1 Koridɨ 15
15
Kɨraazɨtɨyai mena balaka ayɨna dɨkaavake'nesɨ.
1Nya'mweihi, yagaala tewaanya' yɨhɨzɨwaake' sarɨmɨre sɨmunya ayɨna maradɨhaa'bwata yɨhima! Yagaala tewaanya sa' sarɨmɨ mena maaresasɨ. Yɨ dazavɨ dɨragɨnna daa'dɨvɨsasɨ. 2Yɨ yagaala tewaanya dazahɨrɨvɨna Gotɨyai sarɨmɨnyɨ yɨhɨvadaihasamaa'desɨ. Yɨ yagaala yɨhɨzɨwaake' sarɨmɨ yaasɨwa' lɨmwagapɨja' yɨ sarɨmɨre sɨmunyavɨ dɨragɨnna kuna mwakyɨpɨja' myɨhɨvadaihasamaari yadesɨ. Aawa. Kɨrɨ' yaasɨwa' malɨmwagari yɨpɨja' sɨmunyavɨ dɨragɨnna kuna wakɨpɨja' yɨhɨvadaihasamaa'desɨ.
3Sare' darevɨnyɨ. Yagaala aaya mudɨ'nanya' nɨmɨ sarɨmɨnyɨ yɨhɨmarɨmwange', yɨ sɨnnawɨ yagaala daza' maarageva. Yɨ yagaala dɨragɨnya sa' daresɨ. Gotɨyare bukuyavɨ dɨnɨkevɨna nemɨre kayaa'nanyanna marasɨ'nya'nei Kɨraazɨtɨyai balakelyɨ. 4Yɨ simaangevɨ pwara sahwarɨ wɨlakesalyɨ. Yɨ Gotɨyare bukuyavɨ dɨnɨkevɨna yɨrɨka darɨkaai darɨkɨ Gotɨyai sarerɨ gaalyarɨ yɨdɨkaavakelyɨ. 5Yɨ sarei dɨvidaasɨ Pitarɨ yɨjɨwaainnyɨna ya'. Yɨ sarei ayahi dɨvidaasɨ gamɨre atɨraai sɨvɨla purɨdaa'nyɨ pwaraalyaraavɨ yɨjɨwaainnyɨna ya'. 6Nabaai dɨvidaasɨ gave pɨgaa' neya'mwe kwalaalyaraavɨ yɨjɨwaainnyɨna. Sahwara paaivɨ aadɨretɨyarajɨ pwarajɨ mwaalesare. Yɨ neya'mwe dazaraavɨya kwalaalya naangera sara kuna mwaaiha'. Mwaaihasara yɨhɨthɨpɨnere. Kɨrɨ' pwara se mena bale'. 7Yɨ nabaai dɨvidaasɨ sahwai Jemɨzarɨ yɨjɨwaainnyɨna. Nabaai dɨvidaasɨ yuya Apozelɨyaraavɨ yɨjɨwaainnyɨna. 8Yɨ wana sahwaraavɨ dɨvidaasɨ saamɨnyagaa' bwaranyarɨ ganaange' kayaa'na maarakabaaibɨ' sahwai nɨmɨnyɨ yɨjɨwaainnyɨna nyakeinyɨ. 9Sare' darevɨnyɨ. Apozelɨya yuyaraavɨdaa'nya nɨmɨ wana maalɨkeinyɨ. Yɨ nɨmɨ Gotɨyare kusɨlaanyaraavɨ kayaaka yɨgalake'na nɨmɨnyɨna yɨnɨga wi'na nyɨdɨpɨneinyɨ mɨ' “Sai Apozelɨyalyɨra.” 10Sare kɨrɨ' Gotɨyai yanga gaimwanga nyadevɨ nɨmɨ mwaaiheinyɨ yɨ Apozelɨyainyɨ sareinyɨra. Yɨ gamɨre yanga gaimwange' nɨmɨnyɨne' yɨ sa' kune' mɨ'. Aawa nebulyasɨ. Sai nyɨgaimwadaa'nyɨ nɨmɨ wawɨnya dɨragɨnna mɨraagɨkɨreneinyɨ. Nabaai Apozelɨya pwaraavɨre wawɨnya mena wavɨlaveneinyɨ. Sare kɨrɨvɨ nɨmɨ sainyɨ myɨvanɨge. Aawa. Gotɨyare yanga gaimwange' nɨmɨjɨ nye'mwannamwaaida sa' sahɨrɨsa' yɨvanɨkesɨ. 11Sarevɨdaa'nyɨ nɨmɨ yɨhye kwainyɨ dɨngaka? Apozelɨya pwara yɨhyeta pwara dɨngaka? Dazavɨna yagaala maayasɨ. Nemɨ yuyaina Gotɨyare yagaala sahɨrɨsa'na wɨjɨwakadaanyaine. Yɨ sarɨmɨ yagaala sahɨrɨvɨna dɨragɨnna sara lɨmwagaresaihɨlyɨ.
