Sáni Mateo 27
27
Jesusi Pilatuni jinkuni pánhasti
(Mk 15.1; Lk 23.1-2; Jn 18.28-32)
1Sïuap'entku, iámentuksï k'éri tátecha ka achamasï iretarhu anapuechaksï eratsekuntaspti néna enkaksï Jesusini uántikupirinka. 2Jók'utinksï juramuti Pónsio Pilatuni pákuspti.
Júdasï uantikukorhesti
3Ka Júdasï, ima enka Jesusini intsïnharhitpepka, exerini eskaksï uántikupirinka, p'amontakorhespti ísï úrini ka ma ekuatse ka témpeni taiakatechani k'éri tátechani ka achamasïchani íntsantaaspti 4arhiaparini: “K'amanharhint'aska ísï uarhikuarhu intsïnharhitpetini imani enka nómpe ma k'amanharhint'aka.” Ka imaksï mókukuntaspti: “¡Ka jucha ampeia, chéti jimpoestiia!” 5Ka tuminani tiósïo k'uanimutaspti, ka niraspti pirach'akorheni. 6K'éri tátechaksï tuminani k'arhantaspti ka uantasptiksï: “No sésekua jarhasti íni tuminani tiósïo jurak'uni, jimpoka uántikperakueri maiampekateska.” 7Ka enkaksï kurhamukperapka, imani tumina jimpoksï purhechi úrini echeri ma piákuntaspti, jima enkaksï uérakua anapuecha jatsinhantapirinka. 8Ka ísï jimpo iásï jamperi jima: “Iurhiri jáakurhakuarhu” arhinhat'i. 9Ka úkorhesti ísï eska Diósïri uantari Jeremiasï na uantapka: “Ma ekuatse témpeni taiakatechanksï p'íkuaspti, eskaksï Israeli anapuecha náxani jukaparharaka, 10ka echeri, purhechi úrinksï piákuntasti, eskamenturini Acha na juramucheka.”
Pilatu Jesusini kurhamarhesti
(Mk 15.2-5; Lk 23.3-5; Jn 18.33-38)
11Jesusi juramuti jinkuni péranhaspti ka juramuti kurhamarhespti: “¿T'úsï judiuecheri ireche?” Ka Jesusi arhispti: “T'úri ísï uantaska”. 12Ka tátacheri urhets'ïkuricha ka achamasïchaksï, Jesusini ampe arhiparhataxapti, ka Jesusi nómpema mókukorhespti. 13Ka Pilatu arhispti: “¿Nóri kurhaxaki ampe enkaksïni xáni arhiparhatani jaka?” 14Ka Jesusi méntku nómpe ma arhintaaspti, enka juramuti jamperi ísku pakarerapka eratsentani.
Jesusinksï uántikutarkorhesti
(Mk 15.6-20; Lk 23.13-25; Jn 18.38—19.16)
15Ka k'uínchekuarhu, juramuti p'intespti k'atakatani ma jurak'utspeni néni enkaksï uékapirinka. 16Ka jiák'ani ísï Barrabasi k'atakata jarhaspti, ima kánekua kurhakatespti. 17Enka tánkorhenhantapka, Pilatu kurhamarhpespti: “¿Néni jurak'ua, Barrabasini o Jesusini enkaksï Krístu arhik'a?” 18(Jimpoka Pilatu mítetixapka eskaksï Jesusini epurhexapka, jimpoksïsï intsïnharhitapti).
19Ka enka Pilatu útatsperakuarhu uaxakatini jápka, témpa uantakua axakuspti: “Ásï ampe ma úku inte kaxumpitini, jimpokani chúri inteni jimpo kánekua nósesi tsánharhiska.”
20Ka k'éri tátecha ka achamasïchaksï antats'ïtperaspti eskaksï Barrabasini jurak'utarkorhepirinka ka eskaksï Jesusini uántikupirinka. 21Ka juramuti mókukuantaaspti: “¿Nénksïni jurak'uchea?” Ka imaksï “¡Barrabasini!” Uantaspti. 22Ka Pilatu kurhamarheaspti: “¿Ka ampe úkua Jesusini enkaksï Krístu arhik'a?” Ka iámentuechaksï arhispti: “¡Cháparhatanhe!” 23Ka juramuti arhiaspti: “¿Anti ampe nósesi úski?” Ka imaksï sánteru uinhachasïrempti: “¡Cháparhatanhe!”
24Pilatu exerini eskaksï nóteru kurhach'asïrempkia, eska sánteru méntkisï uinhachanhasïrempka, itsï p'itak'orhespti ka k'uiripuni japarini jupak'unt'aspti uantaparini: “Ji nómpe ma míteska íni achetiri uarhikuani jimpo, chári jimpoestia.” 25Ka iámentuechaksï arhispti: “Interi uarhikua jucha ka juchari sapichaksï arhiparhatanhe.”
26Ka Barrabasini jurak'ukuaspti ka Jesusini atarkorhespti ka cháparhatarkorheni.
27Ka juramutiri p'urhek'utichaksï imecheri k'umanchekuarhu páspti, ka jimaksï uirhipkurhaspti. 28Xukuparhakuaksï p'ikusti ka takusï charhapiti máksï k'uáparhataspti; 29ka kanakua tsurhumueri máksï inchats'ïtaspti, ka pirimu máksï jurhik'antani inchak'urhataspti. Xásïksï tinkuixurhikutini teresmarhusïrempti arhiparini: “¡K'éri ampe arhinhe judiuecheri irecha!” 30T'uárhesïremptiksï ka sîmpa ma jimpoksï uáts'ïskani. 31Xáni teresmarhutinksï p'ikuntaspti k'uáparhakuani ka imeri xukuparhakuaksï jatsikuntaspti ka pásptiksï cháparhatani.
Jesusi cháparhatanhasti
(Mk 15.21-32; Lk 23.26-43; Jn 19.17-27)
32Uératintkuksï jima, kúmaspti acheti Sireni anapuni ma enka Simoni arhinhempka; ka Jesusiri krúsinksï uinhapetarhu páraspti.
33Enkaksï niárapka jima enka Gólgota arhinhak'a (enka uarhiri ép'u arhikuekak'a), 34Kauikua jeuetakata uitsakua xúrakua jinkunksï íntskuspti, ka Jesusi ts'émutintku no uékaspti arhani. 35Enkaksï Jesusini cháparhatapka, p'urhek'utichaksï imeri xukuparhakuani ch'anaparini arhunkurhispti. 36Ka jimaksï uaxantentaspti kuáni. 37Ka krúsirhuksï karakata ma cháts'ïtaspti enka arhimpka:
“Ísti Jesusi, judiuecheri irecha.”
38Ka ima jinkuntuksï tsimani sïpak'urhechani cháparhataaspti, ma jurhik'antani ka máteru uikixkantani. 39Ka ima enkaksï xáni jimesï nitamempka manats'ïskorhesïremptiksï arhimarheni 40ka arhisïremptiksï: “T'u enkari k'éri tiósïoni xerent'apirinka ka tanimu jurhiatekua jimpori úntani, enkari sési jimpo Diósï uáp'eka kuáp'ekorhe, ka krúsirhu kétsentsï.”
41Ka k'éri tátecha ka ístu juramukua jurhentpiricha ka achamasïchat'uksï mák'ueni teresmarhusïrempti ka uantani: 42“Máteruechani p'ímutant'a'asti ka k'óru no úsïnti kuáp'ekorheni. Eka Israelicheri irecheka, krúsirhu kétsente ka jakak'ukuakachi. 43Uantasïnti Diósïni mintsikani ka eskanha Diósï Uáp'eska, eka Diósï xénhchak'a kuáp'entechka.”
44Ka sïpak'urhecha enkaksï ima jinkuni cháparhatanhapka mák'uenksï útakusïrempti.
Jesusi uarhisti
(Mk 15.33-41; Lk 23.44-49; Jn 19.28-30)
45Teruxutini uénani ka ték'amatini jamperi parhakpeni iámu p'ap'akantespti. 46Ték'amatini ísï, Jesusi uinhachaspti:
“Eli, Eli, ¿Lema sabaktani?”
(Enka arhikuekak'a:
“Jucheti Diósï, jucheti Diósï
¿Antirinisï jantiok'u jurak'u?”).
47Ka máru enkaksï jima jápka, ísï kurharinksï uantasïrempti: “I Eliasïni uantap'axati.” 48Ka jimak'u ma, uiriaspti xurhata ma p'íkuni ka kauikua xarhiperakatarhu inchamaspti, ka kupamurhu ma jórhukuspti ka íntskuspti. 49Ka máteruechaksï uantasïrempti: “Jurak'u, ju je exeni nántika Eliasï juuaka kuáp'entani.” 50Ka Jesusi ménteru uinhachaspti ka espirituni íntspentaspti. 51Ka takusï k'uék'uetsasï enka tiósïo arhunhempka karutsanhespti; ka jenchespti ka tsakapuechaksï arhakurhispti. 52Ka jima enkaksï uarhiricha pénhantempka, mítakorhespti ka uánekuaksï pímpinhaxeticha tsíntaspti. 53Ka enka Jesusi tsíntapka uarhirichat'uksï tsíntaspti ka Jerusalenksï inchaakuntaspti ka uánekuaksï exeaspti.
54K'éri purhek'uti, enka jima kuáni jápka, jenchekuani p'ikuarheratini ka exerini ampe enka úkorhempka. Xáni chéni uantasïrempti: “¡Sési jimpo, Diósï Uáp'espti!”
55Jimaksï jarhaspti uánekua uarhiticha iauani uératini eraani, enkaksï Jesusini Galilea uératintki chúxapapka jarhuatapani. 56Ka Maria Magdalena ka Maria Jakobueri ka Joseri amampa ka Sebedeo témpa, imani uarhiticha jinkunksï jámaxapti.
Jesusi jatsinhantasti
(Mk 15.42-47; Lk 23.50-56; Jn 19.38-42)
57Enka churepkia, acheti jatsikorheri ma, Arimatea anapu ma enka Jose arhinhempka, ka enka Jesusiri jurhenkorheripka. 58Pilatuni niraspti jirinhantani ka Jesusini kurhakuntaspti. Pilatu juramuspti eskaksï íntskuntapirinka. 59Ka Jose, Jesusini takusï t'upuki jásï ma irhirhitaspti, 60ka jimpanhe jatsintskuarhu ma péraspti, enka k'erentarhu jarhanharhitarkorhepka, ka k'énhari tsakapu ma jatsimutaspti ka níntaspti.
61Maria Magdalena ka máteru Maria jimaksï jarhaspti uaxakatini.
P'urhek'utichaksï kuáxapti nani enka Jesusi pénhantapka
62Pauantekuarhu sábaduespti, ka tátecheri urhets'ïkuricha ka fariseuechaksï Pilatuni jinkuni tánkorhent'aspti 63ka arhisptiksï: “Tata, míp'askachi eska ima chkuántira, tsípiti jámani jatini uantaspka: ‘Tanimu jurhiatekua jimpo tsíntaaka.’ 64Axap'e, eska tanimu jurhia kuánhani janhaaka, ásïksï jurhenkorheri jémpecha chúrekua pánte ka iretarhuksï arhip'eni: Tsíntasti ka sánteru k'éri ma chkuántirakua úkorheni.” 65Ka Pilatu arhiaspti: “P'urhek'utichaksï jimini jarhasti, ni je ka kuáni je eskats'ï na míteka.” 66Ka imaksï niraspti ka nani enka Jesusi pénhantapka sésiksï kuáxapti, tsakapu ma jinkunksï sési mímutaspti ka kuárichanksï péraaspti.
Trenutno izbrano:
Sáni Mateo 27: DKPJ
Označeno
Deli
Kopiraj
Želiš, da so tvoji poudarki shranjeni v vseh tvojih napravah? Registriraj se ali se prijavi
Biblia en P´urhépecha, Michoacán, México © Sociedad Bíblica de México, A.C.