Openboarunk 22
22
De Läwensstroom un de Läwensboom
1Dan wees de Enjel mie een reinen Stroom von Läwenswota, kloa aus een Kristal, dee kjeem von Gott un daut Laum äaren Troon. #(1 un 2) Hes 47,1.12; Sach 14,8; 1Mo 2,9-10 2Medden velenjd de Gaus, un aun jieda Sied Stroom, stunt een Läwensboom, dee 12 Fruchtarnten daut Joa druach. De Beem brochten aule Moonat äare Arnt. Un de Beembläda deenden de Velkja to de Jesuntheit. 3Un doa es kjeen vebaundet mea, wiels Gott un daut Laum äa Troon woat doabennen sennen, un siene Deena woaren am deenen. #Jos 7,11-13 4See woaren am en daut Jesecht kjikjen, un woaren sien Nomen aun äare Stierns haben. #Opb 3,12 5Un doa woat kjeene Nacht sennen. An woat daut uk nich aun Laumpen ooda Sonnenlicht fälen, wiels Gott de Har es fa an Licht, un see woaren von Eewichkjeit to Eewichkjeit rejieren.
Jesus, de Har kjemt boolt
6Dan säd hee to mie: Dise Wieed sent woarhauftich un opp to veloten, un de heilje Profeeten äa Gott un Har haft sienen Enjel jeschekjt, siene Deena to wiesen, waut nu boolt passieren mott. #Opb 1,1
7Kjikjt emol, ekj kom boolt! Seelich es dee, dee sikj aun de profeetische Wieed en dit Buak helt.
8Un ekj, Johanes, sie dee, dee dit hieed un sach. Un aus ekj dit jehieet un jeseenen haud, foll ekj ver dän Enjel dol, om auntobäden, dee mie dit jewäsen haud. 9Dan säd hee to mie: See doano, daut du daut nich doonen woascht! Wiels ekj sie dien Metkjnajcht un de Metkjnajcht von diene Breeda de Profeeten, un von aule, dee sikj aun de Wieed en dit Buak hoolen. Bäd Gott aun!
10Un hee säd to mie: Veschlut de profeetische Wieed en dit Buak nich met een Säajel, wiels de Tiet es boolt hia. #Opb 1,3; 10,4 11Wäa ojjerajcht es, däm lot ojjerajcht bliewen, un wäa orrein es, däm lot orrein bliewen; oba wäa jerajcht es, saul wiedahan jerajcht bliewen, un wäa heilich es, saul wiedahan heilich bliewen. #Dan 12,10 12Kjikjt mau, ekj kom boolt, un hab mienen Loon met, een jiedrem doano to jäwen, waut siene Woakjen jewast sent. 13Ekj sie daut A un daut Oo, de Aunfank un daut Enj, de Ieeschta un de Latsta. #Heb 13,8; Opb 1,8 14Seelich sent, dee doa doonen waut hee befolen haft, #22,14 Eenje oole Schreften sajen dee äare Kjleeda wauschen daut see een rajcht toom Läwensboom haben, un derch de Puaten en de Staut nenn gonen kjennen. #Opb 7,14 15Wiels buten sent de Hunj un de Zaubra un de Huara un de Merda un de Jettadeenen un aula, dee wellich lieejen un daut eendoont es. #1Kor 6,9-10; Opb 21,8.27
16Ekj, Jesus, hab junt mienen Enjel met dit Zeichnis fa de Jemeenten jeschekjt. Ekj sie de Wartel un kom uk von David sienen Staum. Ekj sie de schienenda Morjenstiern. #Jes 11,10; Luk 1,78 17Un de Jeist un de Brut sajen: Komm! Un wäa daut hieet, dee saul uk sajen: Komm! Un wäm darscht, däm lot komen. Un wäa doa well, saul daut Läwenswota emsonst nämen. #Jes 55,1; Joh 7,37
Woarnunk un Säajenswunsch
18Ekj woarn jieda eenem, dee de profeetische Wieed en dit Buak hieet: Wäa doa irjentwaut toosat, däm woat Gott de Ploagen toosaten, von dee en dit Buak jeschräwen stonen. #5Mo 4,2 19Un wäa von de profeetische Wieed en dit Buak wajchnämen woat, däm woat Gott sien Poat vom Läwensboom, un von de heilje Staut wajchnämen, wuavon en dit Buak jeschräwen steit.
20Un dee dit jesajcht haft, sajcht: Jo, ekj kom boolt. Amen, jo komm, Har Jesus! #1Kor 16,22
21Mucht däm Harn Jesus siene Jnod met junt aula #22,21 Eenje oole Schreften sajen met aule heilje eenje met de heilje sennen! Amen.
Trenutno izbrano:
Openboarunk 22: PB
Označeno
Kopiraj
Primerjaj
Deli
Želiš, da so tvoji poudarki shranjeni v vseh tvojih napravah? Registriraj se ali se prijavi
Plautdietsch Bible © 2003 Kindred Productions and United Bible Societies Association, Inc.