Dɨvidaa'nyɨ yuya bainɨkera ayɨna dɨkaapɨ'de'nesɨ.
12Yuyagaa' nemɨ yagaalya' dara yɨhɨzɨwakadaanyaine. Kɨraazɨtɨyarɨ bainɨkeraayaba Gotɨyai yɨdɨkaavake'nanyɨ. Sare'na sarɨmɨnyɨ pwara dara gatha'dara yɨhɨthadɨvɨka'! “A'mwe mena bainɨkera, sara ayahi ayɨna yɨnɨga wi'na dɨkaapɨ'devwi mwarika!” 13Nabaai yɨ nebulya'nanya' warajɨ kwajɨ yɨ a'mwe bainɨkera ayɨna yɨnɨga wi'na madɨkaayɨ yapɨjɨ kwajɨ Gotɨyai Kɨraazɨtɨyarɨ ayɨna yɨdɨkaavake' nebulya'nanya' mwari kyadɨka! 14Nabaai Gotɨyai Kɨraazɨtɨyarɨ ayɨna midɨkaayɨ yajɨ kwajɨ yɨ savɨdaa'nyɨ nemɨ wɨjɨwakadaanya yagaala daza kune saba sananya kwaradɨka! Yɨ sarɨmɨre Kɨraazɨtɨyarɨ lɨmwanga sa' kɨrɨsɨ kune saba sananya kwaradɨka! 15Yɨ nabaai sara yajɨ kwajɨ yɨ nemɨnyɨna dara kabɨramaapɨdɨke' “O, Apozelɨyara Gotɨyarɨna kwaasɨ jalɨkurakadɨvɨtara daaka!” Nemɨ ku'maayaba dara jalɨkurakadaanyaine. Gotɨyai Kɨraazɨtɨyarɨ yɨdɨkaavakelyɨ. Sare'na Gotɨyai a'mwe bainɨkeraavɨ midɨkaayɨ yade' nebulya'nanya' warajɨ kwajɨ yɨ sai Kɨraazɨtɨyai kwarɨjɨ midɨkaayɨ kyadɨke'na nemɨ kwaasɨ kyɨhɨzalɨkurakaadɨka! 16Sare' darevɨnyɨ. “Dɨvi sagaa' bainɨkeraavɨ midɨkaayɨ yadelyɨra,” daaza' nabaai Kɨraazɨtɨyarɨ midɨkaayɨ kyadɨka! 17Nabaai Kɨraazɨtɨyarɨ midɨkaayɨ yajɨ kwajɨ yɨ sarɨmɨre dɨragɨnna lɨmwangebwi waryaanyabwi kyɨma'nadɨka! Yɨ sarɨmɨ sarɨnnya kayaa'nanyangɨ kuna kamwaaibɨthɨka! 18Sarevɨdaa'nyɨ a'mwera Kɨraazɨtɨyarɨ dɨragɨnna lɨmwadɨvɨ' se mena baidɨvɨsara sara kwarajɨ kayaaka mena kyɨgainɨpɨdɨka! 19Yune nemɨ Kwaaka davakɨ gaala mwaidaanyagaa' gavegaa' Kɨraazɨtɨyarɨ lɨmwadaa dahaa'ne sahwarɨna yemwalaajɨ kwajɨ dɨvi balya'negaa' manegaimwagyɨ yojɨ kwajɨ yɨ a'mwera nemɨnyɨna kale naanga wiadeina kamwalaadɨka! Yɨ a'mwe yuya pwaraavɨna kale maalɨka wia' kwaradɨkesɨ. Nemɨnyɨna kale naanga naanga wia' kwaradɨkesɨ.
