2 Koridɨ 2
2
1Yɨ nɨnnya yune sɨmunyavɨnanya' mena wi'na dara dɨwa. Nɨmɨ sarɨmɨnyawɨnna sarɨmɨnyɨ munyɨ' taanga yɨvalakya'na ayahi mwɨyɨ yɨdeinyɨ. Dena mwɨyɨwa'de. 2Sare' darevɨnyɨ. Nɨmɨ sarɨmɨnyɨ munyɨ' taanginya yɨhɨzaavɨwɨja' yɨ nɨmɨre sɨmunya' yɨlaaya ya'na yɨnɨga wi'na aaihwai yannelaka! Aawa. Sarɨmɨre munyɨ' taanga mena yɨhivalakɨwɨja' yɨ nɨmɨre sɨmunya' yɨlaaya nyɨvalya'nera a'mwera pwara mɨ'. 3Sarɨmɨ a'mweihi nɨmɨnyɨ yɨlaaya nyɨgaibɨneihɨlyɨ. Sarevɨ sarɨmɨnyawɨnna sarɨmɨre kayaa'nanya' wanganaawɨwɨjɨ kwajɨ sarɨmɨnyɨna nɨmɨre munyɨ' taanga kamaa'mudɨka! “Mi'na kyavada'galapɨri wɨdeinyɨ,” dena sarɨmɨnyawɨnna wɨwa'deinyɨ mɨ'. Sahɨrɨsavɨne'na kɨgaa' paazɨya' nɨmɨ yɨhithave. Yɨ nɨmɨ sarɨmɨ yuyaihɨrɨna dɨragɨnna dara lɨmwamwa'de. Nɨmɨ pɨnɨnna yɨlaaya yɨwɨja' yɨ sarɨmɨ yuyaihi yɨlaaya avaaina yadɨvɨsaihɨlyɨ. 4Sare' darevɨnyɨ. Sagaa' sarɨmɨre mwaalyabwina nɨmɨre munyɨ' taanginya naangesɨ nɨmɨre sɨmunya' daanga naangesɨ kɨnɨnnakeinyɨ nabaai kɨdalaalya kwalaalyangɨ pɨkarya yɨhithave. Paazɨya daza' “Sarɨmɨnyɨ munyɨ' yune taanga wivalakɨma!” majena yɨhithave'na mɨ'. Aawa. “Sarɨmɨ ‘O Polɨmɨ nemɨnyɨna tewaanya naanga wɨvu'nɨvanɨkelyɨ,’ yawɨrangabɨka!” dena yɨhithayesɨ.
Pwai gannya yɨwetawakya' wiagalya'mavakerɨ ayɨna maaresa'nesɨ.
5A'mwe akwai gamɨrebwina kya' kale neyadaa'nyɨ sai yune nɨmɨ gaveinyɨ kale sa' manyɨvanɨ'. Aawa. Sahwarɨna kale kɨbawenna yuyaihɨrɨ yɨhivanɨ'. Nɨmɨ “Savɨna taanginya naanga nujaavɨwɨdɨka!” yagaala dena “Kɨbawenna,” yɨhɨthɨwe'nanyɨ. 6A'mwe dazarerɨ a'mwe kwalaalyaihi mi'na yeve' yɨ sa' sarɨ wi'nanne' tɨvɨkɨ'mwa'daasasɨ. 7Sarevɨdaasɨ yɨ dahaa' sarɨmɨ mudɨka pɨrɨ' pɨbwi jɨla! Yɨ sahwai gannya kayaa'nanyaburɨna kale nayaa wiadaa'nyɨ gamɨre kayaa'nanya sa' yange'na marasɨ'napɨjɨ sahware sɨmunyavɨ kave nayaa jɨvaimwagila! Munyɨ' taanga naanga naange' nebulya'na nagalavɨlawakadɨka a'mwe dazarɨ! 8Sarevɨdaasɨ yɨ nɨmɨ yaamɨjɨ dɨragɨnna dara dɨvanɨge. Sahwarɨ sarɨmɨre kale ya sabwi ayɨna jɨvwarɨdaakwila! 9Sare' dare'nanyɨ. “Sarɨmɨ nɨmɨre yagaalya' yuna mɨdɨbɨzaihi daaka?” dena sarɨmɨnyɨ yaamɨjɨ yɨjɨwaalya'ne' “Yawɨranganɨde'nanyɨ,” dena sɨnnawɨ pɨkarya pɨrɨ' a'mwe sarɨnajɨ nɨmɨ yɨdavesɨ. 10Yɨ nabaai sarɨmɨ a'mwe sarɨ wagɨlya' marasɨ'nɨwa'daasa' yɨ nɨmɨ kwainyɨ marasɨ'nɨweinyɨ. Sare' darevɨnyɨ. Nɨmɨ wagɨlya marasɨ'nya'ne kɨnɨnnakeinyɨ daakajɨ yɨ sa Kɨraazɨtɨyare tɨnnyarɨ gaimwanga yɨhya'neinyɨ nɨmɨ marasɨ'nɨwengɨ. 11Nemɨ nayaa sara yaana! “Saataanɨ nemɨnyɨ kwaasɨ neyojɨ nanevɨlawakadɨka!” dawaajɨ sara yaana! Sare' darevɨnyɨ. Sahware sɨmunya kayaa'nanyabwi mena yawɨ'daanyaine. Sare'na taanga naanga sarɨne nayaa marasɨ'naana!
