Ãg oporegeta ipi.

A'evoa rè kee a'età tapekuwa sa'u. Janejare'e koty rewarà tè jane ky'y. Ajawyi ava jẽ rõwã janemoaiwe kuwa Janejare'e rovake ipi.

Age'e remẽ Janejare'e “nivoi mã'ẽ tè ãwĩ” ne'i'ãi janeupe ky'y, Kiristu Jesu revejẽ jaikopa ky'y rewarà mõ. Ajawyi nijanemono'ãi jimomorijau rena kyty janereity ky'y.

Ãwĩvo janeremimota aiwerà rè tè japosiko ipi remẽ, jamãnõ 'atà tè mãe kõ rõmõ jaiko jane ãmẽ ipi. Ajamã'ẽ Janejare'e 'Ãg kasia rupi tè jaiko remẽ, jaiko karuaru 'atà tè ipyri jaiko ãmẽ ipi. Nijajipy'amopirai'ãi ãmẽ jaiko ky'y.

Aekwerà rupi katu jaiko remẽ, nimanyvoi. Kiristu janerauvay. A'e tè jo'arà kytywarà rõmõ janereinõma.

Age'e ike rupi jaiko jẽ remẽ, jajimomorijau jẽ jaiko ipi. Ajamã'ẽ kãramõ Janejare'e ojikuwa Jõvijã wasu rõmõ remẽ, ikatuay janererekotà ky'y. Okatuaya ome'ẽtà janeupe ãmẽ. Nijaja'a'ãi jajimomorijauawerà rè ãmẽ jaiko ky'y. [Ajawyi jajimomorijau remẽ, tijajipy'amopirai e'ã jaiko.] Akuwa a'evotà janerereko mã'ẽ.

Awyje Kiristu remiauvay kõ rõmõ jaiko ky'y. Ajawyi ava jẽ rõwã janerekyi kuwa janerauparà po pe wyi. Jajimomorijau ipe remẽ, janerauvay jẽ kuwa janerereko ipi. Janepy'a pirai tesõ ipe remẽ, nijanereity'ãi ãmẽ. Ãmõ, noerovijai mãe kõ janemoaiwe ipe remẽ, nijanerekyi'ãi kuwa ipo pe wyi. Kiristu janerauvay jẽtà ãmẽ. Ãmõ, janeamyay ipe jaiko remẽ. Ãmõ, nijanekamisai 'eteay ipe teve jaiko remẽ. Ãmõ, janetekorã ipe jaiko remẽ. Ãmõ, jamãnõ taray ipe jaiko remẽ. Aje, a'evo 'evo ipe jaiko remẽ, Kiristu nopoi'ãi janewyi ãmẽ ipi. Manyvo nyvo jẽ jaiko remẽ, janerauvay jẽtà janerereko ipi.

Janejare'e janejipy'amogetaa okuwa katu ipi. O'Ãg jipy'amogetaa okuwa teve, janepy'a pupe wyi oporegeta janeupewarà mõ remẽ. Janejare'e i'eay e'i a'evo remẽ ipi.

Janejare'e 'Ãg janererekoarà rõmõ ekoi remẽ, ijãkarãgwerà kõ rõmõ jaiko ãmẽ ky'y.

Janejare'e 'Ãg kasia rè ypyry oja'a mãe kõ i'Ãg kasia rupi tè ojipy'amogetatà iko ipi. Emimota rupi teve ojipy'amogeta iko kupa ipi. Ajamã'ẽ wemimota aiwerà rè ypyry oja'a ipi mãe kõ, wemimota aiwerà rupi tè ojipy'amogeta iko kupa ipi.

Emã'ẽ. Janejare'e nokãte'ãi Wa'yry rè teipe, wauvay ipe remẽ. Omuroka jẽ tesõ yvy pè janeupewarà mõ tomãnõ. Ajawyi sitõ nijamãnõ'ãi janeaiwererà repykarà mõ ky'y. A'evo Wa'yry rè tẽ tesõ ipe nokãte'ãi imuroka. Tysi tõ pirujẽ wemime'ẽ rã ikatuay mã'ẽ rè nokãte'ã'ãi teve. Pirujẽ ome'ẽ takatutà janeupe ãmẽ wemiauvay kõ rõmõ.

Ajawyi i'Ãg ojimogeta jane'ãg reve aepo rè. Kee e'i janeupe: “Õ'õ aje ywete, Janejare'e ãkarãgwerà kõ tè pejẽ ky'y”, e'i i'Ãg janeupe ipi. Ãmõ, ijãkarãgwerà kõ rõmõ jaiko rewarà mõ oja'a katu janere ipi. Oja'a karuaru janere ipi. Owaray janerereko karuarutà janerereko ipi. Janeupewarà omowaitepa mãe kõ ome'ẽtà janeupe. Kiristu pè omowaitepa mãe kõ ve ome'ẽtà janeupe, Kiristu revejẽ jaiko rewarà mõ. Ãwitõ Kiristu omomorijau kupa remẽ, eevejẽ janemomorijau kupa. Ãwĩvo ve Tuu omoe'e Wa'yry imojisaoka Jõvijã wasu rõmõ remẽ, eevejẽ jaikotà. Ãmẽ sõsi ipyri janeroryvaytà ipyriwarà kõ rõmõ jaiko ãmẽ ky'y.

Ajawyi janepy'a aiwerà rupi kõrijõ jaiko remẽ, Janejare'e ãpã rõmõ tè ãmẽ jaiko ipi. A'evo sõ jaiko tite remẽ, nisimomojyi Janejare'e ãmẽ. Nijaiko'ãi teãmã ijayvu rupi ãmẽ jaiko.

Keetà a'evoa rã janerereko. Janejare'e janemojikuwaokatà wãkarãgwerà kõ rõmõ janerereko ãmẽ ky'y. Age'e remẽ pirujẽ eminõgwerà kõ ojimopirai tesõ, a'evoa rã wãrõ jẽ kupa upa remẽ. Yva, ãmõ, yvy, ipupewarà kõ revejẽ, wyra kõ, mijarà kõ, yvyra kõ. Wãisõ wãrõ. Pirujẽ a'e kõ wãrõ jẽ a'evoa rã ãmẽ. Ajaate a'evotà.

Sikuwa age'e remẽwarà nikatu ywe'ei Janejare'e reminõgwerà kõ pè ipi. Ay teãmã ijupe kõ ipi. Ajawyi ijamu 'ejẽ kupa upa ipi, nojimokatuive kupa rewarà mõ. Ãwitõ wãivĩ imemy'a tarà remẽ, eamai ay pè upa ipi, a'evo ve ekoi kupa.