20Kɨrɨ' sasare' mɨ'. Kɨraazɨtɨyai mena balakerɨ yɨ Gotɨyai ayɨna yɨdɨkaavakelyɨ. Yɨ tɨka munne yabwarya'negaa' nanyɨne tɨvi'na wa'da mala wa'devaaibɨ' Kɨraazɨtɨyarɨne a'mwe se bainɨkeraavɨ sai aaya yɨbwaradɨkaata yakei yuyagaa' mwaaidelyɨ. 21Sare' darevɨnyɨ. A'mwei, Aataamɨ, yaakevɨ balyabwi wakyaa'. Yɨ a'mwei Jizaazai yakevɨ a'mwe bainɨkera ayɨna dɨkaaya'nebwi waka'. 22Yɨ daresɨ. Aataamɨre yɨta savaakɨre yuyara sahwara baidɨvɨtabaaibɨ' Kɨraazɨtɨyarɨ wɨlamwaaidɨvɨta yuyara sahwara gaalyabwi maapɨ'dere. 23Nabaai gazaizai yune gannya sagaa' ayɨna dɨkaa'na, yɨ gaalya' maaradelyɨ. Aaya mudɨ'nanyai tɨka munne mya gaai yadebɨsai sai Kɨraazɨtɨyalyɨ. Gaalya' mena ayɨna maarakelyɨ. Yɨ nabaai dɨvidaa'nyɨ sai ayɨna walaabathevɨ nemɨ yuya Kɨraazɨtɨyare saina yɨ nemɨ gaalya' maraadeine. 24Yɨ dɨvidaa'nyɨ aayagaakɨra. Yɨ maremwaaide gazarɨzarɨjɨ marahuzɨ'bwaremwaaide gazarɨzarɨjɨ dɨragɨnnaka gazarɨzarɨjɨ saraavɨre dɨragɨnya' Kɨraazɨtɨyai mari'mwagasɨ'nojɨ sai Gotɨyarɨ Nɨmwarɨ gannya maremwaaide' marɨmwangadelyɨ. 25Sare' darevɨnyɨ. Kɨraazɨtɨyai kuna maremwaaladelyɨ. Gotɨyai gamɨre yɨkamaangeraavɨ gamɨre sɨvɨlyɨraaryaba galawɨlawakadehaa'na kuna maremwaaladelyɨ. 26Gotɨyai yuya yɨkamaanga pwaraavɨ mena marasɨ'nojɨ yɨ nabaai yɨkamaanga aayaangebwi barya kɨbulyɨ yasɨ'nadelyɨ. 27Sare' darevɨnyɨ. Dara dɨnɨ' “Gotɨyai yuya sahwaryawɨ kwaakewɨ marulawakakengɨ.” Sara dɨnɨka kɨrɨ' yɨ nemɨ mena yawɨ'manɨgo. Gotɨyai yuya, yuyara Kɨraazɨtɨyarɨ dalaangewɨ marulawakakei gamɨ sai dalaangewɨ sahɨnɨjɨ mye'mwannamwaalyɨkelyɨ. Arɨkewɨ. 28Nabaai dɨvi Kɨraazɨtɨyarɨ dalaangewɨ yuya yɨnɨga wi'na marulawakɨna kyojɨ yɨ sagaa' Gotɨyare Gawaalɨvaangei gamɨ sai Gotɨyarɨ sahwai yuya marulawakakerɨ dalaangewɨ wɨlawakɨnadelyɨ. Yɨ “Gotɨyai yuyangɨ yɨnɨga wi'na maremwaaide nebulya'nanyai mwaalana!” dozɨ dalaangewɨ sara wɨlawakɨnadelyɨ.
