1 Koridɨ 16
16
Gotɨyare a'mweraavɨ Jeruzaalemɨ mwaalyaraavɨ gaimwanga ya'ne nɨgwiannesɨ.
1Dahaa' sarɨmɨ yɨda'mwa'daasavɨna Gotɨyare tewaanyara Juthɨya mwaalyaraavɨne nɨgwia dazanna wɨjaaya'ne dɨmari'bwarakyidevɨna yɨhɨthɨma! Nɨmɨ Galezɨya mwaalyaraavɨre Kɨraazɨtɨyare kusɨlaanyangɨ mena wɨdakagevaaibɨ' sarɨmɨ kwaihɨlyɨ nayaa sasara jɨla! 2Yuya Saadehasa sarɨmɨjɨya gazaizai wikɨya pɨrɨkɨne nɨgwia maa'denna nayaa yawɨrana! “Gotɨyai nayaa nyɨgaimwade'na aawawɨnya nayaa yena nɨgwia naanga maa'mweinyɨ dɨngaka!” yawɨ'da kwaala naanga marajaapalojɨ gave pɨba nayaa pada'galakana! Yɨ “Gotɨyai nayaa nyɨgaimwade'na aawawɨnya'ne nɨgwia maalɨka maa'mweinyɨ dɨngaka!” yɨ kwaala maalɨka nayaa pada'galakana! Sarevɨ dɨvi “Polɨ bi'mavojɨyagaa' sahwaraavɨna wɨjaaya'ne nɨgwia yarai namari'bwarakaadɨka!” dapɨjɨ sara jɨla! Yɨ sarevɨna mi'na jide'nanyɨra. 3Dɨvi nɨmɨ kabi'mava'mujɨ yɨ sagaa' sarɨmɨ saihi a'mwe pwara Anga Jeruzaalemɨna sarɨmɨre yanga daza' makulya'neraavɨ nayaa dɨthahɨlakyideihɨlyɨ. Yɨ nɨmɨ sahwaraavɨne paazɨya' “Yɨ dahwara nɨgwia makabɨwaasara a'mwe tewaanyarera,” dɨnɨke' wɨjaava'mujɨ maryaasɨwɨjara wɨpɨ'dere. 4Yɨ nabaai nɨmɨ dara yawɨ'mujainyɨ “Nɨmɨ kwainyɨjɨ wɨwɨneinyɨ dɨngaka!” yɨ sahwara nɨmɨjɨ ye'mwannɨgwawaaderera.
Polɨ “Koridɨ mwaalyaraavɨ wanganɨma!” daka kaanya yamaryake'nesɨ.
5Dɨvidaa'nyɨ nɨmɨ kaanya wawa'mujɨ Maazathonɨya sɨmagɨdaasɨ yalotakudehaa' yɨ sarɨmɨnyawɨnna bi'mavɨdeinyɨ. Sare' darevɨnyɨ. Yɨ Maazathonɨya saba kaanya tɨvi'na yamarya'mujɨ 6yɨ sarɨmɨjɨ pɨgaa'na yɨhye'mwannamwaalɨdeinyɨ dɨngaka? Yɨ sarɨmɨjɨ kuna mwaaida'mujɨ aalɨmavajɨnaake' mena yɨwawojɨyagaa'neinyɨ dɨngaka? Nabaai dɨvidaa'nyɨ anga pɨbanna wɨdehaa' yɨ sarɨmɨ “Nemɨ tusavɨne wɨmakwawaana!” dɨpɨja' nɨmɨnyɨna sara jideihɨlyɨ. 7Sare' darevɨnyɨ. Nɨmɨre sɨmunyavɨ daresɨ. Maalɨkegaa' nɨmɨ sarɨmɨnyɨ yune tusagaa'na wanganya'na “Aala!” dɨwa. Sare' darevɨnyɨ. Naangei avaaina yawɨraja' nɨmɨre sɨmunya' daresɨ. Nɨmɨ saamɨnyagaa' sarɨmɨjɨ yɨhye'mwannamwaalɨdeinyɨ. 8Nabaai “Nɨmɨ dava anga Epazaazɨ kuna mwaalɨdeinyɨ. Yɨ yune Juyaraavɨre Munne Pedikozɨya' mena kyojɨ kaanya wɨdeinyɨ,” yawɨ'manɨge. 9Sare' darevɨdaa'nyɨnyɨ. Gotɨyai tuta naange' nɨmɨnyɨne' mena baasɨwa'. Yɨ nɨmɨ wawɨnya yɨnɨga wi'na ya'ne' warɨ'. “Naangerera yɨma'nɨpɨka!” dena nabaai dava Naangerɨne yɨkamaanga kwalaalya kwarajɨ mwaalɨna yɨgasa'na wawɨnya sa' maremwaalɨdeinyɨ.
10Dɨvidaa'nyɨ sarɨmɨnyawɨnna Timoti bi'mavajai “Gamɨre munyɨ' kave mwaalana! Nemɨreba lɨka myanna!” dapɨjɨ tewaanya nayaa duwila! Sare' darevɨnyɨ. Nɨmɨ sainyɨ yɨvanɨgevaaibɨ' sai Naangere wawɨnya' yadelyɨ. 11Sarevɨdaa'nyɨ yɨ pwai kwai sarɨna dara nyawɨradɨ'! “A'mwe mɨgɨnyalyɨ. Yaasɨwa'nanyalyɨ. Sarɨ wanganakɨma!” Yɨ sahwarɨ nayaa maarapɨjɨ “Polɨmyawɨnna nayaa yagalaawana!” dapɨjɨ sarɨmɨ nayaa kwaamu'na yadɨvɨ' dɨvidaa'nyɨ sahwarɨ tusavɨ dɨmakwidelyɨ. Sare' darevɨnyɨ. Sahwarɨna neya'mwe kwaraavɨnajɨ yemwaalɨdelyɨ.
