Oosana 38
38
Tamaara nammarifa Yudana akaru qinau.
1Mi aukuanna Yudafa narí ainaina minniseenoo Qiraana faqa Aduramma maqusai ooqu marinau. 2Miqoo Yudafa Kannaana maqannaa fasiqa Suana araamuna qafamasee maranau. 3Mariufanoo mi anaaseefa amuaqu qaikinoo akoonaiqi maqasoofanoo Yudafa mina auqu Eera fee qinau. 4Kafaa mariufanoo mi anaaseefa amuaqu qaikinoo faiqi moo maqaseenoo mina auqu reenoo Oonanee qinau. 5Kaifaa amuaqu qaikinoo akoonaiqi moo maqaseeoo mina auqu Seeraa fee qinau. Yudafa Keesiba maqusai marufanoo mina anaaqa fannoo Seeraana maqanau.
6Yudafa narí indaruqaa faiqi auqu Eerafa innooqa fufanoo anaasee Tammaara nammarina mara aminau. 7Eerana marirafa Karaambaiqa afusaa mandaika uqanna ufanoo kuqa arinau.
8Kuqufanoo Yudafa mina akaqa Oonana qimaminoo qinau. Anee maasa oosana mareenana aneenna afasaana anaaqa faqa aana finanoo faiqi maqasainanoo ani afasaana auqu sia taikaani. 9Oonanafa mina iriseenoo maaqi qimirinau. Qinee faiqi maqasaananoo sia qinindi kiandoo qimaseenoo narí afasaana anaaqa faqa aana nidanoo kaqinni kai nammari adiee marinau. Narí afasaana faiqi asumu sia marianifeera miqi marinau. 10Oonanafa mi oosanna maroofanoo Karaambaiqa qafoofanoo mandaika uqanna ufanoo mina kuqamma arinau.
11Kuqufufanoo Yudafa narí aanaakuqu Tammaara nammarina qimaminoo qinau. Aneenna akoona maqa maaqai oonu adeedaana kai marinaqa Seeraafa innooqa finaqa mina faqa ani kai amianaura. Seeraafa faqa narí afasaaqanda undee inoo mi anaaseena marasee kuquandoora mina akoofa miqiqinau. Miqi qufanoo Tammaara nammarifa narí akoona maaqai finau.
12Mariufanoo Yudana anaaqa Suana araamuna kuqinau. Kuqufufanoo soofaara taikaseeoo Yudafa narí aqoondi Aduramma maqusanaana mina auqu Qiraana faqa Timinaa maqusai narí sipsipa asausi aukimaruna niqafarara ooru finau.
13Faiqí moo fannoo Tammaara nammarina qimaminau. Ani aanaakuqu Timinaa maqusai narí sipsipa asausi ateekarara ooru fidanoo fee qinau. 14Tammaara nammarifa mi ufana iriseenoo adeedaana marida afisiu qamunnana raipaquseenoo moo qamunna afisumareenoo narí oori kaqikaa qamunnannai ititaseenoo Eenaimma maqusaki fimaru aannanasaa ooqufaaqee marinau. Tammaara nammarifa Seeraafa innooqanoo marifanoo sia qimiannoo fee qimasee miqinau.
15Yudafa ani qafoofanoo qamunnannai oori rafaaqafusee marufanoo dapi maraqa nua aanaaseefa mifoo qinau. 16Miqi qimaseenoo aana afainni mi anaaseefa marufanoo oonuree qimaminau. Ani rarisama saana mina akiiqara naqumma feefauru fee maridanoo fee. Yudafa mi anaaseenara sia narí aanaakuqu fee qimasee miqi qinau. Miqiqufanoo mi anaaseefa qinau. Mina akiiqara nanee qiminnaree.
17Miqi qufanoo Yudafa qinau. Qinee mimmi moo timmusa ani amaqaanaura. Miqi qufanoo mi anaaseefa qinau. Anee moo ainaina qimiqaina uaqeeiana kasooaqee mimmi qiminna kari aninna amianaura.