29Nabaai yagaala yɨdɨkaasaburɨne daza' nebulya'na mi yajɨ kwajɨ a'mwe bainɨkeraavɨ gaimwagya'ne' a'mwe pwara bavɨtaazɨya' maa'manɨgasara berɨ' yɨpɨ'devaka! A'mwe bainɨkeraavɨ nebulya'na midɨkaayɨ yanne' kwajɨ sahwara a'mwe baimwa'daasaraavɨ gaimwagya'ne' bavɨtaazɨya' be'na maa'manɨgataraavaka! 30Yɨ nemɨ kwainajɨ gazagaasagaa' a'mwe pwara nemɨnyɨna “Kayaaka yɨgalakaana!” dadɨvɨ' yaamɨjɨ neyadɨvɨsaine. Nabaai a'mwe bainɨkeraavɨ ayɨna midɨkaayɨ yanne' kwajɨ nemɨ Kɨraazɨtɨyarɨ mɨdɨdaanyaina sara be'na mwaaiho! 31Nya'mweihi, yuya yɨrɨkerɨkaavɨ nɨmɨ taanginya maa'dɨ mena bainɨkeinyɨbɨsainyɨ. Sarɨmɨnyɨne yaya' munyaba makimunebaaibɨ' daza' nebulya'na dadɨnyɨ. Nebulyasɨ. Kɨraazɨtɨyai Jizaazai sai nemɨre Naangerɨ wɨlamwaaihevɨ yaya munyaba makɨla sa' kɨnɨnnakeinyɨ. 32Nɨmɨ a'mweraavɨrebwina dɨde'nanyɨ. Anga Epazaazɨ nɨmɨ sɨgyaawaryarajɨ mala tanneinyɨ. Yɨ dazavɨ nɨmɨ tewaanya benɨ maa'mune'na! Nabaai yɨ a'mwe bainɨkeraavɨ ayahi midɨkaayɨ yanne' kwajɨ pwara dara dɨpɨ'de' tewaanya' berɨ' kwaradɨkaka! “Baa'nana! Nemɨ tɨka wapaaya naana! Aalya naana! Sare' darevɨnyɨ. Mwanyagaa' nemɨ balaadeina dɨngaka? Nemɨ yune menanyaina yɨma'naadeina dɨngaka?” 33Akai, sahwara kwaasɨ kuna nayɨhɨthɨpɨdɨka! Dara jawɨrila! “Nemɨ a'mwe kayaa'nanyarajɨ ye'mwannayamaryadawaari yɨ sahwara nemɨre tewaanyabwi kayaaka nyɨgalakɨpɨdɨka!” 34Sarɨmɨ navɨ'navɨkebwi nayaa yagalya'ma'na jɨla! Yapɨjɨ yɨdasabwina jawɨrila! Sarɨmɨ kayaa'nanya' aya kɨrɨ' ayawɨ nyɨpɨka! Sare' darevɨnyɨ. Sarɨmɨnyɨdaa'nya pwara sahwara Gotɨyarɨna wana myawɨryadɨvɨsare. Sarɨmɨ wagɨla maarya'ne'na yagaala daza'na yɨhɨthɨwa.
Kɨlaakejɨ' ayɨna dɨkaavadezɨkɨnesɨ.