Gotɨyare nelɨmwagarɨka mudɨkevɨne wɨdaayadɨvɨsaraavɨnesɨ.
12Pɨgaasagaa' anga Tɨrawaazɨna Kɨraazɨtɨyare yagaala tewaanya' wɨjɨwaakya'neinyɨ bi'mavena yɨ Naangei nɨmɨnyɨ tusa' yɨnɨga wi'na wɨjɨwaakya'na kanyɨbaasɨwa'dɨ' wɨjɨwaakɨwa'de. 13Kɨrɨ' nɨmɨre sɨmunya' kave mwariwa'dɨ'. Nɨmɨnyɨ nya'mwei Taaitazai anga sabanna sarɨmɨnyɨne yagaala mamakabyakerɨ tɨnna mwanganyɨwa'de. Aawa. Sɨmunya kwalaalya yawɨ'dɨ Tɨrawaazɨ mwaalyaraavɨ nayaa yagalya'ma'na yena Pɨrovijɨ Maazathonɨyana bena bi'ma'mwa'de.
14Kɨrɨ' saba Taaitazarɨ sarɨmɨnyɨne kadɨka wɨ'nɨwa'de'na Gotɨyarɨ nɨmɨ suya wɨdɨvanɨge. Kɨraazɨtɨyai yuya kayaa'nanyangɨjɨ yuya kayaa'nanyaraavɨjɨ malyavɨ mena dathɨwagakevɨdaa'nyɨ yuyagaa' Gotɨyai Kɨraazɨtɨyarɨjɨ yaaraya neyadaa'nyɨ yɨlaaya yɨwadaanyaine. Yɨ sahwai gamɨre yagaalya' nejɨwaakada yɨ yuya pimagɨ wɨjɨwakamaryadaawojɨ a'mweraavɨna Kɨraazɨtɨyarɨ wibwarɨdaakwadelyɨ. Yawɨta daza' sa' wabatɨrɨnya' yuneba winɨgode'bɨsasɨ. 15Sare' dare'nanyɨ. Kɨraazɨtɨyarɨna wɨjɨwakamaryadaanya' wabatɨrɨnya' Kɨraazɨtɨyarɨ yɨma'naabada yɨ Gotɨyaryawɨnna wawode'bɨsaine. Nemɨ wɨjɨwakamaryadaanyagaa' Kɨraazɨtɨyai wɨvadaihasamaa'manɨkeraavɨjɨ pwara kayaaka yɨgainɨvanɨgasaraavɨjɨ saraayawɨnna tɨrɨnya' wawodesɨ. 16Yɨ pɨrɨ' daresɨ. Sahwara kayaaka yɨgainɨvanɨgasaraavɨ yɨ sa' barya'ne tɨrɨnyasɨ. Yɨ sa' baryabwi sahwaraavɨ marima'naabathesɨ. Yɨ pɨrɨ' daresɨ. Pwara wɨvadaihasamaa'manɨkeraavɨ sa' gaalyabwine tɨrɨnyasɨ. Yɨ sa' sahwaraavɨ gaalyabwi marima'naabathesɨ. We'! Wawɨnya daza' gannya dɨragɨnyavɨ yɨnɨga wi'na aaihwai yannelaka! 17Sare kɨrɨ' darevɨnyɨ. A'mwe kwalaalyara nɨgwia maa'nya'nera Gotɨyare yagaalya' yaasɨwa' wɨjɨwaakadɨvɨtabaaibɨtaina mɨ'. Aawa. Nemɨ Gotɨyare wawɨnya daza' ma'daa yɨ nemɨ yaasɨwa' kwaasɨ yagaala damaryadaanyaina mɨ'. Aawa. Nemɨ gamɨre yagaala yuya yɨda'na mɨjɨwodaanyangɨ. Nemɨ Kɨraazɨtɨyarɨ wɨlamwaaihoina yɨ Gotɨyare tɨnnyarɨ Gotɨyarɨne jalɨkurakadaa wɨjɨwaakɨvanɨgo.
Trenutno izbrano:
2 Koridɨ 2: byr
Označeno
Kopiraj
Primerjaj
Deli
Želiš, da so tvoji poudarki shranjeni v vseh tvojih napravah? Registriraj se ali se prijavi
© 2013, Wycliffe Bible Translators, Inc. All rights reserved.