1 Koridɨ 14
14
Kurya Tewaanyare yangewaarɨnesɨ.
1Pwaraavɨna tewaanya yɨhɨvu'nyabwi yuyagaa' kuna dɨragɨnna dɨmɨdɨnyɨla! Nabaai sarɨmɨ Kurya Tewaanyare sɨhumalenna maarya'na “Dɨragɨnna yawɨramaraana!” dadɨvɨ' dɨmwaalyɨla! Nabaai sare kɨrɨ' yanga naange' “Gotɨyarɨ wɨ'nawaajɨ pwaraavɨ wɨjɨwaakya'neina yɨma'naana!” dɨragɨnna dadɨvɨ' dɨmwaalyɨla! 2Sare' darevɨnyɨ. A'mwe yagaala nabinabinyavɨ sɨhumale' kɨnɨnnakei dadei sai a'mweraavɨ yagaalya' mujadelyɨ. Aawa. Sai yune Gotɨyarɨna wɨdɨvanɨ'. Sare' darevɨnyɨ. Yagaala dazavɨ a'mwe aane pwai aane kwai mu'namaaryadɨvɨsasɨ. Gamɨre kuryarɨ nebulya'nanya kuku'nya yulyakaja dadelyɨ. 3Kɨrɨ' a'mwe Gotɨyarɨ wɨ'nawɨjɨwaakadei sai a'mweraavɨ wɨdadelyɨ. Yɨ a'mwe dazare yagaalya' sa' dɨragɨnya pada'galayɨvaimwadesɨ. A'mwera tewaanya ya'ne sabwina dɨhaa'bwa'desɨ. Kale wiadaa'nyɨyaraavɨjɨ taanginya wiadaa'nyɨyaraavɨjɨ wɨgaimwadesɨ. 4A'mwe yagaala nabinabinyavɨ sɨhumale' kɨnɨnnakei gamɨ sarɨ dɨragɨnya pada'galayɨvaimwannadelyɨ. Kɨrɨ' a'mwe Gotɨyarɨ wɨ'nawɨjɨwaakadei sai aangyagaala Kɨraazɨtɨyare kusɨlaanya yuyavɨ dɨragɨnya pada'galayɨvaimwadelyɨ. 5Nɨmɨ sɨmunyavɨ dare'na yawɨ'manɨge. Sarɨmɨ yuyaihi yagaala nabinabinya wɨja'neihi jɨma'nyide' tewaanyasɨ. Kɨrɨ' nabaai dɨragɨnna dare'na yawɨ'manɨge. Sarɨmɨ yuyaihi “Nemɨ Gotɨyarɨ wɨ'nawɨjɨwakaana!” dapɨjɨ jɨma'nyide' nawɨ'nya tewaanaangesɨ. “Kɨraazɨtɨyare kusɨlaanyavɨyara pada'galayɨvaimwangebwi maapɨka!” dozɨ a'mwe yagaala nabinabinya dadei yagaala daza maridazai yɨnɨga wi'na yadelyɨ. Sare kɨrɨ' yagaala daza pwaraavɨne'na mamarijɨ yajai yɨ Gotɨyarɨ wɨ'nawɨjɨwaakadeibɨsai yɨnɨga wi'na yadei mɨ'. Aawa. Gotɨyarɨ wɨ'nawɨjɨwaakadei sai gave pwainanaanga nawɨ'nyaangelyɨ.