12Neya'mwei Aapolɨzarɨna yɨda'mwa'daasa' daresɨ. Nɨmɨ sahwarɨ yagaala dɨragɨnna wɨdeinyɨ. Saihwaigɨ nya'mwe pwarajɨ saraayawɨnna dɨwia! Dena kɨrɨ' sahwai dahaa' kaanya wɨya'na “Aala!” dɨwa'dɨ'. Sai “Dɨvi sagaaku' nabaai nayaannanyagaa' wangamuneinyɨ dɨngaka!” dozɨ yɨ sarɨmɨnyawɨnna sai kaanna wɨna yadelyɨ.
13“Kayaaka nyɨgainaadɨka!” dadɨvɨ' sarɨmɨ mala nayaa yɨwannadɨvɨ' sarɨnnya Kɨraazɨtɨyarɨ lɨmwangevɨ dɨragɨnna dɨthaayɨla! Sarɨmɨ a'mwe nebulya'nanyaihi nayaa dɨmwaalyɨla! Nayaa yɨhivaimwadaa'nyɨ dɨragɨnna dɨmwaalyɨla! 14Gazaza yadɨvɨ' yɨ Gotɨyarɨnajɨ a'mwe kwaraavɨnajɨ tewaanya yɨhɨvu'nadevɨ sara jɨla!
15Nya'mweihi, sarɨmɨ mena dara yawɨ'manɨga'. Sɨtepaanazalyɨ gamɨre angevɨyarajɨ aayagaa' kumɨdaasɨ yuya Gɨriza mwaalyaraavɨ Kɨraazɨtɨyarera yɨma'nesare. Yevera nabaai kunnya yune sɨmunyangɨna a'mwe Gotɨyare tewaanyaraavɨ wɨdaaya'nera mwaaihasare. Yɨ sahwaraavɨna dɨragɨnna yɨhɨthɨde'nanyɨ. 16“Dazaraavɨjɨ yɨ a'mwe yuya sahwaraavɨ gaimwadɨvɨ' wawɨnya dazavɨ mɨraagɨkɨ'dɨvɨsaraavɨjɨ dalaangewɨ mwalaana!” dapɨjɨ sara jɨla! 17Sɨtepaanazalyɨ Posunaatazalyɨ Aakaaikazalyɨ sara nɨmɨnyawɨnna bɨwa'daasare. Yɨ daza'na nɨmɨ yɨlaaya naanga yɨvanɨge. Davanna yɨbwa'nadɨvɨsaihɨrɨneba sarɨmɨjɨya sahwara bama'mwa'daasa'na yɨlaaya yɨvanɨge. 18Sare' darevɨnyɨ. Sahwara nɨmɨre kuryarɨ gaalya'na nyɨgaimwamanɨgasare. Yɨ kɨgaa' sarɨmɨre kurya kwaraavɨjɨ wɨgaimwamwaa'. Sarevɨdaa'nyɨ sarɨmɨ sasareraavɨ yaya' munyaba makɨlya'ne' tewaanyasɨ.
19Pɨrovijɨ Ezɨya mwaalyara Kɨraazɨtɨyare kusɨlaanyangɨyara “Neya'mweihi!” yɨhɨthɨwaa'. Aakwilaajɨ Pɨrɨzɨlasɨ sayolyɨ sayore angevɨ kusɨlaanyavɨyarajɨ Naangerɨna “Neya'mweihi!” dɨragɨnna yɨhɨthɨwaa'. 20Davanya neya'mwe yuyara “Neya'mweihi!” yɨhɨthɨwaa'. Gotɨyare saburɨ yuyaihi pwai pwarɨ pwai pwarɨ tewaanya'na maangwɨdaayɨlaaya dɨmarinyɨla!
21Nɨmɨ Polɨnyɨ pɨkarya nyɨdayɨvanɨkerɨ pɨkarɨyɨsarɨ' maarena nɨnnya asɨlyɨ dara yɨda'mwesɨ. Nya'mweihi! 22A'mwe pwai Naangerɨna tewaanya muvu'nyɨ yajai Dɨkevɨ Gotɨyai wɨmarasɨ'nadelyɨ. Nemɨre Naangei nemɨnyawɨnna walaabana! 23Naanga Jizaazare kale'na gaimwange' sa' sarɨmɨjɨ yanga yɨhye'mwannamwaalana! 24Kɨraazɨtɨyai Jizaazarɨ wɨlamwaaihasaihi yuyaihɨrɨna nyɨvu'nadevwi yɨhye'mwannamwaalana!
Polɨ
Trenutno izbrano:
1 Koridɨ 16: byr
Označeno
Kopiraj
Primerjaj
Deli
Želiš, da so tvoji poudarki shranjeni v vseh tvojih napravah? Registriraj se ali se prijavi
© 2013, Wycliffe Bible Translators, Inc. All rights reserved.