35Kɨrɨ' nabaai a'mwe pwai dara yɨdaanganadelyɨ “A'mwe bainɨkeraavɨ gatha'dara yɨdɨkaavaderaavaka? Yɨ sahwara be kɨlaakejɨ' maarapɨjɨ ayɨna yɨma'naabɨpɨ'deraavaka?” 36Ai, navɨka dara yɨvanɨgɨnyaigɨ dɨngaka! Gɨmɨ kwaigɨ sɨlya' mena burɨdɨnya' gamɨre kɨlaakejɨ' mabalyɨ yaja' yɨ sa' Gotɨyai gaala marakade' mɨ'. 37Nabaai gɨmɨ burɨdɨza daza' dɨvidaasɨ kɨlaake' yɨma'naabathe avaala' mɨ'. Aawa. Gɨmɨ yune wiaina burɨdɨnyɨ. Witɨzɨla dɨnga'? Tɨka wapaa pɨnɨngɨre sɨlya dɨnga'? 38Yɨ Gotɨyai gannya sɨmunyavɨ mena yawɨraka gamɨre kɨlaakejɨ', yɨ yagɨnya kɨwata saza wɨjaavadezɨkɨra. Yɨ sai wia gazaizai gamɨre kɨlaakejɨ' gɨryadezɨ' wɨjaavadezɨkɨ. Pwarɨ gannya kɨlaakejɨ' pwarɨ gannya kɨlaakejɨ' wɨjaavadezɨkera. 39Mɨwɨta gazasa' avaainanya' mɨ'. Aawa. A'mweraavɨre' gave nabinanyasɨ. Yɨ jɨlɨkyaawaryaraavɨre kumɨre mɨwɨta nabinyangɨ. Yɨ yɨkurɨyaawiangɨre kumɨre mɨwɨta nabinanyangɨ. Yɨ yusaraavɨre kumɨre' nabinanyasɨ. Yɨ jawɨnyaraavɨre' nabinanyasɨ. 40Nabaai sɨgunyavɨ yɨlarɨka sa kɨlaaka kɨnɨnnakengɨ. Yɨ Kwaakevakɨ warɨka sa kɨlaaka kɨnɨnnakengɨ. Sare kɨrɨ' sɨgunyavɨya byaanna dɨragɨnya' ge' warɨ'. Yɨ Kwaakevakɨya byaanna dɨragɨnya' ge' warɨ'. 41Yɨ sɨgunyavɨyangɨna nyɨlyare byaanna dɨragɨnya' pɨrɨsɨ. Lawere byaanna dɨragɨnya' pɨrɨsɨ. Sɨlɨngaamɨnyarɨkaavɨre byaanna dɨragɨnya' pɨrɨsɨ. Sare' darevɨnyɨ. Sɨlɨngaamɨnya pɨrɨkɨre byaanna dɨragɨnya' nabinyasɨ. Sɨlɨngaamɨnya pɨrɨkɨre byaanna dɨragɨnya' nabinyasɨ. Sana sana yadengɨra.