6Nya'mweihi yagaala datha'na nayaa jawɨrila! Nɨmɨ sarɨmɨnyawɨnna wɨwɨjainyɨ yagaala nabinabinya yɨhɨthɨwɨja' gatha'darevɨ yɨhɨgaimwagɨdeinyɨ! Aawa. Gotɨyai nyɨbwarɨdaakwade pɨrɨ', sɨmunya nawɨ'nya' yawɨranganya'ne kɨrɨ', Gotɨyarɨ wɨ'nayɨhɨzɨwaakya pɨrɨ', yɨhɨzɨwaakya kɨrɨ' yɨhɨthɨwɨja' nayaa yɨhɨgaimwagɨdeinyɨ. 7Darebaaibɨsasɨ. Gaala maaya, gware pɨrɨ' pɨradaza kɨrɨ' nabaai sa kɨnɨjɨ avaala sasarengɨ. Nabaai a'mwei gware pɨrɨ' pɨradaza kɨrɨ' kayaa'na dɨna yada sa' yagaala yaasɨwa'na dɨna yadengɨna “Akai, savɨre yagaalya' nemɨ kadɨka nayaa pada'galawɨ'nya' gatha'darevaka!” dadaanyɨ. 8Sare' darevɨnyɨ. Yɨ nabaai pwara jaka ge'bɨ' kayaa'na danganna “Yarala! Mala pɨnaana!” yɨpɨja' kadɨka wɨ'nojɨ malya'na maryovɨravalɨmwagata yadei aaihwalaka! 9Sarɨmɨ kwaihɨlyɨ sasarebaaibɨsasɨ. Sarɨmɨ taalɨsasɨ yagaala nawɨ'nya yɨda'na mujɨ yɨpɨja' sarɨmɨre yagaala dazavɨre aaya kaavɨlyavɨ gatha'dara yawɨrangabɨ'deraavaka! Aawa. Sare' darevɨnyɨ. Sara mi yɨpɨja' sarɨmɨre yagaalya' yɨhusavɨ saba sana yaasɨwa' yɨwɨna yadevaaibɨsasɨ. 10Nebulyasɨ. “Kwaakevakɨ yagaala kwalaalya ge ge dahawarɨkajɨnyɨra.” Yagaala aane pɨrɨ' aane kɨrɨ' yaasɨwa'nanya' mɨ'. Yagaala yuya sangɨna aaya kaavɨlya' kɨnɨnnakengɨ. 11Sarevɨdaa'nyɨ a'mwe pware yagaala aaya kaavɨlya' nɨmɨ myawɨranganyɨ yɨwɨja' yɨ sai nɨmɨnyɨna dara yawɨradelyɨ “A'mwe maa'maataalɨ'minnyalyɨra.” Yɨ nabaai nɨmɨ kwainyɨ yawɨrɨdeinyɨ. A'mwe yagaala dɨwaka dazai sai maa'maataalɨ'minnyalyɨra. 12Sarevɨ sarɨmɨ kwaihɨlyɨ yagaala pwara nayaa yɨhu'nɨpɨja' tewaanyasɨra. Sarɨmɨnyɨ Kurya Tewaanyare sɨhumale yanga maarya'neihɨrɨ nawɨ'nya yɨhɨvu'nɨvanɨ'. Yɨ sareihi “Nawɨ'nya nebulya'nanya sa naanna yaana!” dapɨjɨ Kɨraazɨtɨyare kusɨlaanyavɨyaraavɨ dɨragɨnya dɨvada'galayɨvaimwagyidevɨna kyɨhɨvu'nojɨ Kurya Tewaanyarɨ sara jɨthaanganyɨla!
