Logotip YouVersion
Search Icon

Oosana 39

39
Pootifaana anaaqa faqa Yooseefaana faqa ufa.
1Isamaeerana aiku asauku Yooseefaana afiqamaree Isipa maqa maaqai muqusoofanoo Isipa maqannaa karaambaiqa Faraoona sundiauqa rakisirafa Pootifaafa Yooseefaana feefaurinau. Pootifaafa Faraoofa maruqoo rakisi maru sundiasa uriqararafa marinau.
2Karaambaiqa Yooseefaana faqa maridanoo dadaaqi marufanoo aiqama ainaina auqoofanoo anoona kai kambiqee marinau. Mifa narí Isipa maqannaa uriqararana maaqaki marinau. 3Pootifaafa qafoofanoo karaambaiqa Yooseefaana faqa maridanoo aiqama ainaina auqoofa anoona kambiqee marinau. 4Pootifaafa Yooseefaanara asasammaseenoo uriqarara ainainira faiqikammaqoofanoo marinau. Miqimmaseenoo mifa Yooseefaana mareeqee narí maaqasaa faqa narí aiqama ainainasaa rakisirafaikamma qoofanoo marinau. 5Miqooqari Yooseefaanaroo kai qidanoo karaambaiqa fannoo Isipa maqannaasa maaqakinaa aiqama ainaina faqa Pootifaana maaqakinaa ainaina faqa mina maqakinaa nara ainaina faqa amiqi amiqimma nimaqee marinau. 6Pootifaafa mana mana kaimmi marinau. Sia narí ainainara irimarinau, naranara kai irimarinau. Yooseefaafa amudaani tiafa amiqirafa uqanna mariau.
7Kaqi kaaqoo marinoo mina uriqararana anaaqa fannoo Yooseefaanara aidufanoo qimaminau, aniree qini faqa faiqaa.
8Miqi qufanoo Yooseefaafa qaoo qimaseenoo qimaminoo qinau. Qini uriqararafa sia maaqaki quqaqai ainainausara iridanoo. Qinee marunanoo sia iridanoo. Mifa narí aiqama ainainasaa qini quqaqaifaqa rakisidaqa. 9Qinee maa maaqanaki rakisira afeeka mifa uaqeeindee kai masee uaqee idaqa. Mifa sia moo ainaina qini kukeeqa qimaqa qaifanoo maridanoo aiqama ainaina qimiqaifanoo, ani kai sia qimiqaifanoo. Naqi fee mandee fee qinee maa manda oosanna auqamasee fee Anutuna mandaikamma amaqaanauree. 10Pootifaana anaaqa fannoo aiqama faasaana Yooseefaanara qini faqa faiqaannee qimarufanoo Yooseefaafa sia mina faqa faiqanau.
11Moo faasaana Yooseefaafa naríara maaqaki ainaina auqanoo nufanoo sia moo ainainira faiqi minaki marinau. 12Nariaraa marufanoo mi anaaseefa mina siuta ani qumareenoo qinau. Doo ania. Aniree qini sakasee faiqaa. Miqi qimaseenoo Yooseefaana siutandauru qumaroofanoo mifa narí siuta kai raipaqueeqee mina asaukuki quqaseenoo rafudamakufanoo madaanai sandanau.
13-15Madaanai sandoofanoo Pootifaana anaaqa fannoo qafamaseenoo narí maaqaki ainaini maru faiqisa naaramaseenoo qinau. Innee maana qafaaqa. Maa Qeeburu maqannaa fasiqana qini qifaaqi fannoo maaqaki miniqaifa maasa mandaikamma qima qaidanoo. Mifa qini rarisara rifaqa qinee firaaqoo faaqa runanoo mifa narí siuta qini daaqa quqasee sandeenoo.
16Mifa miqi qimasee qimannimiseenoo mi siutana kaqi uaqeeufannoo Yooseefaana uriqararafa aniranau. 17Aniroofanoo mi ufana kai qimaminau. Maa Qeeburu maqannaa anainira faiqina anee miniqaanafa qini maaqaki keeqafi qini faqa manda oosana auqarara inoo. 18Miqifaqa qinee faaqa runanoo narí siuta qini daaqa raipaqu quqasee madaanai sandeenoo.
19-20Yooseefaana uriqararafa mina irufanoo aranaqoofanoo Yooseefaana qumareeqee uriqararausa rumbara fasiqauqa marunaki quqanau. Quqasoofanoo minaki marinau. 21Marufanoo karaambaiqa Yooseefaana faqa maridanoo dadaaqida amiqi amiqimma amaqee marufanoo karabusasaa rakisi marufa Yooseefaana qafamaseenoo asasinau. 22Karabusasaa rakisi marufa Yooseefaana mareeqee karabusauqasaa rakisiranaika minau. Miqimmasoofanoo Yooseefaafa karabusa maaqaki aiqama ainaina auqee maruna rakisirafa marinau. 23Karabusasaa rakisirafa Yoosefaafa rakisi maru ainainausara sia amiqimmasee iridanoo. Sia rakisi marinau. Karaambaiqa fannoo Yooseefaana faqa marunara aiqama ainaina mifa auqoofa anoona kai kambiqee marinau.

Currently Selected:

Oosana 39: bjr

Označeno

Share

Copy

None

Want to have your highlights saved across all your devices? Sign up or sign in

YouVersion za prilagajanje tvoje izkušnje uporablja piškotke. Z uporabo našega spletnega mesta se strinjaš z našo uporabo piškotkov, kot je opisano v naši Politiki zasebnosti