42A'mwe bainɨkeraavɨre dɨkaasabwi sa' avaaina sasaresɨ. Kɨlaaka nemɨ lɨkirakadaanyajɨ', sajɨ' sɨla burɨdaanyabaaibɨ' bwia bu'dezɨkɨ. Kɨlaaka Gotɨyai ayɨna yɨdɨkaavadezɨ', mudɨka sajɨ' bwia buradezɨ' mɨ'. 43Kɨlaaka nemɨ lɨkirakadaanyajɨ', sajɨ' yaya munyaba makɨlya'nejɨ' mɨ'. Kɨlaaka Gotɨyai ayɨna yɨdɨkaavadezɨ', sajɨ' byaanna dɨragɨnya' kɨnɨnnakejɨkɨ. Kɨlaaka lɨkirakadaanyajɨ', sajɨ' wɨrɨsajɨkɨ. Kɨlaaka yɨdɨkaavadezɨ', sajɨ' dɨragɨnaange' kɨnɨnnakejɨkɨ. 44Kɨlaaka lɨkirakadaanyajɨ', sajɨ' yɨ kwaakevɨnejɨkɨ. Aagɨlaakejɨkɨ. Kɨlaaka yɨdɨkaavadezɨ', sajɨ' Kuryai maremwaaladezɨkɨ. Yɨ kwaakevakɨne kɨlaakejɨ' a'mweraavɨrejɨ' waraja' yɨ Kuryarɨne kɨlaaka kɨjɨ' waradezɨkɨra. 45Sarevɨ Gotɨyare bukuyavɨ dara dɨnɨ' “A'mwe aaya mudɨ'nanyai, Aataamɨ, a'mwei Kwaakevakɨnei yɨma'naka gaalya' kɨnɨnnakei.” Yɨ Aataamɨ aaya dɨviyai a'mweraavɨre kuryaraavɨ gaala wɨjaaya'nei sai kuryai kɨnɨnnakelyɨ. 46Kɨrɨ' sɨnnawɨ kuryare kɨlaakejɨkɨ wɨlamwaalyajɨ' gamɨdaasɨ yɨma'naka' mɨ'. Aawa. Kwaaka dathavakɨya kɨlaakejɨ' sɨnnawɨ gamɨdaasɨ yɨma'nakesɨ. Yɨ kuryare kɨlaakejɨ' sa' dɨvidaasɨ yɨma'nakesɨ. 47A'mwe aaya mudɨ'nanyai sai kwaakevakɨyalyɨ. Sarɨ Gotɨyai yune kwaakesɨna yavɨkaryaakelyɨ. A'mwe ayawɨdaa'nyai sai Sɨgunyavɨyalyɨ. 48A'mwe kwaaka dazavakɨya dazaibɨ' nemɨ dɨvidaa'nyɨ yɨma'nadaa yuya Kwaakevakɨya a'mweina avaainanyaine. A'mwe Sɨgunyavɨya dazaibɨ' nemɨ dɨvidaa'nyɨ yɨma'nadaa Kɨraazɨtɨyarɨna a'mwe Sɨgunyavɨyaina yɨ nemɨ avaaina yɨma'naadeine. 49A'mwe Kwaaka dazavakɨyare ke'ba'nanyasɨyaina mwaaihobaaibɨ' yɨ nabaai dɨvi a'mwe Sɨgunyavɨyare ke'ba'nanyasɨyaina mwalaadeine.
50Nya'mweihi, nɨmɨ yagaala yɨda'nanya' yɨhɨthɨvanɨge. A'mwe mɨwɨsasɨ tawesɨ kɨnɨnnakei Gotɨyare maremwaalade' yɨnɨga wi'na maarannei mɨ' Nɨmware'. Nabaai bwia burya'ne sa' bwia maburyade savɨ yɨnɨga wi'na maaranne' mɨ' Nɨmware'. 51Yɨthaanyi, sare'na Gotɨyare nebulya' yoimavajalɨkurakya' yɨhɨzɨwaakɨma! Yɨ nemɨ a'mwe yuyaina neina yɨma'nadaa balaadeina mɨ'. Nabaai kɨrɨ' yɨ nemɨ gaainakeinajɨ bainɨkerajɨ yuyaina, mudɨkeinaavɨ Gotɨyai nemwaaihadeine. 