13Sarevɨdaa'nyɨ yɨ a'mwe yagaala nabinabinya' wɨdazai sai “Yagaala sa' maridɨma!” dozɨ Gotɨyarɨ dɨragɨnya savɨna nayaa wɨdana! 14Sare' darevɨnyɨ. Nɨmɨ yagaala nabinabinya' Gotɨyarɨ wɨdɨwɨja' yɨ nɨmɨre kuryai sai Gotɨyarɨ wɨdathelyɨ. Sare kɨrɨ' nɨmɨre sɨmunya' sa' kune' yaasɨwa' warɨna yadesɨ. Pwaraavɨ wɨgaimwagya'ne' yɨma'nade' mɨ'. 15Sarevɨdaa'nyɨ nɨmɨ gara yɨjɨwana? Nɨmɨre kuryalyɨ Gotɨyarɨ wɨdɨma! Nabaai kɨrɨ' sɨmunyasɨ Gotɨyarɨ kaavinake' nayaa wɨdɨma! Nɨmɨre kuryalyɨ Gotɨyarɨ daata dɨma! Nabaai kɨrɨ' sɨmunyasɨ daata kaavinake' nayaa dɨma! 16Sarevɨ yɨ'bwa'namwaaidɨvɨsagaa' gɨmɨ sara mi yɨja' yune gɨnnya kuryalyɨ kaavimaaya' Gotɨyarɨ suya wɨdɨza' a'mwe pwai angwangwei mwaalojɨ yagaala daza' myawɨranganyɨ yadei gɨmɨre suya daza'na “Naanga nebulya' sahɨrɨsɨ,” gatha'darevɨ dathelaka! Sai yagaala wɨdɨza daza' myawɨranganyɨ yade'na sa' yɨnɨga wi'na yade' mɨ'. 17Sare' darevɨnyɨ. Gɨmɨ suya' tewaanna wɨdɨwaanya' kɨrɨ' wɨdɨwaanyavɨna a'mwe kware sɨmunya' dɨragɨnya mavada'galayɨvaimwagi yɨwaa. 18Kwalaalyagaa' yagaala nabinabinyangɨ dadɨnyainyɨ. Pɨgaa'na pɨgaa'na sarɨmɨ yagaala sangɨ dadɨvɨsaihɨlyɨ. Yɨ sarevɨ nɨmɨ Gotɨyai nyɨgaimwadaa'nyɨ sahwarɨ suya wɨdɨwa. 19Sare kɨrɨvɨ dara yawɨ'manɨge. Kɨraazɨtɨyare kusɨlaanyavɨ “A'mwe kwaraavɨ wɨjɨwɨrima!” da'mujɨ yagaala sɨmunyavɨnanya ata pwinanya dɨde'na “Yo,” dɨwa. Yagaala nabinabinyavɨya kwala naanga naanga (10,000) dɨde'na “Aala!” dɨwa.
20Nya'mweihi, yagaala nabinabinya dadɨvɨsavɨna sarɨmɨ sarɨnnya sɨmunyangɨ kaimɨraayamɨlɨkabɨ' kuna mamwaaibɨna! Aawa. Kayaa'nanyaburɨna yadɨvɨsa'na sarɨmɨ bwaranyamɨlɨkabɨ' nayaa dɨmwaalyɨla! Sare kɨrɨ' sarɨmɨre sɨmunyangɨna a'mwe naangerabɨ' yuneihi nayaa jɨma'nyɨla! 21Gotɨyare bukuyavɨ, Kɨwɨnyavɨ, dara jɨda'nɨkesɨ.
Naangei dara dɨvanɨ'
“A'mwe yagaala pɨnɨjɨyaraavɨre maangevɨdaasɨ
Menyaraavɨre maangevɨdaasɨ nɨmɨ wɨdɨdeinyɨ.
Davanya datharaavɨ nɨmɨ wɨdɨdeinyɨ.
Sarevɨ kɨrɨ' sahwara nyɨmɨdɨbɨ'dera mɨ'.”
22Sarevɨdaa'nyɨ yagaala nabinabinya ja sabwi yɨnɨga wi'na yɨjɨwaainya daza' Gotɨyarɨ dɨragɨnna lɨmwadɨvɨsaraavɨna mɨ'. Aawa. A'mwe dɨragɨnna malɨmwagyadɨvɨsaraavɨne yakesɨ. Kɨrɨ' Gotɨyarɨ wɨ'napɨjɨ pwaraavɨ wɨjɨwaakya sabwi yɨnɨga wi'na yɨjɨwaainya daza' Gotɨyarɨ malɨmwagyadɨvɨsaraavɨna yaka' mɨ'. Aawa. Sa' yune lɨmwadɨvɨsaraavɨne yakesɨ. 23Sarevɨdaa'nyɨ Kɨraazɨtɨyare kusɨlaanyavɨya yuyaihi yɨkabɨna yapɨjɨ yɨraku'nemwaaibɨza' yɨ yuyaihi yagaala nabinabinyangɨ dɨpɨja' a'mwera angwangwe pwara malɨmwagyadɨvɨta kwara wɨlaabɨpɨjara kadɨka yɨhu'nɨpɨja' dara dɨpɨ'de' midaaka! Sarɨmɨ yɨmakyagaala dɨvanɨgava! 24Kɨrɨ' sarɨmɨ yuyaihi Gotɨyarɨ wɨ'nawɨjɨwaakɨpɨja' a'mwe malɨmwagyade pwai angwangwe kwai kusawɨnna kulaabozɨ yuyaihɨre yagaalya a'mwe dazare sɨmunyavɨ wɨlojɨ yɨ yuyaihɨre yagaalya sarɨ kotɨya maryadaa'nyɨ sahwai gannya kayaa'nanyanna yawɨradelyɨ. 25Sahware sɨmunyavɨ yuya lɨka yulyarɨke yɨ ku'maayabanna yɨma'naabathe sarɨmɨre yagaalya'. Yɨ nabaai sarevɨ sai gannya sɨnnyɨkɨ kwadaai gɨlojɨ yɨ Gotɨyarɨne yaya' munyaba makɨladelyɨ. Yɨ dara jalɨkurakadelyɨ “Naanga nebulyasɨ. Gotɨyai sarɨmɨnyɨ tɨnnyaba mwaalɨka!”
