2 Koridɨ 3
3
1Nemɨ ayahi yamaasa' yadaa yune nemɨnne yaya'na munyaba dahamakimanɨgo! A'mwe pwara paazɨya' kumɨnne yaya' makɨlya'ne' lɨmwamanɨgatabaaibɨ' a'mwera paazɨya sabɨsa' nemɨnyɨne' yɨhidavesa' negainɨnɨkeina dɨngaka! Sarɨmɨ sasare pɨkarya nemɨnyɨne' nayaa jɨthavide' negainɨnɨkeina dɨngaka! 2Paazɨya nemɨnne yayavɨ munyaba makɨlya'ne sa' yɨ sarɨmɨ sahwaihɨlyɨra. Yɨ paazɨya dazavɨre pɨkarya sa' yɨ nemɨre sɨmunyavɨ wɨlarɨ'. Yɨ dara yawɨ'dɨnyainyɨ. Sarɨmɨ yɨvanɨgasabwi paazɨya'bɨsabwina dara dɨnɨ' “Polɨ Gotɨyare wawɨnya' nayaa yadelyɨra.” A'mwe yuyara paazɨya daza' yawɨrangadɨvɨ' yɨ sahwara dangadɨvɨsaihɨlyɨ. 3Sarɨmɨnyawɨ nemɨ nayaa yɨhɨthaayo saihi Kɨraazɨtɨyai pɨkarya yɨdavakeihi ku'maayaba marima'naabahesasɨ. Yɨ paazɨya daza' sahwai yɨgɨyasɨ yɨdavaka' mɨ'. Aawa. Gotɨyai gaalya' kɨnɨnnakere Kuryalyɨ sahwai pɨkarya yɨdavakesɨ. Sahwai sipadasɨkaarɨ Gotɨyai yɨdayaakabaaibɨ' pwaipwairiramaaraka yɨdavaka' mɨ'. Aawa. Gannya yɨkwia' kɨlaakejɨkɨya sɨmunyangɨ yɨdavakesɨ. Yɨ sarɨmɨre sɨmunyangɨ yɨdavakesɨ.
4Aaya kaavɨla dazavɨre yagaalya' yɨ daresɨ. Kɨraazɨtɨyai negaimwagya'nei gannya dɨragɨnya' nejaavanɨ'. Sare'na lɨka mi yadaa Gotɨyarɨ nebulya'na lɨmwadaa sara nayaa yoinera. Nemɨre sɨmunya dɨragɨnya' sasarevɨdaa'nyɨnyɨ. 5Nebulyasɨ. Yune nemɨ sainana yɨnɨga wi'na yaanneina mɨ'. Sarevɨ yɨ “Yune nemɨ sainaavɨdaa'nyɨ nawɨ'nya pɨnɨ marima'naabadeinera!” madaanna! Aawa. Gotɨyai gave pwainanyai sahwai nemɨnyɨne yɨnɨga wi'na yaanne' wakadelyɨ. 6Yɨ nemɨ Gotɨyare yagaala nelɨmwagarɨka mudɨkevɨ wɨdayadaanyaina yɨnɨga wi'na yaanneinaavɨ nayaa neyɨmavɨmwaaihadelyɨ sahwai. Yagaala nelɨmwagarɨka daza' Kɨwɨnyavɨne pɨkarya yɨda'nɨka sa'bɨta' mɨ'. Aawa. Sa' yune Kurya Tewaanya sarengɨ. Sare' darevɨnyɨ. Kɨwɨnyavɨre pɨkarya a'mweraavɨ dara wibwarɨdaakwadesɨ. Galazekɨvaimwaana! Dɨvaideigɨnyɨ. Kɨrɨ' Kurya Tewaanyai yagaala tewaanyavɨna a'mweraavɨna gaalyabwi wɨjaavadelyɨ.
Gotɨyare yagaala nelɨmwagarɨka mudɨkevɨre byaanna dɨragɨnyavɨnesɨ.
7Yɨ Kɨwɨnya dazavɨne' Gotɨyai sɨlyarɨ yɨdayaake' yɨ dazavɨre wawɨnya' baryabwi marima'naabakebulyɨ. Nabaai wawɨnya daza' Gotɨyare byaanna dɨragɨnya kɨrɨsɨ yɨma'nakesɨ. Sarevɨdaa'nyɨ Ne Mozɨzare sɨnnyɨ' byaanna dɨragɨnya' wannakikɨ. Yɨzɨrelɨyara byaanna dɨragɨnya dazavɨna sahware sɨnnyɨkɨ yɨnɨga wi'na baihanareta' mɨ'. Byaanna dɨragɨnya daza' maalɨka wannyɨna yaka dɨvi yɨwawaka, kɨrɨ' yɨnɨga wi'na baihanareta' mɨ'. 8Yɨ kɨgaa' wawɨnya sare' byaanna dɨragɨnya' kɨnɨnnakesɨ. Yɨ Gotɨyai Kurya Tewaanyarɨ a'mweraavɨna wɨjaaya'ne wawɨnya' yɨ sa' dazavɨ wavɨla'da Gotɨyare byaanna dɨragɨnya' naanga naanga maa'de' daaka! 9Sare' darevɨnyɨ. Kɨwɨnya dazavɨre wawɨnya' dɨragɨnna nejɨda'daa'nyɨ nemɨ dɨna “Kayaa'nanyabwina nemɨ baryabwi maraanneinera.” Yɨ sare' kɨrɨ' Gotɨyare byaanna dɨragɨnya' kɨnɨnnakesɨ. Sarevɨdaa'nyɨ yagaala mudɨka dazavɨre wawɨnya' dade' “Kurya Tewaanyarɨna sahwara yɨda'maraangerera,” yɨ daza' Gotɨyare byaanna dɨragɨnya naange' kɨnɨnnake' wawɨnya pɨrɨvɨ naanna wavɨla'desɨ. 10Sare' darevɨnyɨ. Yɨ Kɨwɨnyavɨre wawɨnya' byaanna dɨragɨnya' maryaakesɨ. Yɨ sare' dahaa' kunesɨra. Wawɨnya mudɨka daza' yɨ savɨ yune dɨragɨnna wavɨla'da nemɨ yawɨ'daanyɨ. Yagaala mudɨkevɨre byaanna dɨragɨnya yune naange' warɨkevɨdaa'nyɨ Kɨwɨnyavɨre' mwarika! 11Sare' darevɨnyɨ. Kɨwɨnyavɨ wawɨnya daza' Gotɨyare byaanna dɨragɨnyasɨ yɨma'nake' mena yɨwia'nesɨ. Kɨrɨ' Kuryarɨne wawɨnya daza' Gotɨyare byaanna dɨragɨnya' kɨnɨnnake' yuyagaa' waragwothesɨ. Sare'na sahɨrɨ' ayavɨ yune naanga naanga wavɨla'desɨ.
12Sarevɨdaa'nyɨ yagaala sare' kɨnɨnnakeina “Byaanna sa' waragode'nana,” dɨragɨnna lɨmwadaa nemɨ lɨka mi yadaa ku'maayaba yagaala sa' nayaa yɨda'na jalɨkurakadaanyaine. 13Nemɨ Mozɨzaibɨ' yadaanyaina mɨ'. Sahwai gannya sɨnnyɨkɨ kwaabɨhannyabaalyɨ kawaaka yɨrakɨnakelyɨ. Yɨ byaanna dɨragɨnya daza' maalɨ'na yɨwɨna yaka yɨnahu naanga yuya' yɨwɨna yaake'na “Yɨzɨrelɨyara sa' tɨnna nanyangabɨthɨka!” daka kawaaka yɨrakɨnakelyɨ. 14Yɨ Mozɨzare wawɨnya' sahwara nayaa myawɨri. Aawa. Kumɨre sɨmunya nebulya'na bɨpale'na yakengɨ. Sare' darevɨnyɨ. Yuyagaa' sahwara Gotɨyare yagaala wɨlɨmwagaraka ayavɨre yagaalya' dangadɨvɨ' yɨ yagaala savɨ kwaabɨhannya daza' kuna warɨ'. Yɨ dahaakɨgaasɨ kuna mu'nyadɨvɨkɨ. Sahwara kwaabɨhannya sa' mamarasɨ'nyasɨ. Yɨ Kɨraazɨtɨyai gave pwainanyarɨ sahwarɨna Gotɨyai daza' marasɨ'delyɨ. 15Aawa. Gazagaasagaa' sahwara Mozɨzare yagaalya' dangadɨvɨ' kwaabɨhannyabaai kumɨre sɨmunyangɨ bwakalɨmwagarɨ'. Sahwara myawɨryadɨvɨkɨ. Yɨ dahaakɨgaasɨ kunanyɨ. 16Kɨrɨ' gazagaasagaa' pwai kwai Naangeryawɨnna kagɨnyɨwagozɨ yɨ sahwarɨ sɨmunyavɨ kwaabɨhannya daza' marasɨ'nadelyɨ. 17Yɨ Naangei sai Kuryalyɨra. Nabaai Naangere Kuryai a'mwe pwarɨ mwaalɨ'. Yɨ aawa, yuya pɨnɨ yagaala wɨjɨmwagaraka ayavɨ a'mwe sahwarɨ wɨla yɨrakɨvanɨkai mɨ'. Aawa. Sai sahɨbanna tewaanna mwaalɨ'. 18Yɨ nemɨ yuyaina nemɨre sɨnnyɨkaavɨ lɨka yulyakya'ne maayaina mwaaihoinera. A'mwera sɨnɨmwavananya yennadɨvɨtabaaibɨ' nemɨ Naangere byaanna dɨragɨnya' wangadaa Naangere a'mabaalyaina yɨma'nɨvanɨgo. Yɨ Naanga sahwai, Kuryai gannya byaanna dɨragɨnya daza' nayaa marima'naabya neyadaa'nyɨ yuyagaa' nemɨ byaanna dɨragɨnya' naanga naanga ma'daanyaine. Yɨ Naangere a'mabaalyaina kuna yɨma'nadaanyaine.
Trenutno izbrano:
2 Koridɨ 3: byr
Označeno
Kopiraj
Primerjaj
Deli
Želiš, da so tvoji poudarki shranjeni v vseh tvojih napravah? Registriraj se ali se prijavi
© 2013, Wycliffe Bible Translators, Inc. All rights reserved.