18Miqi qufanoo Yudafa qinau. Nana ainainee amianauree. Miqi qufanoo mi aneeseefa qinau. Aneenna asaukukinaa isaaqama faqa aneenna saunu faqa qimia. Miqi qufanoo Yudafa minauqa amiseenoo mi anaaseena faqa aana numasoofanoo amuaqu qaikinau. 19Tamaara nammarifa findi fufanoo narí maqusai oonureenoo dapi anaasee maraqanu qamunnana raipaqusee adeedaana qamunna kaifaa afisinau.
20Yudafa narí qaqoondi Qiraanasaa mimmi aanaaqi timmusa quqaseenoo munu mi anaaseena amisee narí ainaina uaqeeuna oonu mini qimiannee qufanoo oonu randoosiaa sia mi anaaseena paqurinau. 21Mifa oonureenoo Eenaimma maqusanaa fasiqauqa iramirinoo qinau. Yaifee dapi maraqanua aanaaseefa maa aannana afainni ooqufaaqeeiufa maridanoo fee. Miqi qufaqa misa qiqau. Sia maa maqusanaki dapi maraqanua aanaaseefa maridanoo.
22Miqi qufanoo mi fasiqafa kafaa anirandeenoo Yuda funnai oonureenoo qimaminau. Oo qinee sia mi manaaqana paquriqa. Mi maqusanakinaa fasiqauqa faqa qiqa, sia ooqaindari maasa maqusaki dapi maraqanua aanaaseesa marida miaafoo qia.
23Miqi qufanoo Yudafa qinau. Saina mi anaaseefa mi ainainausa uaqee iani. Faiqí maasara naanaidara qifoora qikooqaidanoo. Minara qinee mi anaaseena feefauru amirara qunana anee oonuree sia paquriananoo.
24Qaarammoo quqoona aiqaramafufanoo Yudana qimamiqa qiqau. Ani aanaakuqu fannoo dapi maraqanua aanaaseesara foora numaseenoo maqee mifa amuaqu qaikinoo maridanoo. Yudafa mi ufana iriseenoo qinau. Mi anaaseena maree munusee idarasaifanoo qaani.
25Misa afiqee fimarufanoo narí aanaakuqu Yudanara ufa quqanau. Qinee maa ainainausa faqaa fasiqa faiqi uqa faqa maridaqa. Qafamasee iria, yana ainainauqee maridanoo fee. Maa qisaaqamafa faqa mina sanda faqa saunu faqa yanaindi fee maridanoo fee.
26Yudafa qafamaseenoo qinau. Maa anaaseefa andeeqanoo maridanoo. Qinee kai aaqeeqa. Qinee qeeqa qimaaku Seeraana amiaqaana. Miqi qimaseenoo Yudafa sia kaifaa mi anaaseena faqa aana finau.
27Mi anaaseena faiqi maqarafa aniroofaqa qafeeqa qiqau. Maa anaaseefa qaara faiqi maqaannoo fee qiqau. 28Faiqi maqarara aupuree marufaqa moo fannoo naaree asauku quqasoo qumuroofanoo mina innaammuna afeesu aanaaseefa asauku qumaraseenoo taatuqee sanda rumbaseenoo qinau. Maafa indaaruqaafa maridanoo. 29Miqi qimasoofanoo asauku raqandaamma maroofanoo moo kaiqeena naaree maqanau. Maqasoofanoo innaamunai afeesu aanaaseefa qinau. Anee naqaa fee ifanee kaqinnaindari anee naaree qumidanee. Minara mina auqureenoo Peereesanee qinau. 30Mina inaaqianna mina akaqa taatuqee sanda asaukusaa rumbarana maqanau. Maqaseenoo mina auqu Seeraa fee qinau.
Currently Selected:
Oosana 38: bjr
Označeno
Share
Copy
Want to have your highlights saved across all your devices? Sign up or sign in
© 2017 Wycliffe Bible Translators, Inc. All rights reserved.