Yuyabwi Kɨraazɨtɨyare kusɨlaanyavɨ nayaa yɨda'na yɨma'nade'nesɨ.
26Sarevɨdaa'nyɨ, nya'mweihi, nayaa gara jijɨwaava? Sarɨmɨ yɨ'bwa'namwaaidɨvɨsagaa' gazaigɨzaigɨ ya'ne pɨrɨ' kɨnɨnnakeigɨnyɨ. Pwai yɨledaata kɨnɨnnakelyɨ. Yɨ pwai yɨhɨzɨwɨrya'ne yagaalya' kɨnɨnnakelyɨ. Yɨ pwai Gotɨyarɨ wɨ'nojɨ yagaalya' yɨhɨzɨwaakya'ne' kɨnɨnnakelyɨ. Yɨ pwai yagaala nabinabinya' kɨnɨnnakelyɨ. Yɨ pwai yagaala dazavɨ marija'ne' kɨnɨnnakelyɨ. Sarɨmɨ yuya sa kusɨlaanyavɨyaraavɨ pada'galayɨvaimwagya'neihi nayaa sara jɨla! 27A'mwe pwai kwai “Yagaala nabinabinya' myawɨryadɨnya' dɨjɨ,” yɨ “A'mwe pwaraai daakajɨ,” “A'mwe pwaraai pwai daakajɨ,” sara yɨnɨga wi'na dɨpɨ'dere. Sa' wi'nanyɨ. Pwarajɨ aawa. Yɨ yuyara yagaala ye'mwannadɨwɨlaawia mipɨna! Pwai yagaalya' mena tɨvi'na kadozɨ yɨ pwai dɨvidaasɨ dathelyɨ. Nabaai yuyagaa' a'mwe pwai yagaalya' nayaa maridana! 28Yɨ nabaai a'mwe yagaala marija'nei maayawɨ, yɨ a'mwe yagaala nabinabinya' dadei sai gannya maangi' nayaa bɨpalemwaaina yojɨ Kɨraazɨtɨyare kusɨlaanyavɨ kave mwaalana! Sai gavei yagaalya' yune Gotɨyalyɨna ye'mwannadathelyɨ. 29Gotɨyarɨ wɨ'nawɨjɨwaakyara, yɨ pwaraaina daraai dainanya kwara wɨdɨpɨka! Yɨ wɨ'nawɨjɨwaakya pwara yagaala sa' maryawɨbwapɨka! 30Yɨ nabaai pwai mwaalɨna yadori yɨ Gotɨyai sarɨ yagaala pɨrɨ' wibwarɨdaakwaja' yɨ a'mwei aayagaa' daavojɨ yagaala gamɨdaasɨ dathei, sai gamɨre yagaalya' yarai jɨ'mwannana! 31Sare' darevɨnyɨ. “Yɨ nemɨre a'mwe yuyara sɨmunya' nayaa yawɨramaapɨka! Yuyara kumɨre kuryaraavɨne dɨragɨnya' maapɨka!” dapɨjɨ sarɨmɨ yuyaihi Gotɨyarɨ wɨ'napɨjɨ yagaala sa' pwaigɨdaasɨ pwaigɨdaasɨ yɨnɨga wi'na wɨjɨwaakɨpɨneihɨlyɨ. 32A'mwe Gotɨyarɨ wɨ'nawɨjɨwaakadɨvɨsaraavɨre yanga sɨhumale sanna sahwara maremwaainadɨvɨsare. Pɨgaa' dɨna, pɨgaa' jɨ'mwannyɨna yadɨvɨsare. 33Sare' darevɨnyɨ. Gotɨyai gavamarasɨ'nyɨyagaala, maihurɨ'nyɨyagaala kɨnɨnnakei mɨ'. Aawa. Sai kwaamu'nanyabwi kɨnɨnnakelyɨ. Sare'na yawɨ'daa nemɨre yɨ'bwa'namwaidaanyanna nayaa maremwainaade'nanyɨ.