52Yɨme'nya'bɨ'na, yune tɨbaalɨku'nya pɨva'na yadehaa', aayagaa'ne gware' jaka dathehaa' sara yadelyɨ. Sare' darevɨdaa'nyɨnyɨ. Gware' jaka wɨdɨna kyojɨ a'mwe mena bainɨkeraavɨ bwia maburya'neraavɨ yɨdɨkaa'na yojɨ nemɨ gaainakeinajɨ yuyainaavɨ mudɨkeinaavɨ nemwaaihadeine. 53Sare' darevɨdaa'nyɨnyɨ. Dare' Gotɨyai dakakesɨ. Kɨlaaka bwia bu'de dazajɨ', sajɨ' yade nayaa yaraaibwa'nojɨ yuyagaa' bwia maburya'nejɨ' nebaazɨ'makwadezɨkɨ. Kɨlaaka baide dazajɨ', sajɨ' nayaa yade yaraaibwa'nojɨ yuyagaa' gaala mwaalagothezɨ' nebaazɨ'makwadezɨkɨ. 54Yɨ kɨlaaka bwia bu'dezɨ' sajɨ' yade nayaa yaraaibwa'nojɨ yuyagaa'ne bwia maburya'nejɨ' kanebaazɨ'makwojɨ yɨ kɨlaaka sajɨ' baidezɨ' nayaa yaraaibwa'nojɨ yuyagaa'ne gaala mwaalagothezɨ' kanebaazɨ'makwojɨ yɨ sagaa' Gotɨyare yagaalya' yunebanna yɨma'naabathesɨ. Dara dɨnɨ' “Gotɨyai malyavɨ wavɨlavaka baryaburɨ galavɨlawakakelyɨ. Yaka yuya yunebanna yɨ'mwagasɨ'nakelyɨ.” 55Yagaala pɨrɨ' dara dɨnɨ'
“Balyabwigɨ gɨmɨre sɨke' gava warɨka!
Balyabwigɨ gɨmɨre tamakya'ne lɨsɨnnyarɨ' gavanaka!”
56Baryabure lɨsɨnnyarɨ' sa' kayaa'nanyabwi yadɨvɨsasɨ. (Yɨ daresɨ. A'mwera kayaa'nanyabwi yadɨvɨsa'na baryabwi naawɨnaanyaibɨsabwi yuna da'devulyɨ.) Nabaai kayaa'nanyabure dɨragɨnya' sa' Gotɨyare Kɨwɨnyasɨra. (Yɨ daresɨ. Gotɨyare Kɨwɨnya' a'mwera kayaa'nanyabwi yadɨvɨsabwi wibwarɨdaakwada kumɨrebwina kumɨnyɨne yɨwetawakya' dɨragɨnna wɨjalɨkurakadesɨ.) 57Sare kɨrɨ' nemɨ Gotɨyarɨ “Su! Su!” wɨdaana! Yɨ sahwai nemɨre Naangei Jizaazai Kɨraazɨtɨyarɨ neyavada'galanemwaaihaka nemɨnyɨne'na baryaburɨjɨ kayaa'nanyaburɨjɨ galavɨlawakakelyɨ. Yɨ sahwai sɨka sa' yanga nejaavanɨkelyɨ.
58Nɨnnya nya'mweihi, sarɨmɨnyɨna tewaanya nyɨvu'nadeihi, sarevɨ sarɨmɨ nayaa dɨragɨnna dɨthaayɨla! Yɨ sangina maalɨ'na yɨbwaaya kɨrɨ' nyɨpɨdɨka! Sarɨmɨ Naangerɨ wawɨnya naange' yadɨvɨsa', sa' Naangerɨna kune' saba sana yɨwɨna yade' mɨ'. Aawa. Dɨragɨnya' waragothesɨ. Sarɨmɨ sara yawɨ'dɨvɨ' yuyagaa' Naangere wawɨnya sa' naanga naanga dɨragɨnna nayaa jɨla!
Trenutno izbrano:
1 Koridɨ 15: byr
Označeno
Kopiraj
Primerjaj
Deli
Želiš, da so tvoji poudarki shranjeni v vseh tvojih napravah? Registriraj se ali se prijavi
© 2013, Wycliffe Bible Translators, Inc. All rights reserved.