Sáni Mateo 26
26
XII. ÚKUARHINCHAKUA, UARHIKUA KA TSÍNTSKUA
(26.1—28.20)
Néna enkaksï Jesusini jupikani uékempka
(Mk 14.1-2; Lk 22.1-2; Jn 11.45-53)
1Enka Jesusi k'amarapka íni ampe uantani, jurhenkorherichani arhiaspti: 2“Eskats'ï na mítetini jakaia, tsimani jurhiatekua jimpo Páskueri k'uínchenhaati ka Acheti Uáp'anksï jupikaati ka krúsirhuksï cháparhataati.”
3Ka tátecheri urhets'ïkuricha ka juramukua jurhentpirichaksï ka achamasï iretarhu anapuechaksï, Kaifasioksï tánkorhent'aspti enka táta k'éripka, 4ka eratsekuntasptiksï ka sésiksï úskuspti néna enkaksï Jesusini jupikapirinka ka uántikunksï. 5Ka arhip'erasptiksï: “K'uínchekuarhu nómpe, jimpoka iretarhu méntku ísï jánhaaka.”
Uarhiti ma Jesusini p'untsumekua atarhesti
(Mk 14.3-9; Jn 12.1-8)
6Enka Jesusi Betania jápka, Simonio enkaksï xúta jukarhekorheti arhimpka, 7uarhiti ma antarheraspti tsúntsu ma jinkuni p'untsumekua ampakiti jatsiratini, ka Jesusini atats'ïkuspti, enka Jesusi t'ireni jápka uaxakatini. 8Íni ampeksï exerini, jurhenkorherichaksï ikiaspti ka uantasptiksï: “¿Antisï ísï ampentarhenha? 9Inte úpirinti jukaparhakua jimpo antaranhantani ka tuminani kómu jántichani íntsaani.” 10Enka Jesusi kurhach'aapka, arhiaspti: “¿Antits'ïsï íni uarhitini xáni ampe arhiparhatani jaki? Interini kánekua sési ampesï úcheti. 11Kómu jántichantsï méntku xéani jauaka, ka ji k'óruni no méntkisï chánksïni jinkuni jauaka, 12interini p'untsumekua atarhentaxati jimpokani ji jatsinhantaakia. 13Sési jimpoksïni arhixaka eska náni uék'i ma parhakpeni enka i jimpanhe aiankperata arhits'ïkperanhaaka, i úkua uantanhantaati ka inte uarhiti míanhantaati.”
Júdasï Jesusini intsïnharhitpesti
(Mk 14.10-11; Lk 22.3-6)
14Ma enka témpeni tsimani jurhenkorhericha jinkunipka, enka Júdasï Iskariote arhinhempka, niraspti tátecheri urhets'ïkurichani uantaxekuani, 15ka arhiaspti: “¿Ampets'ïni íntskua, ka jíksïni Jesusini intsïnharhitaaka?” Ka imaksï ma ekuatse témpeni taiakata íntskuspti. 16Ka Júdasï jiáni uératini jirinhakuntaxapti na enka jatini sési japirinka Jesusini intsïnharhitaani.
Chúrekua anapu Acheri t'irekua
(Mk 14.12-25; Lk 22.7-23; Jn 13.21-30; 1~Ko 11.23-26)
17Imani jurhiatekua jimpo enka k'urhinta no xarhipiti jukariri k'uínchekua uénakorhek'a, jurhenkorherichaksï Jesusini antarheraspti ka arhistiksï: “¿Naniri uékasïnki eskachi Páskueri t'irekua úntaaka?” 18Ka ima uantaspti: “Ni je iretarhu, ka achetintsï ma arhiaka, eska jurhentpiri uantaxaka eska jurhiatekua niáranchaskia; ka eska Páskua jimpo jurhenkorhericha jinkuni chénio nitamakorheaka.” 19Ka jurhenkorherichaksï úspti ísï eska Jesusi na juramukuapka, ka jimaksï péraspti enka Páskueri anhapirinka.
20Chúrekua, Jesusi témpeni tsimani jurhenkorherichani jinkuni uaxakaspti t'ireni. 21Ka enkaksï t'ireni jápka arhiaspti: “Sési jimpoksïni arhisïnka eskarini cha ma ísï intsïnharhitpeaka.” 22Ka jurhenkorherichaksï kánekua kómu p'ikuarheraspti ka mántanksï uénaspti kurhamarheni: “¿Tata, ji?” 23Ka ima arhiantaspti: “Ima enka jínteni jinkuni urhanirhu atarhutani jaka, imarinisï intsïnharhitpeati. 24Sési jimpo Acheti Uáp'a níntaati, ísï eskamentu imeri ampe na karakata jaka, k'óru ¡Áke ima enka Acheti Uáp'ani intsïnharhitpeaka! ¡Sánteru sésipirinti eska no antap'enupirinka!” 25Ka Júdasï, ima enka intsïnharhitpepirinka arhispti: “¿Jurhentpiri jíxamueua?” Ka Jesusi arhispti: “T'úri ísï uantaska.” 26Ka enkaksï t'ireni jápka, Jesusi p'íkuspti kurhintani ka úch'akuraspti ka jurhenkorheri jémpechani arhustakuaspti arhiaparini: “Jupika je ka a je, i jucheti k'uiripekuesti.” 27Ka itsïmatarakua p'íkutini, diósïmaimukua arhispti ka íntsaaspti arhiaparini: “Iámentuecha marhuata je, 28jimpoka i jucheti iurhiriska, jimpanhe pakatperakueri enka uánekuechani jimpo tsîncheaka k'amanharhintskua p'uantsperantskua jimpo. 29Sési jimpoksïni arhixaka eska íni jásï úbasïri itsïrhukuani nóteruni auaka, ima jurhia jamperi enkani na ménteru cha jinkuni, kauikua jimpanhe auaka jucheti Tateri irechekuarhu.” 30Enkaksï na k'amarapka Diósïri pirekuechani pireani, Olibusï juátarhuksï niraspti. 31Ka Jesusi jima arhiaspti: “Iámentuechats'ïni nóteru mintsikaaka, nóchka karakata jarhaski anti:
‘Karichi erankutini uántikuaka
ka karichichaksï etsak'amaati.’
32Ka tsíntatini, Galileaksïni urhechepaaka.” 33Ka Pédru arhispti: “Náuek'iksïni iámentuecha jurak'uni, jíkini nómeni jurak'uaka.” 34Ka Jesusi arhispti: “Sési jimpokini arhixaka eska iásï chúrekua, enka t'arhechu nótki uerani jauaka, tanimu xanharirini no míteni uadaakia.” 35Ka Pédru arhispti: “Nómenikini no míteni uantaaka, nát'ukani t'únkeni jinkuni uarhiaka” ka máteru jurhenkorherichaksï mák'ueni arhisïrempti.
36Xásïksï Jesusi Getsemani niáraspti ka jima arhiaspti: “Ixu uaxaka je, enkani jamperi ji niraska kómarhani.” 37Ka Pédruni ka Sebedeo uáp'echantku pát'aaspti, ka kánekuamentu uénaspti kómu p'ikuarherani. 38Ka Jesusi arhiaspti: “Kánekua kómu p'ikuarhenhexaka, enak'irini uarhikua niárancheia; pámpets'ïni je ka ásï k'ui je.” 39Sántku xanharatini, tinkuixurhispti tsérhukuani antaskueraspti ka kómarhaspti uantaparini: “Jucheti Táte, enkari ampe úk'a, kéntitacherini íni nósesi jámarhani; k'óru ásï ima úkorhe enka ji uék'a, úkorhe eskari t'u na uék'a.” 40Imeri jurhenkorherichani antarhentaaspti ka imaksï kuíxapti ka Pédruni arhispti: “¿Anti nómentuts'ïni úski sónti jukampetani? 41Tsínharhitini ja je ka kómarhini ja je, ásïksïni nósesi jásï ante. Sési jimpo espiritu uékaxati, k'óruts'ï cha no úsïnka p'ínkukorheni.” 42Ménteru uéntaspti nirani kómarhani uantaparini: “Jucheti Táte, enkari íni jásï ampe no úk'a kéntitani, úkorhe eskamenturi t'u na uék'a.” 43Ka k'uanhatsentaspti ka jurhenkorherichaksï k'uíxaptiteru, jimpokaksï uarhisïrempka k'uínhchani. 44Ka jima jurak'uaspti ka tanimu xanhari uéntaspti kómarhani. 45Ka xásï jurhenkorherichani antarhentaaspti ka arhiaspti: “¿Anti k'uíxakiteruts'ï, ka mintsikorheni jarhani? Iásïstia enka Acheti Uáp'a k'amanharhint'atichani intsïnharhitanhaaka. 46¡Jauara je, júia je! Exe je, janoxatiia ima enkarini intsïnharhitpeaka.”
Jesusi jupinhasti
(Mk 14.43-50; Lk 22.47-53; Jn 18.2-11)
47Jesusi uantaxaptiteru enka Júdasï niárapka, ima enka témpeni tsimani jurhenkorhericha jinkunipka, ka uánekuechaksï ima jinkuni jámaxapti, chkári ka atap'etarakuechanksï jupikatini, enkaksï tátecheri urhets'ïkuricha ka achamasï iretarhu anapuecha axaapka. 48Ka Júdasï t'úini arhiarixaptia: “Néni enkani ji putinharhikuaka, imesti, jupika je.” 49Ka Júdasï Jesusini antarheraspti ka arhini: “¡Jurhentpiri!” Ka mátirku putinharhikuspti. 50Ka Jesusi arhispti: “Pámpiri, ¿Amperisï úni juki?” Ka máruksï antarheraspti ka Jesusinksï jupikaspti. 51Ka ma enka Jesusi jinkuni jámani jápka, atap'etarakua p'íp'arhaspti, ka k'éri táteri jántspirini ma kachup'antikuspti. 52Ka Jesusi arhispti: “Inchaarhakorhentsï atap'etarakuani, jimpokaksï iámentu ima enkaksï atap'etarakua úrak'a, inteni jimpoksï uarhiati. 53¿Anti nóts'ï sáni eranhaskasïnki eskani ji úaka jucheti Táteni kómarhini? Ka ¿Anti imarini no ua témpeni tsimani míli ánjelichani axacheani? 54¿Ka néna úkorhea enka karakata arhik'a eska k'uanisïnka ísï úkorheni?” 55Jima Jesusi arhip'espti: “¿Antits'ïnisï chkári ka atap'etarakuechani jinkuni juki jupikani, enak'ini ji sïpak'urha ampe? Mántani pauani jarhaska tiósïo jurhentpeni ka nóts'ïni méni jupikaska. 56K'óru i ampe úkorhexati jimpoka jatsiska ísï úkorheni, eskaksï Diósïri uantaricha na karaka.”
Jesusi k'éri tánkorhekuarhu pánhasti
(Mk 14.53-65; Lk 22.54-55,63-71; Jn 18.12-14,19-24)
57Ima enkaksï Jesusini jupikapka, k'éri táta Kaifasinksï pákuspti, ka jimaksï tánkorhent'atixapti juramukua jurhentpiricha ka iretarhu anapu achamasïchat'u. 58Ka Pédru k'éri táto ekuarhu jamperi chúxapaspti. Inchaspti ka p'urhek'utichani jinkuni uaxakaspti exeni ampe enka xáni úkorhepirinkateru.
59K'éri tátecha ka k'éri tánkorhentskua, nónaksï Jesusini uarhikua k'amanharhitant'a'ni, chkuádirechanksï máru jirinhaaspti eskaksï chkuántirakua ampe arhiparhatapirinka, 60ka nómpemaksï exekuntasïrempti, nák'ikuraksï uánekua mámaru ampe arhiparhatani jarhempka eska ísïspka, ka tsimanterkuksï niáraspti, 61ka uantasptiksï: “Inte uantasti: ‘Ji úaka Acha Diósïri k'umanchekuani xerent'ani ka tanimu jurhiatekua jimpok'u máteru úntani.’ ” 62K'éri táta jauap'atsespti ka kurhamarhespti: “¿Nóri mókukurhea? ¿Ampeksïnisï xáni arhiparhatani jáki?” 63Ka Jesusi no kurhakorhespti. Ka k'éri táta arhispti: “¿Diósïni jimpots'ïni arhi, t'úsï Krístue, t'úsï Diósï Uáp'e?” 64Ka Jesusi arhispti: “T'úri uantaska. Ka ístuksïni arhixaka, eskats'ï iásï uératini exeaka Acheti Uáp'ani Diósïri uinhapekuarhu jurhik'antani uaxakatini jarhani, ka auantarhu anapu xúmurhu ísï jurhani jarhani.” 65Ka k'éri táta xukuparhakuani karunhentaspti ka ikiatintku uantaspti: “¡Diósïni útakusti! ¿Ampeteruksï úni xánteru ampe arhiparhatani jaua? Kurhach'akorheskats'ïa 66¿Náts'ï exesïnki?” Ka imaksï arhispti: “¡Uantikukuesti!” Arhisïremptiksï.
67Ka t'uánharhikuspti ka ch'atarhuskanksï ka máteruksï páksantikuspti, 68arhiparinksï: “¿Krístu, arhits'ïni nékinisï ata?”
Pédru Jesusini no míteni uantasïnti
(Mk 14.66-72; Lk 22.56-62; Jn 18.15-18,25-27)
69Enka Pédru ekuarhu uaxanupka, uarhiti jántspiri ma antarheraspti ka arhini: T'út'uri Jesusi, Galilea anapu jinkuni jámaxapka. 70Ka ima iámentuecha japarini no jiókorhesïrempti uantaparini: “No míteska ampe enkarini arhini jaka.” 71Uéntatini, máteru exespti ka arhiaspti imechani enkaksï jima jápka: “Intet'u Jesusi, Nasareti anapu jinkuni jarhaspti.” 72Ka ménteru Pédru no jiókorhesïrempti Diósïni ónharhiparini: “¡Ji inteni no míteska!” 73Ísï tátsekua antarherasptiksï máru enkaksï jima jámani jápka, ka Pédrunksï arhispti: “Sési jimpo t'út'uri imecha jinkuniska, míchakukorheskari.” 74Jimakani Pédru uénaspti útant'a'ni ka Diósïni ónharhiparini uantani: “¡Ji inteni achetini no míteska!” Ka t'arhechu jimak'u ueraspti.
75Ka Pédru míp'aaspti enka Jesusi arhipka: “T'arhechu nótki jamperi uerani jauati, ka t'úrini tanimu xanhari no míteni uantaakia”. Ka Pédru uéntatini, jurak'utakorhent'aspti uerani.
Trenutno izbrano:
Sáni Mateo 26: DKPJ
Označeno
Deli
Kopiraj
Želiš, da so tvoji poudarki shranjeni v vseh tvojih napravah? Registriraj se ali se prijavi
Biblia en P´urhépecha, Michoacán, México © Sociedad Bíblica de México, A.C.