Yuyaba Gotɨyare tewaanyara Kɨraazɨtɨyare kusɨlaanya yuyangɨ yadɨvɨtabaaibɨ' 34kusɨlaanyangɨ a'mwe yagaalya' madɨpɨna! Sare' darevɨnyɨ. Sahɨnɨ maange' bɨpalemwaaina yɨpɨka! Yagaala madɨpɨna! Aawa. Gotɨyare kɨwɨnyavɨ dɨnɨkabaaibɨ' sahɨnɨ dalaangewɨ nayaa mwaaibɨka! 35Nabaai sahɨnɨ yagaala wɨ'nadɨvɨ' “Yagaala savɨre aaya kaavɨlya' yawɨranganaana!” dɨpɨja' yɨ dɨvidaa'nyɨ kunnya angengɨ kunnya kwalaangeraavɨ yɨdaangabɨka! Sare' darevɨnyɨ. Kusɨlaanya savɨ yagaala daza' nawɨ'nya yɨda'nanyabwi mɨ'. Wagɨla kɨnɨnnakebulyɨ. 36Gatha'darevaka! Gotɨyare yagaalya' sarɨmɨnyawɨdaa'nyɨ yɨma'nake' daa! Sarɨmɨ gaveihɨryawɨ yɨ'mavake' daa! “A'mwe pwaraayawɨ aawa,” sara dɨmanɨgasaihi daa! Yɨda'nanyabwi mamɨdɨnyɨ be'na yɨvanɨga'!
37A'mwe pwai gamɨ sarɨna “Nɨmɨ Gotɨyarɨ wɨ'nawɨjɨwaakadɨnyainyɨ.” Sai “Kurya Tewaanyare yanga sɨhumale' kɨnɨnnakeinyɨ.” Yɨ sai yawɨrajai nayaa dara yawɨramaarana! “Yɨlaaya yadaanyabwi nemɨnyɨna Polɨ yɨda'mwake' yɨ sabwi Naangere kɨwɨnyasɨ.” 38Yɨ nabaai a'mwe pwai kwai sasara mibwakɨnyɨ yajai, yɨ sarɨna “Gotɨyarɨ wɨ'nawɨjɨwaakadelyɨ,” nemɨ yɨbwakɨnaadei mɨ'. Sarɨ kadɨka mu'naanna! 39Nɨmɨre nya'mweihi, sarevɨ “Gotɨyarɨ wɨ'nawaajɨ pwaraavɨ wɨjɨwakaana!” dɨragɨnna dadɨvɨ' dɨmwaalyɨla! Nabaai yagaala nabinabinyangɨ ja sabwina kɨmaakɨya madakɨpɨna! 40Yɨ yɨ'bwa'nawɨ'nadɨvɨsagaa' nayaa yɨda'na jɨla! Pɨrɨ' mena yapi pɨrɨ' jɨla! Sarevɨ Gotɨyarɨ yɨlaaya nawɨ'nyaanga nebulya'nanya' yɨma'nana!
Trenutno izbrano:
1 Koridɨ 14: byr
Označeno
Kopiraj
Primerjaj
Deli
Želiš, da so tvoji poudarki shranjeni v vseh tvojih napravah? Registriraj se ali se prijavi
© 2013, Wycliffe Bible Translators, Inc